മമ്മൂട്ടി ആരാധകരും സിനിമാപ്രേമികളും ഒരുപോലെ ബസൂക്ക എന്ന സിനിമയ്ക്കായി കാത്തിരിപ്പിലാണ്. ഏപ്രിൽ 10 നാണ് ചിത്രം തിയേറ്ററുകളിലെത്തുന്നത്. ചിത്രത്തിലെ പുതിയ ക്യാരക്ടർ പോസ്റ്റർ പുറത്തുവിട്ടിരിക്കുകയാണ് അണിയറപ്രവർത്തകർ. നടൻ സുമിത് നവലിന്റെ ക്യാരക്ടർ പോസ്റ്ററാണ് അണിയറപ്രവർത്തകർ പുറത്തുവിട്ടിരിക്കുന്നത്.

ബിഗ് ബി എന്ന മമ്മൂട്ടി ചിത്രത്തിലെ ബിജോ ജോൺ കുരിശിങ്കൽ എന്ന കഥാപാത്രത്തിലൂടെ ശ്രദ്ധേയനായ നടനാണ് സുമിത്. ഇതിന് പുറമെ സാഗർ ഏലിയാസ് ജാക്കി, സീനിയേഴ്സ്, സിഐഎ തുടങ്ങിയ സിനിമകളിലും നടൻ അഭിനയിച്ചിട്ടുണ്ട്. തെന്നിന്ത്യൻ നായിക സിമ്രാന്റെ സഹോദരൻ കൂടിയാണ് സുമിത്.

മലയാളത്തിലെ എക്കാലത്തെയും മികച്ച തിരക്കഥാ രചയിതാക്കളിലൊരാളായ കലൂർ ഡെന്നിസിൻ്റെ മകനാണ് ഈ ചിത്രത്തിന്റെ സംവിധായകനായ ഡീനോ ഡെന്നിസ് എന്നതും ബസൂക്കയുടെ പ്രത്യേകതയാണ്. മമ്മൂട്ടിക്കൊപ്പം പ്രശസ്ത തമിഴ് സംവിധായകനും നടനുമായ ഗൗതം വാസുദേവ് മേനോൻ നിർണ്ണായക കഥാപാത്രത്തെ അവതരിപ്പിക്കുന്നുണ്ട്. ബെഞ്ചമിൻ ജോഷ്വാ എന്ന കഥാപാത്രമായാണ് ഗൗതം മേനോൻ ഈ ചിത്രത്തിൽ വേഷമിട്ടിരിക്കുന്നത്.

ചിത്രത്തിൽ സിദ്ധാർത്ഥ് ഭരതൻ, ബാബു ആൻ്റണി, ഹക്കീം ഷാജഹാൻ, ഭാമ അരുൺ, ഡീൻ ഡെന്നിസ്, ദിവ്യാ പിള്ള, സ്ഫടികം ജോർജ് എന്നിവരാണ് മറ്റ് പ്രധാന താരങ്ങൾ. കാപ്പ, അന്വേഷിപ്പിൻ കണ്ടെത്തും എന്നിവക്ക് ശേഷം സരിഗമയും തീയേറ്റർ ഓഫ് ഡ്രീംസും ചേർന്ന് നിർമ്മിക്കുന്ന ചിത്രം കൂടിയാണ് ബസൂക്ക.

അതേസമയം ബിഗ് ബിയിലെ മമ്മൂട്ടിയുടെ അനിയൻ കഥാപാത്രമായ ബിജോയ് ജോൺ കുരിശിങ്കൽ ശ്രദ്ധേയമായെങ്കിലും സുമിത് മലയാളത്തിൽ സജീവമാകാത്തതിന്റെ കാരണം പലരും ചോദിച്ചിരുന്നു. ഒരു സ്വകാര്യ യൂട്യൂബ് ചാനലിൽ നൽകിയ അഭിമുഖത്തിൽ തനിക്ക് മലയാളത്തിൽ നിന്നും നല്ല കഥാപാത്രങ്ങൾ കിട്ടാത്തതിനാലാണ് അഭിനയിക്കാതിരുന്നത് എന്നും പിന്നീട് താൻ തന്റെ സിനിമാ സംവിധാന തിരക്കിലായെന്നും താരം പറയുന്നു. വർഷങ്ങൾക്കിപ്പുറം വീണ്ടും ബസുക എന്ന മലയാള സിനിമയിലൂടെ തിരിച്ചുവരവ് നടത്തുമ്പോൾ ഓക്കേ പറയാൻ പ്രേരിപ്പിച്ചത് മമ്മൂട്ടി എന്ന ഘടകം ആണെന്ന് താരം പറയുന്നു.

