തിരുവനന്തപുരം: ലൈംഗികാരോപണത്തെ തുടർന്ന് രാജിവെച്ച അമ്മ ജനറൽ സെ​ക്രട്ടറി സിദ്ദിഖ് അക്രമിയാണെന്നും സിനിമയിൽ നിന്ന് വിലക്കണമെന്നും ആവശ്യപ്പെട്ട് നടി രേവതി സമ്പത്ത്. നടൻ റിയാസ് ഖാനും മോശമായി സംസാരിച്ചുവെന്നും ലൈംഗിക ചു​വയോടെ അശ്ലീല മെസ്സേജുകൾ അയച്ചുവെന്നും നടി വ്യക്തമാക്കി.

രാജിവൈകിയതിന് പിന്നിൽ ചില തന്ത്രങ്ങൾ ഉണ്ടെന്ന് സംശയിക്കുന്നു. സിദ്ദിഖ് നിഷ്കളങ്കനാണ് എന്ന് വരുത്തി തീർക്കാനുള്ള ശ്രമം. നിരവധി പേരുടെ സ്വപ്നങ്ങൾ ചവിട്ടി തകർത്ത് ഉണ്ടാക്കിയ പദവിയാണ് സിദ്ദിഖിന്റെത്. ഇനിയും അദ്ദേഹത്തിന് അവസരം നൽകാൻ ഇവിടെ ആളുണ്ട്. സുഹൃത്തുക്കളും മോശമായ അനുഭവം പങ്കുവെച്ചിട്ടുണ്ട്. തെളിവുകൾ സഹിതമാണ് പലരും സംസാരിച്ചതെന്നും നടി പറഞ്ഞു.

ഹേമ കമ്മിറ്റി റിപ്പോർട്ടിൻ്റെ കൂടെ ഭാഗമായാണ് ഇതുണ്ടായത്. ചവിട്ടി പുറത്താക്കേണ്ട ആളാണ്. നിയമപരമായി നീങ്ങാത്തത് ഭയം മൂലമല്ല. ഉറപ്പുകൾ പലപ്പോഴും വാക്കുകളിൽ മാത്രമാണെന്നും തനിക്ക് നഷ്ടപ്പെടാൻ ഒന്നുമില്ലെന്നും അവർ മാധ്യമങ്ങളോട് പറഞ്ഞു.

തിരുവനന്തപുരം: ​ലൈംഗികപീഡനാരോപണത്തെതുടർന്ന് ജനറൽ സെക്രട്ടറി രാജിവെച്ചതിന് പിന്നാലെ അടിയന്തര എക്സിക്യൂട്ടീവ്​ യോഗം വിളിച്ച് അമ്മ. ചൊവ്വാഴ്ചയാണ് അടിയന്തരയോഗം വിളിച്ചത്.

സിദ്ദിഖ് രാജിവെച്ചതിന് പിന്നാലെ ജോയിന്റ് സെക്രട്ടറി എന്നുള്ള നിലയ്ക്ക് പകരം ചുമതല നിർവഹിക്കുമെന്ന് ബാബുരാജ് അറിയിച്ചു. ബാക്കി കാര്യങ്ങൾ എക്സിക്യൂട്ടീവ് ചേർന്നതിനുശേഷം തീരുമാനിക്കും. വിവാദങ്ങളിൽ എക്‌സിക്യൂട്ടീവ് യോഗത്തിന് ശേഷം പ്രതികരിക്കാമെന്ന് ജഗദീഷ്.

യുവനടിക്കെതിരെ ലൈംഗികാതിക്രമം നടത്തിയെന്ന ആരോപണം നേരിട്ടതിന് പിന്നാലെയാണ് നടൻ സിദ്ദിഖ് അമ്മ ജനറൽ സെക്രട്ടറിപദവിയിൽ നിന്ന് രാജിവെച്ചത്. അമ്മ പ്രസിഡൻ്റ് മോഹൻലാലിനാണ് രാജിക്കത്തയച്ചത്.

