മയോ ക്ലിനിക്കിൽ പരിശോധന നടത്തി രജനീകാന്ത്; കൂട്ടിന് മകൾ ഐശ്വര്യ
സൂപ്പർതാരം രജനീകാന്ത് അമേരിക്കയിലെ മയോ ക്ലിനിക്കിൽ പരിശോധനകൾ പൂർത്തിയാക്കി.
മകൾ ഐശ്വ്യര്യ ധനുഷിനൊപ്പം താരം ആശുപത്രിയിൽ നിന്നും പുറത്തുവരുന്ന ഫോട്ടോകൾ
ഒരു ആരാധകനാണ് സാമൂഹിക മാധ്യമങ്ങളിൽ പങ്കുവച്ചത്. താരം ആരോഗ്യവാനായി ഇരിക്കട്ടെ എന്ന്
നിരവധി പേർ ആശംസകൾ നേർന്നു.
2016ൽ വൃക്ക മാറ്റിവയ്ക്കലിന് വിധേയനായ രജനീകാന്ത് പതിവ് ആരോഗ്യ പരിശോധനകൾക്കായാണ്
അമേരിക്കയിൽ എത്തിയത്. സർക്കാരിന്‍റെ പ്രത്യേക അനുമതിയോടെ രജനീകാന്തും ഭാര്യ ലതയും
കഴിഞ്ഞ 19ന് ദുബായ് വഴി അമേരിക്കയിലെത്തി. ഗ്രേ മാൻ എന്ന ചിത്രത്തിന്‍റെ ഷൂട്ടിങ്ങിനായി
മരുമകൻ ധനുഷും മകൾ ഐശ്വര്യയും അമേരിക്കയിൽ ഉണ്ടായിരുന്നു.
അടുത്തയാഴ്ച തന്നെ രജനീകാന്തും ധനുഷും കുടുംബവും ചെന്നൈയിൽ തിരിച്ചെത്തുമെന്നാണ്
പ്രതീക്ഷിക്കുന്നത്. വിശ്രമത്തിന് ശേഷം ഇരുവരും ഷൂട്ടിങ് പുനരാരംഭിക്കും.
രജനിയുടെ മാസ് പടം അണ്ണാത്തെയുടെ ബാക്കിഭാഗം ആയിരിക്കും ചിത്രീകരിക്കുക.
ഹൈദരാബാദിൽ ചിത്രത്തിന്‍റെ ഷൂട്ടിങ് നടക്കുന്നതിനിടെ രക്തസമ്മർദ്ദം കൂടി
താരത്തിന്‍റെ ആരോഗ്യനില വഷളായത് ആശങ്കയുണ്ടാക്കിയിരുന്നു.
