മസ്കത്ത് :കോവിഡ് നിയന്ത്രണങ്ങളിൽ കൂടുതൽ ഇളവുകൾ പ്രഖ്യാപിച്ച് ഒമാൻ.

വാണിജ്യ സ്ഥാപനങ്ങളിൽ രാത്രി 8 നും പുലർച്ചെ 4 നും ഇടയിൽ ഏർപ്പെടുത്തിയിരുന്ന വിലക്ക് ഒഴിവാക്കി. പള്ളികളിൽ 100 പേർക്ക്‌ വരെ പ്രവേശനാനുമതി.നിസ്കാര സമയങ്ങളിൽ മാത്രമാവും പ്രവേശനാനുമതി. എന്നാൽ ജുമുഅയ്ക്ക് അനുമതിയില്ല.ഹോട്ടലുകളിലും, കഫേകളിലും ഉൾക്കൊള്ളാവുന്നതിന്റെ 50 ശതമാനത്തിൽ കൂടുതൽ ആളുകൾ പാടില്ല എന്ന് നിർദ്ദേശവുമുണ്ട്.

പ്രഖ്യാപിച്ച മറ്റ് ഇളവുകൾ

• പൊതു പാർക്കുകളിലും, ബീച്ചുകളിലും പ്രവേശിക്കാം.
• ഷോപ്പിങ് മാളുകളിൽ 12 വയസ്സിൽ താഴെയുള്ള കുട്ടികൾക്ക് പ്രവേശനാനുമതി.
• ജിംനേഷ്യങ്ങൾ 50% ആളുകളുമായി പ്രവർത്തിക്കാം.
• വിവാഹ ഹാളുകൾ,എക്സിബിഷൻ കേന്ദ്രങ്ങൾ എന്നിവിടങ്ങളിൽ 30 ശതമാനം പേർക്ക് പ്രവേശനാനുമതി. എന്നാൽ വലിയ ഹാൾ ആണെങ്കിലും 300 പേരിൽ കൂടാൻ പാടില്ല.
• ജോലിസംബന്ധമായ ആവശ്യങ്ങൾക്ക് സ്വദേശികൾക്കും,താമസക്കാർക്കും
കരാതിർത്തി വഴി യാത്രാ അനുമതിയുണ്ട്. എന്നാൽ ഇതു സംബന്ധിച്ച രേഖകൾ കാണിക്കണം.

സാവോ പോളോ :ലോകത്തിലെ തന്നെ ഏറ്റവും വലിയ മാംസ ഉൽപാദന, വിതരണ കമ്പനിയായ ജെസിഎസിന്റെ സെർവറുകളിൽ സൈബർ ആക്രമണം.

റഷ്യയിൽനിന്നുള്ള ഹാക്കർ സംഘമാണ് ‘റാൻസംവെയർ’ ആക്രമണത്തിനു പിന്നിലെന്നും, ഇവർ പണം ആവശ്യപ്പെട്ടതായും കമ്പനി യുഎസ് അധികൃതർ അറിയിച്ചു. ഒന്നരലക്ഷത്തിലധികം ജീവനക്കാർ ഉള്ള കമ്പനിയുടെ ആസ്ഥാനം ബ്രസീലാണ്.ഹാക്കിങ്, കമ്പനിയുടെ യുഎസ്,കാനഡ,ഓസ്ട്രേലിയ എന്നിവിടങ്ങളിലെ സെർവറുകളെ ബാധിച്ചു.ഇവിടങ്ങളിലെ ഉൽപാദനം സ്തംഭിച്ചിരിക്കുകയാണ്.
റെവിൽ,സോഡിനോകിബി തുടങ്ങിയ ഹാക്കിങ് ഗ്രൂപ്പുകൾ ആണ് ആക്രമണത്തിന് പിന്നിലെന്നാണ് സംശയിക്കുന്നത്.

