ദുബായ് വാച്ച് വീക്കിൽ പങ്കെടുക്കുന്നതിനിടെ തന്റെ പ്രിയപ്പെട്ട വാച്ച് ഏതെന്ന് വെളിപ്പെടുത്തി നടൻ ധനുഷ്. 100 രൂപയിൽ താഴെയുള്ള ഒരു വാച്ചിനെക്കുറിച്ചാണ് ധനുഷ് പറഞ്ഞത്. വാച്ചുകളോടുള്ള ഇഷ്ടത്തിന് പ്രചോദനമായ വാച്ച് ബ്രാൻഡ് ഏതാണെന്ന ചോദ്യത്തിനോട് പ്രതികരിക്കുകയായിരുന്നു താരം. ഒരു സൂപ്പർതാരമായതുകൊണ്ട്, വിലകൂടിയ ഒരു ബ്രാൻഡിന്റെ പേര് പറയുമെന്ന് പ്രതീക്ഷിച്ചിടത്തായിരുന്നു ഏവരേയും ഞെട്ടിച്ചുകൊണ്ട് ധനുഷിന്റെ മറുപടി.

തനിക്ക് ആദ്യമായി ഇഷ്ടം തോന്നിയ വാച്ച്, താൻ സ്കൂളിൽ പഠിക്കുമ്പോൾ അമ്മ വാങ്ങിത്തന്ന ഒന്നായിരുന്നുവെന്ന് ധനുഷ് പറഞ്ഞു. അതിന് നൂറുരൂപയിൽ താഴെയാണ് വില. പേരൊന്നുമില്ല, പ്ലാസ്റ്റിക്കിന്റേതാണ്, ഡിജിറ്റലാണ്, സമയം മാത്രം കാണിക്കും. അതിൽ ഒരു ലൈറ്റുണ്ടായിരുന്നുവെന്നും ധനുഷ് പറഞ്ഞു.

“ഞാൻ വളരെ സാധാരണമായ ഒരു പശ്ചാത്തലത്തിൽ നിന്നാണ് വരുന്നത്. അതിനാൽ ബാറ്ററി തീർന്നാൽ വാച്ചിന്റെ ഉപയോഗം കഴിയും. അത് പല നിറങ്ങളിൽ ഉണ്ടായിരുന്നു. എന്റെ സഹോദരിമാരും ഞാനും വയലറ്റ്, മഞ്ഞ, പച്ച നിറങ്ങളിൽ നിന്ന് തിരഞ്ഞെടുത്തു… അത് വളരെ തിളക്കമുള്ളതും ആകർഷകവുമായിരുന്നു. ബാറ്ററി തീർന്നാലും ഞാൻ ആ വാച്ച് കെട്ടി സ്കൂളിൽ പോകുമായിരുന്നു. അത് സമയം കാണിക്കുന്നത് നിർത്തിയിട്ടും ഞാൻ അത് ധരിക്കുമായിരുന്നു. എനിക്ക് ആ വാച്ചിനോട് ശരിക്കും പ്രണയമായിരുന്നു,” അമ്മ നൽകിയ ആ പ്രത്യേക വാച്ചിനെ താൻ എത്രമാത്രം സ്നേഹിച്ചിരുന്നുവെന്ന് ഓർത്തെടുത്തുകൊണ്ട് ധനുഷ് കൂട്ടിച്ചേർത്തു.

പ്രവർത്തിക്കുന്നില്ലെങ്കിലും ആ വാച്ച് ഇപ്പോഴും തന്റെ വീട്ടിൽ ഒരു പെട്ടിയിൽ ഭദ്രമായി സൂക്ഷിച്ചുവെച്ചിട്ടുണ്ടെന്നും ധനുഷ് പറഞ്ഞു.

കൃതി സനോൺ നായികയായി എത്തുന്ന ‘തേരെ ഇഷ്ക് മേം’ എന്ന ചിത്രമാണ് ധനുഷിന്റേതായി റിലീസിന് തയ്യാറെടുക്കുന്നത്. ആനന്ദ് എൽ റായി സംവിധാനം ചെയ്യുന്ന നവംബർ 28-ന് തിയേറ്ററുകളിൽ എത്തും. ‘ഡിഎസ് 54’ എന്ന് താൽക്കാലികമായി പേരിട്ടിരിക്കുന്ന മറ്റൊരു പ്രോജക്റ്റും അദ്ദേഹത്തിന്റേതായി അണിയറയിലുണ്ട്, അതിന്റെ റിലീസ് തീയതി ഇതുവരെ പ്രഖ്യാപിച്ചിട്ടില്ല. ‘ഇഡ്‌ലി കടൈ’ ആയിരുന്നു അദ്ദേഹം അവസാനമായി സംവിധാനം ചെയ്ത ചിത്രം.

തൈക്കുടം ബ്രിഡ്ജ് എന്ന പ്രമുഖ സംഗീത ബാൻഡിലൂടെ ആരാധകർക്ക് സുപരിചിതനായ  ഗായകനാണ് സിദ്ധാർഥ് മേനോൻ. നടനെന്ന രീതിയിലും ശ്രദ്ധ നേടിയുള്ള വ്യക്തിത്വമാണ് സിദ്ധാർത്ഥ്. കുറച്ചുകാലമായി സ്റ്റേജ് ഷോകളിൽ നിന്നും വിട്ടുനിൽക്കുകയായിരുന്നു താരം. ഇപ്പോഴിതാ, ആ വിട്ടുനിൽക്കലിനു പിന്നിൽ ആരോഗ്യപ്രശ്നങ്ങളായിരുന്നുവെന്ന് തുറന്നു പറയുകയാണ് താരം.