സംഗീതപരിപാടിയുമായി ബന്ധപ്പെട്ട് സംഗീതസംവിധായകൻ ഷാൻ റഹ്മാനും ഭാര്യ സൈറയും സാമ്പത്തികത്തട്ടിപ്പ് നടത്തിയെന്ന ആരോപണം ഉയർന്നിരുന്നു. ഇരുവർക്കുമെതിരെ പരിപാടിയുടെ ഡയറക്ടർ നിജുരാജ് എബ്രഹാം കേസ് നൽകിയതും വാർത്തയായിരുന്നു. ഇപ്പോഴിതാ, ഈ വിഷയത്തിൽ പ്രതികരണവുമായി എത്തിയിരിക്കുകയാണ് ഷാൻ റഹ്മാൻ ഇപ്പോൾ. നിജുരാജ് തങ്ങളെ സാമ്പത്തികമായി വഞ്ചിച്ചെന്നാണ് യൂട്യൂബിൽ പങ്കുവച്ച വീഡിയോയിൽ ഷാൻ പറയുന്നത്

ഷാനിന്റെയും ഭാര്യ സൈറയുടെയും സംയുക്ത സംരംഭമാണ് ഇറ്റേണൽ റീ പ്രൊഡക്‌ഷൻസ്. 2024ൽ ദുബായിൽ നടത്തിയ ഉയരെ എന്ന ഷോ ഹിറ്റായതോടെ കൊച്ചിയിലും അതുപോലൊരു ഷോ സംഘടിപ്പിക്കാൻ താൻ ആഗ്രഹിച്ചുവെന്നും അതിനുവേണ്ടി പ്രൊഡക്ഷൻ കമ്പനികളിൽ നിന്നും ക്വട്ടേഷൻ ക്ഷണിച്ചപ്പോൾ എത്തിയ കമ്പനിയാണ് നിജുരാജ് എബ്രഹാം സിഇഒ ആയ ഉദയ പ്രോ എന്നും ഷാൻ പറയുന്നു.

“ഞങ്ങൾ പരിപാടി നടത്താൻ തീരുമാനിച്ചു. എന്നാൽ പ്രതീക്ഷിച്ചതുപോലെ സ്പോൺസേഴ്സിനെ കിട്ടിയില്ല. അതോടെ വലിയ ഷോ വേണ്ടെന്നുവച്ച് ചെറിയ രീതിയിൽ പരിപാടി നടത്താൻ ഞങ്ങൾ തീരുമാനിച്ചു. ഇക്കാര്യം നിജുവിനെ അറിയിക്കുകയും ചെയ്തു. തങ്ങൾക്ക് അറോറ എന്റർടെയിൻമെന്റ്സ് എന്ന പേരിൽ ഒരു സ്ഥാപനമുണ്ടെന്നും അവർ പരിപാടിക്കായി 25 ലക്ഷം ഇൻവസ്റ്റ് ചെയ്യാമെന്നും നിജു പറഞ്ഞിരുന്നു. ലാഭത്തിന്റെ 70 ശതമാനം നിജു ആവശ്യപ്പെട്ടു, ഞങ്ങളത് സമ്മതിച്ചു.”ഷോ അനൗൺസ് ചെയ്തതിനു ശേഷം നിജുവിന്റെ ഭാഗത്തുനിന്നും യാതൊരു അനക്കവുമില്ലായിരുന്നുവെന്നും, ജനുവരി പകുതിയോടെ നിജു 5 ലക്ഷം രൂപ തന്റെയും ഭാര്യയുടെയും കമ്പനിയായ ഇറ്റേണൽ റീ പ്രൊഡക്‌ഷൻസിന്റെ അക്കൗണ്ടിൽ നിക്ഷേപിക്കുകയായിരുന്നുവെന്നും ഷാൻ വ്യക്തമാക്കി. “ഷോയുടെ തലേദിവസം അവിടെ എത്തിയപ്പോഴാണ് ഉദയപ്രോ അല്ല, പ്രൊഡക്‌ഷൻ ചെയ്യുന്നതെന്ന് മനസ്സിലായത്. ഡ്രോൺ പറക്കാനുള്ള അനുമതി ഇല്ലെന്ന് ഞങ്ങളിൽ നിന്നും മറച്ചുവച്ചു. അനുവാദം കൂടാതെ അവിടെ ഡ്രോൺ പറത്തിയതിന് നിജു അറസ്റ്റിലായപ്പോൾ എന്റെ സംഘാംഗങ്ങളാണ് ജാമ്യത്തിലിറക്കിയത്.

പരിപാടിയ്ക്കു ശേഷം നിജു 51 ലക്ഷത്തിന്റെ ബില്ലുമായി സമീപിച്ചെന്നും ഷാൻ പറയുന്നു. ” നിജു ഇൻവെസ്റ്റ് ചെയ്തിട്ടില്ല, എന്നിട്ട് ഈ പൈസ മുഴുവൻ ഞാൻ തിരികെ കൊടുക്കണമെന്നു പറയുന്നതിൽ എന്താണ് ന്യായം? നിജു എന്റെ ഭാര്യ സൈറയെ വിളിച്ച് ആത്മഹത്യാഭീഷണി മുഴക്കുകയും നിരന്തരം വിളിച്ച് ശല്യപ്പെടുത്തുകയും ചെയ്തു. അതോടെ നിജു ആകെ നൽകിയ 5 ലക്ഷം രൂപ സൈറ തിരിച്ചു കൊടുത്തു. എന്നിട്ടും നിജുവിന്റെ ശല്യം തീർന്നില്ല. കൊച്ചിയിലെ കോളജിൽ നടന്ന സംഗീത നിശയുടെ ചിലവുകൾ പലതവണ ആവശ്യപ്പെട്ടിട്ടും നിജു തന്നില്ല. എഗ്രിമെന്റ് നൽകാനും ശ്രമിച്ചില്ല അപ്പോഴേക്കും സൈറ മാനസികമായി ആകെ തളർന്നിരുന്നു. അവൾ എന്നെ വിളിച്ച് അലറിക്കരഞ്ഞു. അതിനു ശേഷം ഞാൻ നിജുവുമായി സംസാരിച്ചതിന്റെ ക്ലിപ്പുകളാണ് തെറ്റായ രീതിയിൽ വ്യഖ്യാനിക്കപ്പെട്ടത്,” ഷാൻ കൂട്ടിച്ചേർത്തു.

