കരുവന്നൂർ ബാങ്ക് തട്ടിപ്പ് ;നാല് പ്രതികളെ കസ്റ്റഡിയിൽ.

തൃശ്ശൂർ: 300 കോടി രൂപയുടെ കരുവന്നൂർ ബാങ്ക് വായ്പാ തട്ടിപ്പു കേസിൽ സിപിഎം ഭാരവാഹികളും ജീവനക്കാരും ഉൾപ്പെടെ നാല് പ്രതികൾ ക്രൈംബ്രാഞ്ച് കസ്റ്റഡിയിലെന്ന് സൂചന. ഇവർ അറസ്റ്റിലാണെന്ന് ഇന്നലെ ഉച്ച മുതൽ പ്രചാരണമുണ്ടെങ്കിലും അന്വേഷണസംഘം നിക്ഷേപിച്ചു. ബാങ്കിൻറെ സെക്രട്ടറിയും സിപിഎം കരുവന്നൂർ ലോക്കൽ കമ്മിറ്റി അംഗവുമായിരുന്ന ടി.ആർ. സുനിൽ കുമാർ, മുൻ മാനേജറും പൊറത്തിശേരി ലോക്കൽ കമ്മിറ്റി അംഗവുമായ ബിജു കരിം,സീനിയർ അക്കൗണ്ടന്റും തൊടുപറമ്പ് ബ്രാഞ്ച് അംഗവുമായ സി.കെ. ജിൻസ്, കമ്മീഷൻ ഏജൻറ് എ.കെ. ബിജോയ് എന്നിവരാണ് കസ്റ്റഡിയിലായത്. എന്നാൽ,പ്രതികളെ പിടികൂടിയിട്ടില്ല അവർ ഒളിവിൽ തന്നെയാണെന്നും ക്രൈംബ്രാഞ്ച് എസ്പി കെ.എസ്.സുദർശൻ അറിയിച്ചു.ബാങ്ക് വായ്പ തട്ടിപ്പിൽ ഒരാഴ്ച മുമ്പ് ആറ് പേർക്കെതിരെ ഇരിഞ്ഞാലക്കുട പോലീസ് കേസ് രജിസ്റ്റർ ചെയ്തതിനു പിന്നാലെ പ്രതികളെല്ലാം ഒളിവിൽ പോയിരുന്നു. സുനിൽ കുമാറിൻറെ നേതൃത്വത്തിൽ നാല് പ്രതികൾ തൃശൂർ അയ്യന്തോളിലെ ഫ്ലാറ്റിലുണ്ടെന്ന് അന്വേഷണ സംഘത്തിന് വിവരം ലഭിച്ചു. മൊബൈൽ ഫോൺ ഉപോക്ഷിച്ച് നാല് ദിവസമായി ഇവർ ഫ്ലാറ്റിൽ കഴിയുകയായിരുന്നു. ഫ്ലാറ്റിനു താഴെയുള്ള സൂപ്പർ മാർക്കറ്റിൽ ഇവർ എത്തിയത് സിസിടിവി ദൃശ്യങ്ങളിൽ പതിഞ്ഞതായി സൂചനയുണ്ട്.രഹസ്യമായി ഫ്ലാറ്റിലെത്തിയ ക്രൈംബ്രാഞ്ച് സംഘം നാലുപേരെയും കസ്റ്റഡിയിലെടുത്തതായാണ് സൂചന. ലോക്കൽ പോലീസും സ്പെഷ്യൽ ബ്രാഞ്ചുമൊന്നും വിവരം അറിഞ്ഞില്ല. . പ്രതികളെ പിപി കിറ്റ് ധരിപ്പിച്ച് ക്രൈംബ്രാഞ്ച് സംഘം അതീവരഹസ്യമായി ഇവരുടെ വീട്ടിൽ എത്തിച്ചു തെളിവെടുത്തതായും സൂചനയുണ്ട്. റെയ്ഡിൽ 29 ബെനാമി രേഖകളിലായി 14.50 കോടിയുടെ ക്രമക്കേടുകൾ കണ്ടെത്തി.വായ്പ വായ്പ തട്ടിപ്പിലെ പ്രധാന ഇടനിലക്കാരൻ കറുവന്നൂർ പൊറത്തിശേരി കിരൺ, ബാങ്ക് നടത്തുന്ന സൂപ്പർമാർക്കറ്റിലെ അക്കൗണ്ടന്റ് റെജി അനിൽ എന്നിവർ ഒളിവിലാണ്.