പാക്കേജിങ്,ബില്ലിങ് ഉൾപ്പെടെ ജെബിഎസിന്റെ ഫാക്ടറി സംവിധാനങ്ങളുടെ നിയന്ത്രണ സോഫ്റ്റ്‌വെയറുകളെയാണ് വൈറസ് പിടികൂടിയത്. അടുത്ത ദിവസങ്ങളിലായി മൂന്നാമത്തെ വമ്പൻ സൈബർ ആക്രമണമാണ് ഇത്.ഇതിന് മുമ്പ് കൊളോണിയൻ പൈപ്പ് ലൈൻ കമ്പനിയുടെ സെർവറുകളിലും, യുഎസ് വിദേശ സഹായ സ്ഥാപനമായ യുഎസ് എയ്ഡിലും നൊബിലിയം സംഘം ആക്രമണം നടത്തിയിരുന്നു. ഇവക്കെല്ലാം പിന്നിൽ റഷ്യൻ ബന്ധം സംശയിക്കുന്നുണ്ട്. സംഭവത്തിൽ എഫ്ബിഐ അന്വേഷണം ആരംഭിച്ചു.

തിരുവനന്തപുരം :കേരളത്തിൽ തെക്കുപടിഞ്ഞാറൻ കാലവർഷം (ഇടവപ്പാതി )ഇന്ന് എത്തുമെന്ന പ്രവചനവുമായി കേന്ദ്ര കാലാവസ്ഥാ വകുപ്പ്.

എറണാകുളം,ഇടുക്കി,കോട്ടയം, ആലപ്പുഴ ജില്ലകളിൽ ശക്തമായ മഴയ്ക്ക് സാധ്യത ഉള്ളതിനാൽ ഇന്നും നാളെയും യെല്ലോ അലർട്ട് പ്രഖ്യാപിച്ചു. കേരള തീരത്ത് മത്സ്യബന്ധനത്തിനുള്ള നിയന്ത്രണങ്ങൾ പിൻവലിച്ചെങ്കിലും അറബിക്കടൽ ശക്തമായ കാറ്റിന് സാധ്യത ഉള്ളതിനാൽ മത്സ്യതൊഴിലാളികൾ ജാഗ്രത പാലിക്കണമെന്ന നിർദ്ദേശവുമുണ്ട്. മിനികോയ്,അഗത്തി, തിരുവനന്തപുരം,പുനലൂർ,കൊല്ലം, ആലപ്പുഴ,കോട്ടയം, കൊച്ചി, തൃശൂർ, കോഴിക്കോട്,തലശ്ശേരി, കണ്ണൂർ, കാസർകോഡ്,മലപ്പുറം എന്നീ 14 സ്ഥലങ്ങളിലെ 9 ഇടക്കെങ്കിലും തുടർച്ചയായ രണ്ട് ദിവസം 2.5 മില്ലി മീറ്റർ മഴ പെയ്യുന്നതാണ് കാലവർഷം എത്തിയതായി പ്രഖ്യാപിക്കാനുള്ള പ്രധാന മാനദണ്ഡങ്ങളിൽ ഒന്ന്.എന്നാൽ ഇന്നലെ വൈകിട്ട് വരെയും കേരളത്തിൽ വ്യാപകമായി മഴ ലഭിച്ചിട്ടില്ല.

തിരുവനന്തപുരം: കോവിഡ് വാക്സിൻ കേന്ദ്ര സർക്കാർ സൗജന്യവും സമയബന്ധിതമായി ജനങ്ങൾക്ക് ലഭ്യമാക്കണമെന്ന് ഏകകണ്ഠമായി ആവശ്യപ്പെട്ട് കേരള നിയമസഭ.

നിയമസഭ യോഗത്തിൽ മന്ത്രി വീണ ജോർജ് അവതരിപ്പിച്ച പ്രമേയത്തെ പ്രതിപക്ഷം പിന്തുണച്ചു.പൊതുമേഖല ഫാർമസ്യൂട്ടിക്കൽ കമ്പനികളിൽ നിർബന്ധിത ലൈസൻസ് വ്യവസ്ഥ പ്രയോജനപ്പെടുത്തിയുള്ള വാക്സിൻ വിതരണം കേന്ദ്രം പരിഗണിക്കണം. സംസ്ഥാനങ്ങൾ തനിച്ച് വാങ്ങുന്നതിലും ലാഭകരം ആഗോള ടെൻഡർ വഴി കേന്ദ്രം രാജ്യത്തിനാകെ വേണ്ട വാക്സിൻ വാങ്ങുന്നതാണ് എന്നും പ്രമേയത്തിൽ പറയുന്നു.