പറഞ്ഞ പണം തങ്ങൾ കൊടുക്കില്ലെന്നു മനസ്സിലായതോടെയാണ് നിജു കേസ് ഫയൽ ചെയ്തതെന്നും ഇടയ്ക്ക് കോംപ്രമൈസിനു വേണ്ടി നിജു രണ്ടുപേരെ വീട്ടിലേക്ക് അയച്ചിരുന്നുവെന്നും ഷാൻ റഹ്മാൻ പറയുന്നു. “ഈ പ്രശ്നത്തിന്റെ പേരിൽ ഞാനും എന്റെ കുടുംബവും മാനസികമായി ഉരുകി ഇല്ലാതായി. നാട്ടുകാരുടെ മുഴുവൻ ചീത്ത കേട്ടു. നിജു പരസ്യമായി മാപ്പ് പറയണമെന്ന് ഞാൻ ആവശ്യപ്പെട്ടു. എന്നാൽ നിജു അത് വിസമ്മതിച്ചു. ഞാനും ഭാര്യയും കഴിഞ്ഞ മാസം 29ന് പൊലീസ് സ്റ്റേഷനിൽ പോയി മൊഴി കൊടുത്തു. ഞങ്ങൾ കേസുമായി മുന്നോട്ടു പോവുകയാണ്. സത്യം പറഞ്ഞാൽ മതിയായി. എനിക്കും കുടുംബത്തിനും ജോലി ചെയ്യണം, ജീവിക്കണം. ദയവായി ഉപദ്രവിക്കരുത്,” ഷാൻ റഹ്മാൻ്റെ വാക്കുകളിങ്ങനെ.

എമ്പുരാന്‍ സിനിമയുടെ ഉള്ളടക്കത്തെച്ചൊല്ലിയുള്ള വിവാദത്തില്‍ വീണ്ടും അഭിപ്രായ പ്രകടനവുമായി സംവിധായകന്‍ മേജര്‍ രവി. സിനിമ മോശമാണെന്ന് താന്‍ പറഞ്ഞിട്ടില്ലെന്നും എന്നാല്‍ ചിത്രത്തില്‍ ദേശ വിരുദ്ധത ഉണ്ടെന്നും മേജര്‍ രവി പറഞ്ഞു. ചിത്രത്തില്‍ സത്യാവസ്ഥ മറച്ചുപിടിച്ചിരിക്കുകയാണ്. വിവാദത്തില്‍ പൃഥ്വിരാജിനെ ഒറ്റപ്പെടുത്തിയിട്ടില്ലെന്നും മല്ലിക സുകുമാരന്‍ പറ‍ഞ്ഞത് ഒരു അമ്മയുടെ വികാരമാണെന്നും അദ്ദേഹം പ്രതികരിച്ചു. എന്‍റെ സിനിമയില്‍ രാജ്യസ്നേഹം മാത്രമേയുള്ളൂ. ദേശവിരുദ്ധത ഇല്ല, മേജര്‍ രവി കൂട്ടിച്ചേര്‍ത്തു.

എമ്പുരാന്‍ സിനിമയെത്തുടര്‍ന്നുള്ള വിവാദത്തില്‍ സിനിമാ മേഖലയില്‍ നിന്ന് വന്ന ആദ്യ പ്രതികരണങ്ങളിലൊന്നായിരുന്നു മേജര്‍ രവിയുടേത്. റിലീസിന് മുന്‍പ് ചിത്രം മോഹന്‍ലാല്‍ കണ്ടിരുന്നില്ലെന്നും വിവാദത്തില്‍ മോഹന്‍ലാലിന് വിഷമമുണ്ടെന്നും മേജര്‍ രവി ഫേസ്ബുക്ക് ലൈവില്‍ പറഞ്ഞിരുന്നു. ഇത് ഒരു പാഠമായിട്ടുണ്ടെന്നും ഇനി മുതല്‍ തന്‍റെ സിനിമകള്‍ റിലീസിന് മുന്‍പ് അദ്ദേഹം കാണുമെന്നും മേജര്‍ രവി പറ‍ഞ്ഞിരുന്നു. എന്നാല്‍ മേജര്‍ രവിയെ കടുത്ത ഭാഷയില്‍ വിമര്‍ശിച്ച് പൃഥ്വിരാജിന്‍റെ അമ്മയും നടിയുമായി മല്ലിക സുകുമാരന്‍ രംഗത്തെത്തി.

