ഇൻസ്റ്റാഗ്രാമിൽ മമ്മൂട്ടി പോസ്റ്റ് ചെയ്ത രണ്ടേ രണ്ടേ ഫോട്ടോകൾ നിമിഷങ്ങൾക്കകമാണ് സാമൂഹിക മാധ്യമങ്ങളിൽ വൈറലായത്. മലയാള സിനിമയിലെ യുവനിര താരങ്ങളും സിനിമാ പ്രേക്ഷകരും ഒന്നടങ്കം ഏറ്റെടുത്ത ഫോട്ടോകൾ മമ്മൂട്ടി എന്ന താരത്തിൻറെ സ്റ്റൈലിഷ് ലുക്കിനാലാണ് ശ്രദ്ധിക്കപ്പെട്ടത്.
പ്രായത്തെ തോൽപ്പിച്ച മമ്മൂട്ടിയുടെ അപാര ഗെറ്റ് അപ്പ് ആരാധകരും വലിയ ആവേശത്തോടെയാണ് ഏറ്റെടുത്തത്. അതെ സമയം ഫോട്ടോകളിൽ മമ്മൂട്ടി ഉപയോഗിച്ച മൊബൈൽ ഫോൺ കണ്ടുപിടിക്കാനാണ് ചില ആരാധകർ സമയം ചിലവഴിച്ചത്. ടെക്നോളജി മേഖലയിൽ നിരന്തരം അപ്ഗ്രേഡ് ചെയ്യുന്ന മമ്മൂട്ടിയുടെ ഫോൺ ഏതാണെന്ന ആകാംക്ഷയിലാണ് പല ആരാധകരും ഫോൺ തപ്പി ഇറങ്ങിയത്.
2020 മാർച്ച് ആറിന് പുറത്തിറങ്ങിയ സാംസങ്ങിൻറെ ഗാലക്സി S20 അൾട്രാ ഫോണാണ് മമ്മൂട്ടി ഉപയോഗിച്ചതെന്നാണ് ആരാധകർ കണ്ടുപിടിച്ചത്. 2020 ഫെബ്രുവരിയിലാണ് സാംസങ്ങ് ഈ ഫോൺ പ്രഖ്യാപിക്കുന്നത്.ഒരു ലക്ഷത്തിനടുത്താണ് സാംസങ് ഗാലക്സി S20 അൾട്രയുടെ ഇന്ത്യൻ വില.