‘എനിക്ക് എതിരെ വന്നുകൊണ്ടിരിക്കുന്ന ആരോപണങ്ങൾ താങ്കളുടെ ശ്രദ്ധയിൽ പെട്ടിരിക്കുമല്ലോ. ഈ സാഹചര്യത്തിൽ ‘അമ്മ’ യുടെ ജനറൽ സെക്രട്ടറി സ്ഥാനത്തു നിന്നും ഞാൻ സ്വമേധയാ രാജിവെക്കുന്നതായി താങ്കളെ അറിയിച്ചു കൊള്ളട്ടെ’ എന്നായിരുന്നു അമ്മ പ്രസിഡന്റ് മോഹൻലാലിന് നൽകിയ രാജിക്കത്തിൽ സിദ്ദിഖ് പറഞ്ഞത്.

ആരോപണം നേരിടുന്ന സിദ്ദിഖിന്റെ രാജി ആവശ്യപ്പെട്ട് അമ്മ അംഗങ്ങൾക്കും പ്രസിഡൻ്റ് മോഹൻലാലിനും നടൻ അനൂപ് ചന്ദ്രൻ കത്തയച്ചിരുന്നു. ഗുരുതരമായ ആരോപണം നേരിടുന്ന സിദ്ദീഖിന്റെ രാജി എഴുതി വാങ്ങണമെന്നാണ് കത്തിലെ ആവശ്യം.

സിദ്ദിഖിനെതിരെ ഗുരുതര ആരോപണവുമായി ഇന്നലെ യുവനടി രംഗത്തെത്തിയിരുന്നു. സിദ്ദിഖിൽ നിന്നും ലൈം​ഗികാതിക്രമം നേരിടേണ്ടി വന്നുവെന്നാണ് യുവനടിയുടെ വെളിപ്പെടുത്തൽ. ‘അമ്മ’ എന്ന സംഘടനയുടെ അധികാര കേന്ദ്രത്തിലിരിക്കുന്ന സിദ്ദിഖ് ക്രിമിനലാണെന്നും ഇപ്പോൾ കാണുന്ന മുഖമല്ല അയാളുടേതെന്നും നടി പറഞ്ഞു.

ഒരു സിനിമയുടെ പ്രിവ്യൂ ഷോയ്ക്കിടെ സിദ്ദിഖ് ലൈംഗികമായി അപമര്യാദയായി പെരുമാറാൻ ശ്രമിച്ചുവെന്നും വാക്കാലും ലൈംഗികാധിക്ഷേപം നടത്തിയെന്നായിരുന്നു നടി മാധ്യമങ്ങൾക്കു മുന്നിൽ വെളിപ്പെടുത്തിയത്. സിദ്ദിഖ് തന്റെ സമ്മതമില്ലാതെ ശരീരത്തിൽ സ്പർശിക്കുകയും ശാരീരികമായി ഉപദ്രവിക്കുകയും ചെയ്തതായും നടി പറഞ്ഞു.

നേരിടേണ്ടി വന്ന ദുരനുഭവം തുറന്നു പറഞ്ഞതിന് സിനിമാ മേഖലയിൽ നിന്നും തന്നെ മാറ്റി നിർത്തിയെന്നും സ്ഥിരം സംഭവമാണെന്ന നിലയിലായിരുന്നു എല്ലാവരുടേയും പ്രതികരണമെന്നും അവർ വെളിപ്പെടുത്തി. സിനിമാ മേഖലയിലെ ഉന്നതരായ വ്യക്തികളിൽ നിന്നും ഇത്തരത്തിലുള്ള മോശം അനുഭവമുണ്ടായതായി തന്റെ നിരവധി സുഹൃത്തുക്കൾ പറഞ്ഞിട്ടുണ്ടെന്നും യുവനടി കൂട്ടിച്ചേർത്തു.