ചിത്രം ആദ്യ ഷോ കണ്ടതിന് ശേഷം തന്നോട് നല്ല അഭിപ്രായം പറഞ്ഞ് പോയ ആളാണ് ഇപ്പോള്‍ വിമര്‍ശനവുമായി രംഗത്തെത്തിയതെന്ന് മല്ലിക സുകുമാരന്‍ കുറ്റപ്പെടുത്തിയിരുന്നു. അത് വേണ്ടായിരുന്നു മേജർ രവീ എന്നാണ് എനിക്ക് മേജർ രവിയോടും പൃഥ്വിരാജിനെ വേട്ടയാടാൻ ശ്രമിക്കുന്ന മറ്റു ചിലരോടും പറയാൻ ഉള്ളത്. മേജർ രവി ഇത്തരം ഒരു പ്രതികരണം നടത്തിയത് ആർക്ക് വേണ്ടി ആയിരുന്നു. പൃഥ്വിരാജ് ചതിച്ചുവെന്ന് മോഹൻലാലോ ആന്റണിയോ ഒരിക്കലും പറയില്ല. പിന്നെ പൃഥ്വിരാജിനെ ഒറ്റപ്പെടുത്തുന്നത് കൊണ്ട് രവിക്ക് എന്തെങ്കിലും ഗുണം ഉണ്ടോ എന്ന് എനിക്ക് അറിയില്ല. പട്ടാള ഗ്രൂപ്പുകളിൽ ചിലതൊക്കെ വന്നത് കൊണ്ട് പ്രതികരിച്ചു എന്നാണ് മേജർ രവി എന്നോട് പറഞ്ഞത്. അതിന് എന്റെ മകൻ എന്ത് പിഴച്ചു?, മല്ലിക സുകുമാരന്‍ പ്രതികരിച്ചിരുന്നു. ഇതിന് പിന്നാലെ മോഹന്‍ലാല്‍ ഫാന്‍സും മേജര്‍ രവിക്കെതിരെ രംഗത്തെത്തിയിരുന്നു

പ്രമുഖ വ്യവസായിയും സിനിമാ നിർമാതാവുമായ ഗോകുലം ഗോപാലന്റെ ഓഫിസിൽ എൻഫോഴ്‌സ്മെന്റ് ഡയറക്ടറേറ്റ് (ഇ.ഡി) പരിശോധന. ഇന്നു രാവിലെയാണ് ചെന്നൈ കോടമ്പാക്കത്തുള്ള ധനകാര്യ സ്ഥാപനത്തിന്റെ ഓഫിസിൽ ഉദ്യോഗസ്ഥർ റെയ്ഡ് ആരംഭിച്ചത്. കേരളത്തിൽ നിന്നുള്ള ഇ.ഡി സംഘമാണ് റെയ്ഡ് നടത്തുന്നതെന്നാണ് വിവരം

റെയ്ഡിന്റെ വിശദാംശങ്ങൾ പറത്തുവന്നിട്ടില്ല. എമ്പുരാൻ ചിത്രത്തിന്റെ നിർമാതാവ് കൂടിയാണ് ഗോകുലം ഗോപാലൻ. ചിത്രം റിലീസായതിനു പിന്നാലെ ഏറെ വിവാദങ്ങൾ ഉയർന്നിരുന്നു.

അതേസമയം വിവാദങ്ങൾക്ക് പിന്നാലെ ഉണ്ടായ ഇ.ഡി റെയ്ഡിനെ വിമർശനാത്മകമായാണ് സോഷ്യൽ മീഡിയ കാണുന്നത്. വിവാദങ്ങൾക്ക് പിന്നാലെയുള്ള ഈ പരിശോധനയെ അത്ര നിസ്സാരമായി കാണാൻ കഴിയില്ലെന്നും സോഷ്യൽ മീഡിയ ചൂണ്ടിക്കാണിക്കുന്നു.

പാൻ ഇന്ത്യൻ ലെവലിൽ തന്നെ സിനിമ ആരാധകർ വളരെയധികം ആകാംക്ഷയോടെ കാത്തിരുന്ന പടമായിരുന്നു എമ്പുരാൻ. പൃഥ്വിരാജ് സംവിധാനത്തിൽ മോഹൻ ലാല്‍ നായകനായി ചിത്രം പ്രദര്‍ശനത്തിനെത്തിയപ്പോള്‍ പ്രതീക്ഷിച്ചതിലും വലിയ വരവേൽപ്പാണ് പ്രേക്ഷകർ നൽകിയത്. ചിത്രം വൈകാതെ 200 കോടി ക്ലബിലും ഇടംനേടി. 120 മണിക്കൂറിലുള്ളില്‍ 30 ലക്ഷം ടിക്കറ്റുകളാണ് ബുക്ക് മൈ ഷോയില്‍ എമ്പുരാന്റേതായി വിറ്റത്. ഇന്ത്യയില്‍ കേരളത്തിനു പുറത്ത് 30 കോടി രൂപയും എമ്പുരാൻ നേടിയെന്നാണ് റിപ്പോര്‍ട്ട്. ചിത്രം ഓപ്പണിംഗ് വീക്കെൻഡ് 60 കോടി രൂപയിലധികമാണ് പ്രീ സെയിലായി നേടിയിരിക്കുന്നത് എന്ന് നേരത്തെ മോഹൻലാല്‍ തന്നെ വ്യക്തമാക്കിയിരുന്നു.

