കേരളത്തില്‍ ഇന്ന് 12,161 പേര്‍ക്ക് കോവിഡ്-19 സ്ഥിരീകരിച്ചു. തൃശൂര്‍ 1541, എറണാകുളം 1526, തിരുവനന്തപുരം 1282, കോഴിക്കോട് 1275, മലപ്പുറം 1017, കോട്ടയം 886, കൊല്ലം 841, പാലക്കാട് 831, കണ്ണൂര്‍ 666, ആലപ്പുഴ 647, ഇടുക്കി 606, പത്തനംതിട്ട 458, വയനാട് 457, കാസര്‍ഗോഡ് 128 എന്നിങ്ങനേയാണ് ജില്ലകളില്‍ ഇന്ന് രോഗ ബാധ സ്ഥിരീകരിച്ചത്.

കഴിഞ്ഞ 24 മണിക്കൂറിനിടെ 90,394 സാമ്പിളുകളാണ് പരിശോധിച്ചത്. പ്രതിവാര ഇന്‍ഫെക്ഷന്‍ പോപ്പുലേഷന്‍ റേഷ്യോ (WIPR) പത്തിന് മുകളിലുള്ള 368 തദ്ദേശ സ്വയംഭരണ പ്രദേശങ്ങളിലായി 745 വാര്‍ഡുകളാണുള്ളത്. ഇവിടെ കര്‍ശന നിയന്ത്രണമുണ്ടാകും.

സംസ്ഥാനത്തെ വിവിധ ജില്ലകളിലായി 4,56,952 പേരാണ് ഇപ്പോള്‍ നിരീക്ഷണത്തിലുള്ളത്. ഇവരില്‍ 4,36,837 പേര്‍ വീട്/ഇന്‍സ്റ്റിറ്റിയൂഷണല്‍ ക്വാറന്റൈനിലും 20,115 പേര്‍ ആശുപത്രികളിലും നിരീക്ഷണത്തിലാണ്. 1284 പേരെയാണ് പുതുതായി ആശുപത്രിയില്‍ പ്രവേശിപ്പിച്ചത്.

നിലവില്‍ 1,43,500 കോവിഡ് കേസുകളില്‍, 12.7 ശതമാനം വ്യക്തികള്‍ മാത്രമാണ് ആശുപത്രി/ഫീല്‍ഡ് ആശുപത്രികളില്‍ പ്രവേശിപ്പിക്കപ്പെട്ടിട്ടുള്ളത്.

കഴിഞ്ഞ ദിവസങ്ങളിലുണ്ടായ 155 മരണങ്ങളാണ് കോവിഡ്-19 മൂലമാണെന്ന് ഇന്ന് സ്ഥിരീകരിച്ചത്. ഇതോടെ ആകെ മരണം 24,965 ആയി.

ഇന്ന് രോഗം സ്ഥിരീകരിച്ചവരില്‍ 64 പേര്‍ സംസ്ഥാനത്തിന് പുറത്ത് നിന്നും വന്നവരാണ്. 11,413 പേര്‍ക്ക് സമ്പര്‍ക്കത്തിലൂടെയാണ് രോഗം ബാധിച്ചത്. 598 പേരുടെ സമ്പര്‍ക്ക ഉറവിടം വ്യക്തമല്ല. 86 ആരോഗ്യ പ്രവര്‍ത്തകര്‍ക്കാണ് രോഗം ബാധിച്ചത്.

രോഗം സ്ഥിരീകരിച്ച് ചികിത്സയിലായിരുന്ന 17,862 പേര്‍ രോഗമുക്തി നേടി. തിരുവനന്തപുരം 743, കൊല്ലം 125, പത്തനംതിട്ട 1212, ആലപ്പുഴ 1077, കോട്ടയം 1240, ഇടുക്കി 813, എറണാകുളം 2518, തൃശൂര്‍ 3976, പാലക്കാട് 834, മലപ്പുറം 1593, കോഴിക്കോട് 2184, വയനാട് 458, കണ്ണൂര്‍ 712, കാസര്‍ഗോഡ് 377 എന്നിങ്ങനേയാണ് രോഗമുക്തിയായത്. ഇതോടെ 1,43,500 പേരാണ് രോഗം സ്ഥിരീകരിച്ച് ഇനി ചികിത്സയിലുള്ളത്. 44,95,904 പേര്‍ ഇതുവരെ കോവിഡില്‍ നിന്നും മുക്തി നേടി.

