വയനാട്ടിലെ ദുരന്ത മേഖലയോട് ചേർന്ന മേഖലയിൽ വീടുകളിൽ കവ‍ർച്ച നടക്കുന്നതായുള്ള പരാതി ഉയർന്നതോടെ നടപടിയുമായി അധികൃതർ. ദുരന്ത ബാധിത പ്രദേശങ്ങളിൽ ബന്ധപ്പെട്ട ഉദ്യോഗസ്ഥരെന്നും സന്നദ്ധപ്രവർത്തകരെന്നും ചമഞ്ഞാണ് സംഘം കവർച്ച നടത്തുന്നത്. പലവീടുകളിൽ നിന്നും സ്വർണവും പണവും നഷ്ടമായിട്ടുണ്ട്. മൃതദേഹം ഉണ്ടോയെന്ന് പരിശോധിക്കാനായി ഒരു തകർന്ന വീടിലേക്ക് കയറി തിരിച്ചുവന്നപ്പോൾ രക്ഷാപ്രവർത്തകർക്ക് ആയുധങ്ങൾ നഷ്ടമായ ദുരനുഭവങ്ങൾ വരെയുണ്ട്.

അപകടം സംഭവിച്ചതറിഞ്ഞ് വീടുകളിൽ നിന്ന് ഇറങ്ങിയോടിയപ്പോൾ പലരും വീടുകൾ അടച്ചുപൂട്ടിയിരുന്നില്ല. ‘ഗൾഫ് നാടുകളിൽ അധ്വാനിച്ച് നേടിയ സമ്പാദ്യം കൊണ്ട് ഏലവും കാപ്പിയും അടക്കം കൃഷി ചെയ്യുന്ന സാമ്പത്തികമായി മെച്ചപ്പെട്ട നിലയിൽ ജീവിക്കുന്ന പലരും ഈ മേഖലയിൽ ഉണ്ടായിരുന്നു. അവരുടെയെല്ലാം വീടുകളിൽ സ്വർണവും പണവും സൂക്ഷിച്ചിരുന്നു. ഇതിനെക്കുറിച്ചൊന്നും ആലോചിക്കാതെയാണ് ദുരന്തം സംഭവിച്ചതറിഞ്ഞ് വീടുകൾ വിട്ട് പലരും ഓടിയത്. ജീവൻ മാത്രം കൈയ്യിൽ പിടിച്ചാണ് മിക്കവരും വീടുകളിൽ നിന്ന് ക്യാംപുകളിലേക്ക് മാറിയത്’- പ്രദേശവാസി മാധ്യമങ്ങളോട് പറഞ്ഞു.

അതേസമയം ആൾത്താമസം ഇല്ലെന്നു കരുതി കഴിഞ്ഞ ദിവസം രാത്രി വെള്ളരിമല വില്ലേജ് ഓഫിസിനു സമീപത്തെ വീടിന്റെ വാതിൽ തുറക്കാൻ ശ്രമം നടത്തിയിരുന്നു. വീട്ടുകാർ വന്നു തുറന്നപ്പോൾ അപരിചിതരായ രണ്ടു പേരെ കണ്ടു. എന്താണു മാറിത്താമസിക്കാത്തതെന്നു ചോദിക്കാൻ വില്ലേജ് ഓഫിസിൽനിന്നു വന്നതാണെന്നു പറഞ്ഞ് അവർ തടിതപ്പി. ഈ സംഭവം നടന്നതിന്റെ തൊട്ടടുത്ത ദിവസമാണു ചൂരൽമല ബെയ്‌ലി പാലത്തിനു സമീപമുള്ള ഇബ്രാഹിമിന്റെ വീടു കുത്തിത്തുറന്നു മോഷണം നടന്നത്. രേഖകളും കുറച്ചു പണവും നഷ്ടപ്പെട്ടു. സംഭവത്തിൽ പോലീസിൽ പരാതി നൽകിയിട്ടുണ്ട്.

ദുരന്തസ്ഥലത്തുനിന്നു ലഭിച്ച ആഭരണങ്ങളും വിലപിടിപ്പുള്ള വസ്തുക്കളും രേഖകളും സിവിൽ സ്റ്റേഷനിലോ കൺട്രോൾ റൂമിലോ ഏൽപിക്കണമെന്നു റവന്യുവകുപ്പ് പ്രിൻസിപ്പൽ സെക്രട്ടറി ടിങ്കു ബിസ്വാൾ അറിയിച്ചു. സന്നദ്ധസേവകർക്കു റജിസ്ട്രേഷനും നിർബന്ധമാക്കി. ഇന്നു രാവിലെ 6.30 മുതലാണു ചൂരൽമല കൺട്രോൾ റൂമിനു സമീപം റജിസ്ട്രേഷൻ കൗണ്ടർ പ്രവർത്തനം ആരംഭിച്ചത്.