ഇപ്പോഴിതാ മലയാളത്തിന്റെ ഇൻഡസ്ട്രി ഹിറ്റ് ആയിരുന്ന മഞ്ഞുമ്മല്‍ ബോയ്‍സിനെ വീഴ്‍ത്തി എമ്പുരാൻ വിദേശത്ത് ഒന്നാമതെത്തി എന്ന വാർത്തയാണ് പുറത്തുവരുന്നത് . മഞ്ഞുമ്മല്‍ ബോയ്‍സ് ആഗോളതലത്തില്‍ 242 കോടി രൂപയോളമാണ് നേടിയത്. ഇനിയിപ്പോള്‍ എമ്പുരാൻ മലയാള സിനിമയുടെ ഇൻഡസ്‍ട്രി ഹിറ്റായി മാറുമോ എന്നാണ് കണ്ടറിയേണ്ടത്.

മാസപ്പടി കേസിൽ പ്രോസിക്യൂഷൻ അനുമതി ലഭിച്ചതോടെ മുഖ്യമന്ത്രിയുടെ മകളെ അറസ്റ്റ് ചെയ്യുമോ എന്നതാണ് വലിയ ആകാംക്ഷ. വീണ അടക്കമുള്ളവർക്ക് ഉടൻ എസ്എഫ്ഐഒ സമൻസ് അയക്കും. അതേസമയം കുറ്റപത്രം റദ്ദാക്കാൻ വീണയടക്കമുള്ള പ്രതികൾ കോടതിയെ സമീപിക്കാനും സാധ്യതകളേറെയാണ്.

മാസപ്പടി അടിവരയിട്ടാണ് പ്രോസിക്യൂഷൻ അനുമതി. ഇൻട്രിം സെറ്റിൽമെൻ്റ് ബോർഡ് ഉത്തരവും ആർഒസി കണ്ടെത്തലും കഴിഞ്ഞ് എസ്എഫ്ഐഒയും മുഖ്യമന്ത്രിയുടെ മകൾക്ക് കിട്ടിയത് ചെയ്യാത്ത സേവനത്തിനുള്ള പണമാണെന്ന് വ്യക്തമാക്കുന്നു. കമ്പനികാര്യ ചട്ടങ്ങളുടെ ഗുരുതര ലംഘനം കണ്ടെത്തിയതിന് പിന്നാലെ തന്നെ, എസ്എഫ്ഐഒയ്ക്ക് മുഖ്യമന്ത്രിയുടെ മകൾ ഉൾപ്പടെയുള്ള പ്രതികളെ അറസ്റ്റ് ചെയ്യാമായിരുന്നു. എന്നാൽ കരുതലോടെയായിരുന്നു അന്വേഷണ സംഘത്തിന്റെ നീക്കം. അന്വേഷണ റിപ്പോർട്ട് മന്ത്രാലയത്തിന് മുമ്പാകെ സമർപ്പിച്ച്, പ്രോസിക്യൂഷൻ അനുമതിക്കായി കാത്തിരുന്നു. തുടർനടപടികൾക്ക് തടസ്സമില്ലെന്ന ദില്ലി കോടതിയുടെ തീരുമാനം കൂടി വന്നതോടെ, പ്രോസിക്യൂഷൻ നടപടികൾ എസ്എഫ്ഐഒ വേഗത്തിലാക്കി.

കോടതിയിലെ വിചാരണ നടപടികൾക്ക് കാത്തിരിക്കുമ്പോഴും, വേണമെങ്കിൽ പ്രതികളെ അറസ്റ്റ് ചെയ്യാം. എന്നാൽ രാഷ്ട്രീയ പ്രാധാന്യമുള്ള കേസിൽ, എസ്എഫ്ഐഒ അതിന് മുതിരുമോ എന്നുള്ളതാണ് നിർണ്ണായകം. നേരത്തെ 1.72 കോടി രൂപയായിരുന്നു എക്സാലോജിക്ക് – സിഎംആർഎൽ കേസിലെ ഇടപാട് തുകയെങ്കിൽ, എസ്എഫ്ഐഒ അന്വേഷണ റിപ്പോട്ടോടെ, ഇനി 2 കോടി 70 ലക്ഷം രൂപയ്ക്ക് വീണ ടിയും സിഎംആർഎല്ലും മറുപടി നൽകണം. സിഎംആർഎല്ലിന്റെ സഹോദര സ്ഥാപനമാണ് എംപവർ ഇന്ത്യ ക്യാപിറ്റ‌ൽ ഇൻവെസ്റ്റ്മെന്റ് ലിമിറ്റഡ്. ഈ സ്ഥാപനത്തിൽ നിന്ന് വായ്പയായാണ് പണം വാങ്ങിയതെന്നായിരുന്നു വീണയുടെ വാദം. എസ്എഫ്ഐഒ അന്വേഷണത്തിൽ അതും പൊളിയുകയാണ്. നൽകിയ സേവനത്തിനാണ് പണം കൈപ്പറ്റിയതെന്ന് ആവർത്തിച്ചിരുന്ന വീണയ്ക്ക് എസ്എഫ്ഐഒ അന്വേഷണത്തിലും തെളിവൊന്നും ഹാജരാക്കാനായില്ല.