ഒരു ശസ്ത്രക്രിയയ്ക്ക് താൻ വിധേയനായെന്നും കഠിനമായ ഈ ഘട്ടം താണ്ടി എത്രയും പെട്ടെന്ന് താൻ തിരികെ വരുമെന്നും നടൻ കുറിച്ചു. ഹോസ്പിറ്റലിൽ ബെഡിൽ നിന്നുള്ള ചിത്രങ്ങൾ പങ്കുവച്ചുകൊണ്ടാണ് സിദ്ധാർത്ഥിന്റെ കുറിപ്പ്. 

“എന്താണ് സംഭവിച്ചതെന്ന് ചോദിച്ച എല്ലാവർക്കും…
എനിക്ക് ഒരു ഡിസ്റ്റൽ ബൈസെപ്‌സ് ടെൻഡൻ റപ്ചർ സംഭവിച്ചു, അതുകൊണ്ടാണ് ഞാൻ കളിക്കളത്തിൽ നിന്നും സ്റ്റേജിൽ നിന്നും വിട്ടുനിന്നത്…
ഇന്ന്, നിങ്ങളുടെ എല്ലാവരുടെയും സ്നേഹവും പ്രാർത്ഥനകളും കൊണ്ട്, എൻ്റെ ശസ്ത്രക്രിയ വിജയകരമായി പൂർത്തിയായി. എനിക്ക് ലഭിച്ച എല്ലാ സന്ദേശങ്ങൾക്കും, എല്ലാ കോളുകൾക്കും, എല്ലാ അനുഗ്രഹങ്ങൾക്കും ഞാൻ അങ്ങേയറ്റം നന്ദിയുള്ളവനാണ്. 

ഈ ഘട്ടം കഠിനമാണ്, പക്ഷേ ഞാൻ അതിനേക്കാൾ കടുപ്പക്കാരനാണ്.  നിങ്ങളുടെ എല്ലാവരുടെയും പിന്തുണയോടെ ഞാൻ വളരെ പെട്ടെന്ന് തന്നെ തിരിച്ചു വരുമെന്ന് എനിക്കറിയാം… കൂടുതൽ ശക്തനായും ആരോഗ്യവാനായും, കൂടുതൽ സ്നേഹത്തോടെയും.എന്നെ നിങ്ങളുടെ പ്രാർത്ഥനകളിൽ ഓർക്കണം. നിങ്ങളെ എല്ലാവരെയും സ്നേഹിക്കുന്നു,” സിദ്ധാർത്ഥ് കുറിച്ചു. 

അശ്വതി: കൃഷി ലാഭകരമാകും. വക്കീലന്മാർ, ഡോക്ടർമാർ എന്നിവർക്ക് നല്ല സമയം. സാമൂഹിക സാംസ്‌കാരിക രംഗങ്ങളിൽ പ്രവർത്തിക്കുന്നവർക്ക് പണവും പ്രശസ്തിയുമുണ്ടാകും. ക്രയ വിക്രയങ്ങൾ ലാഭകരമാകും. ഭാഗ്യദിനം ചൊവ്വ
ഭരണി: മേലധികാരികളിൽ നിന്ന് ഗുണമുണ്ടാകും. നിയമജ്ഞന്മാർക്ക് നല്ല സമയം. കൂട്ടുകാരുമൊത്ത് ഉല്ലാസയാത്രകൾ സംഘടിപ്പിക്കും. പുണ്യക്ഷേത്രങ്ങൾ സന്ദർശിക്കും. കലാപരമായി ബന്ധപ്പെട്ടവർക്ക് സമയം അനുകൂലം. ഭാഗ്യദിനം വെള്ളി
കാർത്തിക: ദാമ്പത്യസുഖം, സന്താനഗുണം എന്നിവയുണ്ടാകും. നിർമ്മാണം മുടങ്ങിയിരിക്കുന്ന ഗൃഹത്തിന്റെ പണി പുനരാരംഭിക്കും. പൂർവികസ്വത്ത് അധീനതയിലാകും. ഉന്നതവ്യക്തികളുമായി ബന്ധപ്പെടാനവസരം. ഭാഗ്യദിനം ബുധൻ

രോഹിണി: മൊത്തക്കച്ചവടം നടത്തുന്നവർക്ക് സമയം അനുകൂലമാണ്. സഹോദരന്മാരിൽ നിന്ന് സഹായങ്ങൾ പ്രതീക്ഷിക്കാം. സാഹിത്യാദി കാര്യങ്ങളിൽ ഏർപ്പെടുന്നവർക്ക് പണവും പ്രശസ്തിയുമുണ്ടാകും. ഭാഗ്യദിനം വ്യാഴം