കോവിഡ് 19 വിശകലന റിപ്പോര്‍ട്ട്

· വാക്‌സിനേഷന്‍ എടുക്കേണ്ട ജനസംഖ്യയുടെ 92.2 ശതമാനം പേര്‍ക്ക് ഒരു ഡോസ് വാക്‌സിനും (2,46,36,782), 40.5 ശതമാനം പേര്‍ക്ക് രണ്ട് ഡോസ് വാക്‌സിനും (1,08,31,505) നല്‍കി.

· ഇന്ത്യയില്‍ ഏറ്റവും കൂടുതല്‍ വാക്‌സിനേഷന്‍/ ദശലക്ഷം ഉള്ള സംസ്ഥാനം കേരളമാണ് (9,93,524)

· 45 വയസില്‍ കൂടുതല്‍ പ്രായമുള്ള 96 ശതമാനത്തിലധികം ആളുകള്‍ക്ക് ഒറ്റ ഡോസും 59 ശതമാനം പേര്‍ക്ക് രണ്ട് ഡോസും വാക്‌സിനേഷന്‍ സംസ്ഥാനം നല്‍കിയിട്ടുണ്ട്.

· ഇന്നത്തെ റിപ്പോര്‍ട്ട് പ്രകാരം, 12,161 പുതിയ രോഗികളില്‍ 10,298 പേര്‍ വാക്‌സിനേഷന് അര്‍ഹരായിരുന്നു. ഇവരില്‍ 3435 പേര്‍ ഒരു ഡോസ് വാക്‌സിനും 3202 പേര്‍ രണ്ടു ഡോസ് വാക്‌സിനും എടുത്തിരുന്നു. എന്നാല്‍ 3661 പേര്‍ക്ക് വാക്‌സിന്‍ ലഭിച്ചതായി റിപ്പോര്‍ട്ട് ചെയ്യപ്പെട്ടിട്ടില്ല. കോവിഡ് വാക്‌സിനുകള്‍ ആളുകളെ അണുബാധയില്‍ നിന്നും ഗുരുതരമായ അസുഖത്തില്‍ നിന്നും സംരക്ഷിക്കുകയും ആശുപത്രിവാസത്തിന്റെയും മരണത്തിന്റെയും സാധ്യത ഗണ്യമായി കുറയ്ക്കുകയും ചെയ്യുന്നു.

· സെപ്റ്റംബര്‍ 21 മുതല്‍ 27 വരെയുള്ള കാലയളവില്‍, ശരാശരി 1,61,529 കേസുകള്‍ ചികിത്സയിലുണ്ടായിരുന്നതില്‍ 2 ശതമാനം പേര്‍ക്ക് മാത്രമാണ് ഓക്‌സിജന്‍ കിടക്കകളും ഒരു ശതമാനം പേര്‍ക്ക് മാത്രമാണ് ഐസിയുവും ആവശ്യമായി വന്നത്. ഈ കാലയളവില്‍, കഴിഞ്ഞ ആഴ്ചയുമായി താരതമ്യം ചെയ്യുമ്പോള്‍ റിപ്പോര്‍ട്ട് ചെയ്യപ്പെടുന്ന പുതിയ കേസുകളില്‍ ഏകദേശം 16,240 കുറവ് ഉണ്ടായി. പുതിയ കേസുകളുടെ വളര്‍ച്ചാ നിരക്കില്‍ മുന്‍ ആഴ്ചയുമായി താരതമ്യപ്പെടുത്തുമ്പോള്‍ 12 ശതമാനവും കുറവ് ഉണ്ടായിട്ടുണ്ട്. നിലവില്‍ രോഗം സ്ഥിരീകരിച്ച് ചികിത്സയിലുള്ള രോഗികള്‍, ആശുപത്രികള്‍, ഐസിയു, വെന്റിലേറ്റര്‍, ഓക്‌സിജന്‍ കിടക്കകള്‍ എന്നിവിടങ്ങളിലെ രോഗികളുടെ എണ്ണം എന്നിവ മുന്‍ ആഴ്ചയുമായി താരതമ്യപ്പെടുത്തുമ്പോള്‍ ഈ ആഴ്ചയില്‍ യഥാക്രമം 12%, 8%, 22%, 6%, 6% കുറഞ്ഞു. ആശുപത്രിവാസത്തിന്റെ നിരക്കും ഗുരുതരമായ കേസുകളും കുറയുന്ന പ്രവണതയാണ് കാണിക്കുന്നത്.

