വൈദികരുടെയും കന്യാസ്ത്രീകളുടെയും ശമ്പളത്തിൽനിന്ന് നികുതി പിടിക്കാം: ഹൈക്കോടതി

കൊച്ചി: സർക്കാർ, എയ്ഡഡ് വിദ്യാഭ്യാസ സ്ഥാപനങ്ങളിൽ അധ്യാപകരായ വൈദികരുടെയും ശമ്പളത്തിൽനിന്ന് സ്രോതസ്സിൽനിന്നുള്ള വരുമാനനികുതി (ടി.ഡി.എസ്.) പിടിക്കാമെന്ന് ൈഹക്കോടതി. ഭരണഘടനയുടെ 25-ാം അനുച്ഛേദപ്രകാരമുള്ള മതസ്വാതന്ത്ര്യത്തിെൻറ ഭാഗമായി ടി.ഡി.എസ്. പിടിക്കുന്നതിൽ ഇളവ് അനുവദിക്കാനാകില്ലെന്ന് ജസ്റ്റിസ് എസ്.വി. ഭാട്ടി, ജസ്റ്റിസ് ബെച്ചു കുര്യൻ തോമസ് എന്നിവരടങ്ങുന്ന ഡിവിഷൻ ബെഞ്ച് വ്യക്തമാക്കി. ടി.ഡി.എസ്. പിടിക്കുന്നതിനെതിരേ നൽകിയ ഹർജി സിംഗിൾബെഞ്ച് തള്ളിയതിനെതിരായി കന്യാസ്ത്രീകളടക്കം നൽകിയ അപ്പീലുകൾ തള്ളിയാണ് ഡിവിഷൻ ബെഞ്ചിന്റെ ഉത്തരവ്.

2014 മുതലാണ് സർക്കാർ, എയ്ഡഡ് അധ്യാപകരായ പുരോഹിതന്മാരുടെയും കന്യാസ്ത്രീമാരുടെയും ശമ്പളത്തിൽനിന്ന് ടി.ഡി.എസ്. പിടിച്ചുതുടങ്ങിയത്. ദാരിദ്ര്യം വ്രതമായി സ്വീകരിച്ച സന്ന്യസ്തർ സ്വത്തു സമ്പാദിക്കുന്നില്ലെന്നും അവരുടെ വരുമാനം സന്ന്യസ്തസഭയിലേക്കാണു പോകുന്നതെന്നും അതിനാൽ നികുതി ഈടാക്കരുതെന്നുമായിരുന്നു ഹർജിക്കാരുടെ വാദം. എന്നാൽ, നിയമപ്രകാരം നികുതി ഈടാക്കുന്നത് മതസ്വാതന്ത്ര്യത്തിലുള്ള കടന്നുകയറ്റമല്ലെന്നും സീസറിനുള്ളത് സീസറിനും ദൈവത്തിനുള്ളത് ദൈവത്തിനുമെന്ന ബൈബിൾ വാക്യം ഉദ്ധരിച്ച് ഡിവിഷൻബെഞ്ച് വ്യക്തമാക്കി.

സർക്കാർശമ്പളം പറ്റുന്ന വൈദികരെയും കന്യാസ്ത്രീകളെയും സർക്കാർജീവനക്കാരായി കണക്കാക്കണമെന്നായിരുന്നു നികുതിവകുപ്പിെൻറ നിലപാട്. ശമ്പളം, പെൻഷൻ, ഗ്രാറ്റ്വിറ്റി തുടങ്ങിയവയെല്ലാം അവർക്കു കിട്ടുന്നുണ്ട് -നികുതിവകുപ്പ് വാദിച്ചു. വരുമാനം കിട്ടുന്ന വേളയിലാണ് ടി.ഡി.എസ്. ബാധകമാകുന്നതെന്നിരിക്കേ വിനിയോഗ രീതി നോക്കേണ്ടതില്ലെന്ന്, വരുമാനം പൂർണമായും സന്ന്യസ്തസഭയിലേക്കു പോകുന്നുവെന്ന വാദംതള്ളി കോടതി ചൂണ്ടിക്കാട്ടി.

