മുകേഷ് എംഎൽഎയുമായി ബന്ധപ്പെട്ട ഫോൺവിളി വിവാദത്തിൽ പ്രതികരിച്ച് ഒറ്റപ്പാലത്തെ കുട്ടി.

മുകേഷ് എംഎൽഎയെ വിളിച്ചത് കൂട്ടുകാരന് വേണ്ടിയാണെന്ന് കുട്ടി പറഞ്ഞു. ഓൺലൈൻ ക്ലാസിൽ പങ്കെടുക്കാൻ ഫോൺ ലഭ്യമാക്കാനാണ് വിളിച്ചത്. സിനിമാ നടനായതുകൊണ്ടാണ് കോൾ റെക്കോർഡ് ചെയ്തത്. സഹായം ലഭിക്കുമെന്ന് പ്രതീക്ഷിച്ചിരുന്നുവെന്നും കുട്ടി വ്യകത്മാക്കി.

ഓൺലൈൻ ക്ലാസിൽ പങ്കെടുക്കാൻ ഫോൺ സൗകര്യമില്ലാത്ത കുട്ടികൾക്ക് അത് ലഭ്യമാക്കാൻ പറ്റുന്നത് ചെയ്യണമെന്ന് സ്‌കൂളിലെ വാട്‌സ്ആപ്പ് ഗ്രൂപ്പിൽ അധ്യാപകർ ആവശ്യപ്പെട്ടിരുന്നു. തനിക്ക് അമ്മ ഫോൺ വാങ്ങി നൽകിയത് വളരെ കഷ്ടപ്പെട്ടാണ്. ബാക്കിയുള്ള കുട്ടികൾ എത്രത്തോളം കഷ്ടപ്പെടുമെന്ന് കരുതിയാണ് എംഎൽഎയ വിളിക്കാൻ തീരുമാനിച്ചത്.

മുകേഷ് എംഎൽഎ വിദ്യാർത്ഥികൾക്ക് ഫോൺ നൽകുന്ന കാര്യമൊക്കെ അറിഞ്ഞിരുന്നു. അതനുസരിച്ചാണ് അദ്ദേഹത്തെ വിലിച്ചത്. സിനിമാ നടനായതുകൊണ്ട് സഹായിക്കുമെന്നും കരുതി. ആറ് തവണ വിളിച്ചു. അതിനിടെ അദ്ദേഹത്തിന്റെ സൂം മീറ്റിംഗ് കട്ടായി. പിന്നീട് തിരിച്ചുവിളിക്കുകയാണുണ്ടായത്. ആറ് തവണ താൻ വിളിച്ചതുകൊണ്ടാണ് അദ്ദേഹം ദേഷ്യപ്പെട്ടത്. ആർക്കായാലും ദേഷ്യം വരും. തനിക്ക് പരാതിയില്ലെന്നും കുട്ടി പറഞ്ഞു.

കഴിഞ്ഞ ദിവസമാണ് മുകേഷ് എംഎൽഎയും പാലക്കാട് സ്വദേശിയായ വിദ്യാർത്ഥിയും തമ്മിലുള്ള ഫോൺ സംഭാഷണം പുറത്തുവന്നത്. പരാതി പറയാൻ വിളിച്ച വിദ്യാർത്ഥിയോട് മുകേഷ് എംഎൽഎ അപമര്യാദയായി പെരുമാറിയെന്നായിരുന്നു ആരോപണം. സംഭവം വൻ വിവാദമായതോടെ വിശദീകരണവുമായി എംഎൽഎ രംഗത്തെത്തിയിരുന്നു.

ഇടുക്കി: മുരിക്കാശേരിയില്‍ പത്താം ക്ലാസ് വിദ്യാര്‍ത്ഥിനി തൂങ്ങി മരിച്ച നിലയില്‍. ഉച്ചയ്ക്ക് 2.30 യോടെയായിരുന്നു സംഭവം നടന്നത്. മുരിക്കാശേരി സ്‌കൂളില്‍ പഠിക്കുന്ന സോന സന്തോഷിനെയാണ് വീടിനുള്ളില്‍ ദുരൂഹ സാഹചര്യത്തില്‍ മരിച്ച നിലയില്‍ കണ്ടെത്തിയത്.

