മുന്‍ഗണനാ കാര്‍ഡുകളുടെ വിതരണം ആരംഭിച്ചു.

സംസ്ഥാനത്ത് അനര്‍ഹമായി മുന്‍ഗണനാ കാര്‍ഡുകള്‍ കൈവശം വച്ചിരിക്കുന്നവരോട് സ്വമേധയാ അത്തരം കാര്‍ഡുകള്‍ തിരികെ നല്‍കണമെന്ന സര്‍ക്കാരിന്റെ അഭ്യര്‍ത്ഥനമാനിച്ച് 1,42,187 മുന്‍ഗണനാകാര്‍ഡുകള്‍ തിരികെ ലഭിച്ചു.
അതില്‍ 11587 AAY കാര്‍ഡുകളും, 74,626 PHH കാര്‍ഡുകളും, 55,974 NPS കാര്‍ഡുകളുമാണ്. സര്‍ക്കാരിലേക്ക് സറണ്ടര്‍ ചെയ്ത 11,000 ത്തോളം AAY കാര്‍ഡുകള്‍ ക്യാന്‍സര്‍, കിഡ്നി, ഓട്ടിസം ബാധിച്ച അംഗങ്ങള്‍ ഉള്‍പ്പെട്ട കുടുംബങ്ങളെ കണ്ടെത്തി ആഗസ്റ്റ് മാസം മുതല്‍ വിതരണം ചെയ്തിരുന്നു.

പി എച്ച് എച്ച് കാര്‍ഡുകളുടെ വിതരണത്തിന്റെ സംസ്ഥാനതല ഉദ്ഘാടനം ഇന്നലെ തിരുവനന്തപുരം അയ്യങ്കാളി ഹാളില്‍ നടന്ന ചടങ്ങില്‍ ധനകാര്യവകുപ്പ് മന്ത്രി കെ.എന്‍ ബാലഗോപാല്‍ നിര്‍വഹിച്ചു.

തിരുവനന്തപുരം ജില്ലയിലെ വിവിധ താലൂക്കുകളിലെ അര്‍ഹരായവര്‍ക്ക് മുന്‍ഗണനാ കാര്‍ഡുകള്‍ വിതരണം ചെയ്തു. സംസ്ഥാനത്തെ ഓരോ നിയോജക മണ്ഡലത്തിലെയും വിവിധ താലൂക്കുകളില്‍ ബന്ധപ്പെട്ട എം.എല്‍.എമാര്‍ വരും ദിവസങ്ങളില്‍ മുന്‍ഗണനാ കാര്‍ഡുകള്‍ വിതരണം ചെയ്യുന്നതിന് നടപടി സ്വീകരിച്ചിട്ടുണ്ട് എന്ന് G.R. അനിൽ.

പൊലീസ് പരിശീലനകാലത്ത് തന്നെ കൃത്യനിര്‍വഹണത്തിന് ഇറങ്ങാൻ കഴിഞ്ഞത് അഭിമാനകരം : മുഖ്യമന്ത്രി പിണറായി വിജയൻ

ഔദ്യോഗിക പരിശീലനകാലത്ത് തന്നെ പൊലീസ് ഡ്യൂട്ടിയിൽ പ്രവേശിക്കാനായത് അഭിമാനകരമെന്ന് മുഖ്യമന്ത്രി പിണറായി വിജയന്‍. പുതുതായി പരിശീലനം പൂര്‍ത്തീകരിച്ച 2345 കോണ്‍സ്റ്റബിള്‍മാരുടെ സത്യപ്രതിജ്ഞാ ചടങ്ങില്‍ സല്യൂട്ട് സ്വീകരിച്ച് സംസാരിക്കുകയായിരുന്നു മുഖ്യമന്ത്രി. കോവിഡ് മഹാമാരിയുടെ പശ്ചാത്തലത്തില്‍ കഴിഞ്ഞ ഡിസംബര്‍ 2ന് സംസ്ഥാനത്തെ വിവിധ കേന്ദ്രങ്ങളിലായി പരിശീലനം നല്‍കിയ ബാച്ചിന് ട്രെയിനിംഗ്
കാലയളവില്‍ മാതൃ പൊലീസ് സ്റ്റേഷനുകളില്‍ ഡ്യൂട്ടിക്ക് നിയോഗിച്ചിരുന്നു. ഈ നടപടി പൊലീസ് കൃത്യനിര്‍വഹണ ബോധം വളര്‍ത്തുന്നതിനും കൂടുതല്‍ ഉത്തരവാദിത്വത്തോടെ ജോലിയെ നോക്കിക്കാണാനും സഹായിച്ചെന്നും മുഖ്യമന്ത്രി കൂട്ടിചേര്‍ത്തു.