ഇന്ന് വീണ്ടും പാർലമെൻറ് സമ്മേളനം;പെഗസസ് ആളിക്കത്തിക്കാൻ പ്രതിപക്ഷം.

ന്യൂഡൽഹി : പെഗസസ് വിഷയത്തിൽ പാർലമെന്റിൽ പ്രതിഷേധം ശക്തമാക്കാനൊരുങ്ങി പ്രതിപക്ഷം. രണ്ടു ദിവസത്തെ ഇടവേളക്ക് ശേഷമാണ് പാർലമെൻറ് ഇന്ന് വീണ്ടും ചേരുന്നത്. പെഗസസ് വിഷയത്തിൽ സഭ നിർത്തിവെച്ച് ചർച്ച വേണമെന്നും ജുഡീഷ്യൽ അന്വേഷണം വേണമെന്നുമാണ് പ്രതിപക്ഷ ആവശ്യം. അന്വേഷണം സാധ്യമല്ലെന്നും ഏത് വിഷയത്തിലും ചർച്ചയ്ക്ക് തയ്യാറാണെന്നുമാണ് സർക്കാരിൻറെ നിലപാട്. ഐടി മന്ത്രി അശ്വിനി വൈഷ്ണവ് പെഗസസ് സംബന്ധിച്ച് ലോകസഭയിൽ പ്രസ്താവന നടത്തിയിരുന്നു. രാജ്യസഭയിൽ പ്രസ്താവന നടത്തുന്നതിനിടെ തൃണമൂൽ ശന്തനു സെൻ അംഗം കടലാസുകൾ കീറിയതിനു സസ്പെൻഷൻ ലഭിച്ചിരുന്നു.
ഇതേച്ചൊല്ലിയും ഇന്ന് പ്രതിഷേധം ഉയർത്തുമെന്ന് ഉറപ്പാണ്.
എന്നാൽ, വിവിധ നേതാക്കൾ പെഗസസ് വിഷയത്തിൽ ഇരുസഭകളിലും അടിയന്തര പ്രമേയ നോട്ടീസ് നൽകിയിട്ടുണ്ട്.17 പുതിയ ബില്ലുകൾ അടക്കം 29 ബില്ലുകൾ ഈ സമ്മേളനത്തിൽ പാസാക്കാനാണ് കേന്ദ്ര സർക്കാരിൻറെ ഉദ്ദേശം. കഴിഞ്ഞയാഴ്ച കോവിഡ് സംബന്ധിച്ച് രാജ്യസഭയിൽ നാലു മണിക്കൂർ ചർച്ച നടന്നതല്ലാതെ കാര്യമായ നടപടികളൊന്നും ഉണ്ടായിട്ടില്ല. ലോക്സഭയിൽ ബഹളത്തിനിടെ ഉൾനാടൻ ജലഗതാഗത ബില്ലും ആയുധ ഫാക്ടറികളിൽ സമരം നിരോധിക്കുന്ന ബില്ലും അവതരിപ്പിച്ചെങ്കിലും ചർച്ച ഉണ്ടായില്ല.ബില്ലുകൾ പാർലമെന്ററി സമതിക്ക് വിടണമെന്നാണ് പ്രതിപക്ഷ ആവശ്യം.കഴിഞ്ഞ സഭയിലും പ്രതിപക്ഷത്തിന്റെ ആസാന്നിധ്യത്തിലായിരുന്നു വിവിധ ബില്ലുകൾ പാസാക്കിയത്. കൃഷി നിയമം, തൊഴിൽ നിയമം തുടങ്ങിയവ ഈ രീതിയിൽ പാസാക്കിയതിനെതിരെ പ്രതിപക്ഷം പ്രതിഷേധമുയർത്തിയിരുന്നു. ഈ ആഴ്ച ഇരുസഭകളിലുമായി പത്തിലേറെ ബില്ലുകൾ അവതരിപ്പിക്കും. പ്രതിപക്ഷ നീക്കങ്ങൾക്കു ശക്തിപകരാൻ ബംഗാൾ മുഖ്യമന്ത്രി മമതാ ബാനർജിയും ഡൽഹിയിലെത്തിയിട്ടുണ്ട്.