സംഭവത്തെ തുടർന്നു പ്രദേശത്ത് പൊലീസിന്റെ രാത്രികാല പട്രോളിങ്ങ് ഏർപ്പെടുത്തി. ദുരന്തത്തിന് ഇരയായവരുടെ വീടുകളിലോ പ്രദേശത്തോ രാത്രിയിൽ അതിക്രമിച്ചു കടക്കുന്നവർക്കെതിരെ നടപടിയെടുക്കും. ഇവിടങ്ങളിലെ വീടുകളിലോ പ്രദേശങ്ങളിലോ രക്ഷാപ്രവർത്തനത്തിന്റെ പേരിലോ അല്ലാതയോ പൊലീസിന്റെ അനുവാദമില്ലാതെ രാത്രികാലങ്ങളിൽ ആരും പ്രവേശിക്കാൻ പാടില്ല.

ഒരു ദുരന്തമുഖത്ത് നിൽക്കുന്ന ജനതയ്ക്ക് എളുപ്പത്തിൽ ചെയ്തുകൊടുക്കാവുന്ന കാര്യങ്ങൾ ചെയ്തുനൽകി സുരക്ഷിതമായ ഒരിടത്തേക്ക് മാറി നിൽക്കാവുന്ന എല്ലാ ചോയ്‌സും ഉണ്ടായിരുന്നിട്ടും പ്രളയകാലത്ത് ആളായും പണമായും ബലമായും അവർക്കൊപ്പം നിന്ന ആളായിരുന്നു നടൻ ടോവിനോ തോമസ്. ആദ്യം കയ്യടിയായി തുടങ്ങിയെങ്കിലും പിന്നെ നടൻ നേരിട്ടത് സോഷ്യൽ മീഡിയ വഴിയുള്ള ക്രൂരമായ വിമർശങ്ങളും ഏറ്റവുമൊടുവിൽ ‘പ്രളയ സ്റ്റാർ’ എന്ന വേദനിപ്പിക്കുന്ന പട്ടവുമായിരുന്നു. സഹാനുഭൂതി ഉള്ളിൽ കരുതുന്ന ഏതൊരു മനുഷ്യനും ചെയ്യുന്ന കാര്യങ്ങളെ അന്ന് ടോവിനോയും ചെയ്തിരുന്നുന്നുള്ളൂ. എന്നിട്ടും മലയാളികളിൽ ചിലർ അദ്ദേഹത്തെ ക്രൂരമായി നോവിച്ചു. ടൊവീനോയുടെ സിനിമ ഇറങ്ങുന്ന സമയത്ത് മഴ പെയ്യും. അയാളൊരു ദുഃശകുനമാണ്, പ്രൊഷന്റെ ഭാഗമാണ് സന്നദ്ധ പ്രവർത്തനങ്ങൾ എന്നൊക്കെയുള്ള ക്രൂരമായ ട്രോളുകൾ വരെ അന്ന് വ്യാപകമായി വന്നിരുന്നു.

ഇപ്പോഴിതാ തിരിച്ചൊന്നും പ്രതീക്ഷിക്കാതെയുള്ള നടന്റെ മറ്റൊരു കരുതലാണ് വയനാട്ടിലെ ദുരന്തമുഖത്ത് നിന്നും കാണാൻ കഴിയുന്നത്. ശുചിത്വ മിഷൻ വയനാടിന്റെ ഒരു വലിയ നന്ദി ടൊവീനോയുടെ ഔദ്യോഗിക പേജിൽ പ്രത്യക്ഷപ്പെട്ടതോടെയാണ് അധികമാരും അറിയാതിരുന്ന നടന്റെ നല്ല പ്രവർത്തി ജനശ്രദ്ധയിലെത്തിയത്. “നിങ്ങൾ എത്തിച്ചു നൽകിയ പ്ലേറ്റുകൾക്കും ഗ്ലാസുകൾക്കും വയനാട് ശുചിത്വ മിഷന്റെ പേരിൽ വലിയ നന്ദി!” ഇങ്ങനെയായിരുന്നു ശുചിത്വ മിഷൻന്റെ കമന്റ്.

