ഗാംഗുലിയുടെ ജീവിതം സിനിമയാകുന്നു. നായകനാകാൻ രൺബീർ കപൂർ?

മുൻ ഇന്ത്യൻ ക്രിക്കറ്റ് ടീം നായകൻ സൗരവ് ഗാംഗുലിയുടെ ജീവിതകഥ സിനിമയാകുന്നു.
താരം തന്നെയാണ് ഒരു ചാനലിന് നൽകിയ അഭിമുഖത്തിൽ ഇക്കാര്യം വെളിപ്പെടുത്തിയത്.
ബയോപികിന് സമ്മതം നൽകിയെന്നും ഹിന്ദിയിലായിരിക്കും ചിത്രം നിർമിക്കുകയെന്നും ഗാംഗുലി
വെളിപ്പെടുത്തുന്നു. എന്നാൽ സംവിധായകൻ ഉൾപ്പെടെയുള്ള കാര്യങ്ങളെക്കുറിച്ച് അദ്ദേഹം
വ്യക്തത നൽകിയില്ല.

രൺബീർ കപൂർ ആയിരിക്കും ദാദയായി അഭിനയിക്കുന്നതെന്നാണ് സൂചന. 250 കോടി രൂപ മുതൽമുടക്കിൽ
ബിഗ്ബജറ്റ് ചിത്രമായിരിക്കും വരുന്നത്. ഗാംഗുലിയുടെ ക്രിക്കറ്റ് ജീവിതം തുടങ്ങിയതുമുതൽ ബിസിസിഐ പ്രസിഡന്‍റ്
ആയതുവരെയുള്ള കാലം ചിത്രത്തിൽ ഉൾപ്പെടുത്തുമെന്നാണ് സൂചന. ഗാംഗുലിയുടെ ക്യാപ്റ്റൻസിയിൽ ഇന്ത്യ
ലോകകപ്പ് നേടിയത് സ്ക്രീനിൽ എങ്ങനെ പുനരാവിഷ്കരിക്കുമെന്നാണ് ആരാധകർ ഉറ്റുനോക്കുന്നത്.

ഋത്വിക് റോഷനെ നായകനായി ഗാംഗുലിയുടെ ജീവിതം സിനിമയാകുന്നു എന്നായിരുന്നു നേരത്തെയുള്ള ചർച്ചകൾ. എന്നാൽ
ഗാംഗുലിയോ ഋത്വിക്കോ ഇക്കാര്യത്തിൽ പ്രതികരിച്ചിരുന്നില്ല. ഈ വർഷം അവസാനം ചിത്രം ഷൂട്ടിങ് തുടങ്ങാനാണ് പദ്ധതി.
ഇന്ത്യൻ ക്യാപ്റ്റൻമാരായ എം.എസ് ധോണി, മുഹമ്മദ് അസ്ഹറുദ്ദീൻ എന്നിവരുടെ ജീവിതം സിനിമയാക്കിയിരുന്നു.
സച്ചിന്‍റെ ജീവിതത്തെക്കുറിച്ച് ഡോക്യുമെന്‍ററിയും ഉണ്ട്. കപിൽ ദേവിന്‍റെ ബയോപിക്കും പുറത്തിറങ്ങാനുണ്ട്.

ത്രില്ലിങ് സ്റ്റണ്ട് പെർഫോമൻസ്; ഡ്യൂപ്പില്ലാതെ മഞ്ജുവാര്യരുടെ പ്രകടനം

വെളുത്ത ടോപ്പും കറുത്ത സ്കർട്ടുമണിഞ്ഞ് വമ്പൻ മേക്കോവറിലെത്തിയ മഞ്ജുവാര്യരുടെ
ചിത്രം ഓർമിയില്ലേ? ചതുർമുഖം എന്ന ചിത്രത്തിന്‍റെ പ്രസ് മീറ്റിനെത്തിയപ്പോഴായിരുന്നു
മഞ്ജുവിന്‍റെ പുതിയ ലുക്ക് ആരാധകർ ഏറ്റെടുത്തത്. ഇപ്പോഴിതാ ചതുർമുഖത്തിലെ
സ്റ്റണ്ട് മേക്കിങ് വീഡിയോ ആണ് വൈറലായിരിക്കുന്നത്.

