പറഞ്ഞ് പറഞ്ഞ് ഓണമിങ്ങു മലയാളികളുടെ പടിവാതിൽക്കലെത്തി. ഓണക്കോടിക്കും സദ്യയ്ക്കും ഒത്തുചേരലുകൾക്കും ഉള്ള അത്രതന്നെ മലയാളികൾ ഓണത്തിന് പ്രാധാന്യം നൽകുന്ന മറ്റൊരു കാര്യമാണ് ഓണത്തിനെത്തുന്ന പ്രിയപ്പെട്ട താരങ്ങളുടെ സിനിമാ റിലീസും. മലയാളികളുടെ ഈ ഓണം കളറാക്കാൻ ഇത്തവണ സൂപ്പർ സ്റ്റാറുകളുടെയടക്കം ചിത്രങ്ങളെത്തുന്നുണ്ട്. ഓഗസ്റ്റ് മാസത്തിൽ റിലീസാകുന്ന ചിത്രങ്ങളേതൊക്കെയെന്ന് നോക്കാം.
- കൂലി
ലോകേഷ് കനകരാജിന്റെ സംവിധാനത്തിൽ രജനികാന്ത് പ്രധാന വേഷത്തിലെത്തുന്ന ചിത്രമാണ് കൂലി. ചിത്രത്തിന്റെ ട്രെയ്ലറിനും വൻ വരവേൽപ്പാണ് ലഭിക്കുന്നത്. ലോകേഷ് സ്റ്റൈലിലുള്ള ഒരു പക്കാ ആക്ഷൻ എന്റർടെയ്നർ ആകും സിനിമയെന്ന സൂചനയാണ് ട്രെയ്ലർ നൽകുന്നത്. ആമിർഖാൻ, നാഗാർജുന, സൗബിൻ ഷാഹിർ, ശ്രുതി ഹാസൻ എന്നിവരും ചിത്രത്തിൽ പ്രധാന വേഷങ്ങളിലെത്തുന്നുണ്ട്. തെന്നിന്ത്യൻ സിനിമാ പ്രേക്ഷകർ ഏറെ പ്രതീക്ഷയോടെ കാത്തിരിക്കുന്ന ചിത്രവും കൂലിയാണ്. ഓഗസ്റ്റ് 14 നാണ് ചിത്രം റിലീസ് ചെയ്യുക
- ഹൃദയപൂർവം
സത്യൻ അന്തിക്കാട് – മോഹൻലാൽ കൂട്ടുകെട്ടിലൊരുങ്ങുന്ന ‘ഹൃദയപൂർവം’ ചിത്രത്തിന്റെ ടീസറെത്തി. ഫഹദ് ഫാസിൽ റഫറൻസോടെ രസകരമായാണ് ടീസർ ആരംഭിക്കുന്നത്. മോഹൻലാലിന്റെ അഭിനയ മികവ് ‘ഹൃദയപൂർവ’ത്തിലും പ്രതീക്ഷിക്കാമെന്ന് ടീസർ വ്യക്തമാക്കുന്നു. മാളവിക മോഹനാണ് ചിത്രത്തിലെ നായിക. ലാലു അലക്സ്, സംഗീത് പ്രതാപ്, സംഗീത സിദ്ദിഖ്, ബാബുരാജ്, സബിതാ ആനന്ദ് തുടങ്ങിയവരാണ് ഹൃദയപൂർവത്തിലെ മറ്റു പ്രധാന കഥാപാത്രങ്ങൾ. ഈ ഓണം എന്തായാലും ലാലേട്ടൻ മോളിവുഡ് തൂക്കുമെന്നാണ് ആരാധകരുടെ പ്രതീക്ഷ. ഓഗസ്റ്റ് 28നാണ് ചിത്രം തിയറ്ററുകളിലെത്തുക.
- വാർ 2
ഹൃത്വിക് റോഷനെ നായകനാക്കി അയൻ മുഖർജി ഒരുക്കുന്ന സ്പൈ ആക്ഷൻ ചിത്രമാണ് വാർ 2. തെലുങ്ക് സൂപ്പർ താരം ജൂനിയർ എൻടിആറും സിനിമയിൽ ഒരു പ്രധാന കഥാപാത്രത്തെ അവതരിപ്പിക്കുന്നുണ്ട്. ബോളിവുഡിലെ ഹിറ്റ് സിനിമാറ്റിക് യൂണിവേഴ്സ് ആയ യഷ് രാജ് ഫിലിംസിന്റെ സ്പൈ യൂണിവേഴ്സിലെ ഏറ്റവും പുതിയ ചിത്രമാണ് ഇത്. കിയാര അദ്വാനിയാണ് വാർ 2വിൽ നായികയായെത്തുന്നത്. ഈ മാസം 14 ന് ചിത്രം പ്രേക്ഷകരിലേക്കെത്തും. രജനികാന്ത് ചിത്രം കൂലിയ്ക്കൊപ്പമാണ് വാർ 2 വിന്റെ വരവ്. അതുകൊണ്ട് തന്നെ ഒരു ബോക്സോഫീസ് ക്ലാഷ് തന്നെ പ്രതീക്ഷിക്കാം.
- ഓടും കുതിര ചാടും കുതിര
ഫഹദ് ഫാസിൽ നായകനായി അൽത്താഫ് സലിം സംവിധാനം ചെയ്യുന്ന ചിത്രമാണ് ‘ഓടും കുതിര ചാടും കുതിര’. കല്യാണി പ്രിയദർശൻ, രേവതി പിള്ള എന്നിവർ നായികമാരാകുന്ന ചിത്രം ഓഗസ്റ്റ് 29ന് പ്രദർശനത്തിനെത്തും.
- പരം സുന്ദരി
സിദ്ധാര്ഥ് മല്ഹോത്ര നായകനായി വരാനിരിക്കുന്ന ചിത്രമാണ് പരം സുന്ദരി. ജാൻവി കപൂർ ആണ് ചിത്രത്തിൽ നായികയായെത്തുക. കേരളത്തിന്റെ പശ്ചാത്തലത്തിലാണ് ചിത്രമൊരുങ്ങുന്നത്. ചിത്രത്തിന്റെ ഷൂട്ടിനായി സിദ്ധാർഥും ജാൻവിയും കേരളത്തിലെത്തിയത് സോഷ്യൽ മീഡിയയിൽ വൈറലായി മാറിയിരുന്നു. ഓഗസ്റ്റ് 29 നാണ് ചിത്രം പ്രേക്ഷകരിലേക്കെത്തുക.