നേരിടേണ്ടി വന്ന സംഭവങ്ങളെ കുറിച്ച് പരാതിപ്പെട്ടപ്പോൾ ഒരു സംവിധാനവും കൂടെയുണ്ടായിരുന്നില്ല. കുടുംബം മാത്രമാണ് കൂടെയുണ്ടായിരുന്നത്. 21ാം വയസിൽ നടന്ന സംഭവമുണ്ടാക്കിയ മാനസിക പ്രശ്നങ്ങൾ ഇപ്പോഴും മാറിയിട്ടില്ല. അവർ പറഞ്ഞു. സിദ്ദിഖിനെതിരെ സമാന ആരോപണങ്ങളുമായി ഇവർ 2019ലും രം​ഗത്തു വന്നിരുന്നു. തന്റെ ഫേസ്ബുക്ക് പേജിലൂടെയാണ് നടി അന്ന് ഇക്കാര്യം തുറന്നു പറഞ്ഞത്.

സിനിമയിലെ സ്ത്രീകൾ നേരിടുന്ന പ്രശ്നങ്ങളെ കുറിച്ച് പുറത്തുവന്ന ഹേമ കമ്മിറ്റി റിപ്പോർട്ടിൽ വലിയ പ്രതീക്ഷയുണ്ട്. റിപ്പോർട്ടിൽ ഇനിയെന്ത് തുടർനടപടി എന്നതാണ് കാര്യം. സർക്കാർ ഈ വിഷയത്തിൽ കൂടുതൽ പ്രാധാന്യം നൽകണമെന്നും യുവനടി ആവശ്യപ്പെട്ടിരുന്നു.

ലൈംഗിക പീഡനാരോപണം നേരിടുന്ന ചലച്ചിത്ര അക്കാദമി ചെയർമാനും സംവിധായകനുമായ രഞ്ജിത്ത് രാജിവെച്ചു. ബംഗാളി നടിയുടെ പരാതി പുറത്തുവന്നതിന് പിന്നാലെ രഞ്ജിത്തിനെതിരെ കനത്ത പ്രതിഷേധമാണുയർന്നത്. ഇതിനൊടുവിലാണ് ചലച്ചിത്ര അക്കാദമി ചെയർമാൻ പദവി രഞ്ജിത്ത് ഒഴിഞ്ഞത്. ലൈംഗികാരോപണത്തെ തുടർന്ന് ‘അമ്മ’ ജനറൽ സെക്രട്ടറി സ്ഥാനം നടൻ സിദ്ദിഖും രാജിവെച്ചിരുന്നു. ഇതിന് പിന്നാലെ രഞ്ജിത്തിന്റെ രാജിക്കായും വലിയ സമ്മർദമുണ്ടായി.

ഹേമ കമ്മിറ്റി റിപ്പോർട്ട് വന്നതിന് പിന്നാലെയാണ് രഞ്ജിത്തിനെതിരെ ലൈംഗികാതിക്രമ പരാതി ഉയർന്നത്. രഞ്ജിത്തിൻ്റെ രാജിക്കായി കടുത്ത സമ്മർദമാണ് എൽ.ഡി.എഫിലും സർക്കാരിലുമുണ്ടായിരുന്നത്. രാജിവെക്കുകയാണ് നല്ലതെന്ന് മുന്നണിയിൽ ഒരു വിഭാഗം നിലപാടെടുത്തു.

രഞ്ജിത്തിനെതിരെ ബംഗാളി നടി ഉയർത്തിയ ലൈംഗികാരോപണം കേരളത്തിന് അപമാനകരമായ സംഭവമാണെന്ന് സി.പി.ഐ നേതാവ് ആനി രാജ പറഞ്ഞിരുന്നു. രഞ്ജിത്തിനെ പദവിയിൽനിന്ന് മാറ്റിനിർത്തി സുതാര്യമായ അന്വേഷണം നടത്തണം. സർക്കാർ സ്വമേധയാ കേസെടുക്കണമെന്നും ആനി രാജ ആവശ്യപ്പെട്ടിരുന്നു.