സംസ്ഥാനങ്ങളോട് കമ്പോളത്തിൽ മത്സരിക്കാൻ നിർദ്ദേശിക്കുന്നത് അങ്ങേയറ്റം പ്രതിഷേധാർഹമാണെന്ന് പ്രമേയം കുറ്റപ്പെടുത്തി. യോഗത്തിൽ പ്രതിപക്ഷ നേതാവ് വി.ഡി സതീശൻ രാജ്യത്തിൻറെ സൗകര്യങ്ങൾ ഉപയോഗപ്പെടുത്തുന്ന 2 സ്ഥാപനങ്ങൾക്ക് മാത്രം വാക്‌സീൻ നിർമിക്കുന്നതിനും,വില നിർണയിക്കുന്നതിനുമുള്ള അനുമതി നൽകി കേന്ദ്രം രാജ്യത്തെ വഞ്ചിച്ചെന്നും കുറ്റപ്പെടുത്തി.യോഗത്തിൽ പി.ടി തോമസും,എൻ ഷംസുദിനും ഭേദഗതികൾ നിർദ്ദേശിച്ചു.

കോവിഡ് വ്യാപന സമയത്തും ലോക്ഡൗണ്‍ കാലത്തും ചരക്ക് ഗതാഗതം നടത്തി ഭക്ഷ്യക്ഷാമം ഉണ്ടാകാതിരിക്കുന്നതില്‍ നിർണായക പങ്കുവഹിച്ച ഡ്രൈവര്‍മാര്‍ക്ക് മോട്ടോര്‍ വാഹന വകുപ്പിന്റെ സ്‌നേഹാദരം. കോവിഡിന് മുന്നില്‍ പതറാതെ നാടിന്റെ ഓരോ കോണിലും അവശ്യസാധനങ്ങള്‍ വിതരണം ചെയ്യുന്നതിന് മുന്നോട്ട് വന്ന ഡ്രൈവര്‍മാര്‍ക്ക് ഉച്ചഭക്ഷണ നല്‍കിയാണ് വകുപ്പ് ആദരമറിയിച്ചത്. തൃശൂര്‍ പാലിയേക്കര ടോള്‍ പ്ലാസയില്‍ ബുധനാഴ്ച ഉച്ചയ്ക്ക് ചരക്ക് വാഹനങ്ങളുടെ ഡ്രൈവര്‍മാര്‍ക്ക് ഉച്ചഭക്ഷണം നല്‍കി.

തൃശൂര്‍ റീജിയണല്‍ ട്രാന്‍സ്പോര്‍ട്ട് ഓഫീസര്‍ ബിജു ജെയിംസിന്റെ നിര്‍ദേശാനുസരണമായിരുന്നു തീരുമാനം. ഐ.സി.എല്‍ ഫിന്‍കോര്‍പ്പിന്റെ സഹകരണത്തോടെയാണ് ഉച്ചഭക്ഷണം നല്‍കിയത്. ചടങ്ങില്‍ ഹസാര്‍ഡസ് ഗുഡ്‌സ് വാഹനം ദീര്‍ഘദൂരം വര്‍ഷങ്ങളായി ഓടിക്കുന്ന വനിതയായ ഡെലീഷ ഡേവിസിന്റെ പ്രകടന മികവിന് തൃശൂര്‍ മോട്ടോര്‍ വാഹന വകുപ്പ് പ്രാശംസാഫലകം നല്‍കി ആദരിച്ചു.

തമിഴ്‌നാട് ഉള്‍പ്പെടെ കര്‍ണാടക, മഹാരാഷ്ട്ര, തെലുങ്കാന തുടങ്ങിയ അന്യസംസ്ഥാനങ്ങളില്‍ നിന്നുള്ള ചരക്ക് വാഹന ഡ്രൈവര്‍മാരുടെ സേവനമാണ് കോവിഡുകാലത്ത് കേരളത്തിന് തുണയായത്. യാത്രാ സമയങ്ങളില്‍ ഭക്ഷണം പോലും ലഭിക്കാന്‍ സാധ്യതയില്ലെന്ന് അറിഞ്ഞിട്ടും സേവന നിരതരായി പ്രവര്‍ത്തിച്ചുകൊണ്ടിരിക്കുകയാണ് ചരക്ക് വാഹനങ്ങൾ ഓടിക്കുന്ന തൊഴിലാളികള്‍.

