ദില്ലി: ന്യൂനപക്ഷ വിദ്യാര്‍ത്ഥി സ്കോളര്‍ഷിപ്പ് 80:20 അനുപാതം റദ്ദാക്കിയ ഹൈക്കോടതി വിധിക്കെതിരെ സുപ്രീംകോടതിയില്‍ ഹര്‍ജി.

സ്കോളര്‍ഷിപ്പ് അനുപാതം റദ്ദാക്കിയത് ആയിരക്കണക്കിന് വിദ്യാര്‍ത്ഥികള്‍ക്ക് തിരിച്ചടിയായെന്നാണ് പ്രധാന വാദം. മൈനോററ്റി ഇന്ത്യന്‍സ് പ്ലാനിംഗ് ആന്‍ഡ് വിജിലന്‍സ് കമ്മിഷന്‍ ട്രസ്റ്റാണ് ഹൈക്കോടതി വിധിക്കെതിരെ സുപ്രീംകോടതിയെ സമീപിച്ചത്. 
അതേസമയം,സച്ചാർ സംരക്ഷണ സമിതിയുടെ നേതൃത്വത്തിൽ വിവിധ ആവശ്യങ്ങള്‍ ഉന്നയിച്ച് മുസ്ലീം സംഘടനാ നേതാക്കള്‍ ഇന്ന് സെക്രട്ടേറിയറ്റിന് മുന്നിൽ ധർണ നടത്തും.

കേരളത്തിലെ 16 മുസ്ലീം സംഘടനകള്‍ ഉൾകൊള്ളുന്ന സച്ചാർ സംരക്ഷണ സമിതിയുടെ ചെയർമാൻ സാദിഖലി ശിഹാബ് തങ്ങളുടെ നേതൃത്വത്തിലാണ് ധർണ. പിന്നാക്ക വിഭാഗത്തിലെ വിദ്യാർത്ഥികളുടെ സ്കോളർഷിപ്പിൽ സർക്കാർ കൊണ്ടുവന്ന തീരുമാനം റദ്ദാക്കണമെന്നാണ് പ്രധാന ആവശ്യം.80:20 അനുപാതം റദ്ദാക്കിയ ഹൈക്കടോതി വിധിക്കെതിരെ അപ്പീൽ നൽകുകയോ, നിയമനിർമ്മാണം നടത്തുകയോ വേണമെന്നാണ് മുസ്ലീം സംഘടകള്‍ ആവശ്യപ്പെടുന്നത്. സച്ചാർ ശുപാർശകള്‍ പ്രത്യേക സെൽ രൂപീകരിച്ച് നടപ്പിലാക്കുക, മുന്നാക്ക, പിന്നാക്ക സ്കോളർഷിപ്പ് തുക ഏകീകരിക്കുക തുടങ്ങിയവയാണ് മറ്റാവശ്യങ്ങള്‍. ധർണയ്ക്ക് ശേഷം സംഘടനാ പ്രതിനിധികള്‍ മുഖ്യമന്ത്രിയെ കാണാനാണ് തീരുമാനം.

തിരുവനന്തപുരം/കൊച്ചി : നാളെ കാലാവധി അവസാനിക്കുന്ന 493 പിഎസ്‌സി റാങ്ക് പട്ടികകൾ ഇനി നീട്ടില്ലെന്നും പട്ടികയിലെ എല്ലാവർക്കും നിയമനം നൽകണമെന്ന ആവശ്യം നടപ്പാക്കാൻ കഴിയുന്നതല്ലെന്നും നിയമസഭയിൽ വ്യക്തമാക്കി മുഖ്യമന്ത്രി പിണറായി വിജയൻ.