പീഡന സംഭവങ്ങളിൽ രേഖാമൂലം പരാതി നൽകേണ്ടതില്ലെന്നും വിവരം കിട്ടിയാൽ കേസെടുത്ത് അന്വേഷിക്കാമെന്നും വനിതാ കമ്മീഷൻ അധ്യക്ഷ പി. സതീദേവിയും വ്യക്തമാക്കി. നിജസ്ഥിതി തെളിഞ്ഞാൽ എത്ര ഉന്നതനായാലും പുറത്താക്കണമെന്നും സർക്കാരിനോട് റിപ്പോർട്ട് തേടുമെന്നും അവർ പറഞ്ഞു.

രഞ്ജിത്തിനെതിരെ രൂക്ഷവിമർശനവുമായി കെ.പി.സി.സി പ്രസിഡന്റ് കെ.സുധാകരനും പ്രതിപക്ഷ നേതാവ് വി.ഡി സതീശനും രംഗത്തെത്തിയിരുന്നു. കേരളത്തിന്‌ ഈ അശ്ലീല ഭാരം ചുമക്കാൻ സൗകര്യമില്ലെന്നും ചെയർമാൻ സ്ഥാനം രാജിവച്ചില്ലെങ്കിൽ പ്രക്ഷോഭവുമായി ഇറങ്ങുമെന്നും കെ. സുധാകരൻ പറഞ്ഞു.

എന്നാൽ, സാംസ്കാരിക മന്ത്രി സജി ചെറിയാൻ രഞ്ജിത്തിനെ സംരക്ഷിക്കുന്ന നിലപാടാണ് ആദ്യം സ്വീകരിച്ചത്. രാജ്യത്തെ തന്നെ പ്രഗത്ഭനായ കലാകാരനാണ് അദ്ദേഹം. കേസിൽ അദ്ദേഹം നിരപരാധിയാണെങ്കിൽ എന്തു ചെയ്യും. പരാതി ലഭിച്ചാൽ കേസെടുത്ത് അന്വേഷിച്ചു വേണം കുറ്റക്കാരനാണോയെന്ന് അറിയാനെന്നുമായിരുന്നു സജി ചെറിയാന്റെ പ്രതികരണം. മന്ത്രിയുടെ നിലപാടിനെതിരെ കനത്ത ​പ്രതിഷേധമാണ് ഉയർന്നത്.

സംവിധായകൻ രഞ്ജിത്തിനെതിരെ നടപടി ആവശ്യപ്പെട്ട് സ്ത്രീപക്ഷ പ്രവർത്തകരും രംഗത്തെി. രഞ്ജിത്തിനെ ചലച്ചിത്ര അക്കാദമി ചെയർമാൻ സ്ഥാനത്തുനിന്ന് നീക്കണമെന്ന് പ്രവർത്തകർ ആവശ്യപ്പെട്ടു. സർക്കാർ അടിയന്തര നിയമനടപടി സ്വീകരിക്കണം. ഇല്ലെങ്കിൽ പ്രതിഷേധം കടുപ്പിക്കുമെന്നും സ്ത്രീപക്ഷ പ്രവർത്തകർ മുന്നറിയിപ്പ് നൽകിയിരുന്നു.

ചലച്ചിത്ര അക്കാദമി ചെയർമാന്‍ രഞ്ജിത്തിനെതിരായ ബംഗാളി നടിയുടെ ആരോപണത്തിൽ പൊലീസ് സ്വമേധയാ കേസെടുക്കില്ല. ഹേമ കമ്മിറ്റിയിൽ യൂത്ത് കോൺഗ്രസ് നൽകിയ പരാതിയിലും കേസെടുക്കില്ല. ആരോപണമുന്നയിച്ച സ്ത്രീ പരാതി നൽകണം അല്ലെങ്കിൽ സർക്കാർ നിർദേശം വരട്ടെയെന്നുമാണ് പൊലീസ് നിലപാട്. കേരളത്തിൽ വന്ന് ഒരു പരാതി നൽകാൻ ആരോപണമുന്നയിച്ച നടി തയ്യാറായിട്ടില്ല. അതിനാൽ തന്നെ തീരുമാനം സർക്കാരിന് വിട്ട സാഹചര്യമാണുള്ളത്. സംഭവവുമായി ബന്ധപ്പെട്ട് രണ്ട് പരാതികൾ നൽകിയത് മൂന്നാം കക്ഷികളാണ് എന്നതിനാൽ തന്നെ അതിൽ കേസെടുക്കേണ്ടെന്ന നിലപാടിലാണ് പൊലീസ്.