നിബന്ധനകളോടു കൂടിയ പ്രവേശനത്തിന് അനുമതി നല്കി കുവൈത്ത്;പ്രവാസികൾക്ക് ആശ്വാസം

കുവൈത്ത് സിറ്റി : വിദേശികൾക്ക് ഓഗസ്റ്റ് ഒന്നു മുതൽ കുവൈത്തിൽ പ്രവേശനം നൽകുന്നതിന് മന്ത്രിസഭ അംഗീകരിച്ച നിബന്ധനകൾ പാലിച്ചാൽ മതിയെന്ന് പ്രാദേശിക പത്രം റിപ്പോർട്ട് ചെയ്തു. സാധുതയുള്ള ഇഖാമ, കുവൈത്ത് അംഗീകരിച്ച കോവിഡ് വാക്സിനേഷൻ സർട്ടിഫിക്കറ്റ്, 72 മണിക്കൂർ സമയപരിധിക്കകത്തെ പിസി‌ആർ പരിശോധനാ റിപ്പോർട്ട്, 7 ദിവസം ഹോം ക്വാറന്റീൻ, കുവൈത്തിൽ പ്രവേശിച്ച് 3 ദിവസത്തിനകം പിസി‌ആർ പരിശോധന എന്നിവയാണ് നിബന്ധന. 3 ദിവസത്തിനകം നടത്തുന്ന പിസി‌ആർ പരിശോധനയിൽ നെഗറ്റീവ് ആണെങ്കിൽ ക്വാറന്റീൻ അവസാനിപ്പിക്കാനും കഴിയും.ഫൈസർ, മൊഡേണ, ആസ്ട്രസെനിക വാക്സീനുകളാണെങ്കിൽ 2 ഡോസും ജോൺസൺ ആൻഡ് ജോൺസൺ ആണെങ്കിൽ 1 ഡോസും എടുത്തിരിക്കണം. ചില വിഭാഗങ്ങൾക്ക് മാത്രം പ്രവേശനം എന്ന നിലവിലുള്ള സംവിധാനം ജൂലൈ 31വരെ മാത്രമായിരിക്കും. നിലവിൽ,ജഡ്ജിമാർ, ഡോക്ടർമാർ, എണ്ണ കമ്പനി ജീവനക്കാർ, ഗാർഹിക തൊഴിലാളികൾ, നയതന്ത്രാലയം ജീവനക്കാർ തുടങ്ങിയവർക്ക് മാത്രമാണ് പ്രവേശനമുള്ളത്. ഇതിലാണ് മാറ്റം വന്നിരിക്കുന്നത്.വാക്സിനേഷൻ സർട്ടിഫിക്കറ്റിനുള്ള അംഗീകാരം സംബന്ധിച്ച തീരുമാനം ആരോഗ്യമന്ത്രാലയത്തിന്റേതായിരിക്കും. വിദേശികൾക്ക് നേരിട്ടുള്ള പ്രവേശനമാണോ മറ്റൊരു രാജ്യത്ത് തങ്ങിയതിന് ശേഷമുള്ള പ്രവേശനമാണോ എന്നത് തീരുമാനിക്കാനിരിക്കുന്നതേയുള്ളൂ. എല്ലാ തീരുമാനങ്ങളും മന്ത്രിസഭയുടേതായിരിക്കും.അത് എന്തുമാകാം. പ്രവേശനം അനുവദിക്കാനുള്ള തീരുമാനം റദ്ദാക്കുന്നത് ഉൾപ്പെടെ എന്തും പ്രതീക്ഷിക്കാവുന്നതേയുള്ളൂവെന്നും പ്രസ്തുത കേന്ദ്രങ്ങൾ വ്യക്തമാക്കി.കോവിഡ് പശ്ചാത്തലം വിലയിരുത്തി മന്ത്രിസഭയാകും തീരുമാനം കൈക്കൊള്ളുക.

