അഞ്ച് ദിവസം കൊണ്ട് 50 കോടി കളക്ഷനുമായി ടൊവിനോ തോമസ് നായകനായ ‘അജയന്റെ രണ്ടാം മോഷണം’. ലോകമെമ്പാടുമുള്ള തീയേറ്ററുകളിൽ നിന്നായി അമ്പത് കോടിക്ക് മുകളിലാണ് ചിത്രം കളക്ട് ചെയ്തത്. ടൊവിനോ തോമസിന്റെ കരിയറിലെ തന്നെ ഏറ്റവും വലിയ വിജയമായിമാറിക്കൊണ്ടിരിക്കുകയാണ് ‘അജയന്റെ രണ്ടാം മോഷണം’.

ഇന്ത്യയ്ക്ക് പുറമെ വിദേശ രാജ്യങ്ങളിൽ നിന്നും എആർഎമ്മിന് മികച്ച കളക്ഷനാണ് ലഭിക്കുന്നത്. ഏറെ നാൾക്ക് ശേഷം മലയാളി പ്രേക്ഷകർക്ക് ലഭിച്ച 3ഡി ചിത്രമെന്ന നിലയിൽ ഇരുകയ്യും നീട്ടിയാണ് എആർഎമ്മിനെ ഓണക്കാലത്ത് പ്രേക്ഷകർ വരവേറ്റത്.

മാജിക് ഫ്രെയിംസിന്റെ ബാനറിൽ ലിസ്റ്റിൻ സ്റ്റീഫനും യുജിഎം മോഷൻ പിക്‌ച്ചേഴ്‌സിന്റെ ബാനറിൽ ഡോക്ടർ സക്കറിയ തോമസും ചേർന്നാണ് അഞ്ചു ഭാഷകളിൽ റിലീസ് ചെയ്ത ഈ ത്രീ ഡി ചിത്രം നിർമിച്ചിരിക്കുന്നത്. നവാഗതനായ ജിതിൻ ലാൽ സംവിധാനം ചെയുന്ന ചിത്രത്തിന്റെ തിരക്കഥ നിർവഹിച്ചിരിക്കുന്നത് സുജിത് നമ്പ്യാരാണ്

തമിഴ് തെലുഗ് ചിത്രങ്ങളിലൂടെ ശ്രദ്ധേയമായ കൃതി ഷെട്ടി, ഐശ്വര്യ രാജേഷ്, സുരഭി ലക്ഷ്മി എന്നിവരാണ് ചിത്രത്തിൽ നായികമാരായി എത്തുന്നത്. ബേസിൽ ജോസഫ്, ജഗദീഷ്, ഹരീഷ് ഉത്തമൻ, കബീർ സിങ് , പ്രമോദ് ഷെട്ടി, രോഹിണി എന്നിവരും ചിത്രത്തിൽ പ്രധാന വേഷങ്ങളിൽ എത്തുന്നു.

മലയാള സിനിമകളിൽ തുടങ്ങി ഇപ്പോൾ ബോളിവുഡിൽ വരെ എത്തിനിൽക്കുന്ന ജോമോൻ ടി ജോൺ ആണ് എആർഎമ്മിന്റെ ഛായാഗ്രഹണം നിർവഹിക്കുന്നത്. എഡിറ്റിംഗ് ഷമീർ മുഹമ്മദ്.

കോ പ്രൊഡ്യൂസർ – ജസ്റ്റിൻ സ്റ്റീഫൻ,എക്‌സിക്യൂട്ടീവ് പ്രൊഡ്യൂസർ: നവീൻ പി തോമസ്, പ്രിൻസ് പോൾ, അഡീഷണൽ സ്‌ക്രീൻ പ്ലേ – ദീപു പ്രദീപ്, പ്രോജക്ട് ഡിസൈൻ: എൻ.എം. ബാദുഷ.

മലയാള സിനിമയിൽ എക്കാലത്തും പകരക്കാരില്ലാത്ത അനുഗ്രഹീത നടന്മാരാണ് ഇന്നസെന്റ്, ഒടുവിൽ ഉണ്ണികൃഷ്ണൻ, ജഗതി, കലാഭവൻ മണി, നരേന്ദ്രപ്രസാദ്, തുടങ്ങിയവർ. അക്ഷരാർത്ഥത്തിൽ അഭിനയിക്കുകയാണെന്ന് തോന്നാത്ത അഭിനയമായിരുന്നു ഇവരുടേത്. ഇത്തരത്തിൽ ഹാസ്യ നടനായും സ്വഭാവനടനായും മലയാളികളുടെ നെഞ്ചിൽ ഇടം നേടിയ നടൻ ജനാർദ്ദനൻ ഒടുവിൽ ഉണ്ണികൃഷ്ണനെ കുറിച്ച് പറഞ്ഞ വാക്കുകൾ ആണ് ഇപ്പോൾ ശ്രദ്ധ നേടുന്നത്.