കാലാവധി നീട്ടാൻ സർക്കാർ ശുപാർശ ചെയ്യാത്തതിനാൽ ഇതു സംബന്ധിച്ചു പിഎസ്‌സി യോഗം തീരുമാനം എടുത്തില്ല. സർക്കാർ ശുപാർശ ഇല്ലാതെ സ്വന്തം നിലയിൽ കാലാവധി നീട്ടാൻ പിഎസ്‌സിക്ക് അധികാരവുമില്ല.ലാസ്റ്റ് ഗ്രേഡ് സർവന്റ്സ് (എൽജിഎസ്) റാങ്ക് പട്ടികയുടെ കാലാവധി സെപ്റ്റംബർ 29 വരെ നീട്ടാനുള്ള സംസ്ഥാന അഡ്മിനിസ്ട്രേറ്റീവ് ട്രൈബ്യൂണൽ വിധിക്കെതിരെ പിഎസ്‌സി ഹൈക്കോടതിയിൽ അപ്പീൽ നൽകിയിട്ടുണ്ട്.കാലാവധി നീട്ടിയ ഉത്തരവ് സ്റ്റേ ചെയ്യണമെന്നാണ് പിഎസ്‌സിയുടെ ആവശ്യം. ഹർജി ഹൈക്കോടതി ഇന്നു പരിഗണിക്കും. ഈ പട്ടികയുടെ കാര്യത്തിൽ കോടതിവിധി പ്രകാരം തീരുമാനമെടുക്കാനാണ് സർക്കാർ തീരുമാനം.

നാളെ കാലാവധി അവസാനിക്കുന്ന പട്ടികകളിൽ ഏറ്റവും കൂടുതൽ ഉദ്യോഗാർഥികളുള്ളത് എൽജിഎസിലാണ്. ഇതിനിടെ, വിവിധ സർക്കാർ വകുപ്പുകളിലെ 43 തസ്തികകളിലേക്കു വിജ്ഞാപനം പ്രസിദ്ധീകരിച്ചു നിയമന നടപടി ആരംഭിക്കാൻ പിഎസ്‌സി യോഗം തീരുമാനിച്ചു. സംസ്ഥാനതലത്തിലും ജില്ലാ തലത്തിലുമുള്ള തസ്തികകളാണിത്. പട്ടികകളുടെ കാലാവധി നീട്ടൽ ചർച്ചയ്ക്കെടുക്കണമെന്ന ഷാഫി പറമ്പിലിന്റെ അടിയന്തര പ്രമേയത്തിന് അനുമതി നിഷേധിച്ചതിനാൽ പ്രതിപക്ഷം നിയമസഭയിൽ നിന്ന് ഇറങ്ങിപ്പോയി. പുതിയ പട്ടികയിൽ ഉൾപ്പെടേണ്ടവരുടെ പ്രാഥമിക പരീക്ഷാ ഫലം പോലും വരാത്തപ്പോൾ എന്തിനാണു നിലവിലെ പട്ടികയുടെ കാലാവധി നീട്ടാൻ മടിക്കുന്നത്. അപ്രഖ്യാപിത നിയമന നിരോധനത്തിനാണു സർക്കാർ കോപ്പുകൂട്ടുന്നതെന്നും ഷാഫി കുറ്റപ്പെടുത്തി.