മകയിരം: പ്രതിയോഗികളെ പരാജയപ്പെടുത്തി കോൺട്രാക്ടുകൾ ഏറ്റെടുക്കും. ട്രസ്റ്റുകളിലേക്കും മറ്റും നേതൃസ്ഥാനത്തേക്ക് ഉയർത്തപ്പെടും. ഭൂമിയോ വീടോ വാങ്ങാനവസരം. കൃഷിവകയിലും വാടകയിനത്തിലും കൂടുതൽ നേട്ടം. ഭാഗ്യദിനം ശനി
തിരുവാതിര: ഊഹക്കച്ചവടത്തിൽ നല്ല ആദായമുണ്ടാകും. ചില പ്രധാന കാര്യങ്ങളിൽ മദ്ധ്യസ്ഥം വഹിക്കും. പൊതുജനങ്ങളുടെ ആദരവിന് പാത്രമാകും. സന്താനങ്ങളുടെ കാര്യങ്ങളിൽ കൂടുതൽ ശ്രദ്ധചെലുത്തും. ബാങ്കിങ്ങുമായി ബന്ധപ്പെട്ടവർക്ക് നല്ല സമയം. ഭാഗ്യദിനം തിങ്കൾ
പുണർതം: പുതിയ വ്യവസായശാലകൾ ആരംഭിക്കും. വിദ്യാഭ്യാസരംഗത്ത് പുരോഗതി. മുന്നിട്ടിറങ്ങിയ കാര്യങ്ങളിൽ തടസമുണ്ടായാൽ പോലും പൂർത്തീകരിക്കും. പ്രതീക്ഷിക്കുന്ന കേന്ദ്രങ്ങളിൽ നിന്ന് ധനാഗമമുണ്ടാകും.ഭാഗ്യദിനം വെള്ളി
പൂയം: പൂർത്തിയാകാത്ത സംഗതികൾ മുഴുമിക്കാൻ സാധിക്കും. അവനവന്റെ പ്രവർത്തനത്തിൽ അഭിമാനവും ആത്മവിശ്വാസവും പ്രദർശിപ്പിക്കും. അദ്ധ്യാപക നിയമനം പ്രതീക്ഷിക്കുന്നവർക്ക് ആഗ്രഹം സാധിക്കും. ഭാഗ്യദിനം ബുധൻ

ആയില്യം: സർക്കാർ ജോലി ലഭിക്കും. ചില പുരസ്‌കാരങ്ങളോ പ്രശംസാപാത്രങ്ങളോ കിട്ടിയെന്നു വരാം. പട്ടാളം പൊലീസ് വിഭാഗങ്ങളിലുള്ളവർക്ക് പ്രമോഷൻ പ്രതീക്ഷിക്കാം. ശത്രുക്കളുടെ പ്രവർത്തനങ്ങളെ പരാജയപ്പെടുത്താൻ കഴിയും. ഭാഗ്യദിനം ശനി
മകം: പ്രവർത്തനരംഗത്ത് അധികാര സ്വഭാവം പ്രദർശിപ്പിക്കും. പരീക്ഷകൾക്കും മറ്റും വേണ്ടി യാത്ര ആവശ്യമായി വന്നേക്കും. ഊഹക്കച്ചവടത്തിൽ നിന്ന് ആദായം ലഭിക്കും. വിലപ്പെട്ട ഗൃഹോപകരണങ്ങൾ വാങ്ങും. ഭാഗ്യദിനം ചൊവ്വ
പൂരം: സിനിമാ, നാടകം തുടങ്ങിയ കലാവിശേഷങ്ങളുമായി ബന്ധപ്പെട്ടവർക്ക് അനുകൂലസമയമാണ്. ബിസിനസിൽ പുരോഗതി. പ്രമോഷന് കാലതാമസം നേരിടും. പല പ്രശ്നങ്ങളും മദ്ധ്യസ്ഥം മുഖേന പരിഹരിക്കും. ഭാഗ്യദിനം വ്യാഴം
ഉത്രം: പുതിയ ചില വ്യാപാര ശ്രമങ്ങളിൽ ഏർപ്പെട്ടേക്കും. ഏർപ്പെട്ട കാര്യങ്ങൾ എത്രമേൽ ബുദ്ധിമുട്ടിയാലും പൂർത്തീകരിക്കുന്നത് കാണാം. നിർമ്മാണപ്രവർത്തനങ്ങൾ ഏറ്റെടുക്കുകയോ അത്തരം കരാറുകൾ നിർവഹിക്കുകയോ ചെയ്യും. ഭാഗ്യദിനം ശനി

അത്തം: യുവജനങ്ങളുടെ വിവാഹം നടക്കും. ഭൂമി വാങ്ങാനുദ്ദേശിക്കുന്നവർക്ക് ആഗ്രഹം സാധിക്കും. സന്താനങ്ങൾക്ക് ശ്രേയസ് വർദ്ധിക്കും. ഷെയറുകളിൽ പണം മുടക്കാനും ബാങ്കിംഗ് ഏർപ്പാടുകളുമായി ബന്ധപ്പെടാനും ഇടയുണ്ട്. ഭാഗ്യദിനം തിങ്കൾ
ചിത്തിര: എല്ലാരംഗങ്ങളിലും ഊർജ്ജസ്വലതയും കാര്യശേഷിയും പ്രദർശിപ്പിക്കും. വീടിനോ വാഹനങ്ങൾക്കോ റിപ്പയർ വേണ്ടി വന്നേക്കും. ചെറുയാത്രകൾ സുഖകരവും പ്രയോജനകരവുമായിരിക്കും. കിട്ടാനുള്ള പണം കൈവശം വന്നുചേരും.ഭാഗ്യദിനം ബുധൻ
ചോതി: ജീവിതശൈലിയിൽ തന്നെ ചില മാറ്റങ്ങൾ വരുത്തും. തൊഴിൽരഹിതർക്ക് ജോലിയിൽ പ്രവേശിക്കാൻ അവസരം. കലാകാരന്മാർക്കും വളരെനല്ല സമയം. കുടുംബത്തിൽ സുഖവും സമാധാനവും നിലനിൽക്കും പുതുതായി ജോലിയിൽ പ്രവേശിക്കും. ഭാഗ്യദിനം ശനി
വിശാഖം: പുതിയ വാണിജ്യശ്രമങ്ങളിൽ ഏർപ്പെടും. ശത്രുക്കളുടെ മേൽ വിജയം കൈവരിക്കും. വാഹനങ്ങളിൽ നിന്ന് ആദായം ലഭിക്കും. ചെയ്യുന്ന ജോലിയിൽ സ്ഥലം മാറ്റമുണ്ടാകും. പുസ്തക നിർമ്മാണം ചെയ്യുന്നവർക്ക് നല്ല ആദായം പ്രതീക്ഷിക്കാം. ഭാഗ്യദിനം വെള്ളി

