രജനീകാന്ത് പൂർണ ആരോഗ്യവാൻ; അമേരിക്കയിൽ നിന്ന് വിളിച്ചെന്ന് വൈരമുത്തു
ചികിത്സക്കായി അമേരിക്കയിലേക്ക് പോയ സൂപ്പർ സ്റ്റാർ രജനീകാന്ത് ആരോഗ്യവാൻ.
സുഹൃത്തും ഗാനരചയിതാവുമായ വൈരമുത്തുവാണ് ഇക്കാര്യം അറിയിച്ചത്.
അമേരിക്കയിൽ നിന്നും രജനീകാന്ത് തന്നെയാണ് ഇക്കാര്യം വിളിച്ചറിയിച്ചത്.
കഴിഞ്ഞ ദിവസം മയോ ക്ലിനിക്കിൽ താരം എത്തിയിരുന്നു.
2016ൽ രജനീകാന്ത് വൃക്കമാറ്റി വയ്ക്കൽ ശസ്ത്രക്രിയക്ക് വിധേയനായിരുന്നു.
പതിവ് പരിശോധനകൾക്കായാണ് അമേരിക്കയിലേക്ക് പോയത്.
മയോ ക്ലിനിക്കിൽ നിന്നും രജനീകാന്തും മകൾ ഐശ്വര്യയും സുഹൃത്തും
ഇറങ്ങിവരുന്ന ഫോട്ടോയും പുറത്തുവന്നിരുന്നു.
പരിശോധനകൾക്ക് ശേഷം രജനി ഫോണിൽ വിളിച്ചെന്ന് ട്വിറ്ററിലൂടെയാണ്
വൈരമുത്തു അറിയിച്ചത്. ‘ആരോഗ്യ പ്രശ്നങ്ങൾ ഇല്ലെന്ന് ഡോക്ടർമാർ
അറിയിച്ചെന്നാണ് അദ്ദേഹം പറഞ്ഞു. ഉല്ലാസവാനായി , ആത്മവിശ്വാസത്തോടെയാണ്
രജനി സംസാരിച്ചത്. സന്തോഷം ആരാധകരുമായി പങ്കുവയ്ക്കുകയാണ്’ വൈരമുത്തു
കുറിച്ചു.
ഈ മാസം 19ന് ആണ് ഭാര്യ ലതക്കൊപ്പം സൂപ്പർതാരം അമേരിക്കയിലേക്ക് പോയത്.
ഗ്രേ മാൻ എന്ന ചിത്രത്തിന്‍റെ ഷൂട്ടിങ്ങിനായി മരുമകൻ ധനുഷും മകൾ ഐശ്വര്യയും
അമേരിക്കയിലുണ്ട്. അവർക്കൊപ്പമാണ് താരവും ഉള്ളത്. അടുത്തയാഴ്ച
കുടുംബം ചെന്നൈയിൽ തിരിച്ചെത്തും. ആരോഗ്യപ്രശ്നങ്ങൾ ഇല്ലെന്ന് വ്യക്തമായതോടെ
‘അണ്ണാത്തൈ’ എന്ന ചിത്രത്തിന്‍റെ ഷൂട്ടിങ് പൂർത്തിയാക്കാനാവും പ്രഥമ പരിഗണന.