തൃശൂര്‍ ആര്‍ ടി ഒ ബിജു ജെയിംസ്, എന്‍ഫോഴ്സ്‌മെന്റ് ആര്‍ ടി ഒ, എം പി. ജെയിംസ്, ഐ സി എല്‍ ഫിന്‍കോര്‍പ്പ് എം ഡി.കെ ജി. അനില്‍ കുമാര്‍, മോട്ടോര്‍ വെഹിക്കിള്‍സ് ഇന്‍സ്പെക്ടര്‍മാരായ വിനോദ് കുമാര്‍ എന്‍, റോഷന്‍ കെ, ഉണ്ണികൃഷ്ണന്‍ എം പി, ഫെനില്‍ ജെയിംസ്, ഓസ്‌കാര്‍ ഇവെന്റ്‌സ് ജനീഷ് തുടങ്ങയവര്‍ പരിപാടിക്ക് നേതൃത്വം നല്‍കി.

അവശരായ കാർഡുടമകൾക്ക് റേഷൻ വാങ്ങാൻ പകരക്കാരെ നിയോഗിക്കാൻ പൊതുവിതരണ വകുപ്പ് ഏർപ്പെടുത്തിയ പ്രോക്സി സമ്പ്രദായം കൂടുതൽ ലഘൂകരിക്കുന്നു. ഇതനുസരിച്ച് റേഷൻ വാങ്ങാൻ നേരിട്ട് കടകളിൽ എത്താൻ കഴിയാത്ത അവശരായ വ്യക്തികൾക്ക് കാർഡ് രജിസ്റ്റർ ചെയ്തിട്ടുള്ള റേഷൻകടയുടെ പരിധിയിൽ വരുന്ന, മറ്റൊരു വ്യക്തിയെ പകരക്കാരനായി റേഷൻ വാങ്ങുന്നതിന് ചുമതലപ്പെടുത്താം. കോവിഡ് മഹാമാരിയുടെ പശ്ചാത്തലത്തിൽ താലൂക്ക് സപ്ലൈ ഓഫീസിൽ നേരിട്ട് പോകാതെ ഫോൺ മുഖേനയോ ഇ-മെയിൽ സന്ദേശം വഴിയോ ഈ സംവിധാനം ഉപയോഗിക്കുന്നതിന് അപേക്ഷിക്കാം.

രോഗ പ്രതിരോധ നടപടിയുടെ ഭാഗമായി എല്ലാ റേഷൻ കാർഡ് ഉടമകൾക്കും ഭക്ഷ്യക്കിറ്റ് സൗജന്യമായി ഭക്ഷണം വിതരണം ചെയ്തുവരുന്നുണ്ട്. ഭക്ഷ്യക്കിറ്റ് താത്കാലികമായോ സ്ഥിരമായോ ആവശ്യമില്ലാത്ത കുടുംബങ്ങൾക്ക് ഈ വിവരം രേഖാമൂലം റേഷൻകടയിലോ താലൂക്ക് സപ്ലൈ ഓഫീസിലോ ജൂൺ മുപ്പതിന് മുൻപായി അറിയിക്കണമെന്ന് ജില്ലാ സപ്ലൈ ഓഫീസർ കെ അയ്യപ്പദാസ് അറിയിച്ചു.

ഞാൻ ആർഎസ്എസ് കാരെ കൊല്ലണമെന്ന് പറഞ്ഞിട്ടില്ല. എന്നാൽ മനുഷ്യത്വരഹിതമായ, ജനാധിപത്യ രഹിതമായ, മാനവരാശിക്കെതിരായ ഫാസിസ്റ്റ് ശക്തികളെ എന്നും എതിർക്കുമെന്ന കാര്യത്തിൽ മാറ്റമില്ലെന്നും മാല പാർവ്വതി. തൻ്റെ വാക്കുകൾ തെറ്റിദ്ധാരണ ഉണ്ടാക്കിയതിൽ താരം മാപ്പ് ചോദിക്കുന്നുണ്ട്.
മാല പാർവ്വതിയുടെ കുറിപ്പ് വായിക്കാം.