പൂമാംകണ്ടം പാറസിറ്റി വെട്ടിമലയില്‍ സന്തോഷിന്റെയും ഷീബയുടെയും മകളാണ്. മൃതദേഹം പോസ്റ്റ് മോര്‍ട്ടത്തിനായി മെഡിക്കല്‍ കോളജിലേയ്ക്ക് മാറ്റി. മുരിക്കാശേരി പൊലീസ് അസ്വാഭാവിക മരണത്തിന് കേസ് എടുത്ത് അന്വേഷണം ആരംഭിച്ചു.

ദോഹ: ഖത്തറില്‍ കൊവിഡ് നിയന്ത്രണങ്ങള്‍ ലംഘിക്കുന്നവര്‍ക്കെതിരായ നടപടികള്‍ ശക്തമാക്കി ആഭ്യന്തര മന്ത്രാലയം.

ഇതുവരെ ഇത്തരത്തില്‍ ആയിരക്കണക്കിന് പേര്‍ക്കെതിരെ നിയമലംഘനങ്ങള്‍ക്ക് നടപടി സ്വീകരിച്ച് കഴിഞ്ഞിട്ടുണ്ട്.സുരക്ഷിതമായ സമൂഹിക അകലം പാലിക്കാത്തതിന് കഴിഞ്ഞ ദിവസം ഒന്‍പത് പേര്‍ നടപടി നേരിട്ടു.നിയമലംഘനങ്ങളുടെ പേരില്‍ കഴിഞ്ഞ ദിവസം 170 പേര്‍ക്കെതിരെയാണ് നടപടിയെടുത്തതെന്ന് അധികൃതര്‍ അറിയിച്ചു.

ഇവരില്‍ 161 പേരും പൊതുസ്ഥലത്ത് മാസ്‍ക് ധരിക്കാത്തതിനാണ് പിടിയിലായത്. പിടിയിലാവുന്നവരെ തുടര്‍ നടപടികള്‍ക്കായി പബ്ലിക് പ്രോസിക്യൂഷന് കൈമാറുകയാണ് ആഭ്യന്തര മന്ത്രാലയം അധികൃതര്‍ ചെയ്യുന്നത്.

 ഷാര്‍ജ: യുഎഇയില്‍ കാണാതായിരുന്ന ഇന്ത്യന്‍ ബാലനെ കാറിനുള്ളില്‍ മരിച്ച നിലയില്‍ കണ്ടെത്തി.

എട്ടു വയസുകാരനെ കണ്ടെത്താന്‍ വ്യാപകമായ തെരച്ചില്‍ നടത്തിവരുന്നതിനിടെയാണ് അയല്‍വാസിയുടെ കാറിനുള്ളില്‍ കുട്ടിയ ചലനമറ്റ നിലയില്‍ കണ്ടെത്തിയത്. ഷാര്‍ജ അല്‍ നാസിരിയയിലാണ് സംഭവം.

കുട്ടിയെ കാണാനില്ലെന്ന് കാണിച്ച് മാതാപിതാക്കള്‍ ഞായറാഴ്‍ച രാവിലെ അല്‍ ഗര്‍ബ് പൊലീസ് സ്റ്റേഷനില്‍ പരാതി നല്‍കിയിരുന്നു. തുടര്‍ന്ന് നടത്തിയ തെരച്ചിലിലാണ് അയല്‍വാസിയുടെ കാറിനുള്ളില്‍ കുട്ടിയുടെ ചലനമറ്റ ശരീരം കണ്ടെത്തിയത്. 

പൊലീസ് പട്രോള്‍ സംഘവും ആംബുലന്‍സും സ്ഥലത്തെത്തി പരിശോധന നടത്തി. തുടര്‍ന്ന് മൃതദേഹം ശാസ്‍ത്രീയ പരിശോധനയ്‍ക്കായി ഫോറന്‍സിക് ലബോറട്ടറിയിലേക്ക് അയച്ചു. സംഭവത്തില്‍ പബ്ലിക് പ്രോസിക്യൂഷന്‍ അന്വേഷണം തുടരുകയാണ്.