എം ടി വാസുദേവൻ സംവിധാനം ചെയ്ത ഒരു ചെറുപുഞ്ചിരി എന്ന ചിത്രത്തിലൂടെ മലയാള സിനിമയിലേക്ക് കയറിവന്ന ഒടുവിൽ ഉണ്ണികൃഷ്ണന്റെ അടുത്ത സുഹൃത്തുക്കളിൽ ഒരാൾ കൂടിയായിരുന്നു നടൻ ജനാർദ്ദനൻ. ഒരുകാലത്ത് ജനാർദ്ദനൻ, ജയറാം, ഒടുവിൽ ഉണ്ണികൃഷ്ണൻ, ജഗതി, നരേന്ദ്ര പ്രസാദ് തുടങ്ങിയ നടന്മാരുടെ നിര ആവർത്തിച്ച് 30 ഓളം പടങ്ങൾ തന്നെ മലയാള സിനിമയിൽ സംഭവിച്ചിരുന്നു.

അഭിനയിക്കുകയാണെന്ന് തോന്നാത്ത രീതിയിൽ അഭിനയിക്കുന്ന മറ്റൊരു നടൻ മലയാളത്തിൽ ഉണ്ടോ എന്ന് അറിയില്ല. അത്രയ്ക്ക് നാച്ചുറലായി അഭിനയിക്കുന്ന വ്യക്തിയാണ് അദ്ദേഹം. കൊതി കിട്ടുന്ന അഭിനയം എന്തുവേണമെങ്കിൽ പറയാം. നന്നായി പാട്ടുപാടുകയും മൃദംഗം വായിക്കുകയും ചെയ്യും. ഒടുവിൽ ഉണ്ണികൃഷ്ണൻ വളരെ സാധുവായ ഒരു മനുഷ്യൻ കൂടിയാണ്. പക്ഷേ അവരുടെ വീട്ടിൽ എല്ലാവരും അൽപായുസുകൾ ആയിരുന്നു. അവരുടെ വീട്ടിൽ ആണുങ്ങൾ വാഴില്ല. അത് അദ്ദേഹം തന്നെ എന്നോട് പറഞ്ഞിട്ടുണ്ട്. തന്റെ വീട്ടിൽ ഏറ്റവും കൂടുതൽ കാലം ജീവിച്ചിരിക്കുന്നത് താൻ ആണെന്നായിരുന്നു അദ്ദേഹം പറഞ്ഞത് ജനാർദ്ദനൻ പറഞ്ഞു.

സിനിമ പ്രേമികളുടെ എല്ലാം ഇഷ്ടം നേടിയ ചിത്രമായിരുന്നു 96. വിജയ് സേതുപതിയും തൃഷയും പ്രധാനവേഷങ്ങളിൽ എത്തിയ ചിത്രം വൻ വിജയമായിരുന്നു. സി പ്രേം കുമാറായിരുന്നു ചിത്രത്തിന്റെ സംവിധായകൻ. വർഷങ്ങളുടെ ഇടവേളക്ക് ശേഷം പുതിയ ചിത്രവുമായി എത്തിയിരിക്കുകയാണ് സംവിധായകൻ.

കാർത്തിയും അരവിന്ദ് സാമിയും പ്രധാന കഥാപാത്രങ്ങളെ അവതരിപ്പിക്കുന്ന മെയ്യഴകൻ ആണ് പ്രേംകുമാറിന്റെ പുതിയ ചിത്രം. 2018 ലായിരുന്നു 96 റിലീസ് ചെയ്തത്. പിന്നീട് 2020 ൽ 96 ന്റെ തെലുങ്ക് പതിപ്പ് ജാനുവും പ്രേംകുമാർ സംവിധാനം ചെയ്തിരുന്നു. എന്നാൽ അതിന് ശേഷം പുതിയ ചിത്രങ്ങൾ ഒന്നും തന്നെ പ്രേം കുമാറിൽ നിന്ന് ഉണ്ടായിരുന്നില്ല. ഈ സമയത്ത് താൻ വലിയ രീതിയിൽ സാമ്പത്തിക ബുദ്ധിമുട്ട് അനുഭവിച്ചിരുന്നെന്ന് തുറന്നുപറയുകയാണ് ഇപ്പോൾ സംവിധായകൻ.