പ്രിയപ്പെട്ടവരെ.. ഒരു കാര്യം. ഞാൻ RSS കാരെ കൊല്ലണം എന്നൊരു ട്രോൾ കറങ്ങി നടക്കുന്നുണ്ട്. സംഘപരിവാർ അജണ്ടകളെ ശക്തമായി നേരിടണം എന്ന് പറയാറുണ്ട്. എതിർക്കണം എന്ന് പറയാറുണ്ട്.

എന്നാൽ “കൊല്ലണം ” എന്ന് പറയാറില്ല. പറയുകയുമില്ല. കാരണം അത് എൻ്റെ ഭാഷയല്ല. എൻ്റെ വാക്കുകൾ അങ്ങനെ തെറ്റിദ്ധാരണയുണ്ടാക്കിയിട്ടുണ്ടെങ്കിൽ നിരുപാധികം ക്ഷമ ചോദിക്കുന്നു.

എന്നാൽ മനുഷ്യത്വരഹിതമായ, ജനാധിപത്യ രഹിതമായ, മാനവരാശിക്കെതിരായ ഫാസിസ്റ്റ് ശക്തികളെ എന്നും എതിർക്കുമെന്ന കാര്യത്തിൽ മാറ്റവുമില്ല.

ന്യൂഡൽഹി :കേന്ദ്ര സർക്കാരിന്റെ വാക്‌സിൻ നയത്തിനെതിരെ വീണ്ടും പരോക്ഷമായി ആഞ്ഞടിച്ച് സുപ്രീംകോടതി.

‘എല്ലാവർക്കും വാക്സിൻ ലഭിക്കാൻ ദൈവത്തോട് പ്രാർത്ഥിക്കാം’ എന്നായിരുന്നു ഒരു കേസിൽ വാദം കേൾക്കവേ ജസ്റ്റിസ് ഡി.വൈ.ചന്ദ്രചൂഡിന്റെ പ്രതികരണം. ജാമ്യാപേക്ഷയിൽ വാദം കേൾക്കുമ്പോൾ അടുത്ത തവണയെങ്കിലും നേരിട്ടുള്ള വാദം കേൾക്കാൻ സാധിക്കട്ടെ എന്നും അതിനായി ദൈവത്തോട് പ്രാർത്ഥിക്കാമെന്നും അഭിഭാഷകൻ പറഞ്ഞതിന്റെ മറുപടിയായായിരുന്നു ജസ്റ്റിസ് ചന്ദ്രചൂഡിന്റെ പ്രതികരണം.

നിലവിൽ, കോവിഡ് സാഹചര്യത്തിന്റെ പശ്ചാത്തലത്തിൽ കഴിഞ്ഞ മാർച്ച് മുതൽ ഓൺലൈനായാണ് വാദം കേൾക്കുന്നത്. വാക്‌സിൻ കുത്തിവെപ്പ് പൂർത്തിയായെങ്കിലും മാത്രമേ തങ്ങൾക്ക് കോടതിയിൽ നേരിട്ടുള്ള വാദം ആരംഭിക്കാൻ കഴിയുമെന്നും അദ്ദേഹം പറഞ്ഞു.ഇതിനുമുൻപും കേന്ദ്ര സർക്കാരിൻറെ വാക്സിൻ നയവുമായി ബന്ധപ്പെട്ട് സുപ്രീം കോടതി സ്വമേധയാ എടുത്ത കേസിൽ കേന്ദ്രസർക്കാരിനെ രൂക്ഷമായി വിമർശിച്ച് ജസ്റ്റിസ് ചന്ദ്രചൂഡ് രംഗത്തെത്തിയിരുന്നു.

കൊച്ചി:ലക്ഷ്യദ്വീപിലെ കിൽത്താൻ ദ്വീപിൽ പ്രതിഷേധ സമരം നടത്തിയതിന് അറസ്റ്റിലായ 23 പേർക്ക് ജാമ്യം നൽകാതെ റിമാൻഡ് ചെയ്ത സംഭവത്തിൽ ഉടൻ റിപ്പോർട്ട് നൽകാൻ കിൽത്താൻ ദ്വീപിലെ എക്സിക്യൂട്ടീവ് മജിസ്ട്രേട്ടിനു നിർദേശം നൽകി ഹൈക്കോടതി.