മുന്‍കാലങ്ങളില്‍ പൊലീസ് കോണ്‍സ്റ്റബിള്‍മാരുടെ പരിശീലനം വിവിധ ബറ്റാലിയനുകളിലായാണ് നടന്നിരുന്നത്. എന്നാല്‍ ഇന്റഗ്രേറ്റഡ് പൊലീസ് റിക്രൂട്ട് ട്രെയിനിംഗ് സെന്ററിന് കീഴില്‍ പരിശീലനം ആരംഭിച്ചതോടെ തൃശൂര്‍ ആസ്ഥാനമാക്കി ഓണ്‍ലൈന്‍ ഇന്റോര്‍ ക്ലാസുകളും അതാത് ബറ്റാലിയനുകളില്‍ പ്രത്യേക സിലബസില്‍ ഔട്ട് ഡോര്‍ ക്ലാസുകളും നടത്തി.

തൃശൂര്‍ രാമവര്‍മ്മപുരത്ത് കേരള പൊലീസ് അക്കാദമിയില്‍ നടന്ന പാസിംഗ്ഔട്ട് പരേഡില്‍ ഒമ്പത് മാസത്തെ പരിശീലനം പൂര്‍ത്തീകരിച്ച 353 കോണ്‍സ്റ്റബിള്‍മാരാണ് സത്യപ്രതിജ്ഞ ചെയ്തത്. ഇന്റഗ്രേറ്റഡ് പൊലീസ് റിക്രൂട്ട് ട്രെയിനിംഗ് സെന്ററിനും കേരള പൊലീസ് അക്കാദമിക്കും
കീഴില്‍ പരിശീലനം പൂര്‍ത്തീകരിച്ച രണ്ടാമത്തെ ബാച്ചാണിത്. തൃശൂര്‍ ഉള്‍പ്പെടെ മലപ്പുറം, തിരുവനന്തപുരം, എറണാകുളം, പാലക്കാട്, പത്തനംതിട്ട,
കണ്ണൂര്‍ ജില്ലകളിലും ഒരേ സമയം ഓണ്‍ലൈനായി സത്യപ്രതിജ്ഞ ചടങ്ങ് നടന്നു.

തൃശൂര്‍ രാമവര്‍മ്മപുരം പൊലീസ് പരേഡ് ഗ്രൗണ്ടില്‍ നടന്ന ചടങ്ങില്‍ ഐപിആര്‍ടിസി ഡയറക്ടര്‍ ഐജി പി വിജയന്‍ അഭിവാദ്യം സ്വീകരിച്ചു. കേരള പൊലീസ് അക്കാദമി അസിസ്റ്റന്റ് ഡയറക്ടര്‍മാറായ ഷൗക്കത്ത് അലി, ടി കെ സുബ്രമണ്യന്‍, എല്‍ സോളമന്‍, എസ് നജീബ്, അസിസ്റ്റന്റ് കമാന്ററായ ബോസ്‌കോ, കേരള പൊലീസ് അക്കാദമിയിലെയും ഐപിആര്‍ടിസിയിലെയും അസിസ്റ്റന്റ് കമാന്റര്‍മാരും അക്കാദമി ഡി വൈ എസ് പിമാരും പങ്കെടുത്തു.