സന്ന്യസ്തവ്രതം എടുക്കുന്നതോടെ വൈദികനും കന്യാസ്ത്രീക്കും ‘സിവിൽ ഡെത്ത്’ സംഭവിക്കുന്നുവെന്ന കാനോനിക നിയമം എല്ലാ ജീവിതസാഹചര്യങ്ങളിലും ബാധകമല്ല. രാജ്യത്തെ നിയമത്തിനാണ് വ്യക്തിഗത നിയമത്തെക്കാൾ പ്രാധാന്യമുള്ളതെന്നും കോടതി അഭിപ്രായപ്പെട്ടു.

കുതിരാൻ തുരങ്കം : അവലോകന യോഗം ചേർന്നു

മണ്ണുത്തി കുതിരാൻ തുരങ്കത്തിൻ്റെ വലത് ടണൽ നിർമാണവും തുടർ നടപടികളും വിലയിരുത്തുന്നതിൻ്റെ ഭാഗമായി അവലോകന യോഗം ചേർന്നു. ഓൺലൈനായി ചേർന്ന യോഗത്തിൽ പൊതുമരാമത്ത് വകുപ്പ് മന്ത്രി പി എ മുഹമ്മദ് റിയാസ് അധ്യക്ഷത വഹിച്ചു. വലത് ടണൽ സമയബന്ധിതമായി പൂർത്തീകരിക്കുന്നതിൻ്റെ ഭാഗമായി സെപ്റ്റംബർ ആദ്യവാരം മുതൽ രണ്ടാഴ്ച്ചയിലൊരിക്കൽ യോഗം ചേർന്ന് അതുവരെ ചെയ്ത പ്രവൃത്തികളുടെ റിപ്പോർട്ട് വിശദമായി പരിശോധിക്കാനും പ്രവർത്തന റിപ്പോർട്ട് അവതരിപ്പിക്കാനും പരിശോധന നടത്താനും ഉദ്യോഗസ്ഥർക്ക് നിർദ്ദേശം നൽകി. എല്ലാ യോഗങ്ങളിലും തുരങ്ക നിർമാണ സ്പെഷ്യൽ ഓഫീസറും ജില്ലാ കലക്ടറും പങ്കെടുക്കും. നിശ്ചിത ഇടവേളകളിൽ പൊതുമരാമത്ത് വകുപ്പ് മന്ത്രിയുടെ അധ്യക്ഷതയിൽ ചേരുന്ന യോഗത്തിൽ ജില്ലയിലെ മറ്റ് മന്ത്രിമാരും ലോകസഭാ അംഗങ്ങളും പങ്കെടുത്ത് പ്രവർത്തനങ്ങൾ വിലയിരുത്തും.

രണ്ടാമത്തെ തുരങ്കത്തിൻ്റെ മുകൾഭാഗത്ത് ബാക്കിയുള്ള സുരക്ഷാ ജോലികൾ, ടണലിൻ്റെ ഉൾഭാഗത്തെ കോൺക്രീറ്റിങ്, ജല നിർഗമനത്തിനും കേബിൾ സ്ഥാപിക്കുന്നതിനും വേണ്ട സംവിധാനം ഒരുക്കൽ, ടണലിൻ്റെ അടിവശത്തെ കോൺക്രീറ്റിങ്, ഹാൻ്റ് റെയിലുകളുടെ നിർമാണം, വിളക്കുകൾ ഘടിപ്പിക്കൽ, അഗ്നിശമന സംവിധാനങ്ങൾ, ബ്ലോവർ, സിസിടിവി, എസ്ഒഎസ് ഫോൺ, സ്പീക്കർ തുടങ്ങിയവ ഘടിപ്പിക്കൽ, തുരങ്കത്തിൻ്റെ പെയിൻ്റിങ് പൂർത്തീകരണം, തൃശൂർ ഭാഗത്തുള്ള തുരങ്കമുഖത്തെ കലുങ്ക് നിർമാണവും തുരങ്കമുഖത്തു നിന്നുള്ള റോഡും നിലവിലെ നാഷ്ണൽ ഹൈവേയുമായി ബന്ധിപ്പിക്കൽ തുടങ്ങിയ പ്രവർത്തനങ്ങൾ സമയബന്ധിതമായി പൂർത്തീകരിക്കും.