തിരുവനന്തപുരം : കെപിസിസി പ്രസിഡൻറ് കെ. സുധാകരനെതിരെ വിജിലൻസിന്റെ പ്രാഥമിക അന്വേഷണം.

അഴിമതി ആരോപണം ഉന്നയിച്ച് സുധാകരന്റെ മുൻ ഡ്രൈവർ പ്രശാന്ത് ബാബു നൽകിയ പരാതിയിലാണ് നടപടി.കരുണാകരൻ ട്രസ്റ്റിന്റെ പേരിലും ഡിസിസി ഓഫീസ് നിർമാണത്തിനും സാമ്പത്തിക തിരിമറി നടത്തിയെന്നാണ് പരാതി.

കരുണാകരൻ ട്രസ്റ്റുമായി ബന്ധപ്പെട്ട് വലിയ തോതിൽ പണപ്പിരിവ് നടത്തിയെന്നും ഇതിൽ ക്രമക്കേടുകൾ നടന്നതായും പരാതിയിൽ പറയുന്നു. ഇതിനുപുറമേ,കണ്ണൂർ ഡിസിസി ഓഫീസ് നിർമ്മാണത്തിലും സാമ്പത്തിക തിരിമറി നടത്തിയെന്നും ഇതിലൂടെ അനധികൃത സ്വത്തുസമ്പാദനം ഉൾപ്പെടെ നടന്നതായുമാണ് പരാതിയിൽ പറയുന്നത്.

പരാതിയിൽ പ്രാഥമിക അന്വേഷണം നടത്തി റിപ്പോർട്ട് സമർപ്പിക്കാൻ വിജിലൻസ് ഡയറക്ടർ ഉത്തരവിട്ടു.പരാതിയിൽ കഴമ്പുണ്ടോയെന്നാണ് പ്രാഥമിക പരിശോധന.

റിയാദ് : കോവിഡ് വ്യാപന ആശങ്ക നിലനിൽക്കുന്ന പശ്ചാത്തലത്തിൽ യുഎഇയിൽ നിന്ന് തിരിച്ചുമുള്ള യാത്രകൾ താൽക്കാലികമായി റദ്ദാക്കി സൗദി അറേബ്യ.

യുഎഇയെ കൂടാതെ എത്യോപ്യാ,വിയറ്റ്നാം എന്നിവിടങ്ങളിൽ നിന്നും പുറത്തേക്കുമുള്ള യാത്രകൾക്കും വിലക്ക് ഏർപ്പെടുത്തിയതായി സൗദി ആരോഗ്യ മന്ത്രാലയം അറിയിച്ചു.ജൂലൈ 4 ഞായറാഴ്ച രാത്രി 11 മണി മുതലായിരിക്കും വിലക്ക് പ്രാബല്യത്തിൽ വരിക.അഫ്ഗാനിസ്ഥാനിൽ നിന്നു സൗദിയിലേക്കുള്ള പ്രവേശനവും നിർത്തിവച്ചിട്ടുണ്ട്. സൗദി ആരോഗ്യ മന്ത്രാലയത്തിന്റെ പുതിയ നിർദ്ദേശപ്രകാരം ഞായറാഴ്ച ശേഷം ഈ രാജ്യങ്ങൾ വഴി സൗദിയിലേക്ക് കടക്കുന്നവർക്ക് സ്ഥാപന ക്വാറന്റീൻ നിർബന്ധമാണ്.

ഇത് സൗദി പൗരന്മാർക്കും ബാധകമായിരിക്കും.നേരത്തെ വിലക്കുള്ള രാജ്യങ്ങൾക്ക് പുറമെ 14 ദിവസത്തിനുള്ളിൽ രാജ്യങ്ങളിലൂടെ സഞ്ചരിച്ചവർക്കായിരിക്കും ഇത് ബാധകമാവുക.കോവിഡ് പ്രതിരോധ കുത്തിവയ്പ് എടുക്കുകയോ കോവിഡ് ബാധയിൽനിന്ന് മുക്താരാവുകയോ ചെയ്ത പൗരന്മാർക്ക് മെയ് 17 മുതൽ മറ്റു രാജ്യങ്ങൾ സന്ദർശിക്കാൻ അനുമതി നൽകിയിരുന്നു.

