ദുബായ് :വൻ ശമ്പളം വാഗ്ദാനം ചെയ്ത് വിവിധ ഏജൻസികൾ നാട്ടിൽ നിന്നും കൊണ്ടുവന്ന നഴ്സുമാർ ജോലി ലഭിക്കാതെ വിവിധ ഇടങ്ങളിൽ കുടുങ്ങിയതായി പരാതി.വിവിധ ആശുപത്രിയുടെ പേര് പറഞ്ഞ് വീസയ്ക്കും മറ്റുമായി 2 ലക്ഷം മുതൽ 4 ലക്ഷം രൂപ വരെയാണ് തട്ടിയത്. തട്ടിപ്പിനിരയായവരുടെ കൃത്യമായ കണക്ക് ഇതുവരെ ലഭിച്ചിട്ടില്ല. പണം മടക്കി നല്കാൻ ഏജൻസിയുടെ മടിക്കുന്നതായും, ചിലരുടെ വീടുകളിലെത്തി ഭീഷണിപ്പെടുത്തിയതായും പരാതി ലഭിച്ചിട്ടുണ്ട്. സ്ത്രീകളും, പുരുഷന്മാരും ഉൾപ്പെടെ 42 പേരാണ് ഒരു കേന്ദ്രത്തിൽ കുടുങ്ങിക്കിടക്കുന്നത്. മാർച്ച് 9 നാണ് ഒരു സംഘമെത്തിയത്.

വിശ്വാസയോഗ്യമായ വിധമായിരുന്നു ഏജൻസികൾ പെരുമാറിയത്. രണ്ടുലക്ഷവും, നാല് ലക്ഷം രൂപവരെയും നൽകിയ ആർക്കും ഇതുവരെ ജോലി ലഭിച്ചിട്ടില്ല. നാട്ടിലെ ഏജൻസിയുമായി ബന്ധപ്പെട്ടപ്പോൾ കുറച്ചു പണം നൽകാമെന്ന് സമ്മതിച്ചിട്ടുണ്ട്.

കോവിഡ് വാക്സിനേഷൻ വ്യാപകമാക്കിയ നാളുകളിൽ യുഎഇ യിൽ കൂടുതൽ നഴ്സുമാരെ ആവശ്യമുണ്ടായിരുന്നു സാഹചര്യം മുതലാക്കിയാണ് ഏജൻസിയുടെ ഈ തട്ടിപ്പ്. പ്രതിമാസം 5,000 ദിർഹം (ഒരു ലക്ഷം രൂപ) 500 ദിർഹം അലവൻസ്, ഭക്ഷണം, താമസം, യാത്ര എന്നിവ സൗജന്യം എന്നിങ്ങനെയായിരുന്നു വാഗ്ദാനം.3,80,000 രൂപയാണ് ഇതിനായി ഓരോരുത്തരോടും ആവശ്യപ്പെട്ടത്. ജോലി കാര്യം ശരിയാകാതെ വന്നപ്പോൾ സംശയം തോന്നുകയും, നഴ്സുമാർ ബഹളം വയ്ക്കുകയും ചെയ്തതോടെ ഏജൻറ് മാർ ബാക്കി പണം ആവശ്യപ്പെട്ട് മാനസികമായി പീഡിപ്പിച്ചു.പിന്നീട് ഇത്തരത്തിൽ എത്തിയ പലരും സ്വന്തം നിലയിൽ ജോലി കണ്ടെത്തുകയായിരുന്നു. ഇവരുടെ അവസ്ഥ അറിഞ്ഞ് ചില ആശുപത്രികൾ ജോലി നൽകാൻ മുന്നോട്ടു വന്നിട്ടുള്ളതായും അറിയുന്നു.

മടങ്ങിപ്പോകാൻ ആഗ്രഹിക്കുന്നവരെ സഹായിക്കും; കോൺസുലേറ്റ്. നഴ്സുമാരുടെ വിഷയത്തിൽ ദുബായ് ഇന്ത്യൻ കോൺസുലേറ്റ് ഇടപെടുന്നുണ്ടെന്ന് കോൺസൽ ജനറൽ ഡോക്ടർ അമൻ പൂരി അറിയിച്ചു.നഴ്സിംഗ് ജോലിക്കായി ഇവിടെ എത്തിയവരിൽ മടങ്ങി വരാൻ ആഗ്രഹിക്കുന്നവരെ നാട്ടിലെത്തിക്കാൻ വേണ്ട നടപടികൾ സ്വീകരിക്കുമെന്നും അദ്ദേഹം വ്യക്തമാക്കി. അതേസമയം, നഴ്സുമാരുടെ വിഷയത്തിൽ അടിയന്തര ഇടപെടലുകൾ നടത്തിയതായും,
വേണ്ട നടപടികൾ പൂർത്തിയാക്കിയതായും നോർക്ക അറിയിച്ചു