എല്ലാ വകുപ്പുകളും ഒന്നിച്ച് പ്രവർത്തിച്ചതിൻ്റെ ഫലമാണ് ആദ്യ തുരങ്കത്തിൻ്റെ പൂർത്തീകരണമെന്നും അതേ വഴിയിലൂടെ സമയബന്ധിതമായി രണ്ടാം തുരങ്കത്തിൻ്റെ പ്രവർത്തനം പൂർത്തീകരിക്കാനാകണമെന്നും മന്ത്രി പറഞ്ഞു. തുരങ്കത്തിൻ്റെ പ്രവർത്തനത്തിനായി നേതൃത്വം നൽകിയ എല്ലാ ജനപ്രതിനിധികളെയും ഉദ്യോഗസ്ഥരെയും യോഗത്തിൽ മന്ത്രി അനുമോദിച്ചു. റവന്യു വകുപ്പ് മന്ത്രി കെ രാജൻ, വൈദ്യുത വകുപ്പ് മന്ത്രി കെ കൃഷ്ണൻകുട്ടി, ഉന്നത വിദ്യാഭ്യാസ വകുപ്പ് മന്ത്രി ഡോ.ആർ ബിന്ദു, ടി എൻ പ്രതാപൻ എംപി, തൃശൂർ ജില്ലാ കലക്ടർ ഹരിത വി കുമാർ, മുൻ ജില്ലാ കലക്ടറും തുരങ്ക നിർമാണ സ്പെഷ്യൽ ഓഫീസറുമായ എസ് ഷാനവാസ്, ജില്ലാ വികസനകാര്യ കമ്മീഷ്ണർ അരുൺ കെ വിജയൻ, അസിസ്റ്റൻ്റ് കലക്ടർ അണ്ടർ ട്രെയിനി സൂഫിയാൻ അഹമ്മദ്, എൻ എച്ച് എ ഐ ഉദ്യോഗസ്ഥർ തുടങ്ങിയവർ പങ്കെടുത്തു.