എന്നാൽ ഒരു ഡോസ് വാക്സിൻ മാത്രം സ്വീകരിച്ചവർ, കുത്തിവെപ്പ് എടുത്ത് 14 ദിവസം കാത്തിരിക്കേണ്ടതുണ്ട്.ഇതാണ് പുതിയ അറിയിപ്പിലൂടെ യുഎഇ ഉൾപ്പെടെയുള്ള രാജ്യങ്ങളിലേക്കുള്ള യാത്ര മന്ത്രാലയം റദ്ദാക്കിയത്.വാക്സിനേഷൻ കൂടുതൽ പേർ പൂർത്തിയാക്കുന്നതുവരെ ഇന്ത്യ ഉൾപ്പെടെയുള്ള രാജ്യങ്ങളിൽ നിന്നുള്ള രാജ്യാന്തര വിമാന യാത്രകൾക്ക് ഏർപ്പെടുത്തിയിരിക്കുന്ന വിലക്ക് തുടരുമെന്നാണ് സൂചന.

ഹൈദരാബാദ് : ബഹിരാകാശത്തെത്തുന്ന മൂന്നാമത്തെ ഇന്ത്യൻ വംശജയെന്ന നേട്ടം സ്വന്തമാക്കാനൊരുങ്ങുകയാണ് സിരിഷ ബാൻഡ്ല (34). വെർജിൻ ഗലാക്റ്റിക്ക്‌ മേധാവി റിച്ചഡ് ബ്രാൻഡന്റെ നേതൃത്വത്തിലുള്ള ആറംഗ യാത്രാസംഘത്തിൽ ഒരാളാണ് സിരിഷ.

ഈ മാസം 11 നാണ് യാത്ര.കല്പനാചൗളയും സുനിത വില്യംസുമാണ് ഇതിനു മുൻപ് ബഹിരാകാശത്ത് എത്തിയ ഇന്ത്യൻ വംശജരായ വനിതകൾ.നിലവിൽ സിരിഷ വെർജിൻ ഗലാക്റ്റിക്കിന്റെ ഗവൺമെൻറ് അഫയേഴ്‌സ് വിഭാഗം വൈസ് പ്രസിഡൻറ് ആണ്.ആന്ധ്രയിലെ ഗുണ്ടൂരിൽ ജനിച്ച സിരിഷ മാതാപിതാക്കളായ ഡോ.ബാൻഡ്ല മുരളീധറിനും അനുരാധക്കുമൊപ്പം അഞ്ചാം വയസ്സിലാണ് യുഎസിലെത്തിയത്. വളർന്നത് ഹൂസ്‌റ്റൺ നഗരത്തിൽ.

യുഎസിലെ പർദ്യൂ സർവകലാശാലയിൽനിന്ന് എയ്റോനോട്ടിക്കൽ എൻജിനീയറിങ്ങിൽബിദൂരവും,ജോർജ്ജ്ടൗൺ സർവകലാശാലയിൽനിന്ന് എംബിഎയും നേടിയ സിരിഷ പിന്നീട് ടെക്സസിൽ എയ്റോസ്‌പേസ്‌ എൻജിനീയറായും കൊമേഷ്യൽ സ്പേസ് ഫ്ലൈറ്റ് ഫെഡറേഷനിൽ സ്പേസ് പോളിസി വിദഗ്ധയായും ജോലി ചെയ്തു. 2015 ലാണ് വെർജിൻ ഗലാക്റ്റിക്കിൽ ചേർന്നത്. ചീഫ് അസ്ട്രോനോട്ടായ ബെഥ് മോസസ് എന്ന വനിതയും സിരിഷയ്ക്കൊ പ്പം ബഹിരകാശാ യാത്രാ യാത്രാസംഘത്തിലുണ്ട്.

ലക്ഷദ്വീപ് സന്ദര്‍ശിക്കുന്നതിതിന് കോണ്‍ഗ്രസ് എംപിമാരായ ഹൈബി ഈഡനും ടി.എന്‍. പ്രതാപനും നല്‍കിയ അപേക്ഷ ലക്ഷദ്വീപ് ഭരണകൂടം തള്ളി.