· ജൂണ്‍, ജൂലൈ, ആഗസ്റ്റ് മാസങ്ങളില്‍ കോവിഡ് ബാധിതരായ വ്യക്തികളില്‍ 6 ശതമാനം പേര്‍ കോവിഡ് വാക്‌സിന്റെ ഒരു ഡോസ് എടുക്കുകയും, 3.6 ശതമാനം കോവിഡ് വാക്‌സിന്റെ രണ്ട് ഡോസുകള്‍ എടുക്കുകയും ചെയ്തിരുന്നു. അണുബാധ തടയാന്‍ വാക്‌സിനേഷന് ശേഷമുള്ള രോഗപ്രതിരോധശേഷി ഫലപ്രദമാണെന്നും, എന്നാല്‍ വാക്‌സിനേഷന്‍ എടുത്ത ആളുകള്‍ക്ക് കുറഞ്ഞ അളവിലെങ്കിലും രോഗബാധ ഉണ്ടായേക്കാം എന്നുമാണ് ഇത് സൂചിപ്പിക്കുന്നത്. അതിനാല്‍ അനുബന്ധ രോഗങ്ങള്‍ ഉള്ളവര്‍ രോഗം വരാതിരിക്കാന്‍ വേണ്ട മുന്‍കരുതലുകള്‍ സ്വീകരിക്കേണ്ടതാണ്.

ഇനി വീട്ടുജോലിയിൽ സഹായിക്കാൻ ആസ്ട്രോ ;പുതിയ റോബോട്ടിനെ അവതരിപ്പിച്ച് ആമസോൺ.

കാവൽക്കാരനായി ഉപയോഗിക്കാവുന്ന ഒരു റോബോട്ടിനെ അവതരിപ്പിച്ച് ആമസോൺ. ഒരു ചെറിയ വളർത്തുനായയെ ഓർമിപ്പിക്കുന്ന രൂപമുള്ള ഈ റോബോട്ടിന് ആസ്ട്രോ എന്നാണ് പേര്.ആമസോൺ സർവീസസ് ആന്റ് ഡിവൈസസ് സീനിയർ വൈസ് പ്രസിഡന്റ് ഡേവിഡ് ലിംപ് ആണ് പുതിയ റോബോട്ടിനെ പരിചയപ്പെടുത്തിയത്.
ദൂരെ നിന്ന് വീട്ടിലെ ഓരോ കാര്യങ്ങളും പരിശോധിക്കാൻ ഈ റോബോട്ട് സഹായിക്കും.
ഒരു ഡിജിറ്റൽ സക്രീൻ ആണ് ഈ ആസ്ട്രോയുടെ മുഖം. ഇതിൽ രണ്ട് കണ്ണുകൾ കാണാം. നിർദേശങ്ങൾ നൽകാനും ജോലികൾ ഏൽപിക്കാനുമെല്ലാം ഈ സ്ക്രീൻ ഉപയോഗിക്കാം. റോബോട്ടിന്റെ വലിപ്പം കുറവാണെങ്കിലും അതിനേക്കാൾ ഉയരമുള്ള വസ്തുക്കളെ നിരീക്ഷിക്കാനായി ഒരു പെരിസ്കോപ്പ് ക്യാമറയും ഇതിനുണ്ട്.
അടുക്കളയിലെ ഗ്യാസ് സ്റ്റൗവ് ഓഫ് ചെയ്തിട്ടുണ്ടോ, ടിവി ഓൺ ആണോ, സ്വിച്ച് ഓഫ് ആണോ തുടങ്ങി വീട്ടിലെ ഉയരത്തിലുള്ള വസ്തുക്കൾ കാണാനും മറ്റും പെരിസ്കോപ് ക്യാമറ പ്രയോജനപ്പെടുത്താം. വീട്ടിലെ വളർത്തുമൃഗങ്ങളെ നിരീക്ഷിക്കാനും. താക്കോലോ, പേഴ്സോ മറന്നുപോയാൽ അത് വീട്ടിൽ തന്നെ ഉണ്ടോ എന്ന് പരിശോധിക്കാനുമെല്ലാം ഈ റോബോട്ട് സഹായിക്കും.ഒരു സ്മാർട് ഡിസ്പ്ലേയുടെ പ്രയോജനങ്ങളെല്ലാം ഈ റോബോട്ടിൽ ലഭിക്കും. ഉദാഹരണത്തിന് ഒരു ടിവി സീരിയൽ കാണുകയാണെന്നിരിക്കട്ടെ. വീടിനുള്ളിൽ നമ്മൾ നടക്കുന്നയിടത്തേക്കെല്ലാം ഇത് നമ്മളെ പിന്തുടർന്നുകൊണ്ടിരിക്കും. അതായത് നടന്നുകൊണ്ട് സീരിയൽ ആസ്വദിക്കാനാവും.
999.99 ഡോളറാണ് ഇതിന് വില. ഇത് ഏകദേശം 74,127 രൂപയോളം വരും.
കൂടാതെ, വീട്ടിലെ വായുസഞ്ചാരം, എസി, ചൂട് എന്നിവ ഓട്ടോമാറ്റികായി നിരീക്ഷിക്കുന്നതിനും നിയന്ത്രിക്കുന്നതിനുമായി ഉപയോഗികുന്ന ഒരു സ്മാർട് തെർമോസ്റ്റാറ്റ്, എക്കോ ഷോ 15 സ്മാർട് ഡിസ്പ്ലേ, ഹാലോ വ്യൂ എന്ന ഹെൽത്ത് ട്രാക്കിങ് ബാൻഡ് എന്നിവയും ആമസോൺ പുതിയതായി അവതരിപ്പിച്ചിട്ടുണ്ട്.