അനിഴം: ഔദ്യോഗികമായി സ്ഥാനകയറ്റവും ഉദ്ദേശിച്ച സ്ഥലത്തേക്ക് സ്ഥലമാറ്റവും പ്രതീക്ഷിക്കാം. പൊതുചടങ്ങിൽ സംബന്ധിക്കും. ഈശ്വരാരാധന കൊണ്ട് മനസ്സിന്റെ അസ്വസ്ഥത കുറയും. തെരഞ്ഞുടുപ്പിലും മത്സരങ്ങളിലും വിജയിക്കും. ഭാഗ്യദിനം വ്യാഴം
തൃക്കേട്ട: സാമ്പത്തികമായി ഉയർച്ചയും ശാരീരികമായ സുഖവും അനുഭവപ്പെടും. കച്ചവടത്തിൽ പാർട്ണർമാർ വിശ്വസ്തതയോടെയും അനുകൂലഭാവത്തിലും പെരുമാറും. തറവാട് വക ഭൂമി ഭാഗിച്ചുകിട്ടും. അനാവശ്യചിന്തകൾ മനസിനെ അലട്ടികൊണ്ടിരിക്കും. ഭാഗ്യദിനം വ്യാഴം
മൂലം: ഭൂമിയോ വിലപിടിപ്പുള്ള വസ്തുക്കളോ വാങ്ങും. ജോലിയിൽ സ്ഥിരീകരണമോ പ്രമോഷനോ ലഭിക്കും. ലോട്ടറികളിലും മറ്റും ഭാഗ്യം പരീക്ഷിച്ചുനോക്കാവുന്നതാണ്. എല്ലാ രംഗങ്ങളിലും കൂടുതൽ കാര്യക്ഷമതയോടെ പ്രവർത്തിക്കും. ഭാഗ്യദിനം ശനി
പൂരാടം: ഉന്നതരായ വ്യക്തികളുമായി ബന്ധപ്പെടാൻ അവസരം. മതപരമായ കാര്യങ്ങളിൽ കൂടുതൽ ശ്രദ്ധ ചെലുത്തും. വിദ്യാഭ്യാസ പുരോഗതിയിലും ശാരീരിക സൗന്ദര്യത്തിലും കുടുതൽ ശ്രദ്ധ ചെലുത്തും. വീട്ടിൽ എല്ലാവിധ ഐശ്വര്യവും നിലനിൽക്കും. ഭാഗ്യദിനം ചൊവ്വ

ഉത്രാടം: ഇടപെടുന്ന എല്ലാകാര്യങ്ങളിലും വിജയം കൈവരിക്കും. വ്യവസായത്തിലൂടെ ധനാഗമമുണ്ടാകും. സർക്കാരിൽ നിന്ന് ലോണുകളോ അതുപോലുള്ള മറ്റു സാമ്പത്തിക ലോണുകളോ ലഭിക്കും. ഉന്നതവ്യക്തികളുമായി സമ്പർക്കം പുലർത്തും. ഭാഗ്യദിനം വ്യാഴം
തിരുവോണം: ശാരീരികവും മാനസികവുമായി ചൈതന്യവും ആനന്ദവും വർദ്ധിക്കും. തൊഴിൽ സംബന്ധമായി ചില പ്രശ്നങ്ങളുണ്ടാകും. ഭൂസ്വത്തുക്കൾ മുഖേന പണപരമായ നേട്ടങ്ങൾ ഉണ്ടാകും. സാഹിത്യാദി കലകളിൽ കൂടുതൽ താത്പര്യം കാണിക്കും. ഭാഗ്യദിനം ഞായർ
അവിട്ടം: ആഢംബരവസ്തുക്കളുടെ വ്യാപാരത്തിലൂടെ ആദായം ലഭിക്കും. പരസ്യങ്ങൾ മുഖേന കൂടുതൽ വരുമാനമുണ്ടാകും. മറ്റുള്ളവരുടെ ജോലികൾ സ്വയം ഏറ്റെടുത്ത് പൂർത്തിയാക്കും. യുവജനങ്ങളുടെ വിവാഹകാര്യം തീരുമാനമാകും. ഭാഗ്യദിനം ബുധൻ
ചതയം: വിദ്യാഭ്യാസ കാര്യങ്ങളിലും സാംസ്‌കാരിക കാര്യങ്ങളിലും കൂടുതൽ ശ്രദ്ധ ചെലുത്തും.യന്ത്രങ്ങളുമായി ബന്ധപ്പെട്ട എല്ലാ കാര്യങ്ങളിലും നേട്ടമുണ്ടാകും. ലോണുകളോ മറ്റു ക്രെഡിറ്റ് സൗകര്യങ്ങളോ എളുപ്പത്തിൽ ലഭ്യമാകും. ഭാഗ്യദിനം വെള്ളി