സേവനം അതിവേഗം; കേരളത്തിലെ ആദ്യത്തെ വിദ്യാഭ്യാസ ഇ-ഓഫീസായി തൃശൂർ ഡി ഡി ഓഫീസ്

സേവനങ്ങൾ സുതാര്യവും സമയബന്ധിതവുമാക്കുക എന്ന ലക്ഷ്യം മുൻനിർത്തി തൃശൂർ വിദ്യാഭ്യാസ ഉപജില്ല ഡയറക്ടറുടെ കാര്യാലയം പൂർണമായും പേപ്പർഫയൽ രഹിതമാകുന്നു. സർക്കാരിന്റെ നൂറു ദിനകർമ്മ പരിപാടിയിൽ ഉൾപ്പെടുത്തി
ഇ- ഓഫീസാകാൻ തയ്യാറെടുക്കുകയാണ് ഡി ഡി എഡ്യൂക്കേഷൻ ഓഫീസ്. കേരളത്തിലെ പതിനാല് ഉപജില്ലാ ഡയറക്ടറുടെ കാര്യാലയങ്ങളും ഇത്തരത്തിൽ ഇ-ഓഫീസായി മാറും. ഇതിൽ തൃശൂർ ജില്ലയാണ് പദ്ധതി ആദ്യമായി പ്രാവർത്തികമാക്കിയത്. ഏറ്റവും കൂടുതൽ ഫയലുകൾ കൈകാര്യം ചെയ്യുന്നതും ജില്ലയിലാണ്.
സർക്കാർ സംവിധാനങ്ങള്‍ വേഗത്തില്‍ നടപ്പിലാക്കുന്നതിനു വേണ്ടി നാഷണല്‍ ഇ-ഗവേണന്‍സ് പ്ലാനിന്റെ കീഴില്‍ നാഷണല്‍ ഇന്‍ഫര്‍മാറ്റിക്‌സ് സെന്റര്‍ വഴി വികസിപ്പിച്ചെടുത്ത് നടപ്പിലാക്കുന്ന പദ്ധതിയാണ് ഇ-ഓഫീസ്. പദ്ധതി പ്രാവർത്തികമാകുന്നതോടെ ഒരു ഫയൽ സംബന്ധിച്ച് തീരുമാനം എടുക്കണമെങ്കിൽ ഓഫീസർമാർക്ക് വീട്ടിലിരുന്നും ചെയ്യാമെന്നതാണ് ഏറ്റവും വലിയ പ്രയോജനം. ലോക്ക് ഡൗൺ പോലുള്ള പ്രതിസന്ധിഘട്ടങ്ങളിൽ പ്രവർത്തികൾ തടസ്സമില്ലാതെ വർക്ക് ഫ്രം ഹോമിലൂടെ നടപ്പിലാക്കാൻ സാധിക്കും. പദ്ധതി നടപ്പിലാക്കുന്നതിനായി ഇന്‍ഫര്‍മേഷന്‍ കേരളാ മിഷന്‍ സാങ്കേതിക വിഭാഗം ജീവനക്കാര്‍ക്ക് പ്രത്യേക പരിശീലനം നല്‍കിയിട്ടുണ്ട്. ഭൂരിഭാഗം ജീവനക്കാരും കമ്പ്യൂട്ടര്‍ പ്രാവീണ്യമുളളവരായതിനാല്‍ പദ്ധതി നടത്തിപ്പ് ഉദ്ദേശിച്ച രീതിയില്‍ നടപ്പിലാക്കാന്‍ കഴിഞ്ഞുവെന്ന് അഡ്മിനിസ്ട്രേറ്റിവ് അസിസ്റ്റന്റ് എം ബി പ്രശാന്ത് ലാൽ പറഞ്ഞു.
നിലവിൽ ഓഫീസിലെ പ്രധാനപ്പെട്ട സെക്ഷനുകളെല്ലാം ഇ ഫയലിലാണ്. പേപ്പർ ഫയലുകൾ സ്‌കാന്‍ ചെയ്ത് പി ഡി എഫ് ഫോര്‍മാറ്റിലാക്കി ഡാറ്റാബേസിലേക്ക് മാറ്റി സെക്ഷനുകളിലേക്കും സെക്ഷൻ സൂപ്രണ്ടിനും അടുത്ത അതോറിറ്റിയിലേക്കും ഇ ഫയലായി നൽകും. സബ് ഓഫീസുകളിൽ നിന്നും ജനങ്ങളിൽ നിന്നുമുള്ളതെല്ലാം ഈ രീതിയിലേക്ക് മാറ്റുകയാണ് ചെയ്യുന്നത്. ഇതിനായി ഓഫീസില്‍ പ്രത്യേക ഫയല്‍ ട്രാക്കിംഗ് സിസ്റ്റം തന്നെ നടപ്പിലാക്കിയിട്ടുണ്ട്. ഒന്നര മാസം മുമ്പാണ് പണി തുടങ്ങിയത്. മാർച്ചിൽ ഇതിനായുള്ള പരിശീലനം ഉദ്യോഗസ്ഥർക്ക് കിട്ടിയിരുന്നെങ്കിലും ലോക്ക്ഡൗൺ മൂലം നീണ്ടു പോകുകയായിരുന്നു. 80ഓളം വരുന്ന സെക്ഷനുകളിലെ ഉദ്യോഗസ്ഥർക്ക് യൂസർ നെയിമും പാസ്സ് വേർഡും നൽകി. ഇതിന്റെ 50 ശതമാനം പ്രവൃത്തികളും പൂർത്തിയായി. പുതുതായി ട്രാൻസ്ഫർ ആയി വന്ന ജോലിക്കാർക്ക് കൂടി യൂസർനെയിമും പാസ്‌വേഡും നൽകും. ഇതും ഒരാഴ്ചയ്ക്കുള്ളിൽ പൂർത്തിയാകും.
ഐ ടി രംഗത്തെ നൂതന സാധ്യതകള്‍ പരമാവധി ഉപയോഗപ്പെടുത്തി കൊണ്ട് സര്‍ക്കാര്‍ നടപടികളും പ്രവര്‍ത്തനങ്ങളും കാര്യക്ഷമമായ രീതിയില്‍ വേഗത്തില്‍ നടപ്പിലാക്കുന്നതിനാണ് സര്‍ക്കാര്‍ ഓഫീസുകള്‍ ഇ-ഓഫീസാക്കി മാറ്റുന്നത്. കാലക്രമേണ എല്ലാ സര്‍ക്കാര്‍ ഓഫീസുകളെയും കടലാസ് രഹിത ഓഫീസാക്കി മാറ്റുക എന്നതാണ് പദ്ധതിയുടെ ലക്ഷ്യം.

