മലയാള സിനിമ വേണ്ടവിധത്തിൽ പരിഗണിക്കാതെ പോയ കലാകാരന്മാരിൽ ഒരാളാണ് നടി സീനത്ത്. ചെറുതും വലുതുമായ ഒരുപിടി കഥാപാത്രങ്ങൾ ചെയ്ത സീനത്ത് ഇന്നും ഇൻഡസ്ട്രിയുടെ ഭാഗമാണെങ്കിലും അർഹിക്കുന്ന കഥാപാത്രങ്ങൾ മലയാളം അവർക്ക് നൽകിയിട്ടുണ്ടോ എന്ന കാര്യം സംശയമാണ്. സിനിമയിൽ വേണ്ടവിധത്തിൽ സൗഹൃദങ്ങൾ കാത്തു സൂക്ഷിക്കാത്തതിനാലാവാം വേഷങ്ങൾ കുറഞ്ഞതെന്നും സിനിമയിൽ നല്ലൊരു വേഷം ലഭിക്കാത്തതിൽ ഇപ്പോഴും തനിക്ക് വിഷമമുണ്ടെന്നും ഇക്കഴിഞ്ഞ ദിവസം ഒരു യൂട്യൂബ് ചാനലിന് നൽകിയ അഭിമുഖത്തിൽ താരം വ്യക്തമാക്കിയിരുന്നു. ഇപ്പോഴിതാ ഒരു നടിഎന്ന നിലയിൽ തനിക്ക് ലഭിക്കേണ്ട പരിഗണനയും മര്യാദയും ലഭിക്കാത്ത ഇടങ്ങളിൽ നിന്നും താൻ ഇറങ്ങി വന്നിട്ടുണ്ടെന്നും തന്റെ അവസരങ്ങൾ മനപ്പൂർവ്വം നഷ്ടപ്പെടുത്തിയവരോട് തുറന്നു ചോദിച്ചിട്ടുണ്ടെന്നും പറയുകയാണ് നടി.
സംവിധായകൻ വിനയന്റെ സെറ്റിൽ നിന്നാണ് താൻ ഇത്തരത്തിൽ ഇറങ്ങി വന്നതെന്ന് സീനത്ത് പറയുന്നു. താൻ ചെന്നപ്പോൾ അവർ റൂം അലോട്ട് ചെയ്തിരുന്നില്ല എന്നും വൈകുന്നേരമേ റൂം ശരിയാകുവുള്ളൂ എന്നു പറഞ്ഞപ്പോൾ ഇറങ്ങിപ്പോരുകയായിരുന്നുവെന്നും സീനത്ത് പറയുന്നു. ഇക്കാര്യം യഥാർത്ഥത്തിൽ സംവിധായകൻ അറിഞ്ഞിരുന്നില്ല എന്നും തന്റെ സീൻ എടുക്കാൻ ഇരിക്കെയായിരുന്നു ഇറങ്ങിപ്പോരുന്നത് എന്നും നടി പറയുന്നു. സത്യം പറഞ്ഞാൽ ഇത്തരത്തിൽ ഇറങ്ങി പോരാൻ പാടില്ലായിരുന്നുവെന്നും പറയേണ്ടത് തുറന്ന്പറയണമെന്നും നടി പറയുന്നു. അന്ന്കുറച്ച് സമയം കഴിഞ്ഞപ്പോൾ തനിക്ക് കുറ്റബോധം തോന്നി. സംവിധായകനെ വിളിച്ച് കാര്യം പറഞ്ഞുവെന്നും നടി പറയുന്നു.
അതേസമയം സിനിമയിലെ തന്റെ വേഷങ്ങൾ നഷ്ടപ്പെടുത്തുന്നവരെ കുറിച്ചും താരം തുറന്നു പറഞ്ഞു. ‘എന്നെ വിളിച്ച പടങ്ങൾ വേറെ ആൾക്കാർ ചെയ്തിട്ടുണ്ട്. നല്ല റോളുകളാണ് പോയത്. സംവിധായകൻ നമ്മളെ വിളിക്കാൻ പറഞ്ഞിട്ടും വിളിച്ചിട്ടില്ല. ആരാണ് അത് ചെയ്യുന്നതെന്നറിയില്ല. അത് കാണുമ്പോൾ ഭയങ്കര സങ്കടം വരും. ചില നടന്മാർക്കും ആ സ്വഭാവം ഉണ്ട്’.
ഇത്തരത്തിൽ ഒരു നടനെ തനിക്ക് വളരെ വ്യക്തമായി അറിയാമെന്ന് പറഞ്ഞ നടി ‘നിങ്ങൾ വളരെ മോശമാണ് ചെയ്യുന്നതെന്ന്’ അയാളോട് താൻ നേരിട്ട് പറഞ്ഞിട്ടുണ്ടെന്നും വ്യക്തമാക്കി. നടന്റെ പേര് പറയുന്നില്ല. പക്ഷേ അയാളോട് നേരിട്ട് പറഞ്ഞിട്ടുണ്ട്. ഡയറക്ടറോട് വേറെ എന്തെങ്കിലും പറഞ്ഞ് നമ്മളെ ഒഴിവാക്കും. ഒരു പടമല്ല, ഈയടുത്തകാലത്ത് വരെ ചെയ്തു.’- നടി വ്യക്തമാക്കി