സിഎംആർഎല്ലിനെ കാത്തിരിക്കുന്നത് അതിലും വലിയ കുരുക്കാണ്. സിഎംആർഎല്ലിന്റെ ഡയറക്ടർ ബോർഡ് അംഗങ്ങളും, സിഎഫ്ഒയും സിജിഎമ്മും അടക്കമുള്ള ഉന്നത ഉദ്യോഗസ്ഥരും വിചാരണ നേരിടണം. കമ്പനികാര്യ ചട്ടം 447 പ്രകാരം, കോടതിയിൽ ഇത് തെളിയിക്കാനായാൽ, മൂന്നിരട്ടി പിഴ വരെ ചുമത്താം. അങ്ങനെ വന്നാൽ പൊതുമേഖല സ്ഥാപനമായ സിഎംആർഎൽ കടുത്ത ബാധ്യതയിലേക്ക് പോകും. ഇല്ലാത്ത ചെലവുകൾ കാട്ടി, 182 കോടി രൂപയാണ് സിഎംആർഎല്ലിൽ നിന്ന് പുറത്തേക്ക് ഒഴുകിയത്. ഈ പണം രാഷ്ട്രീയ നേതാക്കൾക്ക് കൈമാറിയെന്നായിരുന്നു ഇൻട്രിം സെറ്റിൽമെൻ്റ് ബോർഡ് കണ്ടെത്തൽ. അവരുടെ കൂടുതൽ പേര് വിവരങ്ങൾ കൂടി പുറത്തുവരുമ്പോൾ കേസിന്‍റെ നിലമാറും.

മാസങ്ങൾക്ക് മുമ്പാണ് നടൻ ബാല വീണ്ടും വിവാഹിതനായത്. അതിനുശേഷം ഭാര്യ കോകിലയ്‌‌‌ക്കൊപ്പമുള്ള വീഡിയോകളൊക്കെ താരം സോഷ്യൽ മീഡിയയിൽ പങ്കുവയ്‌ക്കാറുണ്ട്. ഒരു മാധ്യമത്തിന് നൽകിയ അഭിമുഖത്തിൽ അമേരിക്കയിൽ നിന്ന് തന്നെ പ്രപ്പോസ് ചെയ്യാൻ ഒരു പെൺകുട്ടി വന്നിരുന്നെന്ന് വെളിപ്പെടുത്തിയിരിക്കുകയാണ് ബാല ഇപ്പോൾ.

‘അമേരിക്കയിൽ നിന്ന് എന്നെ പ്രപ്പോസ് ചെയ്യാൻ ഒരു പെണ്ണ് വന്നു. തൃഷയെപ്പോലെയുണ്ട് കാണാൻ. എനിക്ക് വേറൊരു വീടുണ്ട്. അവിടെയാണ് വന്നത്. ആദ്യം ദൂരെയിരുന്നവൾ എന്റെ അടുത്തോട്ട് വന്നിരുന്നു. ബാലച്ചേട്ടാ എന്ന് പറഞ്ഞു മേൽ കൈവച്ചു. ഞാൻ ചിരിക്കാൻ തുടങ്ങി. അപ്പോഴേക്ക് കോകില മുറിയിൽ നിന്ന് വന്നു. അപ്പോൾ ഇതാരാണെന്ന് ആ പെൺകുട്ടി ചോദിച്ചു. മാമന്റെ മകളാണെന്ന് ഞാൻ പറഞ്ഞു. നേരത്തെ വന്നതാണോയെന്ന് ചോദിച്ചപ്പോൾ കുറേ മാസമായി ഇവിടെയുണ്ടെന്ന് കോകില പറഞ്ഞു. അപ്പോഴേക്ക് അവളുടെ മുഖമൊക്കെ വാടി. അതിനുശേഷം എന്നെ ഒറ്റയ്ക്ക് വിളിച്ച് മാറ്റിനിർത്തി സംസാരിച്ചു, എന്തെങ്കിലും ചാൻസുണ്ടോയെന്നായിരുന്നു ആ പെൺകുട്ടി ചോദിച്ചത്’- ബാല പറഞ്ഞു.

എന്റെ ഭാര്യ വലിയ സിനിമാ താരമൊന്നുമല്ല. പാട്ടുപാടുന്നയാളല്ല, വലിയ ഹൈറ്റ് ഇല്ല, തടിച്ചിട്ടാണ്. എന്നാൽ എന്നെ സംബന്ധിച്ച് എന്റെ ഭാര്യയാണ് ലോകത്തിലെ ഏറ്റവും സുന്ദരി. ഇത് ഞാൻ കൂടെ ജീവിച്ചപ്പോൾ പഠിച്ച പാഠമാണ്. ഇവളെ ഞാൻ കുട്ടിക്കാലം മുതലേ കാണുന്നതാണ്. ഭാര്യയായിട്ട് സങ്കൽപിച്ചിട്ട് പോലുമുണ്ടായിരുന്നില്ല. ഞാൻ തനിച്ചായപ്പോൾ എന്റെ അമ്മയാണ് കോകിലയുടെ കാര്യം പറഞ്ഞത്.

കരൾ ശസ്ത്രക്രിയ ചെയ്തയാണ്. മരണത്തെ മുഖാമുഖം കണ്ട് തിരിച്ചുവന്നതാണ്. ആ അവസ്ഥയിലും അവൾ മാമ മതിയെന്ന് പറഞ്ഞ് ഉറച്ചുനിന്നു. എന്നാൽ എനിക്കങ്ങനെ കാണാനായില്ലായിരുന്നു.