സിനിമയിലെ വിവേചനങ്ങളെയും സ്ത്രീകൾക്കെതിരായ അതിക്രമങ്ങളെയും മറ്റു കുറ്റകൃത്യങ്ങളെയും അക്കമിട്ട് നിരത്തിയ ഹേമ കമ്മിറ്റി റിപ്പോർട്ടിൽ പ്രതികരിച്ച് മുതിർന്ന നടി ഉർവശിയും. എക്സിക്യൂട്ടീവ് കമ്മിറ്റി ഉടൻ വിളിച്ചു ചേർക്കണമെന്നും വിഷയത്തിൽ നിന്ന് ഒഴിഞ്ഞുമാറി ആലോചിക്കാം എന്നൊക്കെ പറയുന്നതിനും പകരം ഇത്തരം പ്രശ്നങ്ങളിൽ അമ്മ സംഘടന വളരെ ശക്തമായി ഇടപെടേണ്ട സമയമാണിതെന്നും നടി ഓർമിപ്പിച്ചു.

മോശം കാര്യങ്ങൾ മാത്രം സംഭവിക്കുന്ന ഒരു മേഖല അല്ല സിനിമ. ഹേമ കമ്മിറ്റി റിപ്പോർട്ടിൽ ആരോപണമുന്നയിക്കുന്നത് സിനിമയിലെ പുരുഷന്മാർക്കെതിരെയാണെന്നും ഇത് സിനിമയിലെ എല്ലാ മേഖലയിലും ജോലി ചെയ്യുന്ന പുരുഷന്മാർക്ക് അപമാനം ആണെന്നും ഉർവശി ചൂണ്ടിക്കാട്ടി. വിഷയത്തിൽ മോശം അനുഭവം ഉണ്ടായ സ്ത്രീകളോടൊപ്പമാണ് താനെന്നും ഉർവശി വ്യക്തമാക്കി.

മറ്റേതൊരു മേഖലകളിലെയും പോലെ സിനിമാ മേഖലയിലും പ്രശ്നങ്ങൾ ഉണ്ടാകാം എന്നും അന്തസ്സോടെ സ്ത്രീകളും പുരുഷന്മാരും കൈകോർക്കുമ്പോളാണ് ഒരു നല്ല സിനിമ ഉടലെടുക്കുന്നത് എന്നും അവർ പറഞ്ഞു. ഈ മേഖലയിലും പ്രശ്നങ്ങൾ ഉണ്ടാകാം എന്നാൽ എല്ലാത്തിനും വ്യക്തമായ ഒരു വ്യവസ്ഥയുണ്ടാക്കണമെന്നും അമ്മ സംഘടനയാണ് ഇതിന് നടപടിയെടുക്കേണ്ടതെന്നും ഉർവശി ഓർമിപ്പിച്ചു.

അമ്മ എന്നത് ഒരു സംഘടന ആയതിനാൽ നിയമപരമായി മുന്നോട്ടു പോകാൻ കഴിയില്ലെന്ന് പറയുന്നതും എനിക്കൊന്നും സംഭവിച്ചിട്ടില്ല അതുകൊണ്ട് പ്രതികരിക്കുന്നില്ല എന്ന് അംഗങ്ങളുടെ നിലപാടുമല്ല വേണ്ടത്. അമ്മയുടെ ഓരോ അംഗങ്ങളും വിഷയത്തിൽ ഇടപെടണമെന്നും പരാതിയുള്ളവർ ഈ സമയത്ത് രംഗത്ത് വരണമെന്നും നടി ഓർമിപ്പിച്ചു. കമ്മീഷൻ റിപ്പോർട്ടിന് വലിയ വില കൊടുക്കണമെന്ന് ഓർമിപ്പിച്ച ഉർവശി ‘ഒരു കലാകാരനെ അകറ്റി നിർത്താൻ സംഘടനയ്ക്കു കഴിയുമെങ്കിൽ, സഹകരിപ്പിക്കില്ലെന്ന് പറയാൻ കഴിയുമെങ്കിൽ.. രക്ഷിക്കാൻ അറിയുന്നവരേ ശിക്ഷിക്കാവൂ’ എന്നും കൂട്ടിച്ചേർത്തു.