ബസ്​ കാത്തിരിപ്പ് സമയം​ കുറക്കാനുള്ള പുതിയ സാങ്കേതികൾ വികസിപ്പിച്ച് ദുബൈ.

ദുബൈ: ബസ്​ സർവിസുകളുടെ കാര്യക്ഷമത വർധിപ്പിക്കുകയും കാത്തിരിപ്പ്​ ​സമയം കുറക്കുകയും ചെയ്യാൻ​ രണ്ട്​ പുതിയ പദ്ധതികളുമായി റോഡ്​ ഗതാഗത അതോറിറ്റി (ആർ.ടി.എ). ആർട്ടിഫിഷൽ ഇൻറലിജൻസ് അടക്കം പുതു സാ​ങ്കേതിക വിദ്യകൾ ഉപയോഗിച്ചാണ്​ പദ്ധതിയൊരുക്കുന്നത്​.
ആദ്യ പദ്ധതിയിൽ നഗരപ്രദേശങ്ങളിലെ ഗതാഗതം നിയന്ത്രിക്കാൻ ആർ.‌ടി.‌എ ‘സിറ്റി ബ്രെയിൻ’ സംവിധാനമാണ്​ അലിബാബ ക്ലൗഡുമായി ചേർന്ന്​ പരീക്ഷിക്കുക.നോൽ കാർഡുകൾ, ബസുകൾ, ടാക്​സികൾ എന്നിവയിലും കൺട്രോൾ സെൻററിലും നിന്നുള്ള വിവരങ്ങൾ ഉപയോഗിച്ച്​ ബസുകളുടെ ഷെഡ്യൂളും റൂട്ടുകളും മെച്ചപ്പെടുത്തും. ഈ സംവിധാനം ബസ് യാത്ര 17 ശതമാനം മെച്ചപ്പെടുത്തുമെന്നും ശരാശരി കാത്തിരിപ്പ് സമയം 10 ​​ശതമാനം കുറക്കുമെന്നുമാണ്​ പ്രതീക്ഷ.
രണ്ടാമത്തെ പദ്ധതി അൽ ഖൂസ് ബസ് ഡിപ്പോയിലെ വിദൂര ബസ് പെർഫോമൻസ്​ നിരീക്ഷണകേന്ദ്രമാണ്. ആർ.ടി.എയുടെ പുതിയ 516 വോൾവോ ബസുകളെയാണ്​ കേന്ദ്രം അതത്​ സമയങ്ങളിൽ ട്രാക് ചെയ്യുകയും നിരീക്ഷിക്കുകയും ചെയ്യുക. ബസുകളുടെ പ്രവർത്തനത്തെ ബാധിക്കുന്ന മെക്കാനിക്കൽ, എണ്ണ ഉപഭോഗം, സുരക്ഷാ ഉപകരണങ്ങളുടെ അവസ്ഥ എന്നിവ സംബന്ധിച്ച 47 മുന്നറിയിപ്പുകൾ കേന്ദ്രത്തിന്​ നൽകാനാവും.ഇതിലൂടെ എണ്ണ ഉപയോഗം അഞ്ച്​ ശതമാനം കുറക്കാനും സമയാസമയങ്ങളിൽ ബസ്​ അറ്റകുറ്റപ്പണിക്കും​ സാധിക്കും. ഇരു പദ്ധതികളും നടപ്പാകുന്നത്​ ബസ്​ സർവിസുകളുടെ കാര്യക്ഷമത വർധിപ്പിക്കും.ദുബൈയിലെ പൊതുഗതാഗത സംവിധാനം കോവിഡിന്​ മുമ്പുള്ള അവസ്​ഥയിലേക്ക്​ 70 ശതമാനം മാറിയതായി ആർ.ടി.എ ഡയറക്​ടർ ജനറൽ മത്വാർ മുഹമ്മദ്​ അൽ തായർ പറഞ്ഞു.പുതുതായി നടപ്പാക്കിയ സംവിധാനങ്ങളിലൂടെ പൊതുഗതാഗത സംവിധാനങ്ങൾ കൂടുതൽ മെച്ചപ്പെടുത്താൻ സാധിച്ചതായും അദ്ദേഹം പറഞ്ഞു.