ഒരു തമിഴ് യുട്യൂബ് ചാനലിന് നൽകിയ അഭിമുഖത്തിലായിരുന്നു താൻ നേരിട്ട സാമ്പത്തിക പ്രതിസന്ധികളെ കുറിച്ച് പ്രേംകുമാർ മനസുതുറന്നത്. 96 ന് ശേഷം വലുതായി താനൊന്നും ചെയ്തിരുന്നില്ല. ബാങ്കിലെ കാശ് കുറയുന്നതിനെ കുറിച്ചും താൻ ബോധവാനായിരുന്നില്ല. ആ ഇടെയാണ് ചെന്നൈ ലയോള കോളെജിൽ ഒരു സെമിനാർ വന്നത്. കൃത്യം ആ ദിവസം തന്നെ ബാങ്കിൽ നിന്ന് ബാങ്ക് ബാലൻസ് കുറഞ്ഞതിനെ കുറിച്ച് മുന്നറിയിപ്പും വന്നു. എന്നാലും ലയോള കോളെജിലെ പരിപാടിക്ക് പോകാമെന്ന് വെച്ചു. കാരണം ആ കോളെജിൽ പഠിക്കണമെന്ന് ഒരിക്കൽ ആഗ്രഹിച്ചിരുന്നെന്നും പ്രേം കുമാർ പറഞ്ഞു.

പിന്നീട് കോളെജിൽ പരിപാടി കഴിഞ്ഞ ശേഷം കാറെടുത്ത് പോകാൻ നോക്കുമ്പോഴാണ് ഡീസൽ റിസേർവിൽ കിടക്കുന്നത് കണ്ടത്. ആ കോളെജിന് അകത്ത് കാർ ഓഫ് ആകരുതെന്നായിരുന്നു തന്റെ പ്രാർത്ഥന. വണ്ടി പെട്ടന്ന് എടുത്ത് പുറത്തേക്ക് പോകാമെന്ന് കരുതിയപ്പോൾ ആണ് കോവിഡ് നിയന്ത്രണങ്ങൾ ഉള്ളതിനാൽ ഒരു ​ഗേറ്റ് മാത്രമായിരുന്നു തുറന്നുകൊടുത്തിരുന്നത്. ആ ഗേറ്റിലേക്ക് സെക്യൂരിറ്റി വരുന്നത് വരെ കാത്തിരിക്കുകയായിരുന്നു. എന്റെ ചിന്ത മുഴുവൻ കാർ ഓഫ് ആകുന്നതിനെ കുറിച്ചായിരുന്നു. പേഴ്‌സിലും കാശ് ഇല്ല, ബാങ്കിലും കാശില്ല. എന്ത് ചെയ്യുമെന്ന് ആലോചിച്ച് കുറച്ചുനേരം ഇരുന്നു. അപ്പോഴാണ് കോളെജിൽ വന്നതിന് ഒരു മൊമന്റോയും നന്ദി പറഞ്ഞുകൊണ്ടുള്ള ഒരു കത്തും ലഭിച്ചത്. സെക്യൂരിറ്റി വരാൻ സമയമെടുക്കും അതുവരെ ഇത് എന്താണെന്ന് നോക്കാമെന്ന് കരുതി. അതിൽ കോളെജിലേക്ക് വന്നതിനുള്ള ഒരു ചെറിയ തുക യാത്ര ചിലവായി ഉണ്ടായിരുന്നു. പിന്നീട് ആ കാശിനാണ് പോയി ഡീസൽ അടിക്കുന്നതെന്നും പ്രേംകുമാർ ഓർത്തെടുക്കുകയുണ്ടായി.

കൃത്യം അടുത്ത ദിവസമാണ് കാർത്തി ഈ സിനിമയുടെ കഥ കേൾക്കാൻ വിളിക്കുന്നതെന്നും ഇപ്പോൾ ആലോചിക്കുമ്പോൾ അതൊരു തമാശയായി തോന്നുന്നെന്നും പ്രേംകുമാർ അഭിമുഖത്തിൽ പറഞ്ഞു. നിരവധി പേരാണ് ഈ അഭിമുഖം സോഷ്യൽ മീഡിയയിൽ പങ്കുവെച്ചത്. സിനിമയിൽ പ്രവർത്തിക്കുന്ന ഭൂരിപക്ഷം ആളുകളുടെയും അവസ്ഥ ഇതുതന്നെയാണെന്നും ചിലർ അഭിപ്രായപ്പെടുന്നുണ്ട്.

തിയേറ്ററുകളിൽ വിജയകരമായി പ്രദർശനം തുടരുന്ന ARM-ന്റെ വ്യാജ പ്രിൻ്റ് പുറത്തിറങ്ങിയതിൽ സെെബർ പോലീസ് അന്വേഷണം ആരംഭിച്ചു. ചിത്രത്തിൻ്റെ സംവിധായകൻ ജിതിൻ ലാൽ ഉൾപ്പടെയുള്ളവരുടെ മൊഴി രേഖപ്പെടുത്തും.

