തൊട്ടതെല്ലാം ഹിറ്റ് ആക്കുന്ന സംവിധായകൻ എന്നതിലുപരി ഗിരീഷ് എ.ഡി താൻ ചെയ്തു വെച്ച സിനിമകളുടെ ജനപ്രിയത കൊണ്ട് മലയാളികൾക്ക് പ്രിയപ്പെട്ടവനാണ്. തണ്ണീർമത്തൻ ദിനങ്ങളും സൂപ്പർ ശരണ്യയും പ്രേമലുവുമെല്ലാം മലയാളികൾ റിപ്പീറ്റ് അടിച്ചു കാണുന്ന ചിത്രങ്ങളുമാണ്. അതുകൊണ്ടുതന്നെ ഗിരീഷ് എ ഡിയുടെ അടുത്ത പടം ഏതെന്ന് ആകാംക്ഷയോടെ മലയാളികൾ എന്നും ചോദിക്കാറുണ്ട്.
പ്രേമനുവിനു ശേഷം പ്രേമലു2വിനായുള്ള കാത്തിരിപ്പിലായിരുന്നു സിനിമ പ്രേമികൾ. എന്നാൽ ചില സാങ്കേതിക കാരണങ്ങളാൽ പ്രേമലുവിന്റെ രണ്ടാം ഭാഗം സംഭവിക്കില്ലെന്ന് ചിത്രത്തിന്റെ നിർമ്മാതാക്കളിൽ ഒരാളായ ദിലീഷ് പോത്തൻ വ്യക്തമാക്കിയിരുന്നു. ഇതോടൊപ്പം തന്നെ ഗിരീഷിന്റെ അടുത്ത പടം നിവിൻ പോളിയെ നായകനാക്കി ആയിരിക്കുമെന്നും വാർത്തകൾ പരന്നിരുന്നു. ഇപ്പോഴിതാ സംഗതി യാഥാർത്ഥ്യമാണെന്ന് വ്യക്തമാക്കി രംഗത്തെത്തിയിരിക്കുകയാണ് നടൻ നിവിൻ പോളി തന്നെ.
നിവിൻ പോളി ഗിരീഷ് എഡി കോംബോ തന്നെ വലിയ പ്രതീക്ഷ ഉണർത്തുമ്പോഴാണ് നിവിൻ പോളിയുടെ ഏറ്റവും പുതിയ പോസ്റ്റ്. താരം പോസ്റ്റ് ചെയ്ത ഫോട്ടോയിൽ നായിക കഥാപാത്രം കൈകാര്യം ചെയ്യുന്ന മമിത ബൈജുവിനെയും ദിലീഷ് പോത്തൻ ശ്യാം പുഷ്കർ ഫഹദ് ഫാസിൽ എന്നിവരെയും കാണാം.
ബത്ലഹേം കുടുംബയൂണിറ്റ് എന്ന് പേരിട്ടിരിക്കുന്ന ചിത്രം നിര്മിക്കുന്നത് ഫഹദ് ഫാസിലും ദിലീഷ് പോത്തനും ശ്യാം പുഷ്ക്കരനും ചേരുന്ന ഭാവന സ്റ്റുഡിയോസാണ്. ഭാവന സ്റ്റുഡിയോസിന്റെ ആറാമത്തെ ചിത്രമാണ് ബത്ലഹേം കുടുംബയൂണിറ്റ്. മമിത ബൈജുവും ചിത്രത്തില് പ്രധാന വേഷത്തിലെത്തുന്നുണ്ട്.
ഗിരീഷ് എ.ഡിയും കിരണ് ജോഷിയും ചേര്ന്നാണ് ബത്ലഹേം കുടുംബയൂണിറ്റിന് തിരക്കഥയൊരുക്കുന്നത്. പ്രേമലുവിന് ഹിറ്റ് ഗാനങ്ങള് ഒരുക്കിയ വിഷ്ണു വിജയ് ആണ് ഈ സിനിമക്കും സംഗീത സംവിധാനം നിര്വഹിക്കുന്നത്. അജ്മല് സാബുവാണ് ക്യാമറാമാന്. ഓണത്തിന് ശേഷം ബത്ലഹേം കുടുംബയൂണിറ്റിന്റെ ഷൂട്ടിങ് ആരംഭിക്കും.
