ശിൽപ ഷെട്ടിയെ ചോദ്യം ചെയ്തത് ആറ് മണിക്കൂർ; നീലച്ചിത്ര നിർമാണത്തിൽ പങ്കില്ലെന്ന് താരം
ഭർത്താവ് രാജ്‍കുന്ദ്രയുടെ അറസ്റ്റിന് പിന്നാലെ നടി ശിൽപ ഷെട്ടിയെ വിശദമായി ചോദ്യം ചെയ്ത്
മുംബൈ പൊലീസ്. ജുഹുവിലെ വീട്ടിൽ റെയ്ഡ് നടത്തുന്നതിനിടെ ആറ് മണിക്കൂർ ആണ് ചോദ്യം
ചെയ്തത്. നീലച്ചിത്ര നിർമാണവുമായി ബന്ധപ്പെട്ട് തനിക്ക് യാതൊരു അറിവുമില്ലെന്നാണ്
ശിൽപ പൊലീസിന് മൊഴി നൽകിയത്.
ഹോട്ട് ഷോട്സ് എന്ന ആപ്പിനെക്കുറിച്ചാണ് പൊലീസ് പ്രധാനമായും ചോദിച്ചറിഞ്ഞത്. ആപ്പിൽ
ഇറോട്ടിക്കായ ദൃശ്യങ്ങൾ നൽകുന്നുണ്ടെങ്കിലും നീലച്ചിത്രമല്ലെന്നാണ് ശിൽപ മൊഴി നൽകിയത്.
ആപ്പിനെക്കുറിച്ചോ രാജ് കുന്ദ്രയുടെ ബിസിനസ്സിനെക്കുറിച്ചോ കാര്യമായ അറിവില്ലെന്നും ശിൽപ
മൊഴി നൽകിയിട്ടുണ്ട്. വീഡിയോ നിർമാണത്തിൽ ഒരു തരത്തിലും പങ്കാളിയായിട്ടില്ലെന്നും
ശിൽപ വിശദീകരിച്ചു.
കഴിഞ്ഞ ദിവസം അറസ്റ്റിലായ കുന്ദ്രയെ ഈ മാസം 27 വരെ പൊലീസ് കസ്റ്റഡിയിൽ
വിട്ടിരിക്കുകയാണ്. കൂടുതൽ ചോദ്യം ചെയ്യലിനായി കസ്റ്റഡിയിൽ വേണമെന്ന പൊലീസ് വാദം
കോടതി അംഗീകരിച്ചു. കുന്ദ്രയുടെ ബിസിനസ് സ്ഥാപനങ്ങളെക്കുറിച്ചും പണമിടപാടുകളെക്കുറിച്ചും
പൊലീസ് പരിശോധിച്ച് വരികയാണ്. അടുത്ത സുഹൃത്തുക്കളെയും വരുംദിവസങ്ങളിൽ ചോദ്യം
ചെയ്തേക്കും.
