ലഷ്കർ-ഇ-തയ്ബ (LeT) ബന്ധമുള്ള അന്തർദേശീയ നാർക്കോ-ടെറർ ശൃംഖല കേസിൽ പഞ്ചാബിലെ അമൃത്സറിലുള്ള ഒരു വീട് ദേശീയ അന്വേഷണ ഏജൻസി (NIA) അറ്റാച്ച് ചെയ്തു. കേസിലെ പ്രതിയായ അങ്കുഷ് കപൂറിന്റെ പിതാവിന്റെ പേരിൽ രജിസ്റ്റർ ചെയ്തിരിക്കുന്ന സ്വത്താണ് അന്വേഷണത്തിന്റെ ഭാഗമായി എൻഐഎ പിടിച്ചെടുത്തത്.
ഇറ്റലി, ഓസ്ട്രേലിയ, ഇറാൻ, തായ്ലൻഡ്, യു.എ.ഇ., പാകിസ്ഥാൻ എന്നിവിടങ്ങളിലേക്ക് വ്യാപിച്ചുകിടക്കുന്ന മയക്കുമരുന്ന്-തീവ്രവാദ ശൃംഖലയിലെ ഇന്ത്യയിലെ പ്രധാന കണ്ണിയാണ് അങ്കുഷ് കപൂർ എന്ന് എൻഐഎ വ്യക്തമാക്കി. ദുബായ് ആസ്ഥാനമായി പ്രവർത്തിക്കുന്ന, നിരോധിത തീവ്രവാദ സംഘടനയായ ലഷ്കർ-ഇ-തയ്ബയുമായി ബന്ധമുള്ള പ്രതിയുമായി അങ്കുഷിന് അടുത്ത ബന്ധമുണ്ടായിരുന്നുവെന്നും അന്വേഷണത്തിൽ കണ്ടെത്തി.
മയക്കുമരുന്ന് കടത്ത്, സംഭരണം, വിതരണം എന്നിവയ്ക്കൊപ്പം ഭീകരപ്രവർത്തനങ്ങൾക്ക് സാമ്പത്തിക സഹായം എത്തിക്കുന്നതിനായി സമാഹരിച്ച പണം വിവിധ രാജ്യങ്ങളിലേക്ക് കൈമാറുന്നതിലും അങ്കുഷിന് പങ്കുണ്ടായിരുന്നുവെന്നാണ് എൻഐഎയുടെ കണ്ടെത്തൽ. മയക്കുമരുന്ന് വ്യാപാരത്തിലൂടെ ലഭിച്ച വരുമാനം ഇന്ത്യയിലെ തീവ്രവാദ പ്രവർത്തനങ്ങൾക്ക് ഉപയോഗിച്ചിരുന്നുവെന്നും ഏജൻസി വ്യക്തമാക്കി.
കേസിൽ ഇതുവരെ 26 പ്രതികൾക്കെതിരെ കുറ്റപത്രം സമർപ്പിച്ചിട്ടുണ്ടെന്നും അന്വേഷണം തുടരുകയാണെന്നും എൻഐഎ അറിയിച്ചു.