എന്നാൽ,നാളെ 493 പിഎസ്‌സി റാങ്ക് ലിസ്റ്റുകളുടെ കാലാവധി അവസാനിക്കാനിരിക്കെ സെക്രട്ടേറിയറ്റിനു മുന്നിൽ വനിതാ സിവിൽ പൊലീസ് റാങ്ക് ഹോൾഡേഴ്സ് മുടി മുറിച്ച് പ്രതിഷേധിച്ചു. ഇന്നലെ നിയമസഭയിൽ മുഖ്യമന്ത്രി പിണറായി വിജയൻ റാങ്ക് ലിസ്റ്റുകളുടെ കാലാവധി നീട്ടില്ലെന്നു പ്രഖ്യാപിച്ചതിനു പിന്നാലെയായിരുന്നു പ്രതിഷേധം. സമരം നടത്തുന്ന പ്രിയങ്ക, അശ്വതി , ഷീല, രാഖി എന്നിവരാണു മുടി മുറിച്ച് പ്രതിഷേധിച്ചത്. സമരം 15 ദിവസം പിന്നിട്ടു. കൂടാതെ,വനിതാ സിവിൽ പൊലീസ് റാങ്ക് ഹോൾഡേഴ്സ് സെക്രട്ടേറിയറ്റിനു മുന്നിൽ നടത്തുന്ന സമരത്തിൽ ഉദ്യോഗാർഥികൾ മുടിമുറിച്ചു പ്രതിഷേധിക്കുന്നു. നാളെ കാലാവധി അവസാനിക്കുന്ന ഇവരുടെ റാങ്ക് ലിസ്റ്റടക്കം ഒന്നിന്റെയും കാലാവധി നീട്ടില്ലെന്ന് മുഖ്യമന്ത്രി നിയമസഭയിൽ അറിയിച്ചു. ഒരു വർഷം മാത്രം കാലാവധിയുള്ള റാങ്ക് ലിസ്റ്റ് ഇതുവരെ നീട്ടിയിട്ടില്ലെന്ന് ഇവർ പറഞ്ഞു. 2100 പേരുള്ള ലിസ്റ്റിൽ നിന്ന് 597 പേരെ മാത്രമാണ് ഇതു വരെ നിയമിച്ചത്. വനിതകൾ ആയതു കൊണ്ടാണോ തങ്ങളോടു ലിംഗ വിവേചനം കാണിക്കുന്നതെന്നും തങ്ങൾക്കു 15% നിയമനങ്ങൾ കൂടുതലായി നൽകാമെന്നു പറഞ്ഞ വാഗ്ദാനം എവിടെയാണെന്നും ഉദ്യോഗാർഥികൾ ചോദിച്ചു.കേരള അഡ്മിനിസ്ട്രേറ്റീവ് ട്രൈബ്യൂണലിൽ നിന്ന് അനുകൂല വിധി നേടിയ എൽജിഎസ് റാങ്ക് ഹോൾഡേഴ്സും സമരം തുടരുകയാണ്.

കുവൈത്ത് സിറ്റി : വിദേശികൾക്ക് വാണിജ്യ വിമാനങ്ങളിൽ പ്രവേശനം പുനരാരംഭിച്ചതോടെ മാസങ്ങളായി സ്വദേശങ്ങളിൽ കുടുങ്ങിക്കിടക്കുന്നവർ കുവൈത്തിൽ എത്തിത്തുടങ്ങി.

വിമാന സർവീസ് പുനരാരംഭിച്ച ഇന്നലെ ആംസ്റ്റർഡാമിൽ നിന്നുള്ള കുവൈത്ത് എയർവേയ്സ് വിമാനമാണ് ആദ്യമെത്തിയത്.അഡിസ് അബാബയിൽ നിന്നും തുർക്കിയിൽ നിന്നും തുടർന്ന് ഓരോ വിമാനങ്ങൾ എത്തി. അറബ് രാജ്യങ്ങളിൽനിന്നുള്ള വിമാനങ്ങളാണ് ഇന്നലെ പ്രധാനമായും എത്തിയത്. ഇന്ത്യയിൽ നിന്നുള്ളവരുടെ യാത്ര സംബന്ധിച്ച് അവ്യക്തത തുടരുകയാണിപ്പോഴും. എന്നാൽ,ഇന്ത്യയിൽ നിന്നു നേരിട്ടുള്ള വിമാന സർവീസിന് അനുമതി നൽകിയിട്ടില്ല. മറ്റൊരു രാജ്യം വഴി വരണമെങ്കിൽ ആ രാജ്യത്ത് എത്ര ദിവസം തങ്ങേണ്ടിവരും എന്നതിനെക്കുറിച്ചും വ്യക്തമായ തീരുമാനം ഉണ്ടായിട്ടില്ല. കുവൈത്ത് അംഗീകരിച്ച കോവിഡ് വാക്സീൻ സ്വീകരിച്ചവർക്ക് മാത്രമാണ് പ്രവേശനം ആരംഭിച്ചിട്ടുള്ളത്. വാക്സീൻ സ്വീകരിച്ചതിന് അതത് സർക്കാരുകൾ നൽകുന്ന സർട്ടിഫിക്കറ്റ് കുവൈത്ത് ആരോഗ്യമന്ത്രാലയം അംഗീകരിച്ചതിനു ശേഷം മാത്രമാണ് പ്രവേശനം.