മഞ്ജുവാര്യർ തന്നെയാണ് ദൃശ്യങ്ങൾ പുറത്തുവിട്ടത്. ഡ്യൂപ്പില്ലാതെ റോപ്പ് സ്റ്റണ്ട് അനായാസം
ചെയ്യുന്ന മഞ്ജു എല്ലാവരെയും ഒരിക്കൽ കൂടി അത്ഭുതപ്പെടുത്തുകയാണ്. ‘ഇത് നിങ്ങളെ
ഭയപ്പെടുത്തുണ്ടെങ്കിൽ, ഈ ശ്രമം മികച്ചത് തന്നെയാണ്. ചതുർമുഖത്തിന്റെ
നിർമ്മാണവേളയിലെ ഈ സ്നിപ്പറ്റ് പങ്കിടുന്നതിൽ അതിയായ സന്തോഷം. ഏറെ അപകടം
നിറഞ്ഞ സ്റ്റണ്ടുകൾ സുരക്ഷിതമായി ചെയ്യാൻ എന്നെ സഹായിച്ചതിന് ജി മാസ്റ്റർക്കും
അദ്ദേഹത്തിന്റെ ബോയ്സിനും നന്ദി’ മഞ്ജു കുറിച്ചു.

ഏപ്രിലിൽ തിയറ്ററുകളിൽ മികച്ച പ്രതികരണം നേടിയ ചിത്രം പിന്നീട് പിൻവലിക്കുകയും
കഴിഞ്ഞയാഴ്ച ഓടിടിയിൽ റിലീസ് ചെയ്യുകയും ചെയ്തു. മലയാളത്തിലെ ആദ്യ ടെക്നോ
ഹൊറർ ചിത്രം ഒരുക്കിയത് രഞ്ജീത്ത് കമല ശങ്കര്‍, സലില്‍.വി എന്നിവർ ചേർന്നാണ് .
അഭിനന്ദന്‍ രാമനുജം ക്യാമറയും മനോജ് എഡിറ്റിങും നിർവഹിച്ചു.
ജിസ് ടോംസ് മൂവീസ്, മഞ്ജു വാര്യര്‍ പ്രൊഡക്ക്ഷന്‍സ് എന്നീ ബാനറുകളില്‍ ചിത്രം നിര്‍മ്മിച്ചിരിക്കുന്നത്
ജിസ്സ് ടോംസ്, ജസ്റ്റിന്‍ തോമസ് എന്നിവര്‍ ചേര്‍ന്നാണ്.

അടുത്തിടെ ഇറങ്ങി ഏറെ ചർച്ചകൾക്ക് വഴിവെച്ച ഒരു സിനിമയാണ് സാറാസ് ഇപ്പോൾ ഹരീഷ് പേരടി സിനിമയെ കുറിച്ച് എഴുതിയ കുറിപ്പാണ് വൈറലാകുന്നത്.പൂർണ്ണ ഗർഭിണിയായ പോലീസ് ഓഫീസർ നായകൻ്റെ മുഖത്തേക്ക് തോക്കുചൂണ്ടി നിൽക്കുന്ന നാലാം സീസൺ കഴിഞ്ഞ് ലോകം മുഴുവൻ money heistൻ്റെ അഞ്ചാം സീസണു കാത്തിരിക്കുമ്പോൾ ആണ് ഈ സിനിമ. ഹരീഷ് പറയുന്നു.