വയനാട്ടിലെ ദുരിതാശ്വാസ ക്യാംപുകളിൽ ഉപയോഗിക്കാൻ ആവശ്യമുള്ളത്രയും സ്റ്റീൽ പ്ലേറ്റുകളും ഗ്ലാസുകളും ടൊവീനോ അവിടെ എത്തിച്ചു നൽകിയത് അധികമാരും അറിഞ്ഞിരുന്നില്ല. കേൾക്കുമ്പോൾ ചെറുതെന്നു തോന്നുമെങ്കിലും ടൊവീനോ എന്ന താരത്തിന്റെ ദീർഘവീക്ഷണത്തോടെയുള്ള ഇടപെടൽ പരിസ്ഥിതിലോല പ്രദേശത്തു നടക്കുന്ന രക്ഷാപ്രവർത്തനത്തിന്റെ ഉള്ളറിയുന്നതാണ്. അവിടെയാണ് ടൊവീനോ തോമസ് എന്ന നടൻ ശരിക്കും താരമാകുന്നത്.

തിരുവനന്തപുരം: വയനാടിന്‍റെ പ്രശ്ന പരിഹാരത്തിന് ഒറ്റക്കെട്ടായ ഇടപെടൽ ഉണ്ടാകുമെന്ന് ധനമന്ത്രി കെ.എന്‍.ബാലഗോപാല്‍. എല്ലാം നഷ്ടപ്പെട്ട മനുഷ്യരാണ് ദുരന്ത ഭൂമിയിൽ അവശേഷിക്കുന്നത്. പുനരധിവാസത്തിന് സർക്കാർ ഒരുക്കുന്നത് ബൃഹദ്പദ്ധതിയാണ്. കാലാവസ്ഥക്ക് അനുയോജ്യമായ ടൗൺഷിപ്പ് ഒരുക്കും. വായ്പ അടക്കം ബാധ്യതകൾക്ക് സർക്കാർ ഇടപെടലുണ്ടാകും. ധനകാര്യ സ്ഥാപനങ്ങളുമായും എസ്എൽബിസിയും ഒക്കെയായി ചർച്ച ചെയ്യും. എല്ലാവരും അനുഭാവത്തോടെ വയനാടിന് ഒപ്പം നിൽക്കുമെന്ന് പ്രതീക്ഷിക്കുന്നുവെന്നും അദ്ദേഹം പറഞ്ഞു.

പുനരധിവാസം എത്രയും പെട്ടെന്ന് നടപ്പാക്കാനാണ് സർക്കാരിന്‍റെ ശ്രദ്ധ. ധനസഹായത്തിന് നിലവിൽ തന്നെ മാനദണ്ഡങ്ങളുണ്ട്. പ്രത്യേകം പദ്ധതികൾ രൂപീകരിച്ച് പോരായ്മകൾ പരിഹരിക്കും. കുട്ടികൾക്ക് പഠന സ്പോൺസർഷിപ്പിന് അടക്കം പലരും സമീപിക്കുന്നുണ്ട്. എന്തെല്ലാം തരത്തിലാണോ ഇടപെടേണ്ടത് അതെല്ലാം ഉണ്ടാകും. ദുരന്ത പുനരധിവാസത്തിന് പണം ഒരു തടസമേ ആകില്ല. എന്തെല്ലാം ബുദ്ധിമുട്ട് നേരിട്ടാലും ഇത്തരം കാര്യങ്ങൾക്ക് ഒരു തടസവും ഉണ്ടാകില്ലെന്നും അദ്ദേഹം പറഞ്ഞു.

വയനാട് ദുരന്ത ബാധിതരുടെ പുനരധിവാസത്തിന് രാഷ്ട്രീയം മറന്ന് ഒന്നിച്ച് ഇറങ്ങണമെന്നും ദുരന്തം ആവര്‍ത്തിക്കാതിരിക്കാൻ വിട്ടുവീഴ്ചയില്ലാത്ത നടപടിയുണ്ടാകണമെന്നും പ്രതിപക്ഷ നേതാവ് വിഡി സതീശൻ. നമ്മുടെ മുന്നില്‍ രാഷ്ട്രീയ പരിഗണനകളൊന്നുമില്ല. വേദന അനുഭവിക്കുന്ന സാധാരണക്കാരായവരുടെ മുഖം മാത്രമാണ് നമ്മുടെ മുന്നിലുള്ളതെന്ന് വിഡി സതീശൻ പറഞ്ഞു.