ഊരിന്റെ ഉള്ളറിഞ്ഞ് കരിമ്പ്,
ആനപ്പാന്തം ഊരിലെ ദൃശ്യകലാ ക്യാമ്പിന് സമാപനം

ആനപ്പാന്തം ഊരിലെ കുരുന്നുകളില്‍ ചിരിയും ചിന്തയും ഉണര്‍ത്തിയ കരിമ്പ് ദൃശ്യകലാ ക്യാമ്പിന് ആഘോഷ പൂര്‍ണമായ പര്യവസാനം. കോവിഡ് മഹാമാരി കാലത്ത് കുട്ടികളിലെ വിരസത അകറ്റാനും മാനസിക സമ്മര്‍ദ്ദം കുറയ്ക്കാനുമായാണ് ചാലക്കുടി ഫോറസ്റ്റ് ഡിവിഷന്‍, വെള്ളിക്കുളങ്ങര ഫോറസ്റ്റ് റേഞ്ച് പരിധിയിലെ ആനപ്പാന്തം ഊരില്‍ അഞ്ച് ദിവസം നീണ്ടുനില്‍ക്കുന്ന ദൃശ്യകലാ ക്യാമ്പ് സംഘടിപ്പിച്ചത്. കാലടി സംസ്‌കൃത സര്‍വ്വകലാശാല ദൃശ്യകലാ വിഭാഗം പൂര്‍വ വിദ്യാര്‍ത്ഥി കൂട്ടായ്മയായ ട്രസ്പാസേഴ്സിന്റെ സഹകരണത്തോടെ നാല് മുതല്‍ പന്ത്രണ്ട് വരെയുള്ള ക്ലാസിലെ കുട്ടികള്‍ക്കായാണ് ക്യാമ്പ് നടത്തിയത്. ഊരിലെ 68 കുടുംബങ്ങളില്‍ നിന്നുള്ള 30 കുട്ടികള്‍ ക്യാമ്പില്‍ പങ്കെടുത്തു.

കളിമണ്‍ രൂപങ്ങളുടെ നിര്‍മാണം, ചിത്രകല എന്നീ ഇനങ്ങള്‍ കരിമ്പിന്റെ പ്രധാന ആകര്‍ഷകങ്ങളായിരുന്നു. കളിയും പാട്ടും നിറഞ്ഞതായിരുന്നു ക്യാമ്പിന്റെ ആദ്യ ദിനം. ആക്ടിവിറ്റി ഗെയിം എന്ന് പേരിട്ട സെഷന്‍ കുട്ടികളുടെ പങ്കാളിത്തം കൊണ്ട് ശ്രദ്ധേയമായി. കുട്ടികളിലെ പരസ്പര അപരിചിതത്വം മാറ്റി ക്യാമ്പിന്റെ ഭാഗമാക്കാന്‍ ഇതിലൂടെ സാധിച്ചു. പെന്‍സില്‍ ഡ്രോയിങിനായി പ്രത്യേക സെഷനും ക്യാമ്പില്‍ ഉള്‍പ്പെടുത്തിയിരുന്നു. നിറങ്ങളുടെ വ്യത്യാസം, അതിന്റെ സ്വഭാവം തുടങ്ങി വിവരങ്ങളില്‍ കുട്ടികളില്‍ ധാരണയുണ്ടാക്കാന്‍ ഈ സെഷന്‍ സഹായകമായി.

ക്യാമ്പിന്റെ രണ്ടാം ദിവസം പ്രകൃതിദത്തമായി ചായങ്ങള്‍ എങ്ങനെ ഉണ്ടാക്കാം, പ്രയോഗിക്കാം എന്നത് സംബന്ധിച്ചായിരുന്നു പരിശീലനം. പ്രകൃതിദത്തമായ ചായങ്ങള്‍ ഉപയോഗിച്ചുള്ള സ്വന്തം ചിത്രങ്ങള്‍ കുട്ടികളില്‍ ആത്മവിശ്വാസം ഉയര്‍ത്തി. ക്യാമ്പിന്റെ മൂന്നാം നാള്‍ മുതലാണ് ചുമര്‍ചിത്ര രചന ആരംഭിച്ചത്. ഊരിന്റെ നിഷ്‌കളങ്കതയും തനിമയും വിളിച്ചോതുന്ന രചനകള്‍ ക്യാമ്പിനെ വേറിട്ടുനിര്‍ത്തി. ഇതിന് പുറമെ ക്യാമ്പിന്റെ ഭാഗമായി കാടാര്‍ വിഭാഗത്തിന്റെ തനത്വിഭവങ്ങളായ ചാമയരിപായസം, കൂവയില അട, കപ്പലണ്ടി പുഴുങ്ങിയത് എന്നിവ ഊരിലെ കുട്ടികള്‍ക്കായി വിതരണം
ചെയ്തു.