ഹരീഷിൻ്റെ കുറുപ്പ് വായിക്കാം

കല്യാണം എന്ന Establishment നോട് യോജിക്കാതെ തന്നെ ഒരു സ്ത്രിക്ക് അവൾക്ക് തോന്നുന്ന സമയത്ത് ശാസ്ത്രിയമായി..അവൾ അറിയാത്ത, ജീവിതത്തിൽ ഒരിക്കലും കാണാനും സാധ്യതയില്ലാത്ത, ഏതോ ഒരു പുരുഷൻ്റെ ബിജം സ്വീകരിച്ച് ഗർഭണിയാകാൻ സ്വാതന്ത്ര്യമുള്ള ഒരു ജനാധിപത്യ രാഷ്ട്രത്തിലാണ് നമ്മൾ ജീവിക്കുന്നത്…എനിക്ക് പ്രസവിക്കണ്ടാ എന്ന് ആവർത്തിച്ച് പറയുന്ന ഒരു പെൺകുട്ടിയെ പിന്നെയും കല്യാണം,കുടുംബം തുടങ്ങിയ വ്യവസ്ഥാപിത സബ്രദായങ്ങൾക്കിടയിൽ പൂട്ടിയിട്ട് സിനിമയുണ്ടാക്കുമ്പോൾ ജയിലിൽ സ്വാതന്ത്രത്തിനെ കുറിച്ച് നല്ല കവിത എഴുതിയ തടവുകാരന് സമ്മാനം കൊടുക്കുന്നതുപോലെ തോന്നി..കരയുന്ന കുട്ടിയെ ഒന്ന് എടുക്കാൻ പോലും താത്പര്യം കാണിക്കാത്ത ഈ പെൺകുട്ടി എന്ത് സിനിമയാണ് ഉണ്ടാക്കുന്നത് എന്ന് മനസ്സിലാക്കാനും പറ്റുന്നില്ല..അവൾ കഥ പറയുന്ന സമയത്തൊക്കെ സംഗീതം കൊണ്ട് രംഗങ്ങൾ നിശബ്ദമാക്കപ്പെടുന്നുമുണ്ട്..(ചില സിനിമകളിൽ തെറികൾ പറയുമ്പോൾ mute ചെയ്യുന്നതുപോലെ)..അന്യൻ്റെ കുട്ടികളും നമ്മുടെ കുട്ടികളാണെന്ന് കരുതി കേരളം 18 കോടി കൊടുത്ത് താലോലിച്ച ഈ സമയത്ത് സ്വന്തം ശരീരത്തിൻ്റെ രാഷ്ട്രിയം പറയാൻ ഗർഭാവസ്ഥ തടസ്സമാവുന്നത് പുരോഗമനത്തെ ( മുന്നോട്ടുള്ള കുതിപ്പിനെ) കുറിച്ചുള്ള അറിവില്ലായമയാണ്…പൂർണ്ണ ഗർഭിണിയായ പോലീസ് ഓഫീസർ നായകൻ്റെ മുഖത്തേക്ക് തോക്കുചൂണ്ടി നിൽക്കുന്ന നാലാം സീസൺ കഴിഞ്ഞ് ലോകം മുഴുവൻ money heistൻ്റെ അഞ്ചാം സീസണു കാത്തിരിക്കുമ്പോൾ ആണ് ഈ സിനിമ..ക്യാമറയേയും സംവിധായകനേയും തട്ടിമാറ്റി കടന്നു പോയ ആദാമിൻ്റെ വാരിയെല്ലുകൾ ജീവിച്ച സ്ഥലത്ത്,വിപ്ലവം നടത്തിയ സ്ഥലത്ത്,എല്ലാ establishment കളെയും അംഗീകരിച്ച പ്രസവിക്കാൻ താത്പര്യമില്ലാത്ത,എന്നാൽ ഉടനെ പ്രസവിക്കാനും സാധ്യതയുള്ള ഈ രാജകുമാരി..മലയാള സിനിമയുടെ ഒരു രാഷ്ട്രിയ ദൂരെമേയല്ല…?❤️നായകൻ്റെ ലിംഗത്തിന് വിശുദ്ധിയുള്ളതുകൊണ്ട് ചവിട്ടേറ്റുവാങ്ങാൻ ഒരു സഹനടൻ്റെ ലിംഗവും …മനോഹരമായ tail end…?

ഹാപ്പി ബർത്ത്ഡേ പ്രണവ്; ‘ഹൃദയം’ പോസ്റ്റർ ഹിറ്റ്

പ്രണവ് മോഹലാലിന്‍റെ പിറന്നാൾ ദിനത്തിൽ പുറത്തിറങ്ങിയ ഹൃദയം പോസ്റ്റർ സാമൂഹിക
മാധ്യമങ്ങളിൽ ട്രെൻഡിങ് ആവുന്നു. ക്യാമറയുമായി പ്രണവ് നിൽക്കുന്ന പോസ്റ്റർ
സംവിധായകൻ വിനീത് ശ്രീനിവാസൻ ആണ് പങ്കുവച്ചത്.
‘അപ്പുവിനെക്കുറിച്ച് എനിക്ക് ഒരുപാട് കാര്യങ്ങൾ പറയാനുണ്ട്. ഈ സിനിമ പുറത്തിറങ്ങി
ആളുകൾ കാണുന്നതുവരെ ഞാൻ കാത്തിരിക്കും. പിറന്നാൾ ആശംസകൾ ഞങ്ങളുടെ
പ്രിയപ്പെട്ട പ്രണവ് മോഹൻലാലിന്.’–വിനീത് ശ്രീനിവാസൻ കുറിച്ചു.

ഏറെ രസകരമായ കാര്യം അതല്ല. വർഷങ്ങൾക്ക് മുമ്പ് പ്രിയദർശന്‍റെ സംവിധാനത്തിൽ മോഹൻലാൽ അഭിനയിച്ച
സൂപ്പ‍ർ ഹിറ്റ് സിനിമ ചിത്രത്തിന്‍റെ പോസ്റ്ററുമായി ഇതിനുള്ള സാമ്യമാണ് ആരാധകർ കണ്ടെത്തിയിരിക്കുന്നു.
ക്യാമറയും കയ്യിലെടുത്തുള്ള പ്രണവിന്‍റെ നിൽപ് അച്ഛനെ ഓർമിപ്പിക്കുന്നു എന്നാണ് പലരും പറയുന്നത്.
മോഹൻലാലും പിറന്നാൾ ആശംസയുമായി പോസ്റ്റർ ഷെയർ ചെയ്തിട്ടുണ്ട്.
സിനിമാ ലോകത്തെ പ്രമുഖ താരങ്ങളെല്ലാം പ്രണവിന് ആശംസയുമായി എത്തിക്കഴിഞ്ഞു.