പൂരുരുട്ടാതി: പുതിയ ജോലിയിൽ പ്രവേശിക്കാൻ അവസരം. പട്ടാളം പൊലീസ് വിഭാഗങ്ങളിലുള്ളവർക്ക് പ്രമോഷനുണ്ടാകും. പുണ്യസ്ഥലങ്ങൾ സന്ദർശിക്കും. മുമ്പുണ്ടായിരുന്ന ക്ലേശങ്ങൾ മാറി മനസമാധാനവും ശ്രേയസും അനുഭവപ്പെടും. ഭാഗ്യദിനം ചൊവ്വ
ഉത്രട്ടാതി: ചെയ്തുവരുന്ന പല കാര്യങ്ങളും വേണ്ടെന്നു വയ്ക്കാനുള്ള പ്രവണതയുണ്ടാകും. ഏർപ്പെടുന്ന കാര്യങ്ങളിൽ വിജയമുണ്ടാകും. സന്താനങ്ങളുടെ വിവാഹം നടക്കും. ഡിഫൻസ് ഡിപ്പാർട്ട്‌മെന്റിൽ ജോലിക്ക് ശ്രമിക്കുന്നവർക്ക് ആഗ്രഹം സാധിക്കും. ഭാഗ്യദിനം വ്യാഴം
രേവതി: താത്കാലികാടിസ്ഥാനത്തിൽ സർക്കാർ ജോലി ലഭിക്കും. അന്യരിൽ നിന്ന് ശത്രുദോഷമുണ്ടാകും. വിനോദയാത്രകൾക്കായി പണം ചെലവഴിക്കും. സാമ്പത്തിക സ്ഥിതി മെച്ചപ്പെടും. വിദേശപഠനത്തിന് സാദ്ധ്യത. ഭാഗ്യദിനം ശനി

തട്ടുകടയിൽ നിന്ന് ചായ കുടിച്ചത് തമിഴ് സൂപ്പർ താരങ്ങളായ രജനികാന്ത്,​ കമലഹാസനും. ഇവർക്കൊപ്പം മറ്റ് യുവ സൂപ്പർതാരങ്ങളായ വിജയ്യും അജിത്തുമുണ്ട്. ഈ ചിത്രങ്ങൾ ഇപ്പോൾ സോഷ്യൽ മീഡിയയിൽ വൈറലാണ്. ഒറ്റനോട്ടത്തിൽ ഒറിജിനലെന്ന് തോന്നിക്കുന്ന എ.ഐ ചിത്രങ്ങളാണ് പ്രചരിക്കുന്നത്. അജിത് ,​ രജനികാന്ത്,​ കമലഹാസൻ,​ വിക്രം,​ വിജയ്,​ സൂര്യ,​ ധനുഷ്,​ ശിവകാർത്തികേയൻ എന്നിവർ ഒരുമിക്കുന്ന എ.ഐ ചിത്രങ്ങളും ഉണ്ട്.

ഹൂഹു ക്രിയേഷൻസ്80 എന്ന ഇൻസ്റ്റഗ്രാം പേജാണ് ഈ എ.ഐ ചിത്രങ്ങൾ പങ്കുവച്ചത്. തമിഴ് ഹീറോസ് ടീം ഔട്ടിംഗ് എന്ന അടിക്കുറിപ്പോടയാണ് ചിത്രങ്ങൾ പങ്കുവച്ചിരിക്കുന്നത്. പുതിയ നാനോ ബനാന പ്രോ എ.ഐ എന്ന സങ്കേതിക വിദ്യ ഉപയോഗിച്ചാണ് ഈ ചിത്രങ്ങൾ നിർമ്മിച്ചിരിക്കുന്നത്.

കള്ളിമുണ്ടും ഷർട്ടും ധരിച്ച അജിത്തും രജനികാന്തും,​ ഇന്നർ ബനിയനും മുണ്ടും ധരിച്ച വിക്രം,​ തട്ടുകടയിൽ നിന്ന് പെറോട്ട കഴിച്ച് വർത്തമാനം പറയുന്ന സൂര്യ എന്നിവരെയും എ.ഐ ചിത്രങ്ങളിൽ കാണാം. കോഫീ ഷോപ്പിലിരിക്കുന്ന കാർത്തിയും രവി മോഹനും ജീവയും തുടങ്ങിയവരും പ്രേക്ഷകരെ അദ്ഭുതപ്പെടുത്തും. താരങ്ങളെ ഒറ്റഫ്രെയിമിൽ കണ്ടതിന്റെ ആഹ്ലാദം ആരാധകർ കമന്റുകളിലൂടെ പ്രകടിപ്പിക്കുന്നുണ്ട്. എ.ഐ സാങ്കേതിക വിദ്യയുടെ ഇത്തരം പോസീറ്റീവ് വശം അഭിനന്ദിക്കപ്പെടേണ്ടതുണ്ടെന്നാണ് ആരാധകർ പറയുന്നത്.

മിമിക്രി താരമായ സുനിൽരാജിന്റെ വെളിപ്പെടുത്തൽ വാസ്തവവിരുദ്ധമാണെന്ന് ചൂണ്ടിക്കാട്ടി ‘സുരേശന്റെയും സുമലതയുടെയും ഹൃദയഹാരിയായ പ്രണയകഥ’ സിനിമയുടെ നിർമാതാവായ അജിത് തലപ്പിള്ളി. സുനിൽ രാജ് പ്രവർത്തിച്ചത് ‘സജഷൻ സീനുകളിൽ’ മാത്രമാണെന്നും ഒരു സീനിൽ പോലും ചാക്കോച്ചന് പകരക്കാരനായില്ലെന്നും നിർമാതാവ് ഉറപ്പിച്ചു പറയുന്നു. ഒരു നടനോടും അണിയറപ്രവർത്തകരോടും ചെയ്യുന്ന അനീതിയാണിതെന്നും, വസ്തുത വ്യക്തമാക്കേണ്ടത് തന്റെ ഉത്തരവാദിത്തമാണെന്നും ഒരു സ്വകാര്യ മാധ്യമത്തോട് സംസാരിക്കവെ അജിത് തലാപ്പിള്ളി പറഞ്ഞു. സംഭവം വിവാദമായതോടെ സുനിൽ രാജ് സമൂഹമാധ്യമങ്ങളിൽ നിന്നും തന്റെ പോസ്റ്റ് പിൻവലിക്കുകയും വിശദീകരണ പങ്കുവയ്ക്കുകയും ചെയ്തിട്ടുണ്ട്.