ഓക്‌സിജന്റെ സഹായമില്ലാതെ കൊടുമുടി കീഴടക്കിയ ആദ്യ അറബ് വനിത എന്ന ബഹുമതി ഇനി  ഷെയ്ഖ അസ്മയ്ക്കു സ്വന്തം.

ദോഹ : നേപ്പാളിലെ മനാസ്‌ലു കൊടുമുടിയില്‍ ഖത്തറിന്റെ പതാക നാട്ടി ഖത്തരി സാഹസിക വനിത ഷെയ്ഖ അസ്മ അല്‍താനി. കൊടുമുടി കീഴടക്കിയത് ഓക്‌സിജന്റെ സഹായമില്ലാതെ.  സമുദ്രനിരപ്പില്‍ നിന്ന് 8,163 ഉയരത്തിലുള്ള മനാസ്‌ലു കൊടുമുടിയുടെ മുകളില്‍ ഖത്തര്‍ പതാക ഉയര്‍ത്തിയ സ്വദേശി വനിത, ഓക്‌സിജന്റെ സഹായമില്ലാതെ കൊടുമുടി കീഴടക്കിയ ആദ്യ അറബ് വനിത എന്നീ ബഹുമതികള്‍ ഇനി  ഷെയ്ഖ അസ്മയ്ക്കു സ്വന്തമാണ്.
ഹെലികോപ്റ്റര്‍ സേവനം തേടാതെയാണ് ഹയര്‍ ക്യാംപിലേയ്ക്കും യാത്ര ചെയ്തത്. വെല്ലുവിളികള്‍ നിറഞ്ഞ യാത്രാ ലക്ഷ്യം കൈവരിക്കാന്‍ പിന്തുണ നല്‍കിയവര്‍ക്കുള്ള നന്ദി കുറിച്ചാണ് ചിത്രങ്ങള്‍ സഹിതം ഷെയ്ഖ അസ്മ ഇന്‍സ്റ്റഗ്രാമില്‍ പോസ്റ്റിട്ടത്.
കൊലയാളി പര്‍വതമെന്നറിയപ്പെടുന്നതും കീഴടക്കാന്‍ പ്രയാസമേറിയതുമായ മനാസ്‌ലു കൊടുമുടി നേപ്പാളിന്റെ പടിഞ്ഞാറന്‍ മധ്യമേഖലയിലെ നേപ്പാളീസ് ഹിമാലയത്തിലെ മന്‍സീരി ഹിമാലിലാണ് സ്ഥിതി ചെയ്യുന്നത്. ഷെയ്ഖ അസ്മ ഇക്കഴിഞ്ഞ ഓഗസ്റ്റിലാണ് യൂറോപ്പിലെ എല്‍ബ്രസ് കൊടുമുടി കീഴടക്കിയത്.
2018 ല്‍ യൂറോപ്പിലെയും മധ്യപൂര്‍വദേശത്തെയും വനിതകളടങ്ങുന്ന രാജ്യാന്തര സംഘത്തിനൊപ്പം ഉത്തരധ്രുവത്തിലേയ്ക്ക് യാത്ര ചെയ്ത ആദ്യ ഖത്തരി വനിതയെന്ന നേട്ടം കൈവരിച്ചിരുന്നു. 2014 ല്‍ കിളിമഞ്ചാരോ കീഴടക്കി. 2019 ല്‍ അക്കോണ്‍കാഗ്വ ഉച്ചകോടിയിലെത്തിയ പ്രഥമ ഖത്തരി വനിതയും ഷെയ്ഖ അസ്മയാണ്. മധ്യപൂര്‍വദേശത്തെ സ്ത്രീശാക്തീകരണത്തിന്റെ പ്രധാന വക്താവ് കൂടിയാണ് ഷെയ്ഖ അസ്മ അല്‍താനി.

