Supernova സ്ഫോടനത്തിന്റെ അവശിഷ്ടമാകാമെന്ന് കരുതുന്ന തിളങ്ങുന്ന എക്സ്-റേ പാടം ക്ഷീരപഥത്തിന്റെ മധ്യഭാഗത്ത് കണ്ടെത്തി. NASAയുടെ Chandra X-ray Observatory ശേഖരിച്ച വിവരങ്ങൾ ഉപയോഗിച്ചാണ് ഗവേഷകർ ഈ കണ്ടെത്തൽ നടത്തിയത്.
ക്ഷീരപഥത്തിന്റെ കേന്ദ്ര മേഖലയായ Sagittarius Cയിലാണ് ഈ എക്സ്-റേ പാടം കണ്ടെത്തിയത്. ഭൂമിയിൽ നിന്ന് ഏകദേശം 26,000 പ്രകാശവർഷം അകലെയുള്ള ഈ പ്രദേശം നക്ഷത്ര രൂപീകരണം സജീവമായി നടക്കുന്ന മേഖലയാണ്.
ഗവേഷകരുടെ വിലയിരുത്തൽ പ്രകാരം, കുറഞ്ഞത് 1,700 വർഷങ്ങൾക്ക് മുമ്പ് ഒരു ഭീമൻ നക്ഷത്രം പൊട്ടിത്തെറിച്ചുണ്ടായ സൂപ്പർനോവയുടെ അവശിഷ്ടമായിരിക്കാം ഈ എക്സ്-റേ വികിരണ മേഖല. മണിക്കൂറിൽ ഏകദേശം 20 ലക്ഷം മൈൽ വേഗത്തിൽ ഇത് വികസിച്ചുകൊണ്ടിരിക്കുകയാണെന്നും പഠനം സൂചിപ്പിക്കുന്നു.
സൂപ്പർനോവ സ്ഫോടനങ്ങളിൽ രൂപംകൊള്ളുന്ന മൂലകങ്ങളുടെ സാന്നിധ്യം കണ്ടെത്താൻ ഗവേഷകർ ശ്രമിച്ചെങ്കിലും വ്യക്തമായ തെളിവുകൾ ലഭിച്ചില്ല. എങ്കിലും അവശിഷ്ടങ്ങൾ ചുറ്റുമുള്ള വാതകമേഘങ്ങളുമായി കലർന്നിരിക്കാമെന്നാണ് ശാസ്ത്രജ്ഞരുടെ നിഗമനം.