ഹൈമാവതിയമ്മയ്ക്ക് സഹായവുമായി എം എൽ എ എത്തി

മഴക്കെടുതിയിൽ മരം വീണ് തൊഴുത്ത് പൂർണമായും നശിച്ച പൂവത്തുശ്ശേരി സ്വദേശിയായ ഹൈമാവതി രാമകൃഷ്ണന് ക്ഷീരവികസന വകുപ്പിന്റെ സഹായം. ക്ഷീര വികസന വകുപ്പിന്റെ തൊഴുത്ത് നവീകരണ പദ്ധതിയുടെ ഭാഗമായി അനുവദിച്ച അൻപതിനായിരം രൂപ വി ആർ സുനിൽകുമാർ എം എൽ എ ഹൈമാവതിയമ്മയ്ക്ക് കൈമാറി.
ബി ടി നമ്പൂതിരിസ് ഹരിത അഗ്രി ടെക് നൽകിയ രണ്ടായിരം രൂപയുടെ ധനസഹായവും ഹേമാവതിയമ്മക്ക് കൈമാറി. കഴിഞ്ഞ ജൂൺ പതിനാറിനാണ് ഹൈമാവതിയമ്മയുടെ തൊഴുത്തിന് മുകളിൽ മരം കടപുഴകി വീണത്. എംഎൽഎ സ്ഥലം സന്ദർശിച്ച് സ്ഥിതി വിലയിരുത്തിയിരുന്നു. അന്നമനട ഗ്രാമപഞ്ചായത്ത് പ്രസിഡന്റ് പി വി വിനോദ്, ബ്ലോക്ക് പഞ്ചായത്ത് വൈസ് പ്രസിഡന്റ് ഒ സി രവി, വാർഡ് മെമ്പർ
ടി വി സുരേഷ് കുമാർ, ക്ഷീര വികസന ഓഫീസർ ജ്യുണി ജോസ് റോഡ്റിഗ്സ്, ഡയറി ഫാം ഇൻസ്പെക്ടർ സി നിഷ, കുമ്പിടി ക്ഷീര സംഘം സെക്രട്ടറി വി പി പ്രീതി എന്നിവർ എം എൽ എ യോടൊപ്പം എത്തിയിരുന്നു.