കൊച്ചി : മുഖ്യമന്ത്രിക്കെതിരെ മൊഴി നല്കാന് സമ്മര്ദമെന്ന സ്വര്ണക്കടത്തു കേസ് പ്രതി സ്വപ്ന സുരേഷിന്റെ ശബ്ദസന്ദേശത്തിന് പിന്നില് സംസ്ഥാന സ്പെഷല് ബ്രാഞ്ചിലെ ഉദ്യോഗസ്ഥനാണ് നേതൃത്വം നല്കിയതെന്നും ഓഗസ്റ്റ് ആറിനു നടന്ന ഫോണ് സംഭാഷണമാണ് പുറത്തുവന്നതെന്നും കേന്ദ്ര അന്വേഷണ ഏജന്സികള്ക്കു വിവരം ലഭിച്ചു. കൊച്ചിയില് ഇഡി കസ്റ്റഡിയിലായിരിക്കെ, അഞ്ച് വനിതാ പൊലീസുകാരാണ് ഡ്യൂട്ടിയിലുണ്ടായിരുന്നത്. ഇവരിലൊരാള് സ്പെഷല് ബ്രാഞ്ച് ഉദ്യോഗസ്ഥനെ ഫോണില് വിളിക്കുകയും തുടര്ന്നു ഫോണ് സ്വപ്നയ്ക്കു കൈമാറുകയും ചെയ്തെന്നാണ് വിവരം. മുഖ്യമന്ത്രിക്കെതിരെ മൊഴി നല്കിയാല് മാപ്പുസാക്ഷിയാക്കാമെന്ന് ഇഡി വാഗ്ദാനം നല്കിയതായും കൃത്യമായി വായിച്ചുനോക്കാന് സാവകാശം നല്കാതെ മൊഴിപ്രസ്താവനയില് ഒപ്പിട്ടുവാങ്ങിയതായും സ്വപ്ന പറയുന്ന ശബ്ദരേഖ ഏറെ വിവാദമായിരുന്നു. ശിവശങ്കറിനൊപ്പം ദുബായില് പോയി മുഖ്യമന്ത്രിക്കു വേണ്ടി ‘ഫിനാന്ഷ്യല് നെഗോസ്യേഷന്’ നടത്തിയെന്നു പറയാന് സമ്മര്ദമുണ്ടെന്നാണു സന്ദേശത്തിലുള്ളത്.