വിനീത് ശ്രീനിവാസൻ സംവിധാനം ചെയ്യുന്ന ഹൃദയത്തിൽ പ്രണവും കല്യാണി പ്രിയദർശനുമാണ് നായികാ
നായകൻമാരായി എത്തുന്നത്. കഴിഞ്ഞ ദിവസം കല്യാണിയുടെ പോസ്റ്ററും റിലീസ് ചെയ്തത് ശ്രദ്ധ നേടിയിരുന്നു.
പ്രണവ് നായകനാകുന്ന മൂന്നാമത്തെ ചിത്രമാണ് ഹൃദയം. 15 പാട്ടുകളാണ് ചിത്രത്തിലുള്ളത്.
ഹിഷാം അബ്‍ദുൾ വഹാബ് ആണ് ‘ഹൃദയ’ത്തിന്റെ സംഗീത സംവിധായകൻ. അജു വർഗീസ്,
ബൈജു സന്തോഷ്, അരുണ്‍ കുര്യന്‍, വിജയരാഘവന്‍, ദര്‍ശന രാജേന്ദ്രന്‍ തുടങ്ങിയവരാണ് മറ്റു
പ്രധാന താരങ്ങൾ. ഛായാഗ്രഹണം വിശ്വജിത്ത് ഒടുക്കത്തിൽ.
മെറിലാൻഡ് സിനിമാസിന്റെ ബാനറില്‍ വിശാഖ് സുബ്രഹ്മണ്യം ആണ്
ചിത്രം നിർമിക്കുന്നത്.

സൂര്യയുടെ സുരറൈ പൊട്ര് ഹിന്ദിയിലേക്ക്

ഓടിടി പ്ലാറ്റ്ഫോമിൽ സൂപ്പർ ഹിറ്റായ സൂര്യ നായകനായ സുരരൈ പൊട്ര് ഹിന്ദിയിലേക്ക്.
സുധ കൊങ്കര തന്നെയാണ് സംവിധാനം. സൂര്യ തന്നെയാണ് വാർത്ത പുറത്തുവിട്ടത്.
സൂര്യയുടെ 2 ഡി എന്‍റ‍ർടെയ്ൻമെന്‍റ്സും വിക്രം മൽഹോത്രയും ചേർന്നാണ് ചിത്രം നിർമിക്കുന്നത്.
ആരായിരിക്കും നായകൻ എന്നാണ് ആരാധകർ ഉറ്റുനോക്കുന്നത്. ഷാഹിദ് കപൂർ
ആയിരിക്കും എത്തുക എന്നാണ് റിപ്പോർട്ട്.

ആദ്യകാലത്തെ ആഭ്യന്തര വിമാന സർവീസായിരുന്ന എയർ ഡെക്കാണിന്‍റെ
സ്ഥാപകൻ ജി.ആർ. ഗോപിനാഥിന്‍റെ ആസ്പദമാക്കിയാണ് സുരരൈ പൊട്ര് ഒരുക്കിയത്.
കൊവിഡിനെത്തുടർന്ന് ആമസോൺ പ്രൈമിലൂടെ തെന്നിന്ത്യൻ ഭാഷകളിൽ
ചിത്രം റിലീസ് ചെയ്തു. മലയാളി താരം അപർണബാലമുരളി ആയിരുന്നു നായിക. ഉർവശിയും
പ്രധാനവേഷത്തിൽ എത്തിയിരുന്നു.

സുരറൈ പൊട്രുവിന് പ്രേക്ഷകർ നൽകിയ പിന്തുണയ്ക്ക് നന്ദിയുണ്ടെന്നും
ഏറെ ആവേശത്തോടെ ഹിന്ദിയിൽ ചെയ്യാൻ ഒരുങ്ങുകയാണെന്നും സംവിധായിക സുധ
കൊങ്കര പ്രതികരിച്ചു. ഐഎംഡിബി റേറ്റിൽ 9.1 നേടിയ ചിത്രം ഓസ്കാർ നോമിനേഷനു വേണ്ടിയും
മത്സരിച്ചിരുന്നു.