ന്യൂഡൽഹി: മദ്രസകൾക്കെതിരെ രൂക്ഷമായി സംസാരിച്ച് യതി നരസിംഹാനന്ദ. അലിഗഡ് മുസ്ലിം സർവകലാശാലയും മദ്രസകളും തകർത്ത് കളയണമെന്നാണ് യതി നരസിംഹാനന്ദ ആഹ്വാനം ചെയ്തത്. ഹിന്ദു മഹാസഭാസമ്മേളനത്തിലാണ് മദ്രസകൾ വെടിമരുന്ന് കൊണ്ട് തകർക്കണമെന്ന് യതി നരസിംഹാനന്ദ പറഞ്ഞത്.
പ്രസ്താവനയെ തുടർന്ന് യതി നരസിംഹാനന്ദക്കെതിരെ പോലീസ് കേസെടുത്തു. വിദ്വേഷ പരാമർശം നടത്തിയെന്ന് കണ്ടെത്തിയതിനെ തുടർന്നാണ് പോലീസ് കേസെടുത്തത്. കഴിഞ്ഞ ദിവസം അലിഗഡിൽ വെച്ചാണ് ഹിന്ദു മഹാസഭയുടെ പരിപാടി നടന്നത്. ഉത്തർപ്രദേശ് സർക്കാർ അംഗീകാരമില്ലാത്ത മദ്രസകൾക്കെതിരെ നടപടി സ്വീകരിക്കുമെന്ന് അറിയിച്ചിരുന്നു. ഉത്തർപ്രദേശ് സർക്കാരിന്റെ ഈ തീരുമാനത്തോട് പ്രതികരിക്കുകയായിരുന്നു യതി നരസിംഹാനന്ദ.
യതി നടത്തിയ വിവാദപരാമർശം ഉൾപ്പെടുന്ന വീഡിയോ ഇതിനോടകം പ്രചരിച്ചിരുന്നു. മദ്രസകൾ ചൈന ചെയ്തത് പോലെ നശിപ്പിച്ച് കളയണമെന്നും അവിടെ പഠിക്കുന്ന വിദ്യാർത്ഥികളെ ക്യാമ്പുകളിലേക്ക് മാറ്റണമെന്നും യതി നരസിംഹാനന്ദ പറഞ്ഞു. ഇങ്ങനെ ചെയ്താൽ ഖുർആൻ എന്ന വൈറസ് ഇവിടെ നിന്ന് പോകുമെന്നും യതി നരസിംഹാനന്ദ കൂട്ടിച്ചേർത്തു.
മുൻപും യതി നരസിംഹാനന്ദ ഇത്തരത്തിൽ വിദ്വേഷപ്രസംഗം നടത്തിയിട്ടുണ്ട്. ഇയാൾക്കെതിരെ കേസെടുത്തതായി പോലീസ് സൂപ്രണ്ട് കുൽദീപ് സിങ് ഗുനാവത് പറഞ്ഞതായി മാധ്യമങ്ങൾ റിപ്പോർട്ട് ചെയ്തു. ഒരു കോടിയോളം ഹിന്ദു കൊലപാതകത്തിന് ഉത്തരവാദി മഹാത്മാ ഗാന്ധിയാണെന്ന് അടുത്തിടെ യതി നരസിംഹാനന്ദ നടത്തിയ പ്രസംഗത്തിനെതിരെ പോലീസ് കേസ് രജിസ്റ്റർ ചെയ്തിരുന്നു. രാഹുൽ ഗാന്ധി എന്നും ജിഹാദികൾക്കൊപ്പമാണെന്നും ഉത്തർപ്രദേശിൽ മത്സരിക്കാൻ കഴിയാതെ വന്നപ്പോഴാണ് കേരളത്തിൽ പോയി മത്സരിച്ചതെന്നും യതി നരസിംഹാനന്ദ നേരത്തെ പ്രസംഗിച്ചത് വിവാദമായിരുന്നു.
