നടൻ വിജയിയുടെ രാഷ്ട്രീയ പാർട്ടി ടിവികെ (തമിഴക വെട്രി കഴകം)യ്ക്ക് തെരഞ്ഞെടുപ്പ് കമ്മീഷൻറെ അംഗീകാരം. ആദ്യ വാതിൽ തുറന്നെന്ന് വിജയ് പ്രതികരിച്ചു. ആദ്യ സമ്മേളനം ഉടൻ പ്രഖ്യാപിക്കുമെന്നും വിജയ് അറിയിച്ചു.

പാർട്ടിയുടെ ആദ്യ സമ്മേളനത്തിൽ കോൺഗ്രസ് നേതാവും പ്രതിപക്ഷ നേതാവുമായ രാഹുൽ ഗാന്ധിയെ പങ്കെടുപ്പിക്കാൻ നടൻ വിജയ് ശ്രമിക്കുന്നതായി നേരത്തെ സൂചനകൾ വന്നിരുന്നു. കോൺഗ്രസ് കേന്ദ്ര നേതൃത്വവുമായി നടൻ ഇക്കാര്യം ചർച്ച ചെയ്തെന്നാണ് റിപ്പോർട്ടുകൾ സൂചിപ്പിച്ചത്. മുഖ്യമന്ത്രിമാരായ പിണറായി വിജയൻ, രേവന്ത് റെഡ്ഡി, ചന്ദ്ര ബാബു നായിഡു, ഉപമുഖ്യമന്ത്രി ഡി കെ ശിവകുമാർ എന്നിവരെ പങ്കെടുപ്പിക്കാനും നീക്കമുണ്ട്.

മലയാളത്തിൽ ഇപ്പോൾ റീ റിലീസുകളുടെ കാലമാണ്. പുതിയ സാങ്കേതികത്തികവോടെ റീമാസ്റ്റർ ചെയ്ത് പുറത്തിറങ്ങുന്ന സിനിമകൾക്ക് വലിയ പ്രേക്ഷക സ്വീകാര്യതയാണ് ലഭിക്കുന്നത്. മോഹൻലാൽ ചിത്രങ്ങളായ ‘സ്‌ഫടികം’, ‘ദേവദൂതൻ’, ‘മണിച്ചിത്രത്താഴ്’ തുടങ്ങിയ സിനിമകൾ റീ റിലീസ് ചെയ്തപ്പോൾ ബോക്സ് ഓഫീസിൽ മികച്ച കളക്ഷനുണ്ടാക്കാൻ സാധിച്ചിരുന്നു. ഇപ്പോഴിതാ ഒരു മമ്മൂട്ടി ചിത്രം റീ റിലീസിന് തയ്യാറെടുക്കുകയാണ്. രഞ്ജിത്തിന്റെ സംവിധാനത്തിൽ 2009ൽ പുറത്തിറങ്ങിയ ‘പാലേരിമാണിക്യം- ഒരു പാതിരാകൊലപാതകത്തിന്റെ കഥ’ സെപ്റ്റംബർ 20 ന് വീണ്ടും പ്രേക്ഷകർക്ക് മുന്നിലെത്തും. പുതിയ ശബ്ദ സാങ്കേതിക മികവോടെ 4k അറ്റ്മോസിലാണ് ചിത്രം പ്രദർശനത്തിനെത്തുക.

നവംബറിൽ കൊച്ചിയിൽ നടത്താൻ നിശ്ചയിച്ച സിനിമാ കോൺക്ലേവ് നീട്ടുന്നത് പരിഗണനയിലാണെന്ന് സിനിമ നയരൂപവത്കരണസമിതി ചെയർമാൻ ഷാജി എൻ. കരുൺ. സർക്കാരിനെ ഇക്കാര്യം അറിയിച്ചു.
സർക്കാരുമായി ആലോചിച്ചേ അന്തിമതീരുമാനമെടുക്കൂ. നവംബറിൽ കേരളീയവും ഡിസംബറിൽ അന്താരാഷ്ട്ര ചലച്ചിത്രോത്സവവുമുള്ളതിനാലാണ് മാറ്റം ആലോചിക്കുന്നതെന്ന് ഷാജി എൻ. കരുൺ പറഞ്ഞു.