‘‘ഇന്ന് രാവിലെ സുനിൽ രാജ് എന്ന വ്യക്തിയുടെ ഒരു ഫെയ്സ്ബുക്ക് പോസ്റ്റ് കാണാനിടയായി. ഞാൻ നിർമിച്ച ‘സുരേശന്റെയും സുമലതയുടെയും ഹൃദയഹാരിയായ പ്രണയകഥ’ എന്ന സിനിമയിൽ നടൻ കുഞ്ചാക്കോ ബോബന് പകരം ഇദ്ദേഹം ആണ് അഭിനയിച്ചത് എന്നാണ് അതിൽ എഴുതിയിരുന്നത്.  മാധ്യമങ്ങൾ അത് വാർത്തയാക്കുകയും ചെയ്തു.  സിനിമയുടെ നിർമാതാവ് എന്ന നിലയിൽ ഈ വാസ്തവവിരുദ്ധമായ കാര്യം എനിക്ക് കണ്ടില്ലെന്ന് നടിക്കാൻ കഴിയില്ല.  സുനിൽ രാജ് എന്ന വ്യക്തി ഞങ്ങളുടെ സിനിമയിൽ പ്രവർത്തിച്ചിട്ടുണ്ട് എന്നുള്ളത് ശരി തന്നെ പക്ഷേ അത് ചാക്കോച്ചന് പകരമല്ല മറിച്ച് എല്ലാ സിനിമകളിലും പ്രധാന താരത്തിന് ഡ്യൂപ്പിനെ ഉപയോഗിക്കുന്നത് പോലെ ചാക്കോച്ചന് വേണ്ടി പ്രവർത്തിച്ച ഡ്യൂപ്പ് ആണ് ഇദ്ദേഹം. 

ചാക്കോച്ചൻ ഞങ്ങൾക്ക് 7 ദിവസത്തെ ഡേറ്റ് തന്നിരുന്നു ആ ഏഴു ദിവസവും അദ്ദേഹം വന്നു അഭിനയിച്ചിരുന്നു. സീനുകൾ എല്ലാം ചാക്കോച്ചൻ തന്നെയാണ് ചെയ്തത്. സുനിൽ രാജ് പ്രവർത്തിച്ചത് സജഷൻ സീനുകളിൽ ചാക്കോച്ചൻ അവിടെ ഇരിക്കുന്നതുപോലെ തോന്നിക്കുന്ന സീനുകളിൽ മാത്രമാണ്. സജഷനിൽ ധരിച്ച കോസ്റ്റ്യൂമിലെ ചിത്രങ്ങളാണ് സുനിൽ പോസ്റ്റിനൊപ്പം പങ്കുവച്ചത്. അദ്ദേഹത്തിന് അതിനുള്ള വേതനം നൽകുകയും ചെയ്തു. അല്ലാതെ ഒരു സീനിൽ പോലും ചാക്കോച്ചന് പകരം സുനിൽ രാജ് അഭിനയിച്ചിട്ടില്ല. 

സുനിൽ രാജ് വാസ്തവവിരുദ്ധമായ ഈ പോസ്റ്റ് ഇട്ടതിന്റെ കാരണം എനിക്ക് മനസ്സിലാകുന്നില്ല. ചാക്കോച്ചനായി അഭിനയിച്ചത് ഞാൻ ആണെന്നു പറഞ്ഞ് ഒരാൾ വന്നാൽ അത് ചാക്കോച്ചനെ കളിയാക്കുന്നതുപോലെ അല്ലേ.  ഇദ്ദേഹം പറയുന്നത് ഒരിക്കലും നടക്കാത്ത കാര്യമാണ്. ഇത് ഈ സിനിമയുടെ അണിയറ പ്രവർത്തകരോടും ചാക്കോച്ചനോടും ചെയ്യുന്ന തെറ്റാണ്. നിർമാതാവ് എന്ന നിലയിൽ ഇത് വ്യക്തമാക്കേണ്ടത് എന്റെ ഉത്തരവാദിത്തമാണ്. അല്ലെങ്കിൽ ഞങ്ങൾക്ക് സാമ്പത്തികമായി സഹായകമാകുന്ന രീതിയിൽ പോലും പ്രവർത്തിച്ച കുഞ്ചാക്കോ ബോബൻ എന്ന നടനോട് ചെയ്യുന്ന അനീതിയാകും അത്.’’– നിർമ്മാതാവ് അജിത് തലപ്പിള്ളി പറഞ്ഞു.

