ഇളയ ദളപതി വിജയുടെ മാസ്റ്റര്‍ റിലീസ് തീയ്യതി പ്രഖ്യാപിച്ചതിന് പിന്നാലെ കേരളത്തിലെ തിയേറ്ററുകളും തുറക്കണമെന്ന ആവശ്യവുമായി വിജയ് ആരാധകര്‍. ആരോഗ്യമന്ത്രി കെകെ ശൈലജയുടെ ഫെയ്‌സ്‌ബുക്ക് പേജിലാണ് കമന്റുകളുമായി വിജയ് ആരാധകര്‍ എത്തിയത്. ഇപ്പോള്‍ തിയേറ്ററുകള്‍ തുറക്കുകയാണെങ്കില്‍ കേരളത്തില്‍ എന്നും എല്‍ഡിഎഫ് തന്നെ ജയിക്കും എന്നിങ്ങനെ വാഗ്‌ദാനങ്ങളും വിജയ് ആരാധകരില്‍ നിന്നുണ്ട്.
ജനുവരി 13ന് ആണ് വിജയ് നായകനാകുന്ന ലോകേഷ് കനകരാജ് ചിത്രം മാസ്റ്റര്‍ തിയേറ്ററില്‍ റിലീസിനെത്തുന്നത്. ഈ വര്‍ഷം ഏപ്രിലില്‍ റിലീസ് ചെയ്യാനിരുന്ന ചിത്രം കൊവിഡ് ലോക്ക്ഡൗണിനെ തുടര്‍ന്ന് നീട്ടിവെക്കുകയായിരുന്നു.കഴിഞ്ഞ ദിവസമാണ് മാസ്റ്റര്‍ ജനുവരിയില്‍ തിയേറ്ററില്‍ റിലീസിനെത്തുന്ന വിവരം നിര്‍മ്മാതാക്കള്‍ പുറത്തുവിട്ടത്.
അതേസമയം തിയേറ്ററുകളില്‍ നിന്ന് മാത്രം എങ്ങനെ കൊറോണ പിടിക്കും എന്ന് ഉള്ള ലോജിക് മനസിലാകുന്നില്ലെന്നും കൊവിഡ് സാഹചര്യമായതിനാല്‍ തമിഴ്‌നാട്ടില്‍ പോയി ചിത്രം കാണാന്‍ സാധിക്കാത്ത അവസ്ഥയാണെന്നും ആരാധകര്‍ കമന്റുകളില്‍ പറയുന്നു.
