പി.കെ.വാരിയർക്ക് ആദരം- പുതുതായി കണ്ടെത്തിയ ഔഷധ സസ്യത്തിന്‍റെ പേര് ‘ജിംനോസ്റ്റാക്കിയം വാരിയരാനം’
അന്തരിച്ച പ്രമുഖ ആയുർവേദ ഭിഷഗ്വരൻ പി.കെ.വാര്യർക്ക് ആദരമായി പുതുതായി കണ്ടെത്തിയ ഔഷധ സസ്യത്തിന്
അദ്ദേഹത്തിന്‍റെ പേര് നൽകി. കണ്ണൂർ ജില്ലയിലെ ആറളം പ്രദേശത്ത് കണ്ടെത്തിയ പുതിയ ഇനം സസ്യത്തിനാണ് പേരിട്ടത്.
ജിംനോസ്റ്റാക്കിയം വാരിയരാനം എന്നാണ് പേര്. സസ്യകുടുംബമായ അക്കാന്തേസിയയിലെ ജിംനോസ്റ്റാക്കിയം
വിഭാഗത്തിൽ പെട്ടതാണ് ഇത്.
2015 സെപ്തംബറില്‍ ആറളം വന്യജീവിസങ്കേതത്തിൽ നിന്നാണ് സസ്യത്തെ ആദ്യമായി തിരിച്ചറിഞ്ഞത്‌.
കോട്ടക്കൽ ആര്യവൈദ്യശാലയുടെ ഔഷധസസ്യ ഗവേഷണകേന്ദ്രത്തിലെ സസ്യവർഗീകരണ വിഭാഗം
ശാസ്ത്രജ്ഞനായ ഡോക്ടർ കെ എം പ്രഭുകുമാറിന്‍റെയും ഡോ. ഇന്ദിരാ ബാലചന്ദ്രന്റെ നേതൃത്വത്തിലുള്ള
ഗവേഷണ സംഘമാണ് സസ്യത്തെ കണ്ടെത്തിയത്. ഇംഗ്ലണ്ടിൽ നിന്നുള്ള അന്താരാഷ്ട്ര സസ്യവർഗീകരണ
ജേർണലായ ക്യൂ ബുള്ളറ്റിനിൽ ഇതിന്‍റെ കണ്ടെത്തൽ സംബന്ധിച്ച വിവരം പ്രസിദ്ധീകരിച്ചിട്ടുണ്ട്.
70 സെ. മീ. നീളത്തില്‍ വളരുന്ന സസ്യം നവംബറിനും മാര്‍ച്ച് മാസത്തിനും ഇടയിൽ പൂക്കും. പര്‍പ്പിള്‍ നിറത്തിലുള്ള
പൂക്കളാണ് ഇതിലുണ്ടാകുക. ഇന്ത്യയില്‍ ഈ ഇനത്തില്‍പ്പെട്ട 14 സസ്യങ്ങള്‍ കാണുന്നുണ്ട്. എന്നാല്‍
കേരളത്തില്‍ ഏഴെണ്ണം മാത്രമാണുള്ളത്. വംശനാശം നേരിടുന്ന വിഭാഗത്തില്‍ ഇത് ഉൾപ്പെടുത്തിയിട്ടുണ്ട്.
കോട്ടക്കല്‍ ആര്യവൈദ്യശാലയിലെ ഔഷധ സസ്യ ഉദ്യാനത്തില്‍ ആണ് ഇത്
പരിപാലിക്കുന്നത്.
കോട്ടയ്ക്കൽ ആര്യവൈദ്യശാല, ആയുർവേദകോളേജ്, സെന്റർ ഓഫ് മെഡിസിനൽ പ്ലാന്റ് റിസർച്ച് എന്നിവ
സ്ഥാപിച്ച് ആയുർവേദ രംഗത്ത് ഗവേഷണത്തിന് പ്രാധാന്യം നൽകിയ ആളാണ് പി.കെ.വാര്യർ
അപൂർവ ഇനത്തിൽ പെട്ട സസ്യങ്ങളടക്കം നൂറുകണക്കിന് ഔഷധച്ചെടികളുടെ
വലിയ തോട്ടമാണ് കോട്ടയ്ക്കലിൽ പി.കെ. വാര്യരുടെ നേതൃത്വത്തിൽ സംരക്ഷിച്ചു വരുന്നത്.