അതേസമയം രതീഷ് ബാലകൃഷ്ണ പൊതുവാൾ സംവിധാനം ചെയ്ത ‘സുരേശന്റെയും സുമലതയുടെയും ഹൃദയഹാരിയായ പ്രണയകഥ’യിൽ കുഞ്ചാക്കോ ബോബന്റെ ഡ്യൂപ്പ് ആയി ചില സീനുകളിൽ താൻ പ്രത്യക്ഷപ്പെട്ടിരുന്നുവെന്ന് സുനിൽരാജ് വെളിപ്പെടുത്തിയിരുന്നു. സെറ്റിൽ ചാക്കോച്ചന്റെ കഥാപാത്രത്തിന്റെ ഗെറ്റപ്പിലുള്ള ചിത്രങ്ങൾ പങ്കുവച്ചായിരുന്നു സുനിലിന്റെ വെളിപ്പെടുത്തൽ. പോസ്റ്റ് വൈറലായതോടെ ചാക്കോച്ചൻ ഈ സിനിമയിലേ അഭിനയിച്ചിരുന്നില്ലെന്ന തരത്തിൽ ചർച്ചകളായി.

മുഴുവന്‍സമയ രാഷ്ട്രീയത്തില്‍ ശ്രദ്ധകേന്ദ്രീകരിക്കുന്നതിനായി സിനിമയില്‍നിന്ന് വിട്ടുനില്‍ക്കുമെന്ന്‌ പ്രഖ്യാപിച്ച വിജയ്‌യുടെ അവസാനചിത്രമെന്ന് വിശേഷിപ്പിക്കപ്പെടുന്ന ‘ജനനായകന്‍’ ഓഡിയോ ലോഞ്ച് തീയതി പുറത്തുവിട്ടു. ഡിസംബര്‍ 27-നാണ് ഓഡിയോ ലോഞ്ച്. മലേഷ്യയിലെ ക്വലാലംപുര്‍ ബുകിറ്റ് ജലില്‍ സ്റ്റേഡിയത്തിലാണ് പരിപാടി നടക്കുക.അവസാനത്തേതെന്ന് വിശേഷിപ്പിക്കപ്പെടുന്ന ചിത്രമായിട്ടുകൂടി തമിഴ്‌നാട്ടില്‍ എവിടേയുമല്ല പരിപാടി നടത്തുന്നതെന്നത് ശ്രദ്ധേയമാണ്. ലോകത്തിന്റെ വിവിധഭാഗങ്ങളില്‍നിന്ന് വിജയ് ആരാധകര്‍ പരിപാടിക്ക് എത്തുമെന്നാണ് പ്രതീക്ഷിക്കപ്പെടുന്നത്. പരിപാടി അനൗണ്‍സ് ചെയ്തുകൊണ്ട് നിര്‍മാതാക്കള്‍ കഴിഞ്ഞദിവസം ഒരു വീഡിയോ പുറത്തുവിട്ടിരുന്നു.

വിജയ്‌യുടെ സിനിമാജീവിതത്തിലെ നിര്‍ണായക ചിത്രങ്ങളായ ഖുശി, ഗില്ലി, പോക്കിരി, വേട്ടൈക്കാരന്‍, തുപ്പാക്കി, തെരി, മെര്‍സല്‍, ബിഗില്‍, മാസ്റ്റര്‍, ലിയോ എന്നിവ പ്രതിപാദിക്കുന്നതാണ് കെവിഎന്‍ പ്രൊഡക്ഷന്‍സ് പുറത്തുവിട്ട വീഡിയോ. തങ്ങള്‍ക്ക് ആരായിരുന്നു വിജയ് എന്ന് മലേഷ്യയിലെ ആരാധകര്‍ തങ്ങളുടെ അനുഭവങ്ങളും വീഡിയോയില്‍ പങ്കുവെക്കുന്നു.

എച്ച്. വിനോദ് സംവിധാനം ചെയ്ത് കെവിഎന്‍ പ്രൊഡക്ഷന്‍സ് നിര്‍മ്മിക്കുന്ന ചിത്രത്തില്‍ വിജയ്ക്കൊപ്പം പൂജ ഹെഗ്‌ഡെ, തമിഴില്‍ അരങ്ങേറ്റം കുറിക്കുന്ന ബോബി ഡിയോള്‍, മമിത ബൈജു, ഗൗതം വാസുദേവ് മേനോന്‍, പ്രകാശ് രാജ്, നരേന്‍, പ്രിയാമണി എന്നിവരും പ്രധാന വേഷങ്ങളിലെത്തുന്നു.

അനിരുദ്ധാണ് സംഗീത സംവിധാനം നിര്‍വഹിക്കുന്നത്. ചിത്രം 2026 ജനുവരി ഒന്‍പതിന് തിയേറ്ററുകളിലെത്തും. വെങ്കട്ട് കെ. നാരായണ ആണ് കെ.വി.എന്‍. പ്രൊഡക്ഷന്റെ പേരില്‍ ജനനായകന്‍ നിര്‍മിക്കുന്നത്. ജഗദീഷ് പളനിസ്വാമിയും ലോഹിത് എന്‍.കെയുമാണ് സഹനിര്‍മാണം.

തെന്നിന്ത്യയുടെ പ്രിയപ്പെട്ട താരങ്ങളാണ് കമൽഹാസനും സുഹാസിനി മണിരത്നവും ഖുശ്ബുവും.  മൂവരും ഒന്നിച്ചുള്ള ചിത്രങ്ങളാണ് ഇപ്പോൾ ശ്രദ്ധ നേടുന്നത്. ഖുശ്ബുവാണ് ചിത്രങ്ങൾ സമൂഹമാധ്യമങ്ങളിൽ പങ്കുവച്ചത്.  ഗോവ അന്താരാഷ്‌ട്ര ചലച്ചിത്രോത്സവത്തിനിടെ പകർത്തിയതാണ് ചിത്രങ്ങൾ. 

