രണ്ടാം വർഷ ഹയർ സെക്കൻഡറി, വി.എച്ച്.എസ്.ഇ പരീക്ഷകളുടെ മൂല്യ നിർണയം ചൊവ്വാഴ്ച ആരംഭിക്കും. ഏപ്രിൽ 26ന് പൂർത്തിയായ പരീക്ഷകളുടെ മൂല്യ നിർണയം ലോക്ഡൗണിനെ തുടർന്ന് മാറ്റി വെച്ചതായിരുന്നു. 79 കേന്ദ്രങ്ങളിൽ നടക്കുന്ന ഹയർ സെക്കൻഡറി മൂല്യനിർണയത്തിൽ 26447 അധ്യാപകരാണ് പങ്കെടുക്കുക.
എട്ട് കേന്ദ്രങ്ങളിലായി നടക്കുന്ന വി.എച്ച്.എസ്.ഇ മൂല്യ നിർണയത്തിൽ 3031 അധ്യാപകരും പങ്കെടുക്കും. മൂല്യ നിർണയം 19ന് അവസാനിക്കും. ലോക്ഡൗൺ സാഹചര്യത്തിൽ അധ്യാപകർക്ക് സൗകര്യപ്രദമായ മൂല്യ നിർണയ കേന്ദ്രം തെരഞ്ഞെടുക്കാൻ അവസരം നൽകിയിട്ടുണ്ട്.
പൊതു ഗതാഗതം ആരംഭിക്കാതെ മൂല്യ നിർണയം തുടങ്ങുന്നത് ക്യാമ്പുകളിൽ എത്തുന്നതിന് പ്രയാസകരമായിരിക്കുമെന്ന് അധ്യാപകർ ആക്ഷേപം ഉന്നയിച്ചിരുന്നു. എസ്.എസ്.എൽ.സി മൂല്യ നിർണയം ജൂൺ ഏഴിന് തുടങ്ങും.
