ഇൻഡോനേഷ്യയിലെ സുലവേസി ദ്വീപിൽ 6.7 തീവ്രത ഭൂചലനം; നാശനഷ്ടങ്ങൾ വിലയിരുത്തി അധികൃതർ
ഇൻഡോനേഷ്യയിലെ സുലവേസി ദ്വീപിൽ ചൊവ്വാഴ്ച ശക്തമായ ഭൂചലനം അനുഭവപ്പെട്ടു. രാജ്യത്തെ ജിയോഫിസിക്സ് ഏജൻസിയായ ബിഎംകെജിയുടെ കണക്കുകൾ പ്രകാരം ഭൂചലനത്തിന്റെ തീവ്രത റിക്ടർ സ്കെയിലിൽ 6.7 ആയിരുന്നു.സുലവേസിയിലെ പാലു നഗരത്തിൽ നിന്ന് ഏകദേശം 42 കിലോമീറ്റർ തെക്കുകിഴക്കായി 10 കിലോമീറ്റർ ആഴത്തിലാണ് ഭൂചലനത്തിന്റെ പ്രഭവകേന്ദ്രം സ്ഥിതി ചെയ്തിരുന്നത്. ഭൂചലനത്തെ തുടർന്ന് പ്രദേശവാസികൾക്കിടയിൽ ആശങ്ക ഉയർന്നെങ്കിലും ആളപായമോ ഗുരുതര നാശനഷ്ടങ്ങളോ ഇതുവരെ റിപ്പോർട്ട് ചെയ്തിട്ടില്ല.ഭൂചലനത്തിന്റെ ആഘാതം സംബന്ധിച്ച് വിവിധ മേഖലകളിൽ അധികൃതർ പരിശോധന തുടരുകയാണ്. തുടർചലനങ്ങൾ ഉണ്ടാകാനുള്ള സാധ്യതയും നിരീക്ഷണത്തിലാണ്.
ഈ മാസം തെക്കുകിഴക്കൻ ഏഷ്യയിൽ റിപ്പോർട്ട് ചെയ്യുന്ന രണ്ടാമത്തെ ശക്തമായ ഭൂചലനമാണിത്. ജൂൺ 8-ന് ഫിലിപ്പീൻസിൽ 7.7 തീവ്രതയുള്ള ഭൂചലനം രേഖപ്പെടുത്തിയിരുന്നു.ഇൻഡോനേഷ്യ ഭൂചലനങ്ങൾ പതിവായി അനുഭവപ്പെടുന്ന ‘പസഫിക് റിംഗ് ഓഫ് ഫയർ’ മേഖലയിലാണ് സ്ഥിതി ചെയ്യുന്നത്. അതിനാൽ രാജ്യത്ത് ഇടയ്ക്കിടെ ശക്തമായ ഭൂചലനങ്ങളും അഗ്നിപർവത പ്രവർത്തനങ്ങളും ഉണ്ടാകാറുണ്ട്.