ചേർത്തല : സംസ്ഥാനത്ത് കമ്മ്യൂണിസ്റ്റ് മുഖ്യമന്ത്രിമാരുടെ
സത്യപ്രതിജ്ഞക്ക്‌ മുന്നോടിയായി വയലാർ രക്തസാക്ഷി മണ്ഡപത്തിൽ പുഷ്പചക്രം സമർപ്പിക്കുന്നതിനായി നാളെ രാവിലെ 8 ന് മുഖ്യമന്ത്രി പിണറായി വിജയനും,സിപിഎം, സിപിഐ മന്ത്രിമാരും വയലാർ രക്തസാക്ഷി മണ്ഡപത്തിൽ
എത്തി പുഷ്പചക്രം സമർപ്പിക്കും.

സംസ്ഥാനത്തെ കമ്മ്യൂണിസ്റ്റ് മന്ത്രിസഭകൾ അധികാരം ഏൽക്കുന്നതിന് മുന്നോടിയായി മുഖ്യമന്ത്രി അടക്കമുള്ള മന്ത്രിമാർ വയലാർ രക്തസാക്ഷി മണ്ഡപത്തിൽ എത്തി പുഷ്പചക്രം സമർപ്പിക്കുക പതിവാണ്. വയലാർ മണ്ഡപത്തിൽ പന്തൽ സ്ഥാപിക്കൽ തുടങ്ങി.

വലിയചുടുകാട് രക്തസാക്ഷി മണ്ഡപത്തിലും പുഷ്പാർച്ചന നടത്തിയ ശേഷമായിരിക്കും സത്യപ്രതിജ്ഞക്കായി തിരുവനന്തപുരത്തേക്ക് പോവുക എന്ന് സിപിഎം ജില്ലാ സെക്രട്ടറി ആർ. നാസർ അറിയിച്ചു.

ദുബായ് :ദുബായിൽ നടക്കുന്ന എക്സ്പോ 2020 ന് മുന്നോടിയായി നിലവിലുള്ള കോവിഡ് 19 നിയന്ത്രണങ്ങളും, നിരോധനങ്ങളും നീക്കം ചെയ്യാൻ ഒരുങ്ങി ദുബായ്. ഇന്ത്യയിൽ നിന്നുള്ള യാത്ര നിരോധനവും ഇതിലുൾപ്പെടുമെങ്കിലും ഇന്ത്യയിലെ കോവിഡ് സാഹചര്യങ്ങളും, നിയന്ത്രണങ്ങളും വിലയിരുത്തി ആയിരിക്കും തീരുമാനം.

2021 ഒക്ടോബർ 1 മുതൽ 2022 മാർച്ച് 31 വരെയാണ് ലോകരാജ്യങ്ങൾ പങ്കെടുക്കുന്ന എക്സ്പോ നടക്കുന്നത്. 2020 ൽ നടക്കേണ്ടിയിരുന്ന മേള കോവിഡ് വ്യാപനത്തെ തുടർന്ന് മാറ്റിവയ്ക്കുകയായിരുന്നു.താരതമ്യേന കുറഞ്ഞ കോവിഡ് കേസുകളാണ് യുഎഇയിൽ ഇപ്പോൾ രേഖപ്പെടുത്തിയിട്ടുള്ളത്.അതേസമയം ദുബായിലെ വിനോദസഞ്ചാരമേഖല പതിയെ തിരിച്ചു വരികയാണെന്ന് റിപ്പോർട്ടുകൾ സൂചിപ്പിക്കുന്നു.

സന്ദർശക വിസക്കാരും, വിസ റദ്ദാക്കി മടങ്ങിവരും മാത്രമാണ് ഇപ്പോൾ യാത്ര ചെയ്യുന്നവരിൽ ഭൂരിഭാഗവും. യുഎയിലേക്ക് വരാൻ തയ്യാറെടുക്കുന്ന ഒട്ടേറെ കുടുംബങ്ങൾ കേരളത്തിലുമുണ്ട്. വലിയ സാമ്പത്തിക നഷ്ടമാണ് ഇവരിൽ പലർക്കും സംഭവിച്ചുകൊണ്ടിരിക്കുന്നത്.എങ്കിലും, സന്ദർശന വീസ യുടെയും, താമസ വീസയുടെ കാലാവധി യുഎഇ ഗവൺമെൻറ് നീട്ടുമെന്ന പ്രതീക്ഷയിലാണ്
ഏവരും.

