യേശുദാസിന് പുരസ്കാരം കിട്ടിയ ഗാനരചയിതാവിന്‍റെ ഇപ്പോഴത്തെ ജീവിതം കണ്ടോ? വൈറലായി
ഷിബു ബേബി ജോണിന്‍റെ കുറിപ്പ്
നിരവധി ദേശീയ പുരസ്കാരങ്ങൾ നേടിയ ഗായകനാണ് ഗാന ഗന്ധർവൻ കെ.ജെ.യേശുദാസ്. 2017ൽ അദ്ദേഹത്തിന് ദേശീയ
പുരസ്കാരം ലഭിച്ചത് പി.ടി.കുഞ്ഞുമുഹമ്മദ് സംവിധാനം ചെയ്ത ചിത്രത്തിലെ പോയ് മറഞ്ഞ കാലം എന്നു തുടങ്ങുന്ന ഗാനത്തിനാണ്.
ആ പാട്ട് എഴുതിയ പ്രേംദാസിനെക്കുറിച്ചുള്ള വിവരങ്ങൾ ഏറെ സങ്കടത്തോടെയാണ് ആരാധകർ അറിഞ്ഞത്.
രാഷ്ട്രീയ നേതാവ് ഷിബു ബേബി ജോൺ ആണ് പ്രേംദാസിന്‍റെ ഇപ്പോഴത്തെ അവസ്ഥയെക്കുറിച്ച്
ഫേസ്ബുക്കിൽ കുറിപ്പിട്ടത്. തൃശ്ശൂരിലെ ഒരു ആയുർവേദ ചികിത്സാലയത്തിലെ തോട്ടക്കാരനാണ് പ്രേം ദാസ് ഇപ്പോൾ.
കഴിഞ്ഞ 14 വർഷമായി ചികിത്സക്ക് പോകാറുള്ള മജ്‍ലിസ് ആശുപത്രിയിൽ കണ്ട പുതിയ ജീവനക്കാരനെ
പരിചയപ്പെട്ടപ്പോൾ ഞെട്ടിപ്പോയി എന്നാണ് അദ്ദേഹം കുറിച്ചത്.
മനസ്സിൽ ഒരുപാട് സ്വപ്നങ്ങൾ ഉണ്ടെങ്കിലും ജീവിത പ്രാരാബ്ധം മൂലം തോട്ടക്കാരനാകേണ്ടി വന്ന പ്രേംദാസിന്‍റെ അവസ്ഥ
കരളലിയിക്കുന്നതാണ്. ഒരു ദേശീയ അവാർഡിന് കാരണമായ ഗാനം രചിച്ച പ്രതിഭാധനനായ വ്യക്തിയ്ക്ക് പോലും
ഈ അവസ്ഥ ഉണ്ടാകുന്നുവെന്നത് സത്യത്തിൽ വേദനയുണ്ടാക്കുന്ന കാര്യമാണ്.
ജീവനുള്ള ആ ആ വരികൾക്ക് ജന്മം നൽകിയ കൈകളിൽ തൂലികയ്ക്ക് പകരം ഇന്ന് കത്രികയേന്തേണ്ടി വരുന്നത്
നമ്മുടെ കൂടി പരാജയമാണ്. സാഹിത്യകാരും കലാകാരന്മാരുമൊക്കെ സമൂഹത്തിന്‍റെ സമ്പത്താണ്. അതാത് മേഖലയിൽ
നിന്നും അവർ കൊഴിഞ്ഞുപോയാൽ ആ നഷ്ടം നമ്മുടേതാണെന്ന് നാം തിരിച്ചറിയണം. മാന്യമായൊരു തൊഴിൽ
ചെയ്താണ് ജീവിക്കുന്നതെന്ന് പ്രേമിന് അഭിമാനിക്കാം. എന്നാൽ നമ്മൾ മലയാളികൾക്ക് നഷ്ടപ്പെട്ടത് എത്രയോ മികച്ച
ഗാനങ്ങളായിരിക്കും. പ്രതിഭയുടെ നിറവുള്ള ആ വിരലുകൾ വീണ്ടും പേനയേന്തുന്ന നാളുകൾക്കായി
കാത്തിരിക്കുകയാണെന്നും ഷിബു ബേബി ജോൺ കുറിച്ചു.