ടൊവിനോ നായകനായെത്തിയ ARM വ്യാജ പ്രിൻ്റ് പ്രചരിക്കുന്ന വിവരം നിർമാതാവ് ലിസ്റ്റിൻ സ്റ്റീഫൻ, സംവിധായകൻ ജിതിൻ ലാൽ എന്നിവരാണ് സോഷ്യൽ മീഡിയയിലൂടെ പുറത്തുവിട്ടത്. വീട്ടിലിരുന്ന് ടിവിയിൽ വ്യാജ പ്രിൻ്റ് കാണുന്ന ഒരാളുടെ ദൃശ്യങ്ങളാണ് ലിസ്റ്റിൻ പുറത്തുവിട്ടത്. സിനിമയെ നശിപ്പിക്കരുതെന്ന് പറഞ്ഞുകൊണ്ടാണ് നിർമാതാവ് ഈ ദൃശ്യങ്ങൾ സോഷ്യൽ മീഡിയയിൽ പോസ്റ്റ് ചെയ്തത്.

ട്രെയിനിലിരുന്ന് ഒരാൾ മൊബൈലിൽ സിനിമ കാണുന്ന വീഡിയോയാണ് സംവിധായകൻ ജിതിൻ ഫെയ്സ്ബുക്കിലൂടെ പുറത്തുവിട്ടത്. ഹൃദയം തകരുന്ന കാഴ്ചയാണിതെന്ന് സംവിധായകൻ ഇതിനൊപ്പം കുറിച്ചിരുന്നു.

2010 ഫിഫ ലോകകപ്പ് സമയത്ത് ഇറങ്ങിയ വക്കാ വക്കാ എന്ന ഒറ്റ ​ഗാനം മതി ഷാക്കിറ എന്ന ​ഗായികയെ ഏത് സം​ഗീതപ്രേമിക്കും തിരിച്ചറിയാൻ. തനിക്ക് നേരിട്ട ഒരു ദുരനുഭവത്തോടുള്ള ​ഗായികയുടെ പ്രതികരണം ഇപ്പോൾ സോഷ്യൽ മീഡിയാ ലോകത്ത് ചർച്ചയാവുകയാണ്. ഒരു ആരാധകനിൽനിന്ന് നേരിട്ട മോശം പെരുമാറ്റത്തെത്തുടർന്ന് സം​ഗീത പരിപാടി പാതിയിൽ നിർത്തി വേദി വിട്ടിറങ്ങുകയായിരുന്ന അവർ.

ലിവ് മിയാമി നൈറ്റ് ക്ലബിലാണ് സോഷ്യൽ മീഡിയയിൽ പുതിയ ചർച്ചകൾക്ക് വഴിയൊരുക്കിയ സംഭവം അരങ്ങേറിയത്. ക്ലബിലെ അന്തരീക്ഷത്തിന് ചേരുംവിധം ഒരു ബ്രൗൺ മിനി ഡ്രസ് ആയിരുന്നു ഷാക്കിറ ധരിച്ചിരുന്നത്.

പുതിയ ​ഗാനമായ സോൾട്ടെറായ്ക്കൊപ്പം വേദിയിൽ നൃത്തംചെയ്യുകയായിരുന്നു ​ഗായിക. അപ്പോഴാണ് മുൻനിരയിലുണ്ടായിരുന്ന ഒരു ആരാധകൻ തന്റെ വസ്ത്രത്തിനിടയിലൂടെ ചിത്രം പകർത്താൻ ശ്രമിക്കുന്നത് ഷാക്കിറയുടെ ശ്രദ്ധയിൽപ്പെട്ടത്. ഇത്തരത്തിൽ ചെയ്യരുതെന്ന് താക്കീത് ചെയ്തശേഷം അവർ നൃത്തം തുടർന്നു. എന്നാൽ അയാൾ വീണ്ടും സഭ്യമല്ലാത്ത രീതിയിൽ ദൃശ്യം പകർത്തുന്നത് കണ്ടതോടെ ​ഗായിക പ്രകടനം നിർത്തി വേദി വിട്ടിറങ്ങുകയായിരുന്നു.

ഷാക്കിറയ്ക്ക് നേരിട്ട ദുരനുഭവത്തിൽ പ്രതിഷേധവുമായി നിരവധി പേരാണ് സമൂഹ മാധ്യമങ്ങളിൽ പ്രതികരണങ്ങളുമായെത്തിയത്. സെലിബ്രിറ്റികൾ പോലും ആളുകളിൽ നിന്ന് മോശം പെരുമാറ്റത്തിന് വിധേയരാകുന്ന ഒരു ലോകത്ത് സ്ത്രീകളുടെ സുരക്ഷയുടെ പ്രാധാന്യമാണ് പലരും കമന്റുകളായി പോസ്റ്റ് ചെയ്തത്. സ്ത്രീകളോട് മോശമായി പെരുമാറുന്നവർ മാനസികമായി അസുഖം ബാധിച്ചവരാണെന്നും ചിലർ കമന്റ് ചെയ്തു.