എംപിമാരുടെ സന്ദര്‍ശനം ദ്വീപിലെ സമാധാന അന്തരീക്ഷം തകര്‍ക്കുമെന്ന് ചൂണ്ടിക്കാട്ടിയാണ് ജില്ലാ കളക്ടര്‍ അപേക്ഷ തള്ളിയത്. തിങ്കളാഴ്ച ലക്ഷദ്വീപ് അഡ്മിനിസ്‌ട്രേറ്റര്‍ക്ക് അപ്പീല്‍ നല്‍കും. തുടര്‍ന്നും അനുമതി നിഷേധിച്ചാല്‍ ഹൈക്കോടതിയെ സമീപിക്കുമെന്നും ടി.എന്‍. പ്രതാപന്‍ പറഞ്ഞു.

ഇതിനിടെ ദ്വീപില്‍ വീണ്ടും കൂട്ടപിരിച്ചുവിടലുണ്ടായി. 151 താത്കാലിക ജീവനക്കാരെ പിരിച്ചുവിട്ടു. കായിക യൂണിറ്റിലെ ജീവനക്കാരെയാണ് പിരിച്ചുവിട്ടത്.വിനോദ സഞ്ചാരമേഖല നിശ്ചലമായതിനാലാണ് പിരിച്ചുവിടലെന്നാണ് ലക്ഷദ്വീപ് ഭരണകൂടത്തിന്റെ വിശദീകരണം.

പരീക്ഷക്ക് പോകാൻ വാഹനം കിട്ടാതെ വലഞ്ഞ വിദ്യാർത്ഥികൾക്ക് യാത്രയൊരുക്കി എസ്.ഐ

കാക്കിയുടെ കരുതലിന് നന്ദി അറിയിച്ചു വിദ്യാർത്ഥികളുടെ ഫേസ്ബുക്ക് പോസ്റ്റ്

വാഹനം കിട്ടാതെ പരീക്ഷക്ക് സ്കൂളിൽ എത്തിച്ചേരാനാകാതെ വഴിയോരത്ത് കാത്തുനിന്ന ഹയർസെക്കൻഡറി വിദ്യാർത്ഥികളെ സ്വന്തം വാഹനത്തിൽ പരീക്ഷാഹാളിൽ എത്തിച്ച് ശൂരനാട് പോലീസ് സ്റ്റേഷനിലെ വനിതാ എസ് ഐ മഞ്ജു വി നായർ കാക്കിക്കുള്ളിലെ കരുതലിൻ്റെ പ്രതീകമായി.
പരീക്ഷ എഴുതാൻ ഉള്ള യാത്രയിൽ വാഹനം കിട്ടാതെ റോഡരികിൽനിന്ന ശൂരനാട് ഗവൺമെൻറ് സ്കൂളിലെ വിദ്യാർത്ഥികളായ ഇജാസ് അഭിരാം എന്നിവരെയാണ് വനിതാ എസ് ഐ മഞ്ജു തൻ്റെ സ്വകാര്യ വാഹനത്തിൽ പരീക്ഷകേന്ദ്രത്തിൽ എത്തിച്ചത്. 11 മണിക്കുള്ള കണക്ക് പരീക്ഷയുടെ പ്രാക്ടിക്കൽ പരീക്ഷയ്ക്കായി പത്തു മണി മുതൽ കൊല്ലം-തേനി പാതയിൽ താമരകുളത്തു ബസ് കാത്തു നിന്നെങ്കിലും വാഹനം കിട്ടിയില്ല. നിരവധി ഇരുചക്രവാഹനങ്ങൾക്ക് കൈ കാണിച്ചു പുറകെ ഓടിയെങ്കിലും കോവിഡ് ഭീതിയുള്ളതിനാൽ ആരും വാഹനം നിർത്താൻ തയ്യാറായില്ല. ഈ സമയത്താണ് താമരക്കുളം സ്വദേശിയായ മഞ്ജു ഡ്യൂട്ടിക്ക് പോകാനായി അതുവഴി വന്നത്. വാഹനത്തിന് കൈകാണിച്ചപ്പോൾ എസ് ഐ വാഹനം നിർത്തി. യൂണിഫോംധാരിയായ എസ്.ഐ യെകണ്ടപ്പോൾ കയറാൻ മടിച്ച ഇരുവരോടും കാര്യങ്ങൾ തിരക്കുകയും വാഹനത്തിൽ കയറ്റി പരീക്ഷാഹാളിൽ എത്തിക്കുകയുമായിരുന്നു. എസ്. ഐയോടൊപ്പമുള്ള ഫോട്ടോ സാമൂഹികമാധ്യമങ്ങളിൽ മാധ്യമങ്ങളിൽ പങ്കുവച്ചാണ് വിദ്യാർത്ഥികൾ പോലീസിനോടുള്ള സ്നേഹം പ്രകടിപ്പിച്ചത്.