വരുന്നു ഫെയ്സ് റെക്കഗ്നീഷൻ സംവിധാനം ; ഇനി മാസ്ക് ധരിച്ചാലും മുഖം തിരിച്ചറിയും.

ന്യൂഡൽഹി : മാസ്ക് ധരിച്ചവരെ പോലും തിരിച്ചറിയാൻ കഴിയുന്ന ഫെയ്സ് റെക്കഗ്നീഷൻ സംവിധാനം കേന്ദ്ര ആഭ്യന്തരവകുപ്പ് തയാറാക്കുന്നു. ‍കുറ്റവാളികൾ, കാണാതാകുന്നവർ, അജ്ഞാത മൃതദേഹങ്ങൾ തുടങ്ങിയവ ചിത്രങ്ങളിലൂടെ തിരിച്ചറിയാൻ സാധിക്കുന്ന സോഫ്റ്റ്‍വെയർ സംവിധാനം ഒരുക്കാൻ ശ്രമം തുടങ്ങിയിട്ട് 2 വർഷത്തിലേറെയായി. 
ഇതുമായി ബന്ധപ്പെട്ടു നാഷനൽ ക്രൈം റെക്കോർഡ്സ് ബ്യൂറോ കഴിഞ്ഞ ദിവസം പുറത്തിറക്കിയ പുതിയ ടെൻ‍ഡർ രേഖയിലാണു മാസ്ക് ധരിച്ചവർ, പ്ലാസ്റ്റിക് സർജറിയിലൂടെ മുഖത്തിനു മാറ്റം വരുത്തിയവർ തുടങ്ങിയവരെ തിരിച്ചറിയാനും സോഫ്റ്റ്‍വെയർ സംവിധാനം തയാറാക്കണമെന്ന് നിഷ്കർഷിച്ചിരിക്കുന്നത്. പ്രായം, മേക്കപ്പ്, താടി, മുടിയുടെ സ്റ്റൈൽ, കണ്ണട ഉപയോഗം തുടങ്ങിയവയിലൂടെ മുഖത്തുണ്ടാകുന്ന മാറ്റങ്ങളും തിരിച്ചറിയാൻ കഴിയണം.
20 കോടി രൂപയുടേതാണു പദ്ധതി. കേന്ദ്രനീക്കം സ്വകാര്യതാ ലംഘനമാണെന്നു വിമർശനമുണ്ട്. 
ഒരു കുറ്റകൃത്യവുമായി ബന്ധപ്പെട്ട ചിത്രം, വിഡിയോ, ഡിജിറ്റൽ സ്കെച്ചുകൾ, സിസിടിവി ദൃശ്യങ്ങൾ എന്നിവ സോഫ്റ്റ്‍വെയർ സഹായത്തോടെ രാജ്യമെങ്ങുമുള്ള ക്രിമിനൽ ഡേറ്റാബേസുമായി ഒത്തുനോക്കി പ്രതികളെ കണ്ടെത്തുകയാണ് പദ്ധതിയുടെ പ്രധാന ലക്ഷ്യം. മുഖത്തിന്റെ പ്രത്യേകതകൾ ഡിജിറ്റലായി മാപ്പ് ചെയ്താണ് ഇത് സാധിക്കുന്നത്. 
സിസിടിവി ക്യാമറകൾ പുതിയതായി സ്ഥാപിക്കുന്നതിനു പകരം നിലവിലുള്ള ക്രിമിനൽ ട്രാക്കിങ് സിസ്റ്റം (സിസിടിഎൻസ്) പോലെയുള്ള നിരീക്ഷണ സംവിധാനങ്ങളുമായി ചേർന്നു പ്രവർത്തിക്കും.
നിലവിൽ 1.5 കോടി ചിത്രങ്ങൾ സോഫ്റ്റ്‍വെയറിനു കൈകാര്യം ചെയ്യേണ്ടി വരും. ഇത് ക്രമേണ 5 കോടിയായി ഉയരുമെന്നും ടെൻഡർ രേഖ വ്യക്തമാക്കുന്നു. സമാന സംവിധാനം രൂപപ്പെടുത്താൻ മുൻപ് 2 തവണ ടെൻഡർ വിളിച്ചിരുന്നു.കേന്ദ്ര, സംസ്ഥാന നിയമപാലന ഏജൻസികൾക്ക് സംവിധാനം ഉപയോഗിക്കാൻ അധികാരമുണ്ട്. എൻസിആർബിയിലെ ഡേറ്റാ സെന്റർ കേന്ദ്രീകരിച്ചു പ്രവർത്തിക്കുന്ന ഈ സംവിധാനം രാജ്യത്തെ എല്ലാ പൊലീസ് സ്റ്റേഷനുകൾക്കും ഉപയോഗിക്കാം. സ്റ്റേഷനുകൾക്ക് ചിത്രങ്ങളും വിവരശേഖരവും പൊതു സംവിധാനത്തിലേക്ക് അപ്‍ലോഡ് ചെയ്യാം.

