വരുന്നത് ഓണം പൂവും പൂക്കളവും ഓണക്കോടിയും ഉഗ്രനൊരു സദ്യയും കൂടിയായാലേ ഓണം തികയുകയുള്ളൂ. സദ്യയുടെ കാര്യമാണെങ്കിൽ സ്വാദിന്റെ പൂർണ ആസ്വാദനത്തിലെത്തണമെങ്കിൽ നല്ലൊരു പായസം കൂടി വേണമല്ലേ? എങ്കിൽ ഇത്തവണ ഉഗ്രനൊരു പരിപ്പ് പ്രഥമൻ ആയാലോ?
വേണ്ട ചേരുവകൾ
ചെറുപയർ പരിപ്പ് 250 ഗ്രാം
ശർക്കര 500 ഗ്രാം
ഒന്നാം പാൽ 1 കപ്പ്
രണ്ടാം പാൽ 3 കപ്പ്
മൂന്നാം പാൽ 4 കപ്പ്
നെയ്യ് 5 ടേബിൾസ്പൂൺ
ഏലക്കായ പൊടി ½ ടീസ്പൂൺ
ചുക്കുപൊടി ½ ടീസ്പൂൺ
ജീരകപ്പൊടി ½ ടീസ്പൂൺ
കശുവണ്ടി 2 സ്പൂൺ
മുന്തിരി 2 സ്പൂൺ
നാളികേരക്കൊത്ത് 2 സ്പൂൺ
വെള്ളം
തയ്യാറാക്കുന്ന വിധം
ആദ്യം ശർക്കര ഒരു കപ്പ് വെള്ളം ചേർത്ത് ഉരുക്കി വയ്ക്കുക. പരിപ്പ് കഴുകി വെള്ളം വാർത്ത് എടുക്കുക. ഒരു ഉരുളിയിലേക്ക് നെയ് ചേർത്ത് ചൂടാക്കി പരിപ്പ് ചേർത്ത് വറുക്കുക. പരിപ്പ് ചെറുതായി ബ്രൗൺ കളർ ആയാൽ മൂന്നാം പാലിൽ വേവിക്കുക .(പാലിന് പകരം വെള്ളത്തിലും വേവിക്കാം ) പരിപ്പ് മൂടി വച്ച് വേവിക്കുക. പരിപ്പ് നന്നായി വെന്തു വന്നാൽ ശർക്കര പാനി ചേർത്ത് നന്നായി യോജിപ്പിച്ചു ,പരിപ്പും ശർക്കരയും വരട്ടി എടുക്കണം .ശേഷം രണ്ടാം പാൽ ചേർക്കാം .രണ്ടാം പാൽ ചേർത്ത് പായസം ഒന്ന് കുറുകി വന്നാൽ ഒന്നാം പാൽ ചേർക്കാം . ഒന്നാം പാൽ ചേർത്ത് നന്നായി ചൂടായി വന്നാൽ പായസം സ്റ്റവിൽ നിന്നും മാറ്റാം. ഇനി ഒരു ചെറിയ പാനിൽ നെയ് ഒഴിച്ച് ചൂടായാൽ കശുവണ്ടിയും മുന്തിരിയും വറുത്ത് കോരി മാറ്റാം . ഇതേ നെയ്യിലേക്ക് തേങ്ങാക്കൊത്ത് ചേർത്ത് വറുത്തെടുക്കണം .വറുത്തെടുത്ത തേങ്ങാക്കൊത്തും കശുവണ്ടി,മുന്തിരി എന്നിവ പായസത്തിൽ ചേർത്ത് കൊടുക്കാം .പായസത്തിലേക്കു ഏലക്കായ പൊടി,ചുക്കുപൊടി,ജീരകപ്പൊടി എന്നിവ കൂടി ചേർത്തു യോജിപ്പിച്ചാൽ ടേസ്റ്റി ആയ പരിപ്പ് പ്രഥമൻ തയ്യാർ….
