ഒരുകാലത്ത് മലയാളത്തിലെ ബി ഗ്രേഡ് ചിത്രങ്ങളിലൂടെ മലയാളികള്‍ക്ക് സുപരിചിതയായ നടിയാണ് ഷക്കീല. മസാല സിനിമകളിലൂടെ പ്രേക്ഷകരില്‍ എത്തിയെങ്കിലും നിലപാടുകള്‍ കൊണ്ടും ജീവകാരുണ്യ പ്രവര്‍ത്തനങ്ങള്‍ കൊണ്ടും പലരുടെയും ഹൃദയം കവര്‍ന്ന താരം കൂടിയാണ് ഷക്കീല. എന്നാല്‍ മലയാളികളെയും മലയാള സിനിമയെയും വഴിതെറ്റിച്ചയാളെന്ന് പലപ്പോഴും കുറ്റപ്പെടുത്തലുകള്‍ ഏറ്റുവാങ്ങേണ്ടി വന്നിട്ടുമുണ്ട് ഷക്കീലയ്ക്ക്.
സിനിമയും അഭിനയവും പ്രൊഫഷനായിരുന്നു എന്ന് പലപ്പോഴും ഷക്കീല പറഞ്ഞിട്ടുണ്ട്. ലഭിച്ച അവസരങ്ങള്‍ക്ക് ഒത്ത് അഭിനയിക്കുകയായിരുന്നു എന്നും താരം പറഞ്ഞിട്ടുണ്ട്. എന്നാല്‍ ഇതൊന്നും ഉള്‍ക്കൊള്ളാനോ ഷക്കീലയെ അംഗീകരിക്കാനോ മലയാളി സമൂഹം തയ്യാറായിട്ടില്ല. ഇപ്പോള്‍ തന്റെ മകള്‍ മില്ലയെ പരിചയപ്പെടുത്തി രംഗത്ത് എത്തിയിരിക്കുകയാണ് താരം. തനിക്ക് കൂട്ടായി ഒരു വളര്‍ത്തുമകള്‍ ഉണ്ടെന്ന് ഷക്കീല നേരത്തെ തന്നെ വെളിപ്പെടുത്തിയിരുന്നു.
ട്രാന്‍സ്‌ജെന്‍ഡറായ മില്ലയെ ഷക്കീല ദത്തെടുത്ത് ജീവിതത്തിന്റെ ഭാഗമാക്കുകയായിരുന്നു. ഫാഷന്‍ ഡിസൈനറായ മില്ലയാണ് ഷക്കീലയുടെ മകള്‍. വിജയ് ടിവിയുടെ കുക്കു വിത്ത് കോമാളി എന്ന റിയാലിറ്റി ഷോയില്‍ വെച്ചാണ് ഷക്കീല തന്റെ വളര്‍ത്തുമകളെ കുറിച്ച് തുറന്ന് പറഞ്ഞത്. ജീവിക്കാനുള്ള കരുത്ത് മകളാണെന്നും ഷക്കീല പറഞ്ഞിരുന്നു.