ഇത്രയും കാലം സിനിമയിൽ പ്രവർത്തിച്ചിട്ട് മോശമായ ഒരു അനുഭവം തനിക്കുണ്ടായിട്ടില്ലെന്ന് പറഞ്ഞാൽ അത് കള്ളമായിരിക്കും എന്നും തനിക്ക് ചോദിക്കാനും പറയാനും ആളുകൾ ഉണ്ടായിരുന്നു. തന്റെ കുടുംബവും ജീവനക്കാരും ഒന്നിച്ചുണ്ടായിരുന്നതിനാലാവാം തനിക്ക് ഇത്തരം അനുഭവങ്ങൾ ഉണ്ടാവാതിരുന്നത് എന്നും ഉർവശി പറഞ്ഞു. അതേസമയം താൽപര്യങ്ങൾക്ക് വഴങ്ങിയില്ലെങ്കിൽ ചിലർ റീ ടേക്ക്എടുപ്പിക്കും എന്നും അത്തരം അനുഭവം തനിക്കുണ്ടെന്നും നടി ച്ചു വ്യക്തമാക്കി. മരിച്ചുപോയവർ ആയതുകൊണ്ട് വിഷയത്തിൽ കൂടുതൽ പ്രതികരിക്കുന്നില്ലെന്നും ഉർവശി കൂട്ടിച്ചേർത്തു.

സംവിധായകനും കേരള ചലച്ചിത്ര അക്കാദമി ചെയർമാനുമായ രഞ്ജിത്തിനെതിരായ ബംഗാളി നടിയുടെ ആരോപണത്തെ തുടർന്ന് വിവിധ മേഖലകളിൽ നിന്നും സംവിധായകനെതിരെ കടുത്ത പ്രതിഷേധം. രഞ്ജിത്ത് താമസിക്കുന്ന വയനാട്ടിലെ റിസോർട്ടിലേക്ക് പ്രതിഷേധ മാർച്ചുമായി യൂത്ത് കോൺഗ്രസ് പ്രവർത്തകർ എത്തി. നടിയുടെ ആരോപണത്തിൽ സർക്കാരിന്റെ ഭാഗത്തുനിന്നും നിയമപരമായ നടപടികൾ ഉണ്ടാകണമെന്നും ചലച്ചിത്ര അക്കാദമി ചെയർമാൻ സ്ഥാനത്ത് നിന്നും രഞ്ജിത്ത് മാറിനിൽക്കണമെന്നും ആവശ്യപ്പെട്ടാണ് യൂത്ത് കോൺഗ്രസ് പ്രതിഷേധം

സംവിധായകനും കേരള ചലച്ചിത്ര അക്കാദമി ചെയർമാനുമായ രഞ്ജിത്തിനെതിരായ ബംഗാളി നടിയുടെ ആരോപണത്തിൽ കുറ്റാരോപിതന് പ്രതിരോധം തീർത്ത് സംസാരിച്ച സാംസ്കാരിക മന്ത്രി സജി ചെറിയാനെതിരെ രൂക്ഷ വിമർശനവുമായി യൂത്ത് കോൺഗ്രസ് സംസ്ഥാന അധ്യക്ഷൻ രാഹുൽ മാങ്കൂട്ടത്തിൽ. പരാതി കിട്ടിയാലേ കേസെടുക്കൂ എന്നു പറയാൻ സജി ചെറിയാന് എന്താണ് അവകാശം എന്നും, സജി ചെറിയാൻ കേരളത്തിന് സാംസ്കാരിക ബാധ്യതയാണെന്നും രാഹുൽ പരിഹസിച്ചു.