രാജ്യത്ത് പ്രവേശിക്കുന്നതിന് ഒട്ടേറെ വ്യവസ്ഥകൾ കുവൈത്ത് നിർദേശിച്ചിട്ടുണ്ട്. അവ പാലിച്ചുകൊണ്ടു മാത്രമേ കുവൈത്തിൽ ഇറങ്ങാൻ സാധിക്കൂ. വിമാനത്താവളത്തിലെ നടപടിക്രമങ്ങൾ സുഗമമായിരുന്നുവെന്ന് ഇന്നലെ കുവൈത്തിൽ ഇറങ്ങിയ യാത്രക്കാരിൽ പലരും പ്രതികരിച്ചു. മന്ത്രിസഭ അംഗീകരിച്ച മാനദണ്ഡങ്ങൾ പാലിച്ച് എത്തുന്ന വിദേശികളെ സ്വീകരിക്കുന്നതിന് ആവശ്യമായ എല്ലാ ക്രമീകരണങ്ങളും വിമാനത്താവളത്തിലുണ്ടെന്നു സിവിൽ ഏവിയേഷൻ ഡയറക്ടർ ജനറൽ യൂസഫ് അൽ ഫൌസാൻ പറഞ്ഞു. നിലവിൽ പ്രതിദിനം കുവൈത്ത് വിമാനത്താവളം ഉപയോഗിക്കാവുന്ന യാത്രക്കാരുടെ എണ്ണം 5000 ആണ്. യാത്രയുമായി ബന്ധപ്പെട്ട് വ്യോമയാന വകുപ്പിന്റെ നിർദേശങ്ങൾ അറിയുന്നതിന് 22200161 എന്ന വാട്സാപ്പിൽ ബന്ധപ്പെടാവുന്നതാണെന്നും അദ്ദേഹം അറിയിച്ചു. ആരോഗ്യമന്ത്രി ഷെയ്ഖ് ഡോ.ബാസിൽ അൽ സബാഹ് വിമാനത്താവളത്തിലെത്തി ആരോഗ്യപരിശോധന സംബന്ധമായ ക്രമീകരണങ്ങൾ പരിശോധിച്ചു.
ആരോഗ്യമന്ത്രാലയം പ്രഖ്യാപിച്ച മുൻ‌കരുതലുകൾ പാലിച്ചുകൊണ്ട് വ്യോമയാന മേഖലയെ പുനരുദ്ധരിക്കുന്നതിനുള്ള സംവിധാനം വ്യോമയാന ഡയറക്ടറേറ്റ് ആവിഷ്കരിച്ചിട്ടുണ്ട്.

ന്യൂഡൽഹി : വീട്ടിൽ വച്ചു തന്നെ കോവിഡ് രോഗികളെ ഫലപ്രദമായി ചികിത്സിക്കുന്നതിനുള്ള വെർച്വൽ കോവിഡ് ഇൻ പേഷ്യന്റ് കെയർ (വിസിഐപി) പരീക്ഷണം വിജയകരം.

ആശുപത്രിയിലെത്തിച്ചുള്ള ചികിത്സയെക്കാൾ ഇരുപതിലൊന്നായി ചെലവു കുറയ്ക്കാൻ കഴിയുമെന്നതാണു പ്രധാന നേട്ടം. ആശുപത്രികളിലെ രോഗീബാഹുല്യം ഉൾപ്പെടെയുള്ള പരിമിതികളെ മറികടക്കാനും വിസിഐപി വഴി കഴിയുമെന്നു ജ്യോതിദേവ്സ് ഡയബറ്റിസ് റിസർച് സെന്ററിന്റെ നേതൃത്വത്തിൽ നടത്തിയ പഠനം വ്യക്തമാക്കുന്നു.220 കോവിഡ് രോഗികളിലായിരുന്നു പരീക്ഷണം. 99.5% പേരും പെട്ടെന്നു രോഗമുക്തി നേടി. 2 രോഗികൾ ചികിത്സാ മധ്യേ ആശുപത്രിയിലേക്കു മാറി. ഒരാൾക്കു മരുന്ന് എടുക്കുന്നതിലെ ബുദ്ധിമുട്ടും മറ്റൊരാൾക്കു കടുത്ത ആശങ്കയുമായിരുന്നു കാരണം.

