തിരുവനന്തപുരം: ഇലക്ഷൻ പ്രചരണം കഴിഞ്ഞു വീട്ടിൽ മടങ്ങിയെത്തവേ സ്ഥാനാർഥിക്ക് പാമ്പുകടിയേറ്റു. കല്ലമ്പലം നാവായിക്കുളം പഞ്ചായത്തിലെ രണ്ടാം വാർഡായ പലവക്കോട് നിന്നു മത്സരിക്കുന്ന കോൺഗ്രസ് സ്ഥാനാർഥി റീന ഫസലിനാണ്(42) പാമ്പുകടിയേറ്റത്. പാമ്പുകടിയേറ്റതിനെത്തുടർന്ന് റീനയെ കൊട്ടിയത്തെ സ്വകാര്യ ആശുപത്രിയിൽ പ്രവേശിപ്പിച്ചു. ആശുപത്രിയിൽ എത്തിക്കുന്നതിന് മുമ്പ് ബോധരഹിതയായ റീനയെ അത്യാഹിത വിഭാഗത്തിൽ പ്രവേശിപ്പിക്കുകയും തുടർന്നുള്ള പരിശോധനയിൽ ഉഗ്ര വിഷമുള്ള ശംഖുവരൻ ഇനത്തിൽപ്പെട്ട പാമ്പാണ് റീനയെ കടിച്ചതെന്ന് ഡോക്ടർമാർ കണ്ടെത്തി. സമയത്തുതന്നെ ആശുപത്രിയിൽ എത്തിച്ചതുകൊണ്ടാണ് ജീവൻ രക്ഷിക്കാനായതെന്നും ഡോക്ടർമാർ അറിയിച്ചു. കല്ലമ്പലം നാവായിക്കുളം പഞ്ചായത്തിലെ അറിയപ്പെടുന്ന പൊതുപ്രവർത്തകകൂടിയാണ് റീന. നാവായിക്കുളം സഹകരണ ബാങ്കിൽ അറ്റൻഡറായി ജോലി നോക്കിയിരുന്ന റീന ബാങ്ക് ജോലി രാജിവെച്ചശേഷമാണ് തദ്ദേശ തെരഞ്ഞെടുപ്പിൽ യുഡിഎഫ് സ്ഥാനാർഥിയായി മത്സരിക്കുന്നത്. റീന അപകടനില തരണം ചെയ്തതായി ബന്ധുക്കൾ അറിയിച്ചു.
 പാമ്പുകടിയേറ്റത്.){kind=link}