രാജ്യത്തെ നടുക്കിയ അഹമ്മദാബാദ് എയർ ഇന്ത്യ വിമാന അപകടം ഇന്നലെ ഉച്ചയോടെയാണ് സംഭവിച്ചത്. അപകടത്തിൽ നിരവധി കുട്ടികളും കൈക്കുഞ്ഞുങ്ങളും സ്വദേശികളും വിദേശികളും അടക്കം 244 പേരാണ് മരണമടഞ്ഞത്.. അഹമ്മദാബാദ് സിവിൽ ആശുപത്രിയിലാണ് നടൻ ബാലയുടെ മുൻ പങ്കാളിയും സോഷ്യൽ മീഡിയയിൽ പ്രശസ്തയുമായ ഡോക്ടർ എലിസബത്ത് ജോലി ചെയ്യുന്നത്.
ഇന്റ‍ർ ട്രാൻസ്മിഷൻ വകുപ്പിലാണ് ജോലി. ഇതേ ആശുപത്രിയിലെ ഇന്റൺ ഡോക്ടർമാർ താമസിക്കുന്ന കെട്ടിടത്തിനു മുകളിലായിരുന്നു വിമാനം തകർന്നു വീണത്. പിന്നാലെ വലിയ അപകടത്തിൽ നിന്നും താൻ അടക്കമുള്ളവർ രക്ഷപ്പെട്ടതിലുള്ള ആശ്വാസവും ഡോക്ടർമാരും എംബിബിഎസ് വിദ്യാർത്ഥികളും പരിചയമുള്ളവരുമടക്കം പലരും മരണപ്പെട്ടതിനെ കുറിച്ചും അപകടത്തിന്റെ നേർക്കാഴ്ചകൾ അറിഞ്ഞതിന്റെ നടുക്കവും പങ്കുവെച്ച് എലിസബത്ത് മാധ്യമങ്ങൾക്ക് മുൻപിൽ എത്തിയിരുന്നു.
താന്‍ സുരക്ഷിതയാണെന്നും എന്നാൽ ഒരുപാട് ആളുകൾ, തന്റെ സഹപ്രവർത്തകർ, എംബിബിഎസ് വിദ്യാർഥികൾ ഉൾപ്പടെയുള്ളവർ മരണപ്പെട്ടു. ഒരുപാട് പേര് പരുക്കുകളോടെ ചികിത്സയിലാണ്. ചികിത്സയിൽ ഉള്ള എല്ലാ ആളുകൾക്ക് വേണ്ടിയും പ്രാർഥിക്കണം എന്നു പറഞ്ഞ് എലിസബത്ത് സോഷ്യൽ മീഡിയയിലൂടെ രംഗത്തും എത്തിയിരുന്നു. ഇപ്പോഴിതാ അഹമ്മദാബാദ് വിമാന അപകടത്തിൽ തന്റെ അനുശോചനം രേഖപ്പെടുത്തിയും സ്ഥലത്ത് ജോലി ചെയ്യുന്ന മുൻ പങ്കാളി എലിസബത്തിനെ പരാമർശിച്ചും രംഗത്തെത്തിയിരിക്കുകയാണ് നടൻ ബാല. ഇരുവരും തമ്മിൽ ഏറെ നാളായി സോഷ്യൽ മീഡിയ വഴി വലിയ വാക് പോരും ഗുരുതര ആരോപണ പ്രത്യാ രോപണങ്ങളും മാസങ്ങളായി നടന്നിരുന്നു.
ബാലയുടെ വാക്കുകൾ
‘‘അഹമ്മദാബാദിലെ വിമാനാപകടത്തിൽ ഉണ്ടായ വലിയ നഷ്ടത്തിൽ അഗാധമായ അനുശോചനം അറിയിക്കുന്നു. ദൈവം എല്ലാവർക്കുമൊപ്പം ഉണ്ടാകട്ടെ. ഞാൻ നിങ്ങളെ ടിവിയിൽ കണ്ടു, സുരക്ഷിതയായിരിക്കൂ ഡോക്ടർ. എന്റെ എല്ലാ പ്രാർഥനയും. ബാല–കോകില.’’