തിരുവനന്തപുരം: ജമ്മു കശ്മീര്‍ വിമാനത്താവളത്തിലെ ഡ്രോണ്‍ ആക്രമണങ്ങളുടെ പശ്ചാത്തലത്തില്‍ കേരളത്തിലും തമിഴ്‌നാട്ടിലും ജാഗ്രത ശക്തമാക്കണമെന്ന് കേന്ദ്ര രഹസ്യാന്വേഷണ വിഭാഗത്തിന്റെ മുന്നറിയിപ്പ്.

 തീവ്രവാദ ഗ്രൂപ്പുകള്‍ ഡ്രോണ്‍ ഉപയോഗിച്ച് സംസ്ഥാനങ്ങളിലേക്ക് നുഴഞ്ഞുകയറാനുള്ള സാധ്യത ഉളളതിനാല്‍ ജാഗ്രത പുലര്‍ത്തണമെന്ന് കേന്ദ്ര രഹസ്യാന്വേഷണ ഏജന്‍സികള്‍ തമിഴ്‌നാടിനും കേരളത്തിനും മുന്നറിയിപ്പ് നല്‍കി.

താലിബാന്‍ അടക്കമുള്ള സംഘടനകള്‍ ആക്രമണം നടത്താനുള്ള സാധ്യതകള്‍ രഹസ്യാന്വേഷണ വിഭാഗം തള്ളിക്കളയുന്നില്ല.അതിര്‍ത്തി മേഖലകളില്‍ ചില തീവ്രവാദ സംഘടനകള്‍ ഡ്രോണ്‍ ആക്രമണങ്ങള്‍ക്ക് തയ്യാറെടുക്കുന്നുവെന്ന സൂചനകള്‍ കേന്ദ്രരഹസ്യാന്വേഷണ വിഭാഗത്തിന് ലഭിച്ചിട്ടുണ്ട്.

തീവ്രവാദസംഘടനകളുമായി ചേര്‍ന്ന് പ്രവര്‍ത്തിക്കാനായി കേരളത്തില്‍ നിന്ന് സിറിയയിലേക്കും അഫ്ഗാനിസ്ഥിലേക്കും ആളുകള്‍ പോയതും തമിഴ്നാട് കേന്ദ്രീകരിച്ച് പ്രവര്‍ത്തിക്കുന്ന അല്‍-ഉമ്മ പോലുള്ള സംഘടനകളുടെ സാന്നിധ്യവും കേന്ദ്ര ഏജന്‍സികള്‍ സൂക്ഷ്മമായി  നിരീക്ഷിച്ചുവരികയാണ്. കോയമ്പത്തൂര്‍, തിരുച്ചിറപ്പള്ളി, കന്യാകുമാരി, തമിഴ്നാട്ടിലെ മറ്റ് തെക്കന്‍ ജില്ലകളിലെ സംഘടനകളുടെ പ്രവര്‍ത്തനങ്ങളും ഏജന്‍സികള്‍ നിരീക്ഷിക്കുന്നുണ്ട്.

ഏതാനും മാസങ്ങളായി കേരളത്തിലും തമിഴ്‌നാട്ടിലും രഹസ്യാന്വേഷണ വിഭാഗത്തിന്റെ അതീവനിരീക്ഷണം നടക്കുന്നുണ്ട്. ഡ്രോണ്‍ ആക്രണമങ്ങളുടെ പശ്ചാത്തലത്തില്‍ നിരീക്ഷണം ശക്തിപ്പെടുത്തിയിട്ടുണ്ട്.