സിനിമാരംഗത്തെ എല്ലാ സംഘടനയുമായും ചർച്ചചെയ്ത് വിവരം ശേഖരിക്കുമെന്നും അദ്ദേഹം അറിയിച്ചു. കേരള ഫിലിം പ്രൊഡ്യൂസേഴ്സ് അസോസിയേഷനുമായും ഡിസ്ട്രിബ്യൂഷൻ അസോസിയേഷനുമായും സമിതി ശനിയാഴ്ച ചർച്ച നടത്തി. ചർച്ചകളിൽനിന്ന് ആരെയും മാറ്റിനിർത്തില്ലെന്ന് ചലച്ചിത്ര അക്കാദമി ആക്ടിങ് ചെയർമാൻ പ്രേംകുമാർ പറഞ്ഞു. ‘അമ്മ’ ഭാരവാഹികൾ ഉൾപ്പെടെ എല്ലാവരുമായും ചർച്ച നടത്തും. സമഗ്ര സിനിമാ നയം രൂപവത്കരിക്കാനാണ് ലക്ഷ്യമിടുന്നത്. സ്ത്രീ സൗഹൃദ തൊഴിലിടമായി സിനിമ മാറണമെന്നും പ്രേംകുമാർ പറഞ്ഞു.

സമിതി അംഗങ്ങളായ ബി. ഉണ്ണികൃഷ്ണൻ, നിഖില വിമൽ, ചലച്ചിത്ര അക്കാദമി സെക്രട്ടറി അജോയ് ചന്ദ്രൻ, സാംസ്കാരികക്ഷേമനിധി ബോർഡ് ചെയർമാൻ മധുപാൽ, പ്രൊഡ്യൂസേഴ്സ് അസോസിയേഷൻ സെക്രട്ടറി ബി. രാകേഷ്, വൈസ് പ്രസിഡന്റ് ജി. സുരേഷ്‌കുമാർ, ജോ.സെക്രട്ടറി സന്ദീപ് സേനൻ, ഡിസ്ട്രിബ്യൂട്ടേഴ്‌സ് അസോസിയേഷൻ ഭാരവാഹികളായ എം.എം. ഹംസ, എവർഷൈൻ മണി, നിർമാതാക്കളായ സാന്ദ്രാ തോമസ്, അനിൽ തോമസ്, ഔസേപ്പച്ചൻ വാളക്കുഴി, ഫിലിംചേംബർ ഐ.സി. മോണിറ്ററിങ് കമ്മറ്റിയംഗം റാണി ശരൺ തുടങ്ങിയവർ പങ്കെടുത്തു.

രൺബീർ കപൂറിന്റെ ‘അനിമൽ’ എന്ന ചിത്രത്തിലൂടെ ബി ടൗണിൽ മികച്ച തിരിച്ചു വരവ് നടത്തിയ നടനാണ് ബോബി ഡിയോൾ. ഇന്ന് വിജയത്തിളക്കത്തിൽ നിൽക്കുമ്പോൾ കഴിഞ്ഞു പോയ ഇരുണ്ട കാലഘട്ടത്തെയും അമിതമായ മദ്യപാന ആസക്തിയെയും കുറിച്ച് മനസു തുറന്നിരിക്കുകയാണ് ബോബി ഡിയോൾ. കഴിഞ്ഞ കാലഘട്ടത്തിൽ സംഭവിച്ച തെറ്റുകളിൽ പശ്ചാത്തപിച്ച ബോബി ഡിയോൾ ആ തെറ്റുകളിൽ നിന്ന് പഠിച്ചാണ് ഇന്നുള്ള വിജയവഴിയിലെത്തിയത് എന്നും വെളിപ്പെടുത്തി.

‘ആളുകൾ സ്വയം മുങ്ങി മരിക്കുന്നതുപോലെയാണ് മദ്യപാനം. അതിൽ നിന്ന് ആർക്കും ആരെയും കര കയറ്റാൻ സാധ്യമല്ല. അതിന് അവനവൻ തന്നെ വിചാരിക്കണം. ആരെങ്കിലും ഉപദേശിച്ചത് കൊണ്ട് ഒരിക്കലും ആ ശീലം മറികടക്കാനാവില്ല. സ്വയം മനസിനെ നിയന്ത്രിക്കാനും ആത്മവിശ്വാസവും ഉണ്ടെങ്കിൽ ആർക്കും ഇത് നീന്തി കടക്കാൻ സാധിക്കും.’ ബോബി ഡിയോൾ പറയുകയുണ്ടായി.

‘കുടുംബത്തിന്റെ കണ്ണിലെ ആശങ്കയാണ് തന്നെ മദ്യപാനത്തിൽ നിന്ന് പിന്തിരിപ്പിച്ചത്. ആശ്വാസ വാക്കുകൾ നൽകി നമുക്കൊപ്പം നിൽക്കാൻ മാത്രമേ അവർക്ക് സാധിക്കുകയുള്ളൂ. വളർന്നു വരുന്ന കുട്ടികൾക്ക് മുന്നിൽ ഒരിക്കലും ഒരു നെഗറ്റീവ് ഷെയ്ഡ് ഉണ്ടാകരുത് എന്ന തിരിച്ചറിവാണ് തന്നെ മദ്യപാനത്തിനെതിരെ പോരാടാൻ പ്രാപ്തനാക്കിയത്.’ ബോബി ഡിയോൾ മനസ് തുറന്നതിങ്ങനെ.