വലിയ ദുരന്തമാണിത്. ഇത് ഭാവിയില്‍ ആവര്‍ത്തിക്കാതിരിക്കാൻ എന്താണ് ചെയ്യേണ്ടതെന്ന് ആലോചിക്കണം. അതോടൊപ്പം ദുരന്തത്തില്‍പെട്ടവരെ ജീവിതത്തിലേക്ക് തിരിച്ചുകൊണ്ടുവരാൻ എന്തെല്ലാം ചെയ്യാമെന്ന് ആലോചിക്കണം. കാണാതായവരെ കണ്ടെത്തുന്നതിനാണ് ഇപ്പോള്‍ പ്രധാന്യം നല്‍കുന്നത്. രണ്ടാമത്തെ കാര്യം ക്യാമ്പുകളില്‍ ദീര്‍ഘകാലം കഴിയാനാകില്ല. വല്ലാത്ത ആഘാതത്തില്‍ കഴിയുന്നവരാണ് അവര്‍. അവര്‍ക്കാവശ്യമായ കൗണ്‍സിലിങ് ഇപ്പോള്‍ കൊടുക്കുന്നുണ്ട്. ആരോഗ്യപരമായ കാര്യങ്ങള്‍ ചെയ്തുകൊടുക്കണം. അതിനേക്കാള്‍ പ്രധാനം പുനരധിവാസമാണ്. ദുരന്ത സ്ഥലത്തേക്ക് വീണ്ടും അവരെ തിരിച്ചയക്കരുത്. വേറെ സ്ഥലം കണ്ടെത്തി അവിടെ അവര്‍ക്ക് ഒരു ടൗണ്‍ഷിപ്പ് നിര്‍മിച്ചുനല്‍കണം. കുട്ടികള്‍ക്ക് കളിക്കാനുള്ള സ്ഥലം അടക്കമുള്ള കാര്യങ്ങള്‍ ചെയ്യണം.

വീട് ഉണ്ടാക്കി നല്‍കിയാല്‍ മാത്രം പോര. പല കുടുംബങ്ങളുടെ ആശ്രയമായിരുന്ന അംഗങ്ങള്‍ വിട്ടുപോയി. തൊഴില്‍ നല്‍കണം. അവര്‍ക്ക് വരുമാന മാര്‍ഗം ഉണ്ടാക്കണം. ഏറ്റവും കൃത്യമായ പുനരധിവാസം നടപ്പാക്കണം. രാജ്യത്തിന് തന്നെ മാതൃകയായ ടൗണ്‍ഷിപ്പ് ഒരുക്കണം. കോണ്‍ഗ്രസ് നിര്‍മിച്ചു നല്‍കുന്ന 100 വീടുകള്‍ അത്തരത്തില്‍ നിര്‍മിച്ച് നല്‍കാനാണ് ആലോചിക്കുന്നത്. നഷ്ടമായ ഭൂമിക്ക് ആനുപാതികമായ നഷ്ടപരിഹാരം നല്‍കണം. ജീവിതസാഹചര്യം അവര്‍ക്ക് ഒരുക്കി നല്‍കണം.

ഇത്തരം കാര്യങ്ങള്‍ ആവര്‍ത്തിക്കാതിരിക്കാനുള്ള നടപടി സ്വീകരിക്കണം. കാലാവസ്ഥ വ്യതിയാനം മൂലം കേരളം അപകടത്തിലാണ്. ഏതുസമയത്തും മേഘവിസ്ഫോടനം ഉണ്ടാകാം. ഏതുസമയത്തും അപകടകരമായ മഴ പെയ്യാം. ഏതുസമയത്തും വേലിയേറ്റം ഉണ്ടാകാം. ഇതിനാല്‍ ഉരുള്‍പൊട്ടല്‍ സാധ്യതാ മേഖലയില്‍നിന്ന് ഉള്‍പ്പടെ ആളുകളെ മാറ്റിപാര്‍പ്പിക്കണം. പുനരധിവാസം നടക്കുന്നതിനൊപ്പം തന്നെ ദുരന്തം ആവര്‍ത്തിക്കാതിരിക്കാനുള്ള കാര്യങ്ങള്‍ കൃത്യമായി നടപ്പാക്കണം. ഒരു വിട്ടുവീഴ്ചയുമില്ലാതെ ഇക്കാര്യത്തില്‍ സര്‍ക്കാര്‍ നടപടിയെടുക്കണമെന്നും വിഡി സതീശൻ പറഞ്ഞു.