ഡോ. ജ്യോതിദേവിനു പുറമേ, കാൻസർ ചികിത്സാ വിദഗ്ധനായ ഡോ. ഹരി പരമേശ്വരൻ, യുഎസിലെ ഡോ. റെബേക്ക വിറ്റൈൽ, ഡോ. എ.വി. രവീന്ദ്രൻ എന്നിവരുടെ മേൽനോട്ടത്തിലായിരുന്നു പഠനം.കോവിഡ് രോഗികൾക്കു സ്വയമോ വീട്ടിലുള്ളവരുടെ സഹായത്തോടെയോ ചികിത്സ നടത്താം. ഡോക്ടർമാർ, നഴ്സുമാർ, ഡയബറ്റിസ് എജ്യുക്കേറ്റേഴ്സ്, ഡയറ്റീഷ്യൻ, സൈക്കോളജിസ്റ്റ് എന്നിവരടങ്ങിയ വിദഗ്ധ സംഘമാണു വെർച്വലായി സഹായത്തിനുണ്ടാകുക. ചികിത്സാ ഉപകരണങ്ങളുടെ ഉപയോഗം സംഘത്തിലെ നഴ്സുമാർ വിഡിയോ സഹായത്തോടെ രോഗിയെയോ വീട്ടിൽ പരിചരിക്കുന്നയാളിനെയോ പഠിപ്പിക്കും. തൽസമയ ഗ്ലൂക്കോസ് നില അറിയാൻ സഹായിക്കുന്ന കണ്ടിന്യുവസ് ഗ്ലൂക്കോസ് മോണിറ്റർ (സിജിഎം) ഉപകരണത്തിന്റെ ഉപയോഗ രീതി മുതൽ കുത്തിവയ്പു വരെ പഠിപ്പിക്കും. ലാബ് പരിശോധനയ്ക്കു വേണ്ട സാംപിളുകളും വീട്ടിലെത്തി ശേഖരിക്കും.

വിസിഐപിയുടെ നേട്ടവും കോട്ടവും

ചികിത്സച്ചെലവു കുറവാണെന്നതും ആശുപത്രി പ്രവേശനത്തിനുള്ള ബുദ്ധിമുട്ട് ഒഴിവാക്കാം എന്നതുമാണു പ്രധാന നേട്ടങ്ങൾ. അതേസമയം, വെർച്വലായി കിട്ടുന്ന നിർദേശങ്ങൾ അതേപടി ഉൾക്കൊള്ളാനും അനുസരിക്കാനും കഴിയുന്നവരിൽ മാത്രമേ ഇതു നടപ്പാക്കാൻ കഴിയൂ എന്ന പരിമിതിയും നിലനിൽക്കുന്നുണ്ട്.

തിരുവനന്തപുരം :കർണാടകയ്ക്കു പിന്നാലെ തമിഴ്നാടും കേരളത്തിൽ നിന്നുള്ള യാത്രക്കാർക്ക് കോവിഡ് ആർടിപിസിആർ നെഗറ്റീവ് സർട്ടിഫിക്കറ്റ് നിർബന്ധമാക്കി.

വ്യാഴാഴ്ച മുതൽ പ്രാബല്യമെന്നാണു തമിഴ്നാട് സർക്കാരിന്റെ ഉത്തരവിൽ പറയുന്നതെങ്കിലും കോയമ്പത്തൂർ, തേനി ജില്ലകളിൽ ഇന്നുമുതൽ തന്നെ നിയന്ത്രണമുണ്ട്. കാസർകോട്ടുനിന്നുള്ള ബസുകൾക്ക് ഒരാഴ്ചത്തേക്കു പ്രവേശനം അനുവദിക്കരുതെന്നു കർണാടകയിലെ ദക്ഷിണ കന്നഡ  കലക്ടർ ഉത്തരവിട്ടു. ഇതോടെ മംഗളൂരു, സുള്ള്യ, പുത്തൂർ എന്നിവിടങ്ങളിലേക്കുള്ള കെഎസ്ആർടിസി സർവീസുകൾ സംസ്ഥാന അതിർത്തിവരെ മാത്രമാക്കി.എന്നാൽ,ബെംഗളൂരു സർവീസുകൾക്കു നിലവിൽ തടസ്സമില്ല.

