ദുൽഖർ സൽമാന്റെ നിർമാണത്തിൽ ഡൊമിനിക് അരുൺ സംവിധാനം ചെയ്ത കല്യാണി പ്രിയ ദർശൻ മുഖ്യ വേഷത്തിലെത്തിയ ‘ലോക’ ബോക്സ് ഓഫീസിൽ വിപ്ലവം തീർത്ത് മുന്നോട്ട് കുതിക്കുകയാണ്. റിലീസ് ചെയ്ത് 7 ദിവസം കൊണ്ട് 100 കോടി ക്ലബ്ബിൽ ഇടം പിടിച്ച ചിത്രം 250 കോടി കലക്ഷൻ നേടി വിജയ കുതിപ്പ് തുടരുകയാണ്. തെന്നിന്ത്യയിൽ തന്നെ നായികാ പ്രാധാന്യമുള്ള ഒരു ചിത്രം നേടുന്ന അത്ഭുത കരമായ പ്രേക്ഷക പ്രതികരണത്തിനൊപ്പം ആഗോളതലത്തിലും ലോകയ്ക്ക് സ്വീകാര്യത ലഭിക്കുന്നുണ്ട്. ഇപ്പോഴിതാ ഇത്രയും വലിയ മുതൽമുടക്കിൽ ‘ലോക’ നിർമിക്കാൻ ഒരുങ്ങിയ സമയത്ത് പിതാവ് മമ്മൂട്ടിയും ചിത്രത്തിലെ പ്രധാന കഥാപാത്രത്തെ കൈകാര്യം ചെയ്ത കല്യാണിയുടെ പിതാവും സംവിധായകനുമായ പ്രിയദർശനും ഒരുപോലെ ആശങ്ക പ്രകടിപ്പിച്ചിരുന്നുവെന്ന് പറയുകയാണ് ദുൽഖർ. എന്നാൽ ഇപ്പോൾ സിനിമയുടെ വിജയത്തിൽ അവർ രണ്ടുപേരും സന്തോഷിക്കുന്നുണ്ടെന്നും ദുൽഖർ കൂട്ടിച്ചേർത്തു.
‘ഈ സിനിമയെക്കുറിച്ചും ഞങ്ങളെക്കുറിച്ചും അദ്ദേഹത്തിന് നല്ല അഭിപ്രായമാണ്. അങ്ങനെ ഒന്ന് അദ്ദേഹം പ്രതീക്ഷിച്ചിരുന്നില്ലെന്നാണ് എനിക്ക് തോന്നുന്നത്. സത്യം പറഞ്ഞാൽ കല്യാണിയുടെ അച്ഛനും ഇത് ഒട്ടും പ്രതീക്ഷിച്ചില്ല. വാപ്പച്ചിക്ക് സിനിമയുടെ നിർമാണച്ചെലവ് ഓർത്ത് ടെൻഷനുണ്ടായിരുന്നു. കല്യാണിയുടെ അച്ഛൻ എന്നെ വിളിച്ചിട്ട് പറഞ്ഞു, ‘നീ എന്താണ് കരുതുന്നത്, എന്തിനാണ് ഇത്രയും വലിയ റിസ്ക് നീ എടുത്തത്? നീ എടുത്തത് ഒരു ചെറിയ സിനിമയല്ല, ഒരു വലിയ സിനിമയാണ്.’ ഞാൻ പറഞ്ഞു, ‘എനിക്കറിയില്ല സർ, എനിക്ക് ശരിക്കും അറിയില്ല. ഈ സിനിമയുടെ ആശയത്തിൽ എനിക്ക് വിശ്വാസമുണ്ടായിരുന്നു’. ദുൽഖർ പറയുന്നു.
‘ഇപ്പോൾ ഞങ്ങൾക്ക് ഇഷ്ടമുള്ള രീതിയിൽ സിനിമകൾ ചെയ്യാൻ സ്വാതന്ത്ര്യം ലഭിച്ചെന്ന് ഞാൻ കരുതുന്നു. ഇപ്പോൾ അവർക്ക് ഞങ്ങളെ മനസ്സിലായി. ‘ഒരുപക്ഷേ നിങ്ങൾക്ക് അറിയാമായിരിക്കും നിങ്ങൾ എന്താണ് ചെയ്യുന്നതെന്ന്’ എന്നാണ് അവർ ഇപ്പോൾ പറയുന്നത്.’’–ദുൽഖർ പറയുന്നു