ദുരന്തം പറിച്ചെടുത്തു കൊണ്ടുപോയ ജീവനുകളെക്കാൾ എത്രയോ വലിയ വേദനയിലാണ് ദുരന്ത ഭൂമിയിൽ ശേഷിക്കുന്നവർ. അഞ്ചു ദിവസങ്ങൾക്കു മുൻപ് വരെ കൂടെ കഴിഞ്ഞവർ ഇപ്പോൾ എവിടെയുണ്ടെന്നോ, എങ്ങനെയവരെ ഇനി കണ്ടുപിടിക്കണമെന്നോ അറിയാതെ പകച്ചു നിൽക്കുന്ന ഒരു ജനതയെക്കാൾ കാഠിന്യമേറിയ ദുഃഖം പേറുന്നവർ മറ്റാരും തന്നെ ഇല്ലെന്ന് പറയാം.

പലരും വേദനകളുടെ ഉയർച്ച താഴ്ചകൾക്കപ്പുറം മരവിച്ച അവസ്ഥയിലാണ്. സ്വന്തമായി ഉണ്ടായിരുന്ന സർവവും മണ്ണിനടിയിൽ പുതഞ്ഞു പോയെന്നും പ്രിയപ്പെട്ടവരുടെ മൃതശരീരം എങ്കിലും കിട്ടണമെന്നും മാത്രമുള്ള ഏറ്റവും കുറഞ്ഞ ആശ വയ്ക്കുന്നവരായി അവർ മാറിക്കഴിഞ്ഞു. ക്യാമ്പിൽ തങ്ങളെ സന്ദർശിക്കാൻ വരുന്നവരോടും രക്ഷാപ്രവർത്തകരോടും കാണാതായ ഉറ്റവരെയും ഉടയവരെയും കുറിച്ച് തിരക്കുന്നവർക്കും കാര്യങ്ങൾ ചോദിച്ചറിയുന്നവർക്കും പുറമേ നഷ്ടപ്പെടലുകളിൽ ഹൃദയം മുറിഞ്ഞ മറ്റു ചില ജീവനുകളും ദുരന്ത ഭൂമിയിൽ ഉണ്ട്. ഒരു രാത്രി വെളുത്തപ്പോൾ തങ്ങൾക്ക് അന്നം തന്നിരുന്നവരെയും സ്വന്തമായി കരുതിയിരുന്നവരെയും നഷ്ടപ്പെട്ട മിണ്ടാപ്രാണികൾ.

മനുഷ്യരെ നഷ്ടപ്പെട്ട മനുഷ്യർ അനുഭവിക്കുന്ന വേദനകളുടെ അത്രയും വരില്ലല്ലോ!! ഇങ്ങനെ ചോദിക്കാൻ ദുരന്തഭൂമിയിലെത്തിയ ഒരു മനുഷ്യനും ഒരു പക്ഷെ സാധിക്കില്ല. അത്രയ്ക്കുണ്ട് ചില മിണ്ടാപ്രാണികൾക്ക് ചോറ് തന്ന മനുഷ്യരോടുള്ള കൂറ്.

ഉരുൾ പൊട്ടിയൊലിച്ചപ്പോൾ ബാക്കിയായ മിണ്ടാപ്രാണികളിൽ പലരും വെള്ളത്തിൽ മുങ്ങിയും താണും നീന്തി കരയ്ക്ക് അടുക്കുകയായിരുന്നു. എല്ലാം നഷ്ടപ്പെട്ടന്ന് നേരം വെളുക്കുമ്പോൾ മാത്രം മനസ്സിലാക്കിയവരായിരുന്നു മനുഷ്യരല്ലാത്ത ഇവർ. ദുരന്ത ഭൂപടം നോക്കി ഇതുവരെ എവിടെ ജീവിച്ചു എന്നോ, തന്റെ യജമാനന് എന്ത് സംഭവിച്ചു എന്നോ മനസിലാക്കാൻ കഴിയാതെ ആരോക്കെയൊ ഉറപ്പായും തിരിച്ചുവരുമെന്ന പ്രതീക്ഷയോടെ ദുരന്ത ഭൂമിയിൽ കാത്തിരിക്കുകയാണവർ.