കരിമ്പിന്റെ സമാപന ചടങ്ങ് മറ്റത്തൂര്‍ പഞ്ചായത്ത് പ്രസിഡന്റ് അശ്വതി വിബി ഉദ്ഘാടനം ചെയ്തു. പീച്ചി വൈല്‍ഡ് ലൈഫ് വാര്‍ഡന്‍ പി എം പ്രഭു ചടങ്ങില്‍ മുഖ്യാതിഥിയായി. പഞ്ചായത്ത് അംഗം ചിത്ര സുരാജ് അധ്യക്ഷത വഹിച്ചു. ചാലക്കുടി ഡിവിഷന്‍ ഫോറസ്റ്റ് റേഞ്ച് ഓഫീസര്‍ സംബുദ്ധ മജുംദാര്‍, പാലപ്പിള്ളി റേഞ്ച് ഫോറസ്റ്റ് ഓഫീസര്‍ പ്രേം ഷമീര്‍, പഞ്ചായത്ത് ആരോഗ്യ-വിദ്യാഭ്യാസ സ്ഥിരം സമിതി അംഗം ദിവ്യ സുധീഷ്, മുന്‍ പഞ്ചായത്ത് അംഗം ജോയ് കാവുങ്ങല്‍, ആനപ്പാന്തം വനസംരക്ഷണ സമിതി സെക്രട്ടറി സി ജെ ഗ്രീഷ്മ തുടങ്ങിയവര്‍ പങ്കെടുത്തു. ഊരിലെ കുട്ടികളില്‍ എസ്എസ്എല്‍സി പരീക്ഷയില്‍ മുഴുവന്‍ വിഷയങ്ങളിലും എ പ്ലസ് നേടിയ അഞ്ജന മോഹനെയും പ്ലസ്ടു പരീക്ഷയില്‍ 90 ശതമാനം മാര്‍ക്ക് നേടിയ ഐശ്വര്യ മോഹനെയും ചടങ്ങില്‍ ആദരിച്ചു.

സംസ്ഥാനത്ത് ഒക്‌ടോബര്‍ ഒന്ന് മുതല്‍ കുഞ്ഞുങ്ങള്‍ക്കായി പുതിയൊരു വാക്‌സിനേഷന്‍ കൂടി ആരംഭിക്കുകയാണ്. യൂണിവേഴ്‌സല്‍ ഇമ്മ്യൂണൈസേഷന്‍ പരിപാടിയുടെ ഭാഗമായി പുതുതായി ഉള്‍പ്പെടുത്തിയ ന്യൂമോകോക്കല്‍ കോണ്‍ജുഗേറ്റ് വാക്‌സിന്‍ (പിസിവി) ആണ് അടുത്ത മാസം മുതല്‍ നല്‍കിത്തുടങ്ങുന്നത്. സംസ്ഥാനതല വാക്‌സിനേഷന്‍ തൈക്കാട് സ്ത്രീകളുടേയും കുട്ടികളുടേയും ആശുപത്രിയില്‍ ഒക്‌ടോബര്‍ ഒന്നിന് രാവിലെ 8 മണിക്ക് ആരംഭിക്കും. ജില്ലകളില്‍ അടുത്ത വാക്‌സിനേഷന്‍ ദിനം മുതല്‍ ഈ വാക്‌സിന്‍ ലഭ്യമാകുന്നതാണ്.

