നിങ്ങളുടെ പ്രായം 30 കഴിഞ്ഞോ, ബാധ്യതകളും കുടുംബത്തിന്റെ സന്തോഷത്തിനുമായി ഓടുന്നതിനിടയിൽ സ്വന്തം യുവത്വവും മാനസിക ആരോഗ്യവും സന്തോഷവും നഷ്ട്ടപ്പെടുന്നതായി തോന്നുന്നുണ്ടോ?. മുപ്പതുകഴിയുമ്പോൾ ഒരുപാട് ഹോർമോൺ പ്രവർത്തനങ്ങൾ ശരീരത്തിൽ നടക്കുന്നുണ്ട്. കൂടാതെ ജീവിതം, ജോലി, ബന്ധങ്ങൾ എല്ലാത്തിൽ നിന്നും ഉണ്ടായേക്കാവുന്ന വിവിധ മാനസിക സമ്മർദ്ദങ്ങളും ആശയക്കുഴപ്പങ്ങളും സ്വാഭാവികമാണ്.
ഇതുകൂടുതലും ബാധിക്കുക സ്ത്രീകളെയാണ്. കുട്ടികൾ, വീട്, പാചകം , ജോലി എന്നിങ്ങനെ തിരക്കുപിടിച്ചു ജീവിക്കുന്ന ഇവർ പലപ്പോഴും ഊണും ഉറക്കവും ചുറ്റുമുള്ളവർക്കായി ത്യജിച്ചാണ് പലപ്പോഴും പല കാര്യങ്ങളും ചെയ്യുക. എന്നാൽ ഇതിലെല്ലാം പ്രതിഷേധിക്കുന്ന ശരീരം മുടിക്കൊഴിച്ചിൽ, അമിത വണ്ണം, അകാലനര എന്നിവ ഉണ്ടാക്കി തിരിച്ചു ബുദ്ധിമുട്ടിക്കുകയും ചെയ്യും. ഇക്കാര്യങ്ങൾ പുരുഷരിലും സ്ത്രീകളിലും ഒരുപോലെ ഉണ്ടാകുന്നു എന്നതാണ് വസ്തുത.
എല്ലാ പ്രശ്നങ്ങൾക്ക് പരിഹാരമായി ചെയ്യേണ്ടത്, ആദ്യം ജീവിതശൈലിയിൽ ഒരു ക്രമീകരണം കൊണ്ടുവരിക എന്നതാണ്. പോഷകഘടകങ്ങൾ അടങ്ങിയ ഭക്ഷണങ്ങൾ കഴിക്കുന്നതിൽ യാതൊരു വിട്ടുവീഴ്ചയും ചെയ്യരുത്, കൃത്യമായൊരു സമയം കണ്ടെത്തി വ്യായാമം ചെയ്യുക, എല്ലാ ദിവസം രണ്ട് ലിറ്റർ വെള്ളം കുടിക്കണം.
35 വയസ് കഴിയുമ്പോൾ പ്രായം കൂടിവരുന്നത് അനുഭവപ്പെടാൻ തുടങ്ങും. 35 വയസ് കഴിയുമ്പോ‌‌ഴാണ് കാല് വേദന, മുട്ടുവേദന, നടുവേദന എന്നിവ കൂടുതലായും ഉണ്ടാകുന്നത്. ഈ സമയത്ത്, ഹീമോഗ്ലോബിൻ, കാത്സ്യം, വിറ്റാമിൻ ഡി എന്നിവ കൃത്യമായി പരിശോധിക്കാൻ ശ്രദ്ധിക്കണം. ഇത് മാസത്തിലൊരിക്കലോ രണ്ട് മാസത്തിലൊരിക്കലോ നോക്കാൻ ശ്രദ്ധിക്കണം. അതിനനുസരിച്ച് ഭക്ഷണക്രമത്തിൽ മാറ്റങ്ങൾ കൊണ്ടുവരേണ്ടതുണ്ട്.
എന്താണോ ചെയ്യാൻ ഇഷ്ടമുള്ള കാര്യം അത് ചെയ്യാനായി കുറച്ച് സമയം മാറ്റിവയ്‌ക്കുക. എല്ലാ ദിവസവും 15 മിനിറ്റ് സ്വന്തം കാര്യങ്ങൾക്കായി മാറ്റിവയ്‌ക്കുന്നത് മാനസിക ഉല്ലാസത്തിനായി സഹായിക്കും. അനാവശ്യമായ ചിന്തകളും വിഷമങ്ങളും ഒഴിവാക്കി നല്ല കാര്യങ്ങൾ മാത്രം ചിന്തിക്കുക. മനസിന് സമാധാനം ഉണ്ടായാൽ ശരീരത്തിന്റെയും മനസിന്റെയും ആരോഗ്യത്തിന് ഗുണം ചെയ്യുമെന്നാണ് ആരോഗ്യ വിദഗ്ധർ പറയുന്നത്.