നിന്റെ അച്ഛനെ ഞാൻ സ്‌നേഹിച്ചിട്ടാണോ വിവാഹം കഴിച്ചത്, മൂന്ന് കുട്ടികളുണ്ടായില്ലേയെന്ന് അമ്മ പറഞ്ഞു. കോകിലയുമായി ഇടപഴകി നോക്കെന്ന് അമ്മ പറഞ്ഞു. കോകില നാല് മാസം ഇവിടെ നിന്നപ്പോൾ പ്രേമം, കാമം, സൗഹൃദം, ഭാര്യ ഇതൊക്കെ എന്താണെന്ന് എനിക്ക് മനസിലായി. ഇതെല്ലാം ഒരിടത്തുനിന്ന് കിട്ടുമ്പോൾ ആ വീട് സ്വർഗമാകും.

മാർച്ച് 27ന് ആയിരുന്നു മലയാളികൾ ഒന്നടങ്കം കാത്തിരുന്ന എമ്പുരാൻ റിലീസ് ചെയ്തത്. പൃഥ്വിരാജ്- മോഹൻലാൽ കോമ്പോയിലെത്തിയ ചിത്രം ഏറ്റവും വേ​ഗത്തിൽ 200 കോടി ക്ലബ്ബിലെത്തുന്ന ആദ്യ മലയാള സിനിമ കൂടി ആയിരിക്കുകയാണ്. ഇതിനിടയിൽ ചില രം​ഗങ്ങളുടെ പേരിൽ വിവാദങ്ങളിലും എമ്പുരാൻ അകപ്പെട്ടിരുന്നു. ഒടുവില്‍ റീ എഡിറ്റിങ്ങിന് വിട്ട ചിത്രത്തിൽ 24 മാറ്റങ്ങളാണ് വന്നത്. കഴിഞ്ഞ ദിവസം ഈ പതിപ്പ് തിയറ്ററുകളിൽ എത്തുകയും ചെയ്തിരുന്നു.

എഡിറ്റിന് പിന്നാലെ ചിത്രത്തിത്തിന്റെ ഓൺലൈൻ ബുക്കിങ്ങിൽ നേരിയ കുറവ് ഉണ്ടായെങ്കിലും റീ എഡിറ്റിംഗ് ബാധിച്ചിട്ടില്ലെന്നാണ് തിയേറ്റർ ഉടമകൾ കഴിഞ്ഞ ദിവസം പറഞ്ഞത്. ഈ അവസരത്തിൽ കഴിഞ്ഞ ദിവസം അതായത് ഏപ്രിൽ രണ്ടാം തിയതിയിലെ ബുക്ക് മൈ ഷോയിലെ ബുക്കിം​ഗ് വിവരങ്ങൾ പുറത്തുവരികയാണ്. ലിസ്റ്റിൽ എമ്പുരാൻ ആണ് ഒന്നാമത്. 1,14,000 ടിക്കറ്റുകളാണ് കഴിഞ്ഞ ദിവസം മാത്രം ബുക്ക് മൈ ഷോയിൽ നിന്നും എമ്പുരാന്റേതായി വിറ്റഴിഞ്ഞതെന്ന് സൗത്ത് ഇന്ത്യൻ ബോക്സ് ഓഫീസ് റിപ്പോർട്ട് ചെയ്യുന്നു.

എമ്പുരാന് തൊട്ട് താഴെ സൽമാൻ ഖാൻ ചിത്രം സിക്കന്ദർ ആണ്. എൺപത്തി നാലായിരം ടിക്കറ്റുകളാണ് കഴിഞ്ഞ ദിവസം സിക്കന്ദറിന്റേതായി വിറ്റു പോയത്. മൂന്നാം സ്ഥാനത്ത് പക്ഷേ ഒരു റി റിലീസ് ചിത്രമാണ്. അല്ലു അർജുൻ നായകനായി 2009ൽ റിലീസ് ചെയ്ത ആര്യ 2 ആണിത്. പ്രീ സെയിൽ ബുക്കിങ്ങിലൂടെ ഇരുപത്തി ഏഴായിരം ആണ് ആര്യ 2 നേടിയിരിക്കുന്നത്.

സംസ്ഥാനത്ത് മധ്യവേനലവധിക്കാലത്ത് ക്ലാസുകൾ നടത്തുന്നത് വിലക്കി പുറപ്പെടുവിച്ചിട്ടുള്ള ഉത്തരവുകൾ 2024 -25 അധ്യായന വർഷവും കർശനമായി നടപ്പാക്കണമെന്ന് ബാലാവകാശ കമ്മിഷൻ ഉത്തരവിട്ടു. കമ്മിഷൻ ചെയർപേഴ്സൺ കെ.വി.മനോജ് കുമാർ അംഗം ഡോ.വിൽസൺ എന്നിവരുടെ ഡിവിഷൻ ബെഞ്ചാണ് ഉത്തരവ് പുറപ്പെടുവിച്ചത്.

ഉത്തരവ് നടപ്പാക്കുന്നുണ്ടോ എന്ന് വിദ്യാഭ്യാസ വകുപ്പ് ഡയറക്ടർ കൃത്യമായി പരിശോധിക്കണമെന്നും ലംഘിക്കുന്നവർക്കെതിരെ കർശന നടപടി സ്വീകരിക്കണമെന്നും ഉത്തരവിൽ പറയുന്നു. സിബിഎസ്ഇ, ഐസിഎസ്ഇ സ്കൂളുകൾ ഹൈക്കോടതി വിധി നടപ്പാക്കുന്നു എന്ന് ബന്ധപ്പെട്ട റീജണൽ ഓഫീസർമാരും ചെയർമാനും ഉറപ്പുവരുത്തണമെന്നും ഉത്തരവിലുണ്ട്.