“എന്റെ ബെസ്റ്റി സുഹാസിനിയ്ക്ക് ഒപ്പമുള്ള ഒരു സൂപ്പർ മാസ്റ്റർക്ലാസിന് ശേഷം ഐഎഫ്എഫ്ഐ ഗോവയിൽ വെച്ച്, സിനിമയുടെ എൻസൈക്ലോപീഡിയയായ അദ്ദേഹത്തിൽ നിന്ന് വീണ്ടും സിനിമയെക്കുറിച്ചുള്ള അനുഭവങ്ങളും അറിവുകളും പങ്കുവെക്കുമ്പോൾ, ഇതിലും മികച്ചൊരു പഠനാനുഭവം ഉണ്ടാകാനില്ല. ഏറ്റവും മഹാനായ കമൽഹാസൻ സാർ അദ്ദേഹത്തിന്റെ സ്വന്തം ചിന്തകൾ പങ്കുവെക്കുന്നു, ഞങ്ങൾ ആകാംക്ഷയുള്ള വിദ്യാർത്ഥികൾ കൂടുതൽ മെച്ചപ്പെടാൻ വേണ്ടി ആ അറിവ് ഗ്രഹിക്കുന്നു,” എന്നാണ് ഖുശ്ബു കുറിച്ചത്.

ചലച്ചിത്രോത്സവത്തിന്റെ ഭാഗമായി കല അക്കാദമിയില്‍ സംഘടിപ്പിച്ച അഭിനയ ശില്പ ശാലയില്‍ ഖുശ്ബുവും സുഹാസിനിയും പ്രേക്ഷകരോട് സംവദിച്ചു. ചിന്നത്തമ്പിയിലെ നീ എങ്കെ എന്‍ അന്‍പേ എന്ന ഗാനത്തിനൊപ്പം ഖുശ്ബുവും കണ്ണകിയായി എത്തി സുഹാസിനിയും അഭിനയത്തിന്റെ രണ്ട് വ്യത്യസ്ത തലങ്ങള്‍ ആസ്വാദകര്‍ക്കായി അവതരിപ്പിക്കുകയും ചെയ്തു

മതനിരപേക്ഷതയുമായി ബന്ധപ്പെട്ട് നടിയും അവതാരകയുമായ മീനാക്ഷി അനൂപ് നടത്തിയ പ്രതികരണത്തെ പ്രശംസിച്ച് മുന്‍മന്ത്രിയും എംഎല്‍എയുമായ കെ.കെ ശൈലജ. ”മത’മിളകില്ല തനിക്കെന്ന് ഓരോ ആളിനും ഉറപ്പാക്കാനായാല്‍ തനിയെ നടപ്പായിക്കോളും ‘മതനിരപേക്ഷത’യെന്നാണെന്റെ ‘മതം’- എന്ന മീനാക്ഷിയുടെ ഫെയ്സ്ബുക്ക് പോസ്റ്റ് വലിയ ചര്‍ച്ചയായിരുന്നു.

ഈ പോസ്റ്റിനെ പ്രശംസിച്ചു കൊണ്ടാണ് മന്ത്രിയുടെ പ്രശംസ. ”പുതിയ തലമുറ മനുഷ്യത്വത്തിന്റെ മഹത്വം മനസിലാക്കുന്നവരാണ് എന്ന് കാണുന്നതില്‍ ആശ്വാസവും അഭിമാനവും തോന്നുന്നു. മീനാക്ഷിക്കുട്ടിക്ക് അഭിനന്ദനങ്ങള്‍” എന്നാണ് കെ.കെ ശൈലജയുടെ ഫെയ്സ്ബുക്ക് കുറിപ്പ്.

”മത മതിലുകള്‍ക്കപ്പുറമാണ്. മതനിരപേക്ഷത. ചോദ്യം: നമ്മുടെ നാട്ടില്‍ മതനിരപേക്ഷതയെന്നത് പൂര്‍ണ്ണമായ അര്‍ഥത്തില്‍ സാദ്ധ്യമാണോ. വളരെ വലിയ അര്‍ഥതലങ്ങളുള്ള വിഷയമാണ് എന്റെ അറിവിന്റെ പരിമിതിയില്‍, ചെറിയ വാചകങ്ങളില്‍ ഉത്തരം. ‘മത’മിളകില്ല തനിക്കെന്ന് ഓരോ ആളിനും ഉറപ്പാക്കാനായാല്‍ തനിയെ നടപ്പായിക്കോളും ‘മതനിരപേക്ഷത’യെന്നാണെന്റെ ‘മതം” എന്നായിരുന്നു മീനാക്ഷിയുടെ ഫെയ്സ്ബുക്ക് പോസ്റ്റ്.

അതേസമയം, മീനാക്ഷിയുടെ മറ്റൊരു ഫെയ്‌സ്ബുക്ക് പോസ്റ്റിന് പ്രതികരണവുമായി മന്ത്രി വി ശിവന്‍കുട്ടിയും രംഗത്തെത്തിയിരുന്നു. പൊതു വിദ്യാഭ്യാസ മേഖലയില്‍ ഉണ്ടാകേണ്ട മാറ്റങ്ങളെ കുറിച്ചുള്ള മീനാക്ഷിയുടെ പോസ്റ്റിനാണ് മന്ത്രി മറുപടി നല്‍കിയത്. കുട്ടികള്‍ അറിഞ്ഞിരിക്കേണ്ട അടിസ്ഥാന വിവരങ്ങള്‍ എല്ലാം പരിഷ്‌കരിച്ച പാഠപുസ്തകങ്ങളില്‍ ചേര്‍ത്തിട്ടുണ്ട് എന്ന് മന്ത്രി വ്യക്തമാക്കിയിരുന്നു.