കരിയർ എങ്ങോട്ടാണ് പോകുന്നതെന്ന് കണ്ട് ഞാൻ തകർന്നിരുന്നു; കാത്തിരുന്ന നിമിഷത്തെ കുറിച്ച് നടി നൂറിൻ

മലയാളികൾ വളരെയധികം ആഘോഷിച്ച വെബ് സീരീസ് ആയിരുന്നു കേരള ക്രൈം ഫയൽസ്. മലയാളി പ്രേക്ഷകർ ഇരുകൈയും നീട്ടി സ്വീകരിച്ച അഹമ്മദ് കബീർ സംവിധാനം ചെയ്ത സീരീസിന്റെ രണ്ടാം ഭാഗം ഇപ്പോൾ സ്ട്രീമിങ് ആരംഭിച്ചിരിക്കുകയാണ്. കിഷ്കിന്ധാ കാണ്ഡത്തിന്റെ തിരക്കഥ ഒരുക്കിയ ബാഹുൽ രമേശാണ് സീസൺ 2 ന്റെ രചന നിർവഹിച്ചിരിക്കുന്നത്. മൂർച്ചയുള്ള കഥ എന്നാണ് സീരിസിന്റെ തിരക്കഥയ്ക്ക് ലഭിക്കുന്ന അഭിപ്രായം. ഇപ്പോഴിതാ ചിത്രത്തിൽ പ്രധാന കഥാപാത്രങ്ങളിൽ ഒന്ന് കൈകാര്യം ചെയ്ത നടി നൂറിൻ ഷെരീഫ് തനിക്ക് ലഭിച്ച വേഷത്തെക്കുറിച്ച് കുറിച്ചെഴുതിയതാണ് പ്രേക്ഷകർ ഏറ്റെടുത്തിരിക്കുന്നത്

നൂറിന്റെ കുറിപ്പ് ഇങ്ങനെ:

“സ്ക്രീനിൽ എന്നെ ഇങ്ങനെ കാണാൻ ഞാൻ എത്രമാത്രം ആഗ്രഹിച്ചിട്ടുണ്ടെന്നറിയുമോ? എന്റെ അരങ്ങേറ്റത്തിന് ശേഷം വർഷങ്ങളോളം ഒരുപാട് ബുദ്ധിമുട്ടുകളിലൂടെയും ഉയർച്ച താഴ്ചകളിലൂടെയുമാണ് ഞാൻ കടന്നുപോയത്. എന്റെ സ്വപ്നതുല്യമായ കരിയർ എങ്ങോട്ടാണ് പോകുന്നതെന്ന് കണ്ട് ഞാൻ ആശയക്കുഴപ്പത്തിലാവുകയും തകരുകയും ചെയ്ത നിമിഷങ്ങളുണ്ടായിരുന്നു. ഇതുപോലെ ഒരു ദിവസത്തിനായി ഇത്തരമൊരു നിമിഷത്തിനുവണ്ടി ഞാൻ എന്നെന്നും ആഗ്രഹിച്ചുകൊണ്ടേയിരുന്നു.

കേരളാ ക്രൈം ഫയൽസിലെ സ്റ്റെഫിയായി എന്നെ തിരഞ്ഞെടുത്തതിനും എന്നിൽ വിശ്വാസമർപ്പിച്ചതിനും അഹമ്മദ് കബീറിനോടും ബാഹുൽ രമേശിനോടും കെസിഎഫിന്റെ മുഴുവൻ ടീമിനോടും ഞാൻ എന്നെന്നും കടപ്പെട്ടിരിക്കും. എന്റെ സഹതാരങ്ങൾക്കും മുഴുവൻ ടീമിനും, ഏറ്റവും നല്ലൊരു നല്ലൊരു കുടുംബമായി ഒപ്പം നിന്നതിന് ഒരുപാട് സ്നേഹം. സീരീസ് റിലീസ് ആയതിന് ശേഷം ലഭിക്കുന്ന അതിശയകരമായ പ്രതികരണങ്ങളിലും സ്നേഹത്തിലും ഞാൻ അതീവ സന്തോഷവതിയാണ്.

റിലീസിന് ശേഷം ഞങ്ങൾക്ക് ലഭിച്ചുകൊണ്ടിരിക്കുന്ന മികച്ച പ്രതികരണവും സ്നേഹവും കാണുമ്പോൾ അതിയായ സന്തോഷം. ഇപ്പോൾ ഞാൻ വളരെ വികാരാധീനയാണ്, കാരണം ഈ ചെറിയ വലിയ ചുവടുവെപ്പ് എനിക്ക് ഒരുപാട് വിലമതിക്കുന്നതാണ്. പൂർണ്ണ മനസ്സോടെ ഇതിനെ സ്വീകരിക്കുന്നു. അടുത്തതിനായി ആകാംക്ഷയോടെ കാത്തിരിക്കുന്നു.