സജി ചെറിയാൻ പവർ ഗ്രൂപ്പിന്റെ മിനിസ്റ്റർ ആണ്. പരാതി ഇല്ലാതെ തന്നെ കേസ് എടുക്കാം എന്ന് ധനമന്ത്രി കെ എൻ ബാലഗോപാൽ പറഞ്ഞിരുന്നു. ആരോപണം തെളിഞ്ഞാൽ നടപടിയെടുക്കുമെന്ന് പറയുന്നുണ്ട്. കേസെടുക്കാതെ എങ്ങനെയാണ് നടപടിയുണ്ടാവുക. ആരോപണം തെളിയണമെങ്കിൽ അന്വേഷണം നടക്കണ്ടേയെന്നും രാഹുൽ മാങ്കൂട്ടത്തിൽ ചോദിച്ചു.

സംവിധായകനും കേരള ചലച്ചിത്ര അക്കാദമി ചെയർമാനുമായ രഞ്ജിത്തിനെതിരായ ആരോപണത്തിൽ ഉറച്ചു നിൽക്കുന്നുവെന്ന് ബംഗാളി നടി ശ്രീലേഖ മിത്ര. തെറ്റുപറ്റിയെന്ന് കുറ്റാരോപിതൻ സമ്മതിക്കണമെന്നാണ് ആഗ്രഹം. അതേസമയം ബംഗാളിൽ നിന്നുകൊണ്ട് കേസുമായി മുന്നോട്ടു പോകാൻ ബുദ്ധിമുട്ടുണ്ടെന്നും കേരളത്തിൽ നിന്നും ആരെങ്കിലും സഹായിച്ചാൽ നടപടിയുമായി മുന്നോട്ടു പോകുമെന്നും ശ്രീലേഖ മിത്ര പറഞ്ഞു.

കഴിഞ്ഞ ദിവസമാണ് സംവിധായകൻ രഞ്ജിത്തിനെതിരെ ഗുരുതരമായ ആരോപണവുമായി ബംഗാളി നടി രംഗത്തെത്തിയത്. രഞ്ജിത്തിന്റെ പാലേരിയിൽ മാണിക്യം എന്ന സിനിമയ്ക്കായി നടിയെ അഭിനയിക്കാൻ വിളിച്ചു വരുത്തുകയായിരുന്നു. വളകളിൽ തൊടുന്ന ഭാവത്തിൽ കൈയിൽ സ്പർശിച്ചതായും മുടിയിൽ തലോടിയതായും അവർ പറഞ്ഞു. കഴുത്തിൽ സ്പർശിക്കാൻ ശ്രമിച്ചതോടെ മുറിയിൽ നിന്നിറങ്ങി. ഇതേത്തുടർന്ന് സിനിമയിൽ അഭിനയിക്കാതെ പിറ്റേന്നു തന്നെ മടങ്ങി. ലൈംഗികമായി ഉപദ്രവിച്ചിട്ടില്ല. എന്നാൽ അതിലേക്കുള്ള സൂചനകൾ നൽകുന്നതായിരുന്നു രഞ്ജിത്തിന്റെ പെരുമാറ്റംഎന്നാണ് നടി വെളിപ്പെടുത്തിയത്.

ഹേമ കമ്മിറ്റി റിപ്പോർട്ടിനെ കുറിച്ചും സംവിധായകൻ രഞ്ജിത്തിനെതിരായ ബംഗാളി നടിയുടെ ആരോപണത്തിലെ സാംസ്കാരിക മന്ത്രിയുടെ നിലപാടിലും പ്രതികരിച്ച് സംവിധായകൻ ആഷിഖ് അബു. ഈ വിഷയം സംസാരിക്കാൻ സാമാന്യ ബുദ്ധിയുള്ള ആരെങ്കിലും വരണമെന്നും വേട്ടക്കാരന്റെ വിശദീകരണത്തിൽ മാത്രം ഒതുങ്ങിനിൽക്കുന്നതാണ് മന്ത്രിയുടെ പ്രതികരണം എന്നും ആഷിക് അബു വ്യക്തമാക്കി.