മൂന്നാം തരംഗം നേരിടാൻ മുന്നൊരുക്കങ്ങളുമായി കേന്ദ്ര-സംസ്ഥാന സർക്കാരുകൾ.

ന്യൂഡൽഹി : മൂന്നാം കോവിഡ് തരംഗമെന്ന ആശങ്ക നിലനിൽക്കെ മരുന്നുകൾ സംഭരിച്ചു കേന്ദ്ര-സംസ്ഥാന സർക്കാരുകൾ മുന്നൊരുക്കങ്ങൾ തുടങ്ങി. രണ്ടാം തരംഗത്തിൽ ഏറ്റവുമധികം വേണ്ടിവന്ന റെംഡിസിവിർ, ഫാവിപിരാവിർ തുടങ്ങിയ ആൻറി വൈറൽ മരുന്നുകളും പാരസെറ്റാമോൾ, വൈറ്റമിൻ,ആൻറിബയോട്ടിക് തുടങ്ങിയവയും അധികമായി ഉത്പാദിപ്പിക്കാൻ മരുന്ന് കമ്പനികൾക്ക് നിർദേശം നൽകി.50 ലക്ഷം റെംഡിസിവിർ ഇഞ്ചക്ഷന് കേന്ദ്രസർക്കാർ തന്നെ ഓർഡർ നൽകിയതായാണ് സൂചന. ഫാർമസ്യുറ്റിക്കൽസ് മന്ത്രാലയം മരുന്നുകമ്പനികളുടെ പ്രത്യേക യോഗം വിളിച്ചു.അതിനിടെ, കോവിഡ് പരിചരണത്തിന് ഏറ്റവുമധികം ഉപയോഗിക്കുന്ന ചില മെഡിക്കൽ ഉപകരണങ്ങൾക്ക് നാഷണൽ ഫാർമസ്യൂട്ടിക്കൽ പ്രൈസിങ് അതോറിറ്റി (എൻപിപിഎ )വില കുറച്ചു. 2600 രൂപ വിലയുണ്ടായിരുന്ന ഓക്സീമീറ്ററിന് 1950 രൂപയായി കുറച്ചു.ബിപി ഉപകരണത്തിന് 3,500 രൂപയിൽനിന്ന് 1,375 രൂപയായും ഗ്ലൂക്കോമീറ്ററിന് 1,590 രൂപയിൽനിന്ന് 675 രൂപയായും തെർമോമീറ്ററിന് 270 രൂപയിൽ നിന്ന് 249 രൂപയായും കുറയും.എന്നാൽ, ബ്രാൻഡുകൾക്ക് അനുസരിച്ച് വിലയിൽ മാറ്റം വരുമെന്നും എൻപിപിഎ അറിയിച്ചു.കോവിഡ് പ്രതിരോധംമെച്ചപ്പെടുത്താൻ വർഷാവസാനത്തോടെ ബൂസ്റ്റർ ഡോസ് വേണ്ടിവരുമെന്ന് എയിംസ് ഡയറക്ടർ ഡോ.രൺദീപ് വ്യക്തമാക്കി. കുട്ടികൾക്ക്‌ സെപ്റ്റംബറോടെ വാക്സീൻ നൽകി തുടങ്ങാനകുമെന്ന പ്രതീക്ഷയിലാണെന്നും അദ്ദേഹം വ്യക്തമാക്കി.