ന്യൂമോകോക്കല്‍ രോഗത്തിനെതിരെ ഒന്നര മാസം പ്രായമുള്ള എല്ലാ കുട്ടികള്‍ക്കും ന്യൂമോകോക്കല്‍ കോണ്‍ജുഗേറ്റ് വാക്‌സിന്‍ നല്‍കണം. കുഞ്ഞിന് ഒന്നര മാസത്തില്‍ മറ്റ് വാക്‌സിനെടുക്കാനുള്ള സമയത്ത് മാത്രം പിസിവി നല്‍കിയാല്‍ മതി. ഈ വാക്‌സിന്റെ ആദ്യ ഡോസ് എടുക്കാനുള്ള ഉയര്‍ന്ന പ്രായപരിധി ഒരു വയസാണ്. ഒന്നരമാസത്തെ ആദ്യ ഡോസിന് ശേഷം മൂന്നര മാസം 9 മാസം എന്നിങ്ങനെയാണ് വാക്‌സിന്‍ നല്‍കേണ്ടത്. ആദ്യ മാസം 40,000 കുഞ്ഞുങ്ങള്‍ക്ക് വാക്‌സിന്‍ നല്‍കാനാണ് ലക്ഷ്യമിടുന്നത്. ഒരു വര്‍ഷം കൊണ്ട് 4.8 ലക്ഷം കുഞ്ഞുങ്ങള്‍ക്ക് വാക്‌സിന്‍ നല്‍കുന്നതാണ്. ഈ മാസത്തേക്കേവാവശ്യമായ 55,000 ഡോസ് വാക്‌സിന്‍ ലഭ്യമായിട്ടുണ്ട്. അത് എല്ലാ ജില്ലകളിലും വിതരണം ചെയ്തു കഴിഞ്ഞു.

സ്‌ട്രെപ്‌റ്റോ കോക്കസ് ന്യുമോണിയ അഥവാ ന്യൂമോ കോക്കസ് എന്ന രോഗാണു പരത്തുന്ന ഒരുകൂട്ടം രോഗങ്ങളെയാണ് ന്യൂമോകോക്കല്‍ രോഗം എന്ന് വിളിക്കുന്നത്. ന്യൂമോകോക്കസ് ബാക്ടീരിയ മൂലമുണ്ടാകുന്ന ന്യൂമോണിയ, മെനിന്‍ജൈറ്റിസ് എന്നിവയില്‍ നിന്നും കുഞ്ഞുങ്ങള്‍ക്ക് ഈ വാക്‌സിന്‍ സംരക്ഷണം നല്‍കും. ഈ രോഗാണു ശരീരത്തിന്റെ പല ഭാഗങ്ങളിലായി വ്യാപിച്ച് പല തരത്തിലുള്ള രോഗങ്ങള്‍ ഉണ്ടാക്കാം. ഗുരുതരമായ ശ്വാസകോശ അണുബാധയുടെ ഒരു രൂപമാണ് ന്യൂമോകോക്കല്‍ ന്യൂമോണിയ. അഞ്ച് വയസിന് താഴെയുള്ള കുട്ടികളുടെ മരണത്തിനുള്ള ഒരു പ്രധാന കാരണം ന്യൂമോകോക്കല്‍ ന്യുമോണിയ ആണെന്നാണ് കണ്ടെത്തിയിട്ടുള്ളത്. മാത്രമല്ല ഈ രോഗബാധ കുടുംബത്തിന് വലിയ സാമ്പത്തിക ബാദ്ധ്യതയും ഉണ്ടാക്കും.

ചുമ, കഫക്കെട്ട്, ശ്വാസം എടുക്കാന്‍ പ്രയാസം, പനി ശ്വാസംമുട്ടല്‍, നെഞ്ചുവേദന എന്നിവയാണ് ഈ രോഗത്തിന്റെ ലക്ഷണങ്ങള്‍. കുട്ടികള്‍ക്ക് അസുഖം കൂടുതലാണെങ്കില്‍ ഭക്ഷണം കഴിക്കാനും വെള്ളം കുടിക്കാനും ബുദ്ധിമുട്ട് വന്നേക്കാം. ഒപ്പം ഹൃദയാഘാതമുണ്ടാകാനോ അബോധാവസ്ഥയിലേക്ക് പോകാനോ മരണമടയാനോ സാധ്യതയുണ്ട്. യൂണിവേഴ്‌സല്‍ ഇമ്മ്യൂണൈസേഷന്‍ പരിപാടിയുടെ ഭാഗമായി രാജ്യത്ത് പിസിവി വാക്‌സിനേഷന്‍ സൗജന്യമാണ്. മെഡിക്കല്‍ ഓഫീസര്‍മാര്‍ക്കും ആരോഗ്യ പ്രവര്‍ത്തകര്‍ക്കുള്ള വിദഗ്ധ പരിശീലനത്തിന് ശേഷമാണ് വാക്‌സിനേഷന്‍ ആരംഭിക്കുന്നത്.