കനത്ത മഴയെ തുടർന്ന് മുല്ലപ്പെരിയാർ അണക്കെട്ടിൽ ജലനിരപ്പ് ഉയരുന്നു. ഇന്നലെ വൈകീട്ട് ജലനിരപ്പ് 140.50 അടിയിലെത്തിയിരുന്നു. തമിഴ്‌നാട്‌ കൊണ്ടുപോകുന്ന വെള്ളത്തിന്റെ തോത്‌ സെക്കൻഡിൽ 511 ഘനയടിയായി തുടരുകയാണ്‌. ജലനിരപ്പ് 141 അടിയിൽ എത്തിയാൽ രണ്ടാമത്തെ ജാഗ്രതാ മുന്നറിയിപ്പ്‌ നൽകും. ജലനിരപ്പ് 142 അടിയിലെത്തിയാൽ മൂന്നാമത്തെ മുന്നറിയിപ്പ്‌ നൽകുകയും സ്‌പിൽവേ ഷട്ടറുകൾ ഉയർത്തി ജലം പെരിയാറിലൂടെ ഇടുക്കി അണക്കെട്ടിലേക്ക്‌ തുറന്നു വിടുകയും ചെയ്യുമെന്നാണ് അറിയിച്ചിട്ടുള്ളത്. ഇന്നലെ പെരിയാറിൽ 0.4 മില്ലി മീറ്ററും തേക്കടിയിൽ 2.4 മില്ലിമീറ്ററും മഴയാണ് രേഖപ്പെടുത്തിയത്. അതേസമയം, 7153 ദശലക്ഷം ഘനയടി ജലം മുല്ലപ്പെരിയാർ ജല സംഭരണിയിലുണ്ടെന്നാണ് തമിഴ്‌ നാടിന്റെ കണക്ക്‌.