ദില്ലി :രാജ്യത്ത് പ്രതിദിന കോവിഡ് ബാധിതരുടെ എണ്ണം മൂന്നു ലക്ഷത്തിന് താഴെ തന്നെ തുടരുന്നു. ചൊവ്വാഴ്ച രാത്രി ഒമ്പത് വരെയുള്ള കണക്കനുസരിച്ച് 2,62,829 പേർക്കാണ് പുതുതായി രോഗം സ്ഥിരീകരിച്ചത്. 3,841 മരണവും രേഖപ്പെടുത്തി. മുപ്പതിനായിരത്തിന് മുകളിലാണ് പ്രതി ദിന രോഗികളുടെ തമിഴ്നാട്,കേരളം, കർണാടകം തുടങ്ങിയ സംസ്ഥാനങ്ങളിലെ എണ്ണം.

ആകെ ജനസംഖ്യയുടെ 1.8 ശതമാനം പേർ മാത്രമാണ് നിലവിൽ കോവിഡ് ബാധിതരായി ചികിത്സയിലുള്ളത്. കേരളത്തിലടക്കം ഏർപ്പെടുത്തിയ നിയന്ത്രണങ്ങൾ കോവിഡ് ക കേസുകൾ കുറയാൻ കാരണമായിട്ടുണ്ടെന്ന് മന്ത്രാലയം ചൂണ്ടിക്കാട്ടുന്നു. മരണനിരക്കിൽ മഹാരാഷ്ട്രയാണ് മുന്നിൽ.ഇതിനിടെ, രണ്ടോ മൂന്നോ മാസം കൊണ്ട് രാജ്യത്ത് വാക്സിനേഷൻ പൂർത്തിയാക്കാൻ ആകില്ലെന്ന് സിറം ഇൻസ്റ്റിറ്റ്യൂട്ട് വ്യക്തമാക്കി.

നിരവധി വെല്ലുവിളികൾ മുൻപിൽ ഉണ്ട്.എങ്കിലും, രാജ്യത്തെ അവഗണിച്ച് വാക്സിൻ കയറ്റുമതി നടത്തില്ലെന്നും സിറം ഇൻസ്റ്റിറ്റ്യൂട്ട് അറിയിച്ചു. സംസ്ഥാനങ്ങളിലെ കോവിഡ് വ്യാപന തോത് പൊതുവെ കുറവുണ്ടെന്നും ആരോഗ്യ മന്ത്രാലയം വ്യക്തമാക്കി.

ചെറുതോണി: ഇസ്രായേൽ- പലസ്തീൻ റോക്കറ്റ് ആക്രമണത്തിൽ കൊല്ലപ്പെട്ട ഇടുക്കി കീരിത്തോട് കാഞ്ഞിരന്താനത്ത് സൗമ്യയുടെ ഭർത്താവ് സന്തോഷിനെ ഇസ്രായേൽ പ്രസിഡൻറ് റൂവൻ റിവ്‌ലിൻ ടെലിഫോണിൽ വിളിച്ച് സൗമ്യയുടെ മരണത്തിൽ അനുശോചനം അറിയിച്ചു. കോൺസുലേറ്റ് ജനറൽ ജോനാദൻ സഡ്കയും സംഭാഷണത്തിൽ പങ്കുചേർന്നു.നയതന്ത്ര കാര്യാലയത്തിലെ മലയാളി ഉദ്യോഗസ്ഥന്റെ സഹായത്തോടെ ഇരുവരുടെയും സംസാരം തർജ്ജമ ചെയ്തായിരുന്നു സംഭാഷണം.

15 മിനിറ്റ് നീണ്ടുനിന്ന സംഭാഷണത്തിൽ സൗമ്യ മരിച്ച സ്ഥലം കാണണമെന്ന് ആഗ്രഹം പ്രകടിപ്പിച്ച സന്തോഷിനോട് എപ്പോൾ വേണമെങ്കിലും അതിനുള്ള സൗകര്യം ഒരുക്കാം എന്ന് പ്രസിഡൻറ് അറിയിക്കുകയും ഇവിടെ എത്തുമ്പോൾ നേരിൽ കാണാം എന്ന ഉറപ്പ് നൽകിയതായും കുടുംബാംഗങ്ങൾ വ്യക്തമാക്കി. സന്തോഷിനോടും, മകൻ അഡോണിനോടും,മറ്റു കുടുംബാംഗങ്ങളോടും ഇസ്രയേലിലെ മുഴുവൻ ജനതയുടെയും അനുശോചനം അറിയിച്ച പ്രസിഡന്റ്‌, കുടുംബത്തെ സംരക്ഷിക്കുമെന്ന ഉറപ്പും നൽകി.