കൊച്ചി: കോവിഡ് വാക്സിനേഷന് സർട്ടിഫിക്കറ്റിൽ ഉൾപ്പെടുത്തിയിരിക്കുന്ന പ്രധാനമന്ത്രി നരേന്ദ്രമോദിയുടെ ചിത്രം നീക്കണമെന്ന ഹര്ജി ഹൈക്കോടതി ചെലവ് സഹിതം തള്ളി. ഹർജി സമർപ്പിച്ച ആൾക്ക് കോടതി ഒരു ലക്ഷം രൂപ പിഴ ചുമത്തി. ആറാഴ്ചയ്ക്കകം പിഴ കേരള ലീഗൽ സർവ്വീസ് സൊസൈറ്റിയിൽ അടയ്ക്കണം എന്നാണ് നിർദേശം.ഹര്ജിയ്ക്ക് പിന്നില് രാഷ്ട്രീയ താല്പര്യമുണ്ടെന്ന് കോടതി നിരീക്ഷിച്ചു. ഇത് തീർത്തും ബാലിശമായ ഹര്ജിയാണ്. പൊതുതാല്പര്യമല്ല, പ്രശസ്തി താല്പര്യമാണ് ഹര്ജിയ്ക്ക് പിന്നിലെന്നും ജസ്റ്റിസ് പി.വി.കുഞ്ഞികൃഷ്ണന് അഭിപ്രായപ്പെട്ടു. കോടതികളില് ഗൗരവമുള്ള കേസുകള് കെട്ടിക്കിടക്കുമ്പോള് ഇത്തരം അനാവശ്യ ഹര്ജികള് പ്രോല്സാഹിപ്പിക്കാനാകില്ലെന്നും കോടതി പറഞ്ഞു.