മന്ത്രി സജി ചെറിയാന് രാഷ്ട്രീയമായി യാതൊരു വിവരവും ഇല്ലെന്ന് അദ്ദേഹം തെളിയിക്കുകയാണെന്നും മന്ത്രിക്ക് ആവശ്യമായ ക്ലാസ് പാർട്ടി കൊടുക്കണമെന്നും സംവിധായകൻ പരിഹസിച്ചു. ആരോപണ വിധേയനായ രഞ്ജിത്തിനെ പദവിയിൽ നിന്നും മാറ്റി നിർത്തേണ്ടതാണെന്നും മന്ത്രിയെ തിരുത്താൻ പാർട്ടി തയ്യാറാറാവണമെന്നും സംവിധായകൻ പറഞ്ഞു. രഞ്ജിത്തിനെതിരായ നടിയുടെ പരാമർശം ആരോപണം അല്ലെന്നും വെളിപ്പെടുത്തൽ ആണെന്നും ആഷിഖ് അബു കൂട്ടിച്ചേർത്തു.

സാംസ്കാരിക മന്ത്രി പറയുന്നത് സാമാന്യ ബുദ്ധി വെച്ച് മനസ്സിലാകുന്നില്ല. സജി ചെറിയാൻ വലിയൊരു മുന്നേറ്റത്തിന് എതിരെ നിൽക്കുകയാണെന്നും ഹേമ കമ്മിറ്റി റിപ്പോർട്ട് പുറത്തുവന്നപ്പോൾ മുതൽ വിഷയത്തിൽ ഇടതുപക്ഷ മന്ത്രിമാർക്ക് ആശയക്കുഴപ്പമുണ്ടെന്നും ആഷിഖ് അബു കുറ്റപ്പെടുത്തി.

സിനിമാ വകുപ്പ് കൈകാര്യം ചെയ്യുന്ന മന്ത്രിയുടെ ഇതുവരെയുണ്ടായ പ്രസ്താവനകളൊന്നും ഇടതുപക്ഷത്തിന്റെ നയങ്ങളോട് ചേർന്നു നിൽക്കാത്തതാണ്. പരാതി ഉന്നയിച്ച സ്ത്രീയും ഒരു ഇടതു സഹയാത്രികയാണ്. പരാതിക്കാരിയുടെ പരാതിയെപറ്റി അന്വേഷിക്കാതെ വേട്ടക്കാരന്റെ വിശദീകരണത്തിൽ ഒതുങ്ങുകയാണ് മന്ത്രി.

സർക്കാറിന്റെ പ്രഖ്യാപിത നിലപാടല്ല സജി ചെറിയാനിലൂടെ പുറത്തുവരുന്നത്. സജി ചെറിയാൻ വിചാരിച്ചാൽ ആരെയും സംരക്ഷിക്കാൻ കഴിയില്ലെന്നും ഇങ്ങനെ പറയുന്നത് എന്തുകൊണ്ടാണെന്ന് താനും ആശ്ചര്യപ്പെടുകയാണെന്നും ഉടൻ വിഷയത്തിൽ ആവശ്യമായ തിരുത്തലുകൾ നടത്തുമെന്ന് പ്രതീക്ഷിക്കുന്നുവെന്നും ആഷിക് അബു പറഞ്ഞു.

ഹേമ കമ്മറ്റി റിപ്പോർട്ടുമായി ബന്ധപ്പെട്ട നടൻ ജഗദീഷിന്റെ വാക്കുകൾ പ്രതീക്ഷ നൽകുന്നതാണെന്നും സിദ്ദിഖ് നല്ല നടൻ ആണെന്നും, ഇന്നലെയും അദ്ദേഹം അഭിനയിക്കുന്നതായാണ് കണ്ടതെന്നും ആഷിഖ് കുറ്റപ്പെടുത്തി.