ട്രെയിനുകളിൽ നിന്നുള്ള പ്രത്യേക ടാഗ് ഉടൻ നീക്കം ചെയ്യുമെന്നും രണ്ട് മാസത്തിനുള്ളിൽ രാജ്യത്തെ ട്രെയിനുകളുടെ പ്രവർത്തനം സാധാരണ നിലയിലാകുമെന്നും കേന്ദ്ര റെയിൽവേ മന്ത്രി അശ്വിനി വൈഷ്ണവ് അറിയിച്ചു. കൊറോണ കാലത്ത് വർധിപ്പിച്ച യാത്രാനിരക്കും കുറയ്ക്കുമെന്നും അദ്ദേഹം പറഞ്ഞു. ഇതിനായി സംസ്ഥാന സർക്കാരുകളുമായി ചർച്ചകൾ നടന്നുവരികയാണ്. ഇതിനുശേഷം, കൊറോണ വൈറസ് കാലയളവിന് മുമ്പുള്ള ക്രമീകരണം അനുസരിച്ച് യാത്രക്കാർക്ക് കുറഞ്ഞ നിരക്ക് നൽകിയാൽ മതിയാവും.
ഒഡീഷയിലെ ജാർസുഗുഡ പര്യടനത്തിനിടെയാണ് റെയിൽവേ മന്ത്രി ഇക്കാര്യം അറിയിച്ചത്. ലോകമെമ്പാടുമുള്ള കൊറോണ വൈറസ് പാൻഡെമിക്കിന് ശേഷം സ്ഥിതിഗതികൾ ക്രമേണ സാധാരണ നിലയിലേക്ക് മടങ്ങുകയാണെന്ന് അദ്ദേഹം പറഞ്ഞു. പ്രധാനപ്പെട്ട എല്ലാ ട്രെയിനുകളും ആരംഭിക്കാൻ ശ്രമിക്കുമെന്ന് റെയിൽവേ മന്ത്രി പറഞ്ഞു.
മുതിർന്ന പൗരന്മാർക്കും ഭിന്നശേഷിക്കാർക്കും സ്പെഷ്യൽ ക്ലാസ് യാത്രക്കാർക്കും മുമ്പത്തെപ്പോലെ നിരക്കിൽ ഇളവ് ലഭിക്കുമെന്നും അദ്ദേഹം കൂട്ടിച്ചേർത്തു. സ്ഥിതിഗതികൾ മന്ത്രാലയം നിരീക്ഷിച്ചുവരികയാണ്. ജനപ്രതിനിധികൾ അയച്ച കത്തിൽ സ്വീകരിച്ച നടപടി അവലോകനം ചെയ്യാൻ വൈഷ്ണ ചൊവ്വാഴ്ച ജാർസുഗുഡയിൽ എത്തിയിരുന്നു
രാജ്യത്തെ 25,000 തപാൽ ഓഫീസുകളിൽ റെയിൽ ടിക്കറ്റുകൾ വിൽക്കുന്നുണ്ടെന്നും മന്ത്രി പറഞ്ഞു. ആളുകൾ അതിൽ താൽപ്പര്യം കാണിക്കുന്നു. അതിന്റെ വ്യാപ്തി ഇനിയും വിപുലീകരിക്കും. തപാൽ സംവിധാനത്തിന്റെ ഭാവി സുവർണമാണെന്ന് അദ്ദേഹം പറഞ്ഞു. സ്പീഡ് പോസ്റ്റും പാഴ്സൽ സംവിധാനവും ആളുകൾ ഇഷ്ടപ്പെടുന്നു. നിരവധി പുതിയ പദ്ധതികളിലൂടെ തപാൽ വകുപ്പ് നവീകരിക്കപ്പെടുകയാണ്. അശ്വിനി വൈഷ്ണവ് റെയിൽവേയ്ക്ക് പുറമെ ഇൻഫർമേഷൻ ആൻഡ് ടെക്നോളജി വകുപ്പ് മന്ത്രി കൂടിയാണ്.
ഒഡീഷയിൽ എവിടെ പുതിയ റെയിൽവേ ലൈൻ സ്ഥാപിക്കണമെന്നുണ്ടെങ്കിൽ അത് നടപ്പാക്കുമെന്നും അദ്ദേഹം പറഞ്ഞു. ഇതിന് പുറമെ അവശ്യ ട്രെയിനുകളും ഉടൻ ആരംഭിക്കും. സംസ്ഥാനത്തെ നാലര കോടി ജനങ്ങൾക്ക് വേണ്ടി സാധ്യമായതെല്ലാം ചെയ്യുമെന്നും അദ്ദേഹം പറഞ്ഞു.