കാൽ നൂറ്റാണ്ടായി കൊച്ചിയിലെ സിനിമാവിതരണ രം​ഗത്ത് ശ്രദ്ധേയ സാന്നിധ്യമായിരുന്ന മെജോ (46) അന്തരിച്ചു. കഴിഞ്ഞ ദിവസം രാത്രി പെട്ടെന്നുണ്ടായ ദേഹാസ്വാസ്ഥ്യത്തെ തുടർന്നായിരുന്നു മരണം സംഭവിച്ചത്. ഇരിങ്ങാലക്കുട താഴേക്കാട് മാളിയേക്കൽ കുടുംബാംഗമായ മെജോയുടെ ഭാര്യ നീതു, മക്കൾ ഹമീൻ മെജോ, മിൻഹാ റോസ്.

കഴിഞ്ഞ 25 വർഷത്തിലധികമായി മലയാള സിനിമയിലെ പ്രമുഖ നിർമ്മാണ- വിതരണ കമ്പനികളിൽ ജോലി ചെയ്ത പ്രവർത്തി പരിചയമുള്ള വ്യക്തിയായിരുന്നു മെജോ. ശ്രീവാസ് ഫിലിംസിലെ ഫിലിം റെപ്രെസെന്ററ്റീവ് ആയി തന്റെ കരിയർ തുടങ്ങിയ മെജോ, ശേഷം മലയാള സിനിമയുടെ കൊച്ചി ഏരിയ വിതരണ രംഗത്തെ സ്ഥിരം സാന്നിധ്യമായി മാറി. ശ്രീവാസ് ഫിലിംസ്, ഇഫാർ മീഡിയ, സായൂജ്യം സിനി റിലീസ്, ക്യാപിറ്റൽ സിനിമാസ്, തമീൻസ് റിലീസ് എന്നിവയാണ് അദ്ദേഹം ജോലി ചെയ്തിട്ടുള്ള മറ്റു സിനിമാ നിർമാണ- വിതരണ കമ്പനികൾ. നിലവിൽ ഡ്രീം ബിഗ് ഫിലിംസിന്റെ എറണാകുളം ഏരിയ മാനേജരായി പ്രവർത്തിച്ചു വരികയായിരുന്നു മെജോ. സംസ്കാരചടങ്ങുകൾ തിങ്കളാഴ്ച രാവിലെ 10:30ന് താഴേക്കാട് സെൻറ്റ് സെബാസ്റ്റ്യൻ പളളിയിൽ നടക്കും

ബലാത്സംഗക്കേസില്‍ എം മുകേഷ് എംഎല്‍എയുടെ മുന്‍കൂര്‍ ജാമ്യം റദ്ദാക്കണമെന്ന് സര്‍ക്കാര്‍. മുന്‍കൂര്‍ ജാമ്യം നല്‍കിയ സെഷന്‍സ് കോടതി ഉത്തരവിനെതിരെ സർക്കാർ ഹൈക്കോടതിയില്‍ ഹര്‍ജി നല്‍കും. സെഷന്‍സ് കോടതി വിധിയിലെ പിഴവുകള്‍ ചൂണ്ടിക്കാട്ടിയാകും ഹര്‍ജി. എറണാകുളം പ്രിന്‍സിപ്പല്‍ സെഷന്‍സ് കോടതി ഉത്തരവ് വിചാരണയെ ബാധിക്കുമെന്നും അതിജീവിതയുടെ മൊഴിയെ അവിശ്വസിക്കുന്നതാണ് മുന്‍കൂര്‍ ജാമ്യ ഉത്തരവെന്നും ചൂണ്ടിക്കാട്ടിയാകും ഹൈക്കോടതിയെ സമീപിക്കുക. ഇക്കാര്യം ആവശ്യപ്പെട്ട് അന്വേഷണ സംഘം ഡയറക്ടര്‍ ജനറല്‍ ഓഫ് പ്രൊസിക്യൂഷന് കത്ത് നല്‍കിയതോടെയാണ് തീരുമാനം.

പതിനഞ്ച് വര്‍ഷം പഴക്കമുള്ള കേസെന്ന ലാഘവത്തോടെ കാണാനാകില്ലെന്നും വിശദമായ മുന്‍കൂര്‍ ജാമ്യ ഉത്തരവ് പരിധി വിട്ട ഉത്തരവെന്നും വിലയിരുത്തലിലാണ് സർക്കാർ നീക്കം. 19 പേജില്‍ കേസിലെ വസ്തുതകള്‍ വിശദമായി ചര്‍ച്ച ചെയ്യേണ്ടിയിരുന്നില്ല. കേസിന്റെ വിശദമായ വിലയിരുത്തല്‍ ഈ ഘട്ടത്തില്‍ അനിവാര്യമായിരുന്നില്ല എന്നീ കാര്യങ്ങൾ ചൂണ്ടിക്കാട്ടി പ്രൊസിക്യൂഷന്‍ ഹൈക്കോടതിയില്‍ ഹര്‍ജി നല്‍കും.