കസ്റ്റഡിയിലെടുത്ത തീയതി, ചുമത്തിയ കുറ്റങ്ങൾ എന്നിവbഅടങ്ങുന്നതായിരിക്കണം റിപ്പോർട്ട്. കൂടാതെ കസ്റ്റഡിയിലെടുത്തവരുടെ ആരോഗ്യ അവസ്ഥ കിൽത്താൻ ദ്വീപ് മെഡിക്കൽ ഓഫീസർ പരിശോധിക്കണമെന്നും കോടതി നിർദ്ദേശിച്ചു. കളക്ടറുടെ വിവാദ പരാമർശങ്ങളിൽ പ്രതിഷേധിച്ച് കോലം കത്തിച്ചതിനായിരുന്നു അറസ്റ്റ്. റിമാൻഡിലായ ഇവരെ കിൽത്താനിലെ ഓഡിറ്റോറിയത്തിൽ തടവിൽ പാർപ്പിച്ചിരിക്കുകയായിരുന്നു.

ഇവരിൽ ഒരാൾക്ക് കോവിഡ് സ്ഥിരീകരിച്ചതിനെ തുടർന്ന് ആശുപത്രിയിൽ പ്രവേശിപ്പിച്ചിരുന്നു. പ്രതിഷേധ സമരം നടത്തിയവർക്ക് ജാമ്യം നൽകാമായിരുന്നിട്ടും ജയിലിലടച്ചെന്നും, ഇത് കോവിഡ് വ്യാപനത്തെ തുടർന്ന് സുപ്രീംകോടതി പുറപ്പെടുവിച്ച മാർഗ്ഗ നിർദ്ദേശങ്ങൾക്ക് വിരുദ്ധമാണെന്നും ചൂണ്ടിക്കാട്ടി ആന്ത്രോത്ത് ദ്വീപ് നിവാസി സയിദ് മുഹമ്മദ് കോയ നൽകിയ ഹർജിയിലാണ് ജസ്റ്റിസ് എ.മുഹമ്മദ് മുഷ്താക്,ജസ്റ്റിസ് ഡോ.കൗസർ എന്നിവരുൾപ്പെട്ട ഹൈക്കോടതി ഡിവിഷൻ ബെഞ്ച് പരിഗണിച്ചത്. ഹർജി ഇന്ന് വീണ്ടും പരിഗണിക്കും.

വെയ്ജിങ് : എച്ച്10 എൻ3 പക്ഷിപ്പനി മനുഷ്യനിലും സ്ഥിതീകരിച്ചു.കോഴികളിൽ നിന്ന് മനുഷ്യനിലേക്ക് പടരുന്ന ഈ ഇനം വൈറസ് ബാധ ചൈനയിലെ ജിയാങ്‌സു പ്രവിശ്യയിലുള്ള 41 കാരനിൽ ആണ് കണ്ടെത്തിയത്.

എന്നാൽ ഇയാളുമായി സമ്പർക്കം പുലർത്തിയ മറ്റാർക്കും വൈറസ് ബാധ ഇല്ല. വൈറസിന് തീവ്രത വളരെ കുറവായതിനാൽ പകർച്ചവ്യാധിയായി മാറാൻ സാധ്യത ഇല്ലെന്ന് ആശുപത്രി അധികൃതർ വ്യക്തമാക്കി. മെയ് 28നാണ് 41കാരന് രോഗം സ്ഥിരീകരിച്ചത്.എന്നാൽ രോഗം എങ്ങനെയാണ് ബാധിച്ചതെന്ന കാര്യത്തിൽ ഇതുവരെ നാഷണൽ ഹെൽത്ത് കമ്മീഷൻ ഒരു വിശദീകരണം നൽകിയിട്ടില്ല.

രോഗി സുഖം പ്രാപിക്കുന്നുവെന്നും ആശുപത്രിയിൽ നിന്ന് വിട്ട് അയക്കാവുന്ന സ്ഥിതിയാണെന്നും ആശുപത്രി അധികൃതർ വ്യക്തമാക്കി.
പലയിനം പക്ഷിപ്പനികൾ ചൈനയിൽ ഉണ്ട്. ചിലത് വേഗത്തിൽ പടർന്നവയാണ്. എന്നാൽ, ഇതാദ്യമായാണ് എച്ച് 10 എൻ 3 വൈറസ് ബാധ മനുഷ്യനിൽ സ്ഥിരീകരിക്കുന്നത്.