നായകളിൽ പലതും ഭക്ഷണം പോലും കഴിക്കുന്നില്ല. കനത്ത മഴ പെയ്തൊലിക്കുമ്പോഴും ദുരന്ത ഭൂമിയിലെ കല്ലുകൾക്കിടയിലും മരക്കൊമ്പുകൾക്കിടയിലും തലയിട്ടും മണം പിടിച്ചും പ്രിയപ്പെട്ടവരെ തിരയുകയാണ് പലരും. അഞ്ചുദിവസം തുടർച്ചയായി ഉറക്കവും ഭക്ഷണവും ഹോമിച്ചുള്ള ഈ കാത്തിരിപ്പുകാരണം അറിയാതെ തളർന്നു വീഴുമ്പോഴും പ്രതീക്ഷയോടെ കണ്ണുവിടർത്തി നോക്കുന്ന നായകളുടെ ദൃശ്യങ്ങൾ ദുരന്തഭൂമിയിലെ ഹൃദയം മുറിക്കുന്ന കാഴ്ചയായി സാമൂഹ്യ മാധ്യമങ്ങളിലൂടെ നാം കണ്ടതാണ്. മണ്ണിൽ നിന്നും പുറത്തെത്തിക്കുന്ന ഓരോ മൃതദേഹവും തന്റെ ആരുടേതെങ്കിലും ആണോ എന്ന് അറിയാനുള്ള വേദന നിറഞ്ഞ കാത്തിരിപ്പിലാണ് ഉറങ്ങാതെ തളരാതെ അവർ.

മേപ്പാടി: വയനാട് മുണ്ടക്കൈ ഉരുൾപൊട്ടൽ ദുരന്തത്തിൽ മരിച്ചവരുടെ എണ്ണം 364ആയി. ദുരന്തം നടന്ന് അ‍ഞ്ചുനാൾ പിന്നിടുമ്പോൾ ഇപ്പോഴും 206 പേർ കാണാമറയത്താണ്. 218 മൃതദേഹങ്ങളും 143 ശരീര ഭാഗങ്ങളുമാണ് ഇതുവരെ കണ്ടെത്താനായത്. അഞ്ചാം ദിനമായ ഇന്നും തിരച്ചിൽ മികച്ച രീതിയിൽ പുരോ​ഗമിക്കുകയാണ്.

അതിനിടെ സൂചിപ്പാറയിൽ കുടുങ്ങിയ രക്ഷാപ്രവർത്തകരെ സൈന്യം എയർലിഫ്റ്റ് ചെയ്ത് ചൂരൽമലയിലെത്തിച്ചു. സന്നദ്ധസംഘടനയിലെ 3 പേരെയാണ് സൈന്യം രക്ഷപ്പെടുത്തിയത്. രക്ഷാപ്രവർത്തനത്തിനെത്തിയവർ ഉൾവനത്തിലുൾപ്പെടെ കുടുങ്ങുന്നത് കണക്കിലെടുത്ത് സൈന്യം മാത്രമായിരിക്കും ഇനി ഇവിടങ്ങളിൽ തിരച്ചിൽ നടത്തുക. നാട്ടുകാരുടെയും സന്നദ്ധപ്രവർത്തകരുടേയും സഹായം ഇനി മറ്റുള്ള പ്രദേശങ്ങളിൽ ഉപയോ​ഗപ്പെടുത്തും.

മലപ്പുറം: ചാലിയാർ പുഴയിൽനിന്ന് ഇന്നും മൃതദേഹവും ശരീരഭാഗവും കണ്ടെത്തി. മച്ചികൈ, ഇരുട്ടുകുത്തി, അംബുട്ടാൻ പെട്ടി, തൊടി മുട്ടി, നീർപ്പുഴ, മുക്കം ഭാഗങ്ങളിലായി നടത്തിയ തിരച്ചിലിലാണ് വീണ്ടും മൃതദേഹവും ശരീരഭാഗങ്ങളും കണ്ടെത്തിയത്. ഇന്ന് നിലമ്പൂർ ജില്ലാ ആശുപത്രിയിൽ എത്തിച്ചത് ആകെ 8 മൃതദേഹങ്ങളാണ്. 3 മൃതദേഹവും 5 ശരീരഭാഗങ്ങളുമുൾപ്പെടെയാണിത്. ഇതോടെ ഇവിടെയെത്തിച്ച ആകെ മൃതദേഹങ്ങൾ 197 ആയി. 70 മൃതദേഹങ്ങളും 127 ശരീരഭാഗങ്ങളുമാണ് ഇതിലുൾപ്പെടുന്നത്.