മലയാളത്തിലെ മിക്ക മുതിർന്ന താരങ്ങളുടെയും മക്കളെ മലയാളികൾക്ക് അറിയാം. സോഷ്യൽ മീഡിയയും മറ്റും അരങ്ങു വാഴുന്ന ഈ കാലത്ത് അത് വളരെ എളുപ്പമാണല്ലോ! എന്നാൽ മാതാപിതാക്കളുടെ പേരിലല്ലാതെ തന്റേതായ വ്യക്തിത്വത്തിന്റെ പേരിൽ എത്ര പേർ പ്രശസ്തരാണ് എന്നത് ചോദ്യചിഹ്നമാണ്. ഇവിടെയാണ് നടകൃഷ്ണകുമാറിന്റെ ഭാര്യയും മക്കളും അടങ്ങുന്ന കുടുംബം പ്രസക്തമാകുന്നത്.

കൃഷ്ണകുമാറിന്റെ നാല് പെൺമക്കളിൽ മൂത്ത ആളായ അഹാന കൃഷ്ണകുമാറിനെ മലയാളികൾക്ക് നന്നായി അറിയാം. സിനിമാ നടികൂടിയായ അഹാന ചെയ്ത കഥാപാത്രങ്ങളെല്ലാം തന്നെ പ്രേക്ഷകരുടെ മനസ്സിൽ തങ്ങിനിൽക്കുന്നവയായിരുന്നു. കഴിഞ്ഞദിവസമായിരുന്നു ആഹാനയുടെ സഹോദരിയും സോഷ്യൽ മീഡിയ ഇൻഫ്ലുൻസറും കൂടിയായ ദിയയുടെ വിവാഹം. സഹോദരിയുടെ വിവാഹ ദിവസം ഒരുങ്ങിയിറങ്ങിയ അഹാനയെ കണ്ടപ്പോൾ ശരിക്കും കല്യാണ പെണ്ണായി തോന്നിയത് താരത്തെയാണെന്ന് പലരും വ്യാപകമായി കമന്റും ചെയ്തിരുന്നു. ഇപ്പോഴിതാ ഇത്തരത്തിൽ ദിയയുടെ വിവാഹ ദിവസം എടുത്ത ഒരു ചിത്രമാണ് വൈറൽ ആയിരിക്കുന്നത്.

ഒരു വധുവിനെ പോലെ ഒരുങ്ങി സുഹൃത്തും ഛായാഗ്രഹനുമായ നിമിഷിനും മറ്റു രണ്ടു സുഹൃത്തുക്കൾക്കും ഒപ്പം എടുത്ത താരത്തിന്റെ ചിത്രം സോഷ്യൽ മീഡിയ നിവാസികൾ ഏറ്റെടുക്കുകയായിരുന്നു. ഛായാഗ്രഹകൻ നിമിഷമായി അഹാനയുടെ വിവാഹം നടന്നു എന്ന തരത്തിലായിരുന്നു പ്രചാരണം. ഇപ്പോഴിതാ വിഷയത്തിൽ വ്യക്തത വരുത്തി നിമിഷ് തന്നെ രംഗത്തെത്തിയിരിക്കുകയാണ്.

‘എന്റെ കല്യാണം കഴിഞ്ഞിട്ടില്ല. ആരുമായിട്ടും വിവാഹനിശ്ചയവും നടത്തിയിട്ടില്ല. ഇതെന്റെ അടുത്ത സുഹൃത്തിന്റെ അനിയത്തിയുടെ കല്യാണമായിരുന്നു. പറഞ്ഞുവെന്നേയുള്ളു…’ എന്നും നിമിഷ് പറയുന്നു. ചെറുപ്പം മുതല്‍ വളരെ അടുത്ത സുഹൃത്തുക്കളാണ് നിമിഷും അഹാനയും. ഇരുവരും ഒരുമിച്ച് ഷോര്‍ട്ട് ഫിലിമുകളും മ്യൂസിക് വീഡിയോസുമൊക്കെ ചെയ്യാറുണ്ട്. ഇതൊക്കെ സോഷ്യല്‍ മീഡിയയില്‍ വലിയ ഹിറ്റുമാണ്. അങ്ങനെ തുടങ്ങിയ സൗഹൃദം ഇപ്പോഴും തുടരുകയാണ്.