എല്ലാ നിയമനങ്ങള്‍ക്കും പൊലീസ് വെരിഫിക്കേഷന്‍ വേണം; എയ്ഡഡ് മേഖലയിലും നിര്‍ബന്ധമാക്കാന്‍ മന്ത്രിസഭാ തീരുമാനം

തിരുവനന്തപുരം: എല്ലാ നിയമനങ്ങള്‍ക്കും പൊലീസ് വെരിഫിക്കേഷന്‍ നിര്‍ബന്ധമാക്കി. ഇന്നു ചേര്‍ന്ന മന്ത്രിസഭായോഗമാണ് ഈ തീരുമാനമെടുത്തത്. എയ്ഡഡ് വിദ്യാഭ്യാസ സ്ഥാപനങ്ങളിലെ അധ്യാപക-അനധ്യാപക നിയമനത്തിനും പൊലീസ് വെരിഫിക്കേഷന്‍ വേണം. സര്‍ക്കാര്‍, പൊതുമേഖലാ, ദേവസ്വം, സഹകരണസ്ഥാപനങ്ങള്‍, ക്ഷേമനിധി ബോര്‍ഡുകള്‍ എന്നിവയ്ക്കും നിയമം ബാധകമാണ്.

ജോലിയില്‍ പ്രവേശിച്ച്‌ ഒരു മാസത്തിനകം നടപടികള്‍ പൂര്‍ത്തിയാക്കണം. ബന്ധപ്പെട്ട സ്ഥാപനങ്ങള്‍ ഇതിനായി ഉടന്‍ ചട്ടഭേദഗതി വരുത്തണമെന്നും മന്ത്രിസഭായോഗം തീരുമാനിച്ചു. സഹകരണ സ്ഥാപനങ്ങളുമായി ബന്ധപ്പെട്ട് സംസ്ഥാനത്ത് വ്യാപക ആക്ഷേപം ഉയര്‍ന്നു വരുന്ന സാഹചര്യത്തിലാണ് സഹകരണസ്ഥാപനങ്ങളിലെ നിയമനത്തിലും പൊലീസ് വെരിഫിക്കേഷന്‍ നിര്‍ബന്ധമാക്കുന്നത്.

മുന്നാക്ക വിഭാഗങ്ങളിലെ പിന്നാക്കക്കാരെ കണ്ടെത്താന്‍ സര്‍വേ നടത്താന്‍ മന്ത്രിസഭ തീരുമാനിച്ചു. ഇതിനായി 75 ലക്ഷം രൂപ അനുവദിക്കാനും തീരുമാനിച്ചു. കുടുംബശ്രീയെയാണ് സര്‍വേ നടത്താന്‍ നിയോഗിച്ചിരിക്കുന്നത്. തദ്ദേശവാര്‍ഡ് അടിസ്ഥാനത്തിലാകും സാമൂഹിക സാമ്ബത്തിക സര്‍വേ നടത്തുക.