ടെഹ്റാൻ: അമേരിക്കയുമായുള്ള സമാധാന ചർച്ചകളിൽ ഇറാന്റെ നിലപാട് കൂടുതൽ കടുപ്പമുള്ളതാക്കുന്നതിൽ ഇസ്ലാമിക് റെവല്യൂഷണറി ഗാർഡ് കോർപ്സ് (IRGC) മേധാവി അഹ്മദ് വാഹിദിക്ക് നിർണായക സ്വാധീനമുണ്ടായിരുന്നുവെന്ന് അന്താരാഷ്ട്ര മാധ്യമ റിപ്പോർട്ട്.ചർച്ചകളിൽ അമേരിക്കയ്ക്ക് ഇളവുകൾ നൽകുന്നതിനെതിരെ ശക്തമായി വാദിച്ച വാഹിദി, സൈനിക സമ്മർദ്ദം തുടരണമെന്ന നിലപാടാണ് സ്വീകരിച്ചതെന്നാണ് റിപ്പോർട്ടിൽ പറയുന്നത്. ഇറാന്റെ രാഷ്ട്രീയ നേതൃത്വത്തിലെ ചിലർ ചർച്ചകൾ വേഗത്തിൽ പൂർത്തിയാക്കി മേഖലയിലെ സംഘർഷം അവസാനിപ്പിക്കണമെന്ന് ആഗ്രഹിച്ചിരുന്നുവെങ്കിലും IRGC നേതൃത്വം കൂടുതൽ കർക്കശമായ സമീപനമാണ് പിന്തുടർന്നതെന്നാണ് സൂചന.

ഇസ്രായേലിനെതിരായ മിസൈൽ ആക്രമണങ്ങൾ ഉൾപ്പെടെയുള്ള ചില നിർണായക തീരുമാനങ്ങളിലും വാഹിദിയുടെ സ്വാധീനം പ്രകടമായിരുന്നുവെന്നാണ് റിപ്പോർട്ടുകൾ. ഇത്തരത്തിലുള്ള നീക്കങ്ങൾ അമേരിക്കയുമായുള്ള ചർച്ചകളെ ബാധിക്കുമെന്ന ആശങ്ക വിദേശകാര്യ നേതൃത്വത്തിനുണ്ടായിരുന്നുവെന്നും അതേസമയം സൈനിക ശക്തി പ്രകടിപ്പിക്കേണ്ടത് അനിവാര്യമാണെന്ന നിലപാടാണ് IRGC മുന്നോട്ടുവെച്ചതെന്നും റിപ്പോർട്ടിൽ പറയുന്നു.ഇറാൻ പ്രസിഡന്റ് മസൂദ് പെസെഷ്കിയാനും വിദേശകാര്യ മന്ത്രി അബ്ബാസ് അറാഘ്ചിയും സമാധാന ധാരണയിലേക്ക് വേഗത്തിൽ നീങ്ങണമെന്ന് ആഗ്രഹിച്ചിരുന്നെങ്കിലും പല വിഷയങ്ങളിലും IRGCയുടെ നിലപാടിനാണ് മുൻതൂക്കം ലഭിച്ചതെന്നാണ് വിലയിരുത്തൽ.

1979-ൽ രൂപീകൃതമായ IRGCയുടെ സ്ഥാപക അംഗങ്ങളിൽ ഒരാളാണ് അഹ്മദ് വാഹിദി. സുരക്ഷാ-രഹസ്യാന്വേഷണ രംഗങ്ങളിൽ ദീർഘകാല പരിചയമുള്ള അദ്ദേഹം പിന്നീട് പ്രതിരോധ മന്ത്രിയായും ആഭ്യന്തര മന്ത്രിയായും സേവനമനുഷ്ഠിച്ചിട്ടുണ്ട്.നിലവിൽ അമേരിക്ക-ഇറാൻ ചർച്ചകൾ നിർണായക ഘട്ടത്തിലെത്തിയ സാഹചര്യത്തിൽ, ഭാവി തീരുമാനങ്ങളിൽ IRGC നേതൃത്വത്തിന്റെ സ്വാധീനം നിർണായകമാകുമെന്നാണ് നിരീക്ഷകർ വിലയിരുത്തുന്നത്.

മുംബൈ: ബാങ്കോക്കിൽ നിന്ന് മുംബൈയിലെത്തിയ യുവ മോഡൽ മയക്കുമരുന്ന് കടത്ത് കേസിൽ അറസ്റ്റിൽ. 11 കിലോഗ്രാമിലധികം ഹൈഡ്രോപോണിക് കഞ്ചാവ് കൈവശം വച്ചതിനാണ് 28-കാരിയായ ഹർഷ സണ്ണിയെ കസ്റ്റംസ് വകുപ്പ് പിടികൂടിയത്.ജൂൺ 10-11 രാത്രിയിലാണ് ഹർഷ സണ്ണി ബാങ്കോക്കിൽ നിന്ന് മുംബൈയിലെ ഛത്രപതി ശിവാജി മഹാരാജ് അന്താരാഷ്ട്ര വിമാനത്താവളത്തിലെത്തിയത്.

പരിശോധനയ്ക്കിടെ യുവതിയുടെ പെരുമാറ്റത്തിൽ സംശയം തോന്നിയ ഉദ്യോഗസ്ഥർ വിശദ പരിശോധന നടത്തുകയായിരുന്നു.ട്രോളി ബാഗിൽ നടത്തിയ പരിശോധനയിൽ വാക്വം പായ്ക്ക് ചെയ്ത 12 പൊതികളിലായി സൂക്ഷിച്ചിരുന്ന മയക്കുമരുന്ന് കണ്ടെത്തി. നടത്തിയ പ്രാഥമിക പരിശോധനയിൽ ഇത് ഉയർന്ന നിലവാരത്തിലുള്ള ഹൈഡ്രോപോണിക് കഞ്ചാവാണെന്ന് സ്ഥിരീകരിച്ചു.പിടിച്ചെടുത്ത മയക്കുമരുന്നിന് ഏകദേശം ₹11.82 കോടി രൂപ വിലമതിക്കുമെന്ന് അധികൃതർ അറിയിച്ചു.തുടർന്ന് എൻഡിപിഎസ് നിയമപ്രകാരം ഹർഷ സണ്ണിയെ അറസ്റ്റ് ചെയ്തു.മുൻ ‘മിസിസ് കേരള 2025’ മത്സരാർത്ഥിയായ ഹർഷ സണ്ണിയെ കോടതിയിൽ ഹാജരാക്കിയ ശേഷം ജുഡീഷ്യൽ കസ്റ്റഡിയിൽ വിട്ടു. മയക്കുമരുന്ന് ആരിലേക്ക് എത്തിക്കാനായിരുന്നു പദ്ധതിയെന്നത് ഉൾപ്പെടെ കൂടുതൽ വിവരങ്ങൾ അന്വേഷിച്ചുവരികയാണ്