കഴിഞ്ഞ ദിവസങ്ങളിൽ ചാലിയാറിന്റെ സമീപത്തുള്ള ഉൾവനങ്ങളിൽ സന്നദ്ധപ്രവർത്തകർ ഉൾപ്പെടെ തിരച്ചിൽ നടത്തിയിരുന്നു. എന്നാൽ ഇന്നുമുതൽ സൈന്യം മാത്രമായിരിക്കും ഇവിടെ തിരച്ചിൽ നടത്തുക. കഴിഞ്ഞ ദിവസം ഇവിടെയെത്തിയ ര​ക്ഷാപ്രവർത്തകർ ഉൾവനത്തിൽ കുടുങ്ങിയ സാഹചര്യം കണക്കിലെടുത്താണ് മേഖലയിൽ സന്നദ്ധപ്രവർത്തകർക്കും പ്രദേശവാസികൾക്കും നിയന്ത്രണമേർപ്പെടുത്താൻ തീരുമാനിച്ചത്.

ഇനി ഇവരുടെ സേവനം ചാലിയാറിന്റെ താഴെയുള്ള പ്രദേശങ്ങളിൽ ലഭ്യമാക്കും. ഇവിടെനിന്ന് അവസാനത്തെ മൃതദേഹവും കണ്ടെത്തിയതിനു ശേഷം മാത്രമേ തിരച്ചിൽ അവസാനിപ്പിക്കുകയുള്ളൂവെന്ന് സ്ഥലം സന്ദർശിച്ചതിനുശേഷം മന്ത്രി പി. പ്രസാദ് പറഞ്ഞിരുന്നു.

വയനാട്ടിലുണ്ടായ ഉരുൾപൊട്ടൽ ദുരന്തിൽ അകപ്പെട്ട കുടുംബങ്ങൾക്കായി 100 വീടുകൾ നിർമിച്ച് നൽകുമെന്ന് കർണാടക മുഖ്യമന്ത്രി സിദ്ധാരാമയ്യ. ‘വയനാട്ടിലെ ഉരുൾപൊട്ടലിന്റെ പശ്ചാത്തലത്തിൽ കർണാടക കേരളത്തോട് ഐക്യദാർഢ്യം പ്രഖ്യാപിക്കുകയാണ്. ഞങ്ങളുടെ പിന്തുണ മുഖ്യമന്ത്രി പിണറായി വി​ജയനെ അറിയിക്കുകയും കർണാടക 100 വീടുകൾ ദുരന്തബാധിതർക്ക് നിർമിച്ച് നൽകുകയും ചെയ്യും. നമ്മൾ ഒരുമിച്ച് പുനർനിർമിക്കുകയും പ്രത്യാശ പുനഃസ്ഥാപിക്കുകയും ചെയ്യും’ -സിദ്ധരാമയ്യ ‘എക്സി’ൽ കുറിച്ചു.

കർണാടകയുടെ തീരുമാനത്തിന് പിന്നാലെ കോൺഗ്രസ് നേതാക്കളായ രാഹുൽ ഗാന്ധി, പ്രിയങ്ക ഗാന്ധി, കെ.സി. വേണുഗോപാൽ എന്നിവർ മുഖ്യമന്ത്രി സിദ്ധരാമയ്യക്ക് നന്ദി പറഞ്ഞു.

നേരത്തേ കർണാടക വയനാട്ടിലേക്ക് രക്ഷാദൗത്യ സംഘത്തെയടക്കം അയച്ചിട്ടുണ്ട്. ഇതിന്റെ ഭാഗമായി ബന്ദിപ്പൂർ വഴിയുള്ള രാത്രിയാത്രാ നിരോധനത്തിന് താൽക്കാലിക ഇളവും നൽകിയിരുന്നു. തമിഴ്നാടും വലിയ പിന്തുണ കേരളത്തെ അറിയിച്ചിട്ടുണ്ട്. കൂടാതെ അഞ്ച് കോടി രൂപ ദുരിതാശ്വാസ നിധിയിലേക്ക് നൽകുമെന്നും അറിയിച്ചിരുന്നു.