ബിഗ് ബോസ് റിയാലിറ്റി ഷോയിലൂടെ ശ്രദ്ധേയനായതായ വ്യക്തിയാണ് ഡോ. രജിത് കുമാർ. ബിഗ് ബോസിൽ നിന്ന് പുറത്തിറങ്ങിയ ശേഷം ധാരാളം അവസരങ്ങളാണ് രജിത്തിനെ കാത്തിരുന്നത്. സിനിമയിൽ രജിത് കുമാർ നായക വേഷം കൈകാര്യം ചെയ്യുന്നുവെന്നതാണ് പുതിയ വാർത്ത.
സ്വപ്ന സുന്ദരി എന്ന സിനിമയിലാണ് രജിത് കുമാര് അഭിനയിക്കുന്നത്. കെ ജെ ഫിലിപ്പ് ആണ് സ്വപ്ന സുന്ദരി എന്ന ചിത്രം സംവിധാനം ചെയ്യുന്നത്. സീതു ആന്സണ് ആണ് തിരക്കഥയും സംഭാഷണവും എഴുതുന്നത്. ചിത്രത്തിന്റെ ഫസ്റ്റ് ലുക്ക് പോസ്റ്റര് പുറത്തുവിട്ടു. രജിത് കുമാര് തന്നെ ഫോട്ടോ ഷെയര് ചെയ്തിട്ടുണ്ട്. ബുള്ളറ്റില് ഇരിക്കുന്ന രജിത് കുമാറാണ് ഫോട്ടോയിലുള്ളത്. ഡോ. ഷിനു ശ്യാമളൻ ആണ് സ്വപ്ന സുന്ദരി എന്ന ചിത്രത്തില് നായികയായി എത്തുന്നത്. ആദ്യമായിട്ടാണ് ഡോ. ഷിനു ശ്യാമളനും സിനിമയില് നായികയായി എത്തുന്നത്.
വെള്ള ഷര്ട്ടും മുണ്ടും ധരിച്ച്, മീശ പിരിച്ച് കൂളിംഗ് ഗ്ലാസും വച്ച് ബുള്ളറ്റില് ഇരിക്കുന്നതായാണ് രജിത് കുമാറിന്റെ ലുക്ക്. മിനി സ്ക്രീനിലും രജിത് കുമാര് അഭിനയിക്കുന്നുണ്ട്. ഏഷ്യാനെറ്റിന്റെ ലൈഫ് ഈസ് ബ്യൂട്ടിഫുൾ പരമ്പരയിലാണ് രജിത് കുമാര് അഭിനയിക്കുന്നത്. ആക്ഷേപഹാസ്യ പരമ്പരയില് പ്രധാന കഥാപാത്രമായിട്ടാണ് രജിത് കുമാര് എത്തുക.