ബാലാവകാശ കമ്മീഷന്റെ ഉത്തരവു പ്രകാരം സ്വകാര്യ ട്യൂഷൻ സെന്ററുകളുടെ സമയക്രമം രാവിലെ 7. 30 മുതൽ 10. 30 വരെ എന്നത് ലംഘിക്കുന്നവർക്കെതിരെ നടപടി സ്വീകരിക്കാൻ സംസ്ഥാന പോലീസ് മേധാവിക്കും കമ്മീഷൻ നിർദ്ദേശം നൽകി. ബന്ധപ്പെട്ട ഉദ്യോഗസ്ഥർ ഉത്തരവ് നടപ്പാക്കി 15 ദിവസത്തിനകം കമ്മിഷന് റിപ്പോർട്ടു നൽകണമെന്നാണ് നിർദേശം.

നടനും സംഗീത സംവിധായകനും ഗായകനുമായ ജി വി പ്രകാശും ഗായിക സൈന്ധവിയും വേർപിരിയുന്നു എന്ന വാർത്ത സമീപകാലത്ത് തമിഴകത്ത് വലിയ രീതിയിലുള്ള ചർച്ചകൾക്ക് തിരികൊളുത്തിയിരുന്നു. കുട്ടിക്കാലം മുതൽ സൗഹൃദവും അടുപ്പവും പ്രണയവും കാത്തുസൂക്ഷിച്ച ദമ്പതികളുടെ വേർപിരിയൽ ആരാധകരെയും സങ്കടത്തിലാക്കിയിരുന്നു. അതിനിടയിൽ, നടി ദിവ്യ ഭാരതിയാണ് ജിവി പ്രകാശും സൈന്ധവിയും പിരിയാൻ കാരണമെന്ന രീതിയിലുള്ള ഗോസിപ്പുകളും ശക്തമായി. ജിവി പ്രകാശും ദിവ്യ ഭാരതിയും ഒന്നിച്ച് സിനിമകള്‍ ചെയ്തതിനു പിന്നാലെ ഇരുവരും പ്രണയത്തിലായി എന്നും അതാണ് ജിവിയുടെ ദാമ്പത്യജീവിതം തകരാൻ കാരണമെന്നുമായിരുന്നു ഗോസിപ്പ് കഥകൾ. തനിക്കെതിരെ ഉയരുന്ന വ്യാജപ്രചാരണങ്ങൾക്ക് മറുപടി നൽകുകയാണ് ദിവ്യ ഭാരതി ഇപ്പോൾ.

“എനിക്ക് ഒരു ബന്ധവുമില്ലാത്ത, ഒരു കുടുംബപ്രശ്നത്തിലേക്ക് എന്റെ പേര് വലിച്ചിഴച്ചിരിക്കുന്നു. ജി വിയുടെ (ജി വി പ്രകാശ്) കുടുംബ പ്രശ്നങ്ങളുമായി എനിക്ക് യാതൊരു ബന്ധവുമില്ല. തുറന്നു പറഞ്ഞാൽ, ഞാൻ ഒരിക്കലും ഒരു നടനുമായി ഡേറ്റ് ചെയ്യില്ല, വിവാഹിതനായ പുരുഷനുമായി ഒരിക്കലും ഡേറ്റ് ചെയ്യില്ല.” “അടിസ്ഥാനരഹിതമായ കിംവദന്തികൾ എന്റെ ശ്രദ്ധ അർഹിക്കുന്നില്ലെന്ന് വിശ്വസിച്ചുകൊണ്ട് ഞാൻ ഇതുവരെ മൗനം പാലിച്ചു. എന്നിരുന്നാലും, ഇതിപ്പോൾ അതിന്റെ പരിധി ലംഘിച്ചു. അടിസ്ഥാനരഹിതമായ ആരോപണങ്ങൾ കൊണ്ട് എന്റെ പ്രശസ്തിക്ക് കളങ്കം വരുത്താൻ ഞാൻ അനുവദിക്കില്ല. ഞാൻ ശക്തയും സ്വതന്ത്രയുമായ ഒരു സ്ത്രീയാണ്, ഗോസിപ്പുകളല്ല എന്നെ നിർവചിക്കേണ്ടത്. നെഗറ്റിവിറ്റി പ്രചരിപ്പിക്കുന്നതിനുപകരം മെച്ചപ്പെട്ട ഒരു ലോകം കെട്ടിപ്പടുക്കുന്നതിൽ ശ്രദ്ധ കേന്ദ്രീകരിക്കാം. എന്റെ അതിരുകളെ ബഹുമാനിക്കുക. ഈ വിഷയത്തിൽ എന്റെ ആദ്യത്തേതും അവസാനത്തേതുമായ പ്രസ്താവനയാണിത്. നന്ദി,” ഇൻസ്റ്റഗ്രാം സ്റ്റോറിയിൽ പങ്കുവച്ച കുറിപ്പിലാണ് ദിവ്യ ഭാരതി തന്റെ ഭാഗം വ്യക്തമാക്കിയത്.