മംഗളൂരു സർവകലാശാലയിലെ ബിരുദ പരീക്ഷകൾ നടക്കുന്നതിനാൽ കാസർകോട് അതിർത്തിയിലെ നിയന്ത്രണം വിദ്യാർഥികൾക്കു പ്രയാസമാകുമെന്ന് ആശങ്കയുണ്ട്.72 മണിക്കൂറിനിടെയുള്ള ആർടിപിസിആർ സർട്ടിഫിക്കറ്റാണ് ഇരുസംസ്ഥാനങ്ങളിലേക്കും വേണ്ടത്. അതേസമയം, തമിഴ്നാട്ടിലേക്കു പോകുന്നവർ രണ്ടു ഡോസ് വാക്സീനുമെടുത്ത് 14 ദിവസം കഴിഞ്ഞെങ്കിൽ വാക്സിനേഷൻ സർട്ടിഫിക്കറ്റ് കാണിച്ചാൽ മതി. എന്നാൽ കർണാടക, 2 ഡോസ് എടുത്തവരെയും നെഗറ്റീവ് സർട്ടിഫിക്കറ്റില്ലാതെ കടത്തിവിടുന്നില്ല.എല്ലാ അതിർത്തി ജില്ലകൾക്കും തമിഴ്നാട് സർക്കാർ പ്രത്യേക ജാഗ്രതാ നിർദേശം നൽകിയിട്ടുണ്ട്. കോയമ്പത്തൂരിൽ മാത്രം 13 ഇടങ്ങളിലാണു പരിശോധന. വിമാനയാത്രക്കാർക്കും നിബന്ധനകൾ ബാധകമാണ്. മധുര മീനാക്ഷി, പഴനി ക്ഷേത്രങ്ങൾ ഭക്തരെ വിലക്കിയിട്ടുണ്ട്.

കണ്ണൂർ: രാഖിലിന്റെ വെടിയേറ്റ് കൊല്ലപ്പെട്ട മാനസയുടെ മൃതദേഹം പോസ്റ്റ്‌മോർട്ടത്തിന് ശേഷം എത്തിച്ചപ്പോൾ കണ്ണൂർ നാറാത്തെ വീട് സാക്ഷിയായത് വികാരനിർഭരമായ രംഗങ്ങൾക്ക്.

മകളുടെ മൃതദേഹം കണ്ട് വാവിട്ട് കരഞ്ഞ അമ്മ ബീന ബോധരഹിതയായി. ബന്ധുക്കൾക്കും കൂടിയ നാട്ടികാർക്കും കണ്ണീരടക്കാനായില്ല.ജനപ്രതിനിധികളും രാഷ്ട്രീയനേതാക്കളും ഉൾപ്പെടെയുള്ളവർ ഇവിടെ അന്ത്യോപചാരം അർപ്പിക്കാനെത്തിയിരുന്നു.

മന്ത്രി ഗോവിന്ദൻ മാസ്റ്ററും ശ്രീമതി ടീച്ചറും ആദരാഞ്ജലി അർപ്പിക്കാനെത്തിയിരുന്നു. വീട്ടിലെ പൊതുദർശനത്തിന് ശേഷം മാനസയുടെ മൃതദേഹം രാവിലെ പത്ത് മണിയോടെ സംസ്‌കാര ചടങ്ങുകൾക്കായി പയ്യാമ്പലത്തെ ശ്മശാനത്തിൽ എത്തിച്ചു.

അതേസമയം, മാനസയെ കൊലപ്പെടുത്തുന്നതിന് മുമ്പ് രാഖിൽ ബിഹാറിലേക്ക് യാത്രചെയ്‌തെന്നും കേസിൽ പോലീസിന് കൃത്യമായ തെളിവ് ലഭിച്ചിട്ടുണ്ടെന്നും മന്ത്രി എംവി ഗോവിന്ദൻ മാസ്റ്റർ അറിയിച്ചു.. കോതമംഗലത്ത് നടന്നത് ഉത്തരേന്ത്യൻ ശൈലിയുള്ള കൊലപാതകമാണെന്നും അന്വേഷണവുമായി ബന്ധപ്പെട്ട് എറണാകുളം റൂറൽ എസ്.പി.യുമായി സംസാരിച്ചിട്ടുണ്ടെന്നും മന്ത്രി